Jeremiya 19

Yahweh ooigire ũũ: “Thiĩ ũgũre ndigithũ ya rĩũmba harĩ mũũmbi wa nyũngũ. Woe athuri amwe a kĩrĩndĩ na athuri amwe kuuma harĩ athĩnjĩri-Yahweh,

mũthiĩ Mũkuru-inĩ wa Mũrũ wa Hinomu, itonyero-inĩ rĩa Kĩhingo kĩa Ngĩo. Na ũrĩ hau ũmenyithanie ciugo iria ngũkwĩra

Uuge atĩrĩ, ‘Iguai kiugo kĩa Yahweh inyuĩ athamaki a Yahuda na aikari a Yahrushalayim. Ũũ nĩguo Yahweh mũnene wa ita, o we Kĩhoti wa Isiraeli ekuuga:

Tondũ nĩ maandiganĩirie na magĩtũma kũndũ gũkũ kwage kũmenyeka. Thĩinĩ wakuo nĩ marutagĩra ihoti ingĩ magongona, iria o ene na maithe mao ma tene na athamaki a Yahuda mataamenyete, na nĩ maiyũrĩtie kũndũ gũkũ thakame ya andũ matarĩ na mahĩtia

Nĩ maakire kũndũ gũtũũgĩru kwa Baali nĩgetha macine ariũ ao na mwaki marĩ magongona magima ma njino kũrĩ Baali, ũndũ ũrĩa niĩ itaathanĩte kana ngaria ũhoro waguo na ũtarĩ o na watonya ngoro-inĩ yakwa.”’

“‘“Nĩ ũndũ ũcio, matukũ nĩ maroka,’ ũguo nĩguo Yahweh ekuuga, “rĩrĩa kũndũ gũkũ gũtagacoka gwĩtwo Tofethi kana Mũkuru wa Mũrũ wa Hinomu no gũgeetagwo Mũkuru wa Kũũraganĩrũo

Nĩ ngathararia mĩbango ya Yahuda na Yahrushalayim thĩinĩ wa kũndũ gũkũ, na nĩ ngaatũma moragwo na rũhiũ rwa njora mbere ya thũ ciao na moragwo nĩ guoko kwa arĩa maracaria ũrĩa mekũmaruta muoyo. Na nĩ ngaaneana ciimba ciao ituĩke irio cia nyoni cia rĩera-inĩ na cia nyamũ cia gũkũ thĩ

Na nĩ ngaatũma itũũra rĩrĩ rĩtuĩke kĩndũ gĩa kũguoyohia na kĩndũ gĩa kũhuuhagĩrũo mĩrũri. Mũndũ wothe ũkaahĩtũkagĩra kuo nĩ akeroragĩra amakĩte na akahuuha mĩrũri nĩ ũndũ wa mahũũra ma rĩo mothe

Na nĩ ngaatũma marĩe nyama cia ariũ ao na aarĩ ao, na o ũmwe wao nĩ akaarĩa nyama cia mũndũ ũrĩa ũngĩ, nĩ ũndũ wa kũrigicĩrio na nĩ ũndũ wa kũnyamarĩka rĩrĩa magaathiũrũrũkĩrio nĩ thũ ciao na arĩa maracaria ũrĩa mekũmaruta muoyo.”’

“Ũcoke ũũrage ndigithũ ĩyo athuri acio ũgũthiĩ nao makĩĩyonagĩra,

na ũmeere atĩrĩ, ‘Ũũ nĩguo Yahweh mũnene wa ita ekuuga: “Ũguo noguo ngaahehenja andũ aya o na itũũra rĩrĩ, ta ũrĩa mũndũ oragaga nyũngũ ya mũũmbi ũndũ ĩtangĩthondekwo rĩngĩ; na nĩ magaathika arĩa akuũ kũu Tofethi nginya kwage handũ hangĩ ha kũmathika.”’

“‘Ũguo nĩguo ngeeka kũndũ gũkũ,’ ũguo nĩguo Yahweh ekuuga, ‘o hamwe na aikari a kuo, nĩgetha ndũme itũũra rĩrĩ rĩhaane ta Tofethi

Nacio nyũmba cia Yahrushalayim na nyũmba cia athamaki a Yahuda igaakorũo na thahu ta kũndũ gũkũ gũgwĩtwo Tofethi, nyũmba ciothe iria maarutagĩra magongona igũrũ rĩacio nĩ ũndũ wa mbũtũ yothe ya igũrũ hamwe na kũrĩa maaitaga magongona ma ndibei nĩ ũndũ wa ihoti ingĩ.’”

Rĩrĩa Jeremiya aacokire kuuma Tofethi kũrĩa Yahweh aamũtũmĩte athiĩ akarathe ũhoro, aarũgamire nja ya nyũmba ya Yahweh akĩĩra andũ othe atĩrĩ:

“Ũũ nĩguo Yahweh mũnene wa ita, o we Kĩhoti wa Isiraeli ekuuga, ‘Nĩ ngũrehera itũũra rĩrĩ na taũni ciarĩo ciothe thĩna wothe ũrĩa njugĩte atĩ nĩ ngũrĩrehera, tondũ nĩ maaregire gwathĩkĩra ciugo ciakwa nĩ ũndũ wa ũremi.’”