Jeremiya 20

Na rĩrĩ, Pashuru mũrũ wa Imeri, ũrĩa mũthĩnjĩri-Yahweh, o we warĩ mũtongoria ũrĩa mũnene thĩinĩ wa nyũmba ya Yahweh, nĩ aathikagĩrĩria rĩrĩa Jeremiya aarathaga maũndũ macio

Nake Pashuru akĩhũũra Jeremiya ũcio mũnabii na akĩmũharũkia ndungu-inĩ iria ciarĩ Kĩhingo-inĩ kĩa Rũgongo kĩa Benjamini, kĩrĩa kĩarĩ nyũmba-inĩ ya Yahweh

No mũthenya ũyũ ũngĩ rĩrĩa Pashuru oohorire Jeremiya kuuma ndungu-inĩ icio, Jeremiya aamwĩrire ũũ:

Nĩ gũkorũo ũũ nĩguo Yahweh oigĩte, ‘Nĩ ngaatũma ũtuĩke kĩndũ gĩa kũrehe guoya harĩ wee mwene na harĩ arata aku othe, na nĩ makooragwo na rũhiũ rwa njora rwa thũ ciao ũkĩĩyonagĩra na maitho maku; na nĩ ngaaneana andũ othe a Yahuda moko-inĩ ma mũthamaki wa Babuloni, na nĩ akaamatwara ithamĩrio Babuloni na amorage na rũhiũ rwa njora

Na nĩ ngaaneana ũtonga wothe wa itũũra rĩrĩ, maciaro ma rĩo mothe, indo ciarĩo ciothe cia goro, na mĩthithũ yothe ya athamaki a Yahuda guoko-inĩ gwa thũ ciao. Nacio nĩ igaacitaha na icioe icitware Babuloni

Nawe Pashuru na andũ othe arĩa maikaraga nyũmba yaku-rĩ, nĩ mũgaatahwo. Ũgaatwarũo Babuloni na kũu nĩkuo ũgaakuĩra, na nokuo ũgaathikwo hamwe na arata aku othe, tondũ ũmarathĩire ũhoro wa maheeni.’”

Nĩ ũũheenereirie, wee Yahweh, na ngaheeneka. Nĩ wangĩririe hinya, na ũkĩhoota. Nduĩkĩte kĩndũ gĩa gũthekererũo mũthenya wothe; Andũ othe nĩ manyũrũragia.

Tondũ rĩrĩa rĩothe ngwaria, ndiagaga kwanĩrĩra na ngoiga atĩrĩ, “Maũndũ ma ũhinya na mwanangĩko!” Kiugo kĩa Yahweh nĩkĩo gĩtũmaga niĩ numwo na thekererũo mũthenya wothe.

Nĩ ũndũ ũcio ngiuga atĩrĩ: “Ndirĩmũgwetaga, Na ndikaaria rĩngĩ ngĩhũthĩra rĩĩtwa rĩake.” No ngoro-inĩ yakwa ũndũ ũcio watuĩkire ta mwaki wahingĩrĩirio mahĩndĩ-inĩ makwa, Na ngĩnoga kũũhingĩrĩria; Ndingĩahotire gũkirĩrĩria rĩngĩ.

Nĩ gũkorũo nĩ ndaiguire ndeto nyingĩ njũru cia mũhuhu; Ndarigicĩirio nĩ guoya. “Mũthitangei; nĩ tũmũthitange!” Mũndũ wothe ũrĩa wanyendagĩra thayũ eetagĩrĩra kuona ngĩgũa akoiga: “No gũkorũo nĩ egwĩka ihĩtia rĩa ũrimũ, Na ithuĩ tũhootane na twĩrĩhĩrie harĩ we.”

Ĩndĩ Yahweh aarĩ hamwe na niĩ atariĩ ta njamba ya ita ya gwĩtigĩrũo. Nĩkĩo arĩa manyariraga makaahĩngwo na matigaatooria. Nĩ magaaconorithio mũno, tondũ matikaagaacĩra. Gĩconoko kĩao gĩa tene na tene gĩtikaariganĩra.

No wee Yahweh mũnene wa ita, nĩ ũthuthuragia mũndũ ũrĩa mũthingu; Nĩ wonaga methugunda ma thĩinĩ biũ na ũkona ngoro. Reke nyone ũkĩndĩhĩria harĩ o, Tondũ wee nĩwe ndekereirie cira wakwa.

Inĩrai Yahweh! Goocai Yahweh! Tondũ nĩ ahonoketie ũrĩa mũthĩni kuuma guoko-inĩ kwa andũ arĩa mekaga maũndũ moru.

Mũthenya ũrĩa ndaciarirũo ũronyitwo nĩ kĩrumi! Mũthenya ũrĩa maitũ aanjiarire ũroaga kũrathimwo!

Mũndũ ũrĩa wareheire baba ũhoro mwega aronyitwo nĩ kĩrumi, o ũcio wamwĩrire atĩrĩ: “Nĩ ũciarĩirũo mwana wa kahĩĩ!” Agĩtũma akene mũno.

Mũndũ ũcio arohaana ta matũũra marĩa Yahweh aang’aũranirie na ndacoke kwĩricũkwo. Aroiguaga mũkayo rũcinĩ na akaigua mbu mũthenya gatagatĩ.

Nĩ kĩĩ gĩatũmire age kũnjũraga ndĩ thĩinĩ wa nda ya maitũ, Nĩgetha maitũ atuĩke mbĩrĩra yakwa Na aikarage hingo ciothe arĩ na nda?

Ndoimire thĩinĩ wa nda ya maitũ nĩkĩ Nyonage mathĩna na kĩeha, Namo matukũ makwa marĩkĩrĩre na gĩconoko?