Jeremiya 26

Kĩambĩrĩria-inĩ kĩa wathani wa Jehoiakimu mũrũ wa Josia, mũthamaki wa Yahuda, kiugo kĩa Yahweh nĩ gĩakinyĩire Jeremiya akĩrũo ũũ:

“Yahweh oigĩte atĩrĩ, ‘Rũgama nja ya nyũmba ya Yahweh na warie igũrũ rĩgiĩ andũ othe a matũũra ma Yahuda arĩa mokaga gũthathaiya nyũmba-inĩ ya Yahweh. Ũmeere maũndũ mothe marĩa ngũgwatha; ndũgatigĩrĩre kiugo o na kĩmwe

No gũkorũo nĩ megũthikĩrĩria na o ũmwe wao atigane na njĩra yake njũru, na niĩ nĩ ngũcenjia meciria makwa igũrũ rĩgiĩ ũũru ũrĩa bangĩte kũmarehera nĩ ũndũ wa ciĩko ciao njũru

Ũmeere ũũ: “Yahweh oigĩte atĩrĩ, ‘Akorũo mũtigũũthikĩrĩria, mwage kũrũmĩrĩra Watho wakwa ũrĩa njigĩte mbere yanyu,

na mwage gũthikĩrĩria ciugo cia ndungata ciakwa anabii, arĩa ndĩmũtũmagĩra rĩngĩ na rĩngĩ, o acio mũtathikagĩrĩria,

nĩ ngaatũma nyũmba ĩno ĩhaane o ta Shilo, na ndũme itũũra rĩrĩ rĩtuĩke kĩndũ gĩa kũgwetagwo kĩrumi-inĩ nĩ ndũrĩrĩ ciothe cia thĩ.’”’”

Nao athĩnjĩri-Yahweh na anabii o na andũ arĩa angĩ othe makĩigua Jeremiya akĩaria ciugo icio thĩinĩ wa nyũmba ya Yahweh

Nĩ ũndũ ũcio, rĩrĩa Jeremiya aarĩkirie kwaria maũndũ marĩa mothe Yahweh aamwathĩte ere andũ acio othe, athĩnjĩri-Yahweh na anabii na andũ acio angĩ othe makĩmũnyita na makiuga atĩrĩ: “Wee no mũhaka ũkue

Nĩ kĩĩ gĩtũmĩte ũrathe ũhoro na rĩĩtwa rĩa Yahweh ũkoiga, ‘Nyũmba ĩno ĩkaahaana o ta Shilo, na itũũra rĩrĩ nĩ rĩkaanangwo na gũtigwo gũtarĩ na mũndũ wa gũikara kuo’?” Nao andũ othe makĩũngana makĩrigicĩria Jeremiya kũu nyũmba-inĩ ya Yahweh.

Rĩrĩa anene a Yahuda maaiguire ciugo icio, makĩambata kuuma nyũmba ya mũthamaki magĩthiĩ nyũmba-inĩ ya Yahweh na magĩikara thĩ mũromo-inĩ wa kĩhingo kĩrĩa kĩerũ kĩa Yahweh

Nao athĩnjĩri-Yahweh na anabii makĩĩra anene acio na andũ acio angĩ othe atĩrĩ: “Mũndũ ũyũ agĩrĩire kũũragwo, tondũ nĩ arathĩte ũhoro wa gũũkĩrĩra itũũra rĩrĩ o ta ũrĩa mweiguĩra na matũ manyu.”

Jeremiya agĩcoka akĩĩra anene othe na andũ acio angĩ othe ũũ: “Yahweh nĩwe ũndũmĩte njarie ciugo iria ciothe mweiguĩra ciĩgiĩ gũũkĩrĩrũo kwa nyũmba ĩno na itũũra rĩrĩ

Nĩ ũndũ ũcio-rĩ, garũrĩrai njĩra cianyu na ciĩko cianyu na mwathĩkĩre mũgambo wa Yahweh Kĩhoti wanyu, nake Yahweh nĩ egũcenjia meciria make igũrũ rĩgiĩ ũũru ũrĩa oigĩte nĩ ekũmũrehera

No niĩ-rĩ, ndĩ guoko-inĩ kwanyu. Njĩkai ũndũ ũrĩa mũkuona ũrĩ mwega na mwagĩrĩru maitho-inĩ manyu

Ĩndĩ mũmenye na ma atĩ mwanjũraga, nĩ mũgũtũma thakame ĩtarĩ na mahĩtia ĩmũcokerere na ĩcokerere itũũra rĩrĩ na aikari a rĩo, tondũ ũhoro wa ma nĩ atĩ Yahweh nĩwe ũndũmĩte kũrĩ inyuĩ njarie ciugo icio ciothe mũkĩĩiguagĩra.”

Hĩndĩ ĩyo anene na andũ acio angĩ othe makĩĩra athĩnjĩri-Yahweh na anabii atĩrĩ: “Mũndũ ũyũ ndagĩrĩire kũũragwo, tondũ atwarĩirie na rĩĩtwa rĩa Yahweh Kĩhoti witũ.”

Makĩria ma ũguo, athuri amwe a bũrũri magĩũkĩra na makĩambĩrĩria kwĩra kĩũngano kĩu gĩothe kĩa andũ atĩrĩ:

“Mika wa kuuma Moreshethu nĩ aarathire ũhoro matukũ-inĩ ma Mũthamaki Hezekia wa Yahuda, na akĩĩra andũ othe a Yahuda atĩrĩ, ‘Yahweh mũnene wa ita ekuuga ũũ: “Zayuni ĩkaarĩmwo o ta mũgũnda, Yahrushalayim ĩgaatuĩka hĩba cia mwanangĩko, Nakĩo kĩrĩma kĩa Nyũmba gĩkaahaana ta kũndũ gũtũũgĩru thĩinĩ wa mũtitũ.”’

“Mũthamaki Hezekia wa Yahuda na andũ othe a Yahuda-rĩ, hihi nĩ maamũũragire? Na githĩ ndeetigĩrire Yahweh na agĩthaitha Yahweh amũiguĩre tha, nake Yahweh agĩcenjia meciria make igũrũ rĩgiĩ ũũru ũrĩa ooigĩte nĩ ekũmarehera? Nĩ ũndũ ũcio, ithuĩ tũrĩ hakuhĩ kwĩreherera ũũru mũnene mũno.

Ningĩ nĩ kwarĩ mũndũ ũngĩ warathaga ũhoro na rĩĩtwa rĩa Yahweh, Uriya mũrũ wa Shemaia kuuma Kiriathu-jearimu, ũrĩa warathire ũhoro wa gũũkĩrĩrũo gwa itũũra rĩrĩ o na bũrũri ũyũ akĩhũthĩra ciugo o ta icio cia Jeremiya

Mũthamaki Jehoiakimu na arũme ake othe arĩa marĩ hinya na anene othe nĩ maaiguire ciugo ciake, na mũthamaki ũcio agĩcaria ũrĩa ekũmũũraga. Rĩrĩa Uriya aaiguire ũhoro ũcio, akĩnyitwo nĩ guoya o rĩmwe na akĩũrĩra Misiri

Nake Mũthamaki Jehoiakimu agĩtũma Elinathani mũrũ wa Akibori arĩ hamwe na arũme angĩ mathiĩ Misiri

Nao makĩruta Uriya Misiri makĩmũtwara kũrĩ Mũthamaki Jehoiakimu, nake akĩmũũraga na rũhiũ rwa njora na agĩikia kĩimba gĩake mbĩrĩra-inĩ ya andũ arĩa matarĩ igweta.

No Ahikamu mũrũ wa Shafani nĩ aateithĩrĩirie Jeremiya, na kwoguo akĩaga kũneanwo kũrĩ andũ nĩguo oragwo.