Jeremiya 35

Gĩkĩ nĩkĩo kiugo kĩrĩa gĩakinyĩire Jeremiya kuuma kũrĩ Yahweh matukũ-inĩ ma Jehoiakimu mũrũ wa Josia, mũthamaki wa Yahuda akĩrũo atĩrĩ:

“Thiĩ kũrĩ nyũmba ya Arekabu warie nao na ũmarehe nyũmba-inĩ ya Yahweh, ũmatonyie rumu-inĩ ĩmwe ya kũrĩĩra; ũcoke ũmahe ndibei manyue.”

Nĩ ũndũ ũcio, ngĩoya Jaazania mũrũ wa Jeremiya mũrũ wa Habazinia, ariũ a ithe, ariũ ake othe, na nyũmba yothe ya Arekabu

ngĩmatwara nyũmba-inĩ ya Yahweh. Ngĩmatonyia rumu-inĩ ya kũrĩĩra ya ariũ a Hanani mũrũ wa Igidalia, mũndũ wa Kĩhoti, ĩrĩa yariganĩtie na rumu ya kũrĩĩra ya anene ĩrĩa yarĩ igũrũ rĩa rumu ya kũrĩĩra ya Maaseia mũrũ wa Shalumu ũrĩa warĩ mũikaria wa mũrango.

Ngĩcoka ngĩiga mbakũri na ikombe ciyũire ndibei mbere ya andũ acio a nyũmba ya Arekabu ngĩmeera atĩrĩ: “Nyuai ndibei.”

Ĩndĩ o makiuga: “Tũtikũnyua ndibei, tondũ Jehonadabu mũrũ wa Rekabu ithe witũ wa tene nĩ aatũheire watho ũyũ, ‘Mũtikananyue ndibei inyuĩ ene o na kana ariũ anyu

Na mũtikanake nyũmba, kana mũhande mbeũ, o na kana mũhande kana mwĩgĩĩre na mũgũnda wa mĩthabibũ. Handũ ha ũguo-rĩ, mwagĩrĩirũo gũtũũra hema-inĩ hingo ciothe, nĩgetha mũtũũre ihinda iraya bũrũri-inĩ ũrĩa mũikaraga mũrĩ ageni.’

Na kwoguo tũthiaga na mbere gwathĩkĩra mũgambo wa Jehonadabu mũrũ wa Rekabu ithe witũ wa tene maũndũ-inĩ mothe marĩa aatwathire, na njĩra ya kwaga kũnyua ndibei o na hanini—ithuĩ, aka aitũ, ariũ aitũ, na aarĩ aitũ

Ningĩ tũtiakaga nyũmba cia gũikara, o na tũtikoragwo na mĩgũnda ya mĩthabibũ kana mĩgũnda kana mbeũ

Tũthiaga na mbere gũtũũra hema-inĩ na tũgathĩkĩra maũndũ marĩa mothe Jehonadabu ithe witũ wa tene aatwathire

No rĩrĩa Mũthamaki Nebukadineza wa Babuloni ookire gũũkĩrĩra bũrũri, twoigire atĩrĩ, ‘Ũkai tũthiĩ Yahrushalayim nĩguo tũũrĩre mbũtũ ya Akalidei na mbũtũ ya Asiria,’ na rĩu tũikaraga Yahrushalayim.”

Nakĩo kiugo kĩa Yahweh gĩgĩkinyĩra Jeremiya akĩrũo atĩrĩ:

“Ũũ nĩguo Yahweh mũnene wa ita, o we Kĩhoti wa Isiraeli ekuuga, ‘Thiĩ wĩre andũ a Yahuda na aikari a Yahrushalayim ũũ: “Na githĩ mũtieragwo rĩngĩ na rĩngĩ mwathĩkĩre ciugo ciakwa?” ũguo nĩguo Yahweh ekuuga

“Jehonadabu mũrũ wa Rekabu nĩ aathire andũ a rũciaro rwake matikananyue ndibei, na nĩ mathĩkĩire ciugo ciake na njĩra ya kwaga kũmĩnyua nginya ũmũthĩ ũyũ, na kwoguo magathĩkĩra watho wa ithe wao wa tene. No rĩrĩ, niĩ njaragia na inyuĩ rĩngĩ na rĩngĩ, no mũtinjathĩkagĩra

Ningĩ ndaikaraga ngĩtũmaga ndungata ciakwa ciothe anabii kũrĩ inyuĩ, ngamatũma rĩngĩ na rĩngĩ, ngoiga atĩrĩ, ‘Garũrũkai o ũmwe wanyu, mũtigane na njĩra cianyu njũru, na mwĩke maũndũ marĩa magĩrĩire! Mũtikarũmĩrĩre ihoti ingĩ kana mũcitungatĩre. Na nĩ mũgũthiĩ na mbere gũikara bũrũri-inĩ ũrĩa ndamũheire na ngĩhe maithe manyu ma tene.’ Ĩndĩ mũtiategire gũtũ kwanyu na mũtiathikĩrĩirie

Andũ a rũciaro rwa Jehonadabu mũrũ wa Rekabu nĩ mathĩkĩire watho ũrĩa ithe wao wa tene aamaheire, no andũ aya matithikagĩrĩria.”’”

“Nĩ ũndũ ũcio, ũũ nĩguo Yahweh Kĩhoti mũnene wa ita, o we Kĩhoti wa Isiraeli ekuuga: ‘Nĩ ngaarehithĩria Yahuda na aikari othe a Yahrushalayim ũũru wothe ũrĩa ndamerĩte nĩ ngaamarehera, tondũ nĩ njarĩtie nao, ĩndĩ makarega gũthikĩrĩria, na ndaikaraga ngĩmetaga, no makarega kũnjĩtĩka.’”

Nake Jeremiya akĩĩra andũ a nyũmba ya Arekabu atĩrĩ: “Ũũ nĩguo Yahweh mũnene wa ita, o we Kĩhoti wa Isiraeli ekuuga, ‘Tondũ nĩ mwathĩkĩire watho wa Jehonadabu ithe wanyu wa tene na no mũthiaga na mbere kũrũmĩrĩra mawatho make mothe, mũgeka o ta ũrĩa aamwathire-rĩ,

ũũ nĩguo Yahweh mũnene wa ita, o we Kĩhoti wa Isiraeli ekuuga: “Gũtirĩ hĩndĩ gũkaaga mũndũ wa rũciaro rwa Jehonadabu mũrũ wa Rekabu wa gũtungataga mbere yakwa.”’”