Jeremiya 18
Gĩkĩ nĩkĩo kiugo kĩrĩa gĩakinyĩire Jeremiya kuuma kũrĩ Yahweh:
“Ũkĩra ũikũrũke ũthiĩ nyũmba-inĩ ya mũũmbi wa nyũngũ, na nĩ ngũtũma ũigue ciugo ciakwa ũrĩ kũu.”
Nĩ ũndũ ũcio, ngĩikũrũka ngĩthiĩ nyũmba-inĩ ya mũũmbi wa nyũngũ, na ngĩmũkora agĩthondeka nyũngũ
No nyũngũ ĩyo aathondekaga na rĩũmba ĩgĩthũka ĩrĩ guoko-inĩ gwake. Nĩ ũndũ ũcio akĩũmba nyũngũ ĩngĩ na rĩũmba rĩu, o ta ũrĩa oonire kwagĩrĩire.
Hĩndĩ ĩyo kiugo kĩa Yahweh gĩkĩnginyĩra ngĩrũo atĩrĩ:
“‘Inyuĩ andũ a nyũmba ya Isiraeli, githĩ to ndĩmwĩke o ta ũguo mũũmbi ũyũ wa nyũngũ eka?’ ũguo nĩguo Yahweh ekuuga.
Ingĩkaaria ũhoro wa kũmunya na kũmomora na kwananga rũrĩrĩ kana ũthamaki,
na rũrĩrĩ rũu rũtigane na waganu ũcio njarĩtie ũhoro waguo, o na niĩ nĩ ngaagarũrĩra meciria makwa ũhoro-inĩ wĩgiĩ thĩna ũrĩa bangĩte kũrehera rũrĩrĩ rũu
No ingĩkaaria ũhoro wĩgiĩ gwaka na kũhanda rũrĩrĩ kana ũthamaki,
na rũrĩrĩ rũu rwĩke maũndũ moru maitho-inĩ makwa na rwage gwathĩkĩra mũgambo wakwa, nĩ ngaagarũrĩra meciria makwa ũhoro-inĩ wĩgiĩ maũndũ mega marĩa bangĩte gwĩkĩra rũrĩrĩ rũu.’
“Rĩu-rĩ, ĩra andũ a Yahuda na aikari a Yahrushalayim atĩrĩ, ‘Ũũ nĩguo Yahweh oigĩte: “Nĩ ndĩrahaarĩria thĩna o na ngabanga ũrĩa ngũmũũkĩrĩra. Garũrũkai ndamũthaitha, mũtigane na njĩra cianyu njũru, na mũgarũrĩre njĩra cianyu o na mĩtugo yanyu.”’”
No o makiuga atĩrĩ: “Hatirĩ bata! Tondũ ithuĩ tũkũrũmĩrĩra meciria maitũ, na o ũmwe witũ egwĩka kũringana na ũremi wa ngoro yake njũru.”
Nĩ ũndũ ũcio, ũũ nĩguo Yahweh ekuuga: “Ta ũrĩrĩriai ũhoro gatagatĩ-inĩ ka ndũrĩrĩ. Nũũ ũrĩ waigua ũndũ ta ũyũ? Mũirĩtu gathirange wa Isiraeli nĩ ekĩte ũndũ mũũru mũno.
Hihi mbarabu ya Lebanoni nĩ ĩthiraga ndwaro-inĩ cia mahiga iria irĩ iharũrũka-inĩ ciayo? Kana hihi maĩ mahehu marĩa mathereraga kuuma kũndũ kũraya nĩ mahũaga?
No andũ akwa nĩ mariganĩirũo nĩ niĩ. Nĩ gũkorũo marutagĩra kĩndũ gĩtarĩ kĩene magongona, Na magatũma andũ mahĩngwo njĩra-inĩ ciao, njĩra-inĩ iria cia tene, Nĩguo mathiagĩre njĩra-inĩ cia mĩkĩra iria itarĩ nyoroku na itarĩ njaraganu,
Nĩguo matũme bũrũri wao ũtuĩke kĩndũ gĩa kũguoyohia Na kĩndũ gĩa gũtũũra kĩhuuhagĩrũo mĩrũri tene na tene. Mũndũ wothe ũkaahĩtũkagĩra kuo nĩ akeroragĩra amakĩte na akainia mũtwe.
O ta rũhuho rwa mwena wa irathĩro, nĩ ngaamahurunja mbere ya thũ. Mũthenya ũrĩa wa ũũru ngaamonia mũgongo wakwa, no ti ũthiũ wakwa.”
Nao makiuga atĩrĩ: “Ũkai, tũbange ũrĩa tũgũũkĩrĩra Jeremiya nĩ gũkorũo watho ndũgaathira harĩ athĩnjĩri-Yahweh aitũ, o na kana ũtaaro ũthire harĩ andũ arĩa ogĩ o na kana kiugo gĩthire harĩ anabii. Ũkai tũciire ũrĩa tũkũmũũkĩrĩra na tũtigathikĩrĩrie ũrĩa oigaga.”
Ndegera gũtũ, wee Yahweh, Na ũthikĩrĩrie ũrĩa andũ aya maranjũkĩrĩra maroiga.
Hihi wega nĩ wagĩrĩire kũrĩhwo na ũũru? Nĩ gũkorũo nĩ menjeire muoyo wakwa irima. Ta ririkana ũrĩa ndarũgamaga mbere yaku ngĩaria maũndũ mega mamakoniĩ, Nĩguo ngarũre mang’ũrĩ maku mameherere.
Nĩ ũndũ ũcio-rĩ, neana ariũ ao kũrĩ ng’aragu, Na ũmaneane kũrĩ hinya wa rũhiũ rwa njora. Aka ao marokuĩrũo nĩ ciana ciao na matuĩke atumia a ndigwa. Arũme ao nĩ moragwo nĩ mũrimũ wa kũrehe gĩkuũ, Nao ariũ ao moragĩrũo mbaara-inĩ na rũhiũ rwa njora.
Nĩ kũiguĩke kĩrĩro kuuma nyũmba-inĩ ciao Rĩrĩa ũkaamarehera atunyani o rĩmwe. Nĩ gũkorũo nĩ menjete irima rĩa kũndega Na makaigĩra magũrũ makwa mĩtego.
No wee Yahweh, Nĩ ũĩ wega njama ciao ciothe cia kũnjũkĩrĩra nĩguo manjũrage. Ndũkahumbĩre mahĩtia mao, Na ndũkahuure mehia mao mehere mbere yaku. Reke mahĩngwo marĩ mbere yaku Rĩrĩa ũkoya ikinya rĩa kũmokĩrĩra nĩ ũndũ wa marakara maku.