Jeremiya 24

Yahweh agĩcoka akĩnyonia ikabu igĩrĩ cia ngũyũ ciigĩtwo mbere ya hekarũ ya Yahweh, thutha wa Mũthamaki Nebukadineza wa Babuloni kuoya Jekonia mũrũ wa Jehoiakimu, mũthamaki wa Yahuda, o hamwe na anene a Yahuda, mabundi, na aturi a cuma na akĩmatwara ithamĩrio; aamarutire Yahrushalayim akĩmatwara Babuloni

Gĩkabu kĩmwe kĩarĩ na ngũyũ njega mũno, o ta ngũyũ iria ciambaga kwĩruha, no gĩkabu kĩu kĩngĩ kĩarĩ na ngũyũ njũru mũno, ciarĩ njũru ũũ atĩ itingĩarĩirũo.

Hĩndĩ ĩyo Yahweh akĩnjũria atĩrĩ: “Nĩ kĩĩ ũrona Jeremiya?” Na niĩ ngĩmũcokeria: “Nĩ ngũyũ; ngũyũ iria njega nĩ njega mũno, no iria njũru nĩ njũru mũno, nĩ njũru ũũ atĩ itingĩrĩo.”

Nakĩo kiugo kĩa Yahweh gĩkĩnginyĩra ngĩrũo atĩrĩ:

“Ũũ nĩguo Yahweh Kĩhoti wa Isiraeli ekuuga, ‘O ta ngũyũ ici njega, noguo ndĩrĩonaga na njĩra njega andũ a Yahuda arĩa matwarĩtwo ithamĩrio, o acio ndutĩte kũndũ gũkũ ngamatwara bũrũri wa Akalidei

Riitho rĩakwa rĩrĩikaraga rĩmarorete nĩguo mone maũndũ mega, na nĩ ngaatũma macoke bũrũri-inĩ ũyũ. Nĩ ngaamaaka, na ndikaamamomora; nĩ ngaamahanda, na ndikaamamunya

Na nĩ ngaamahe ngoro ya gũtũma maamenye, atĩ niĩ nĩ niĩ Yahweh. Nĩ magaatuĩka andũ akwa, na niĩ nĩ ngaatuĩka Kĩhoti wao, nĩ gũkorũo nĩ makaanjokerera na ngoro yao yothe.

“‘No ha ũhoro wĩgiĩ ngũyũ icio njũru, o icio njũru ũũ atĩ itingĩrĩo, ũũ nĩguo Yahweh ekuuga: “Ũguo noguo ngoona Mũthamaki Zedekia wa Yahuda, anene ake, matigari ma Yahrushalayim arĩa matigĩtwo bũrũri-inĩ ũyũ, o na arĩa maikaraga bũrũri-inĩ wa Misiri

Nĩ ngaamarehera thĩna ndũme matuĩke kĩndũ gĩa kũguoyohia harĩ mothamaki mothe ma thĩ, matuĩke kĩndũ gĩa kũnyũrũrio, magwetagwo na thimo, manyũrũragio, na matuĩke kĩndũ kĩrume kũndũ guothe kũrĩa ngaamahurunja

Na nĩ ngaamatũmĩra rũhiũ rwa njora, ng’aragu, na mũrimũ mũũru imokĩrĩre, o nginya mathire mehere bũrũri-inĩ ũrĩa ndamaheire na ngĩhe maithe mao ma tene.”’”