Jeremiya 21

Jeremiya nĩ aamũkĩrire ũhoro kuuma kũrĩ Yahweh rĩrĩa Mũthamaki Zedekia aamũtũmĩire Pashuru mũrũ wa Malikiya marĩ na Zefania mũrũ wa Maaseia, ũrĩa mũthĩnjĩri-Yahweh, makĩmwĩra atĩrĩ:

“Tũtuĩrĩrie ũhoro harĩ Yahweh, tondũ Mũthamaki Nebukadineza wa Babuloni nĩ ararũa na ithuĩ. No gũkorũo Yahweh nĩ egwĩka ũndũ ũmwe wa mawĩra make ma magegania nĩ ũndũ witũ o ta ũrĩa anatwĩkĩra, nĩguo mũthamaki ũcio atweherere.”

Nake Jeremiya akĩmeera atĩrĩ: “Ũũ nĩguo mũkwĩra Zedekia,

‘Yahweh Kĩhoti wa Isiraeli oigĩte ũũ: “Nĩ ngaagarũra matharaita macio ma mbaara marĩ moko-inĩ manyu nĩguo mamũũkĩrĩre inyuĩ ene, o macio mũrahũthĩra kũrũa na mũthamaki wa Babuloni o na Akalidei acio marĩ nja ya rũthingo mamũrigicĩirie. Na nĩ ngaamacokanĩrĩria thĩinĩ wa itũũra rĩrĩ gatagatĩ

Na niĩ mwene nĩ ngaarũa na inyuĩ na guoko gũtambũrũkie o na guoko kũrĩ hinya ndĩ na marakara na mang’ũrĩ na mathũgũta manene

Nĩ ngaahũũra aikari a itũũra rĩrĩ, hũũre andũ o na nyamũ. Nĩ makooragwo nĩ mũrimũ mũũru mũno.”’

“‘“Na thutha ũcio,” ũguo nĩguo Yahweh ekuuga, “nĩ ngaaneana Mũthamaki Zedekia wa Yahuda na ndungata ciake o hamwe na andũ a itũũra rĩrĩ—arĩa makaahonoka mũrimũ ũcio mũũru, rũhiũ rwa njora, na ng’aragu—ndĩmaneane guoko-inĩ kwa Mũthamaki Nebukadineza wa Babuloni, ndĩmaneane guoko-inĩ gwa thũ ciao, o na guoko-inĩ kwa arĩa maracaria ũrĩa mekũmaruta muoyo. Nake nĩ akaamoraga na rũhiũ rwa njora. Ndakaaigua kĩeha nĩ ũndũ wao, o na ndakaamacaĩra kana amaiguĩre tha o na hanini.”’

“Nao andũ acio ũmeere atĩrĩ, ‘Ũũ nĩguo Yahweh oigĩte: “Nĩ ndaiga mbere yanyu njĩra ya muoyo o na njĩra ya gĩkuũ

Andũ arĩa megũtigwo thĩinĩ wa itũũra rĩrĩ nĩ makooragwo na rũhiũ rwa njora, moragwo nĩ ng’aragu o na mũrimũ mũũru. No mũndũ wothe ũkuuma thĩinĩ warĩo na eneane harĩ Akalidei acio mamũrigicĩirie nĩ agaathiĩ na mbere gũtũũra muoyo, na nĩ akenyitĩra muoyo wake ta arĩ kũũtaha aũtahĩte.”’

“‘“Nĩ gũkorũo nĩ njerekeirie ũthiũ wakwa itũũra-inĩ rĩrĩ nĩguo ndĩrĩrehere thĩna no ti maũndũ mega,” ũguo nĩguo Yahweh ekuuga. “Nĩ rĩkaaneanwo guoko-inĩ kwa mũthamaki wa Babuloni, nake nĩ akaarĩcina na mwaki.”

“‘Inyuĩ andũ a nyũmba ya Mũthamaki wa Yahuda: Iguai kiugo kĩa Yahweh

Inyuĩ andũ a nyũmba ya Daudi, ũũ nĩguo Yahweh ekuuga: “Rũmagiai itua rĩa cira rĩrũngĩrĩru o rũcinĩ, Na ũrĩa ũratunywo indo mũmũhonokagie kuuma guoko-inĩ kwa mũtunyani, Nĩgetha mang’ũrĩ makwa matikarĩrĩmbũke ta mwaki Na maakane gũtarĩ mũndũ ũngĩhota kũmahoria, Nĩ ũndũ wa ciĩko cianyu njũru.”’

“Nĩ ngũgũũkĩrĩra, wee ũikaraga mũkuru-inĩ, O wee rwaro rwa ihiga rwa kũndũ kwaraganu,’ ũguo nĩguo Yahweh ekuuga. ‘Na inyuĩ arĩa mũũragia atĩrĩ: “Nũũ ũgũikũrũka atũũkĩrĩre? Na nũũ ũgũtharĩkĩra ciikaro citũ?”

Nĩ ngaamũcirithia O ta ũrĩa ciĩko cianyu ciagĩrĩire,’ ũguo nĩguo Yahweh ekuuga. ‘Na nĩ ngaakia mwaki mũtitũ-inĩ wanyu, Naguo nĩ ũgaacina indo ciothe iria imũrigicĩirie ũciniine.’”