Jeremiya 37

Na rĩrĩ, Mũthamaki Zedekia mũrũ wa Josia akĩambĩrĩria gwathana ithenya rĩa Konia mũrũ wa Jehoiakimu, tondũ Mũthamaki Nebukadineza wa Babuloni nĩ aamũtuire mũthamaki bũrũri-inĩ wa Yahuda

Ĩndĩ we na ndungata ciake na andũ a bũrũri matiathikĩrĩirie ciugo iria Yahweh ooigĩte kũgerera mũnabii Jeremiya.

Nake Mũthamaki Zedekia agĩtũma Jehukali mũrũ wa Shelemia na Zefania mũrũ wa Maaseia ũrĩa mũthĩnjĩri-Yahweh mathiĩ kũrĩ Jeremiya ũcio mũnabii mamwĩre atĩrĩ: “Twagũthaitha ũtũhoere kũrĩ Yahweh Kĩhoti witũ.”

Jeremiya aathiaga gatagatĩ-inĩ ka andũ arĩ na wĩyathi tondũ hĩndĩ ĩyo matiamũikĩtie njera

Na rĩrĩ, mbũtũ ya Firauni nĩ yoimagarĩte kuuma Misiri, nao Akalidei arĩa maarigicĩirie Yahrushalayim makĩigua ũhoro wayo. Nĩ ũndũ ũcio makĩehera Yahrushalayim magĩtiga kũmĩũkĩrĩra

Nakĩo kiugo kĩa Yahweh gĩgĩkinyĩra mũnabii Jeremiya akĩrũo ũũ:

“Yahweh Kĩhoti wa Isiraeli oigĩte atĩrĩ, ‘Ũũ nĩguo wagĩrĩirũo kwĩra mũthamaki wa Yahuda, o ũcio ũgũtũmĩte kũrĩ niĩ ũtuĩrie ũhoro harĩ niĩ: “Atĩrĩrĩ, mbũtũ ya Firauni ĩyo ĩroka gũgũteithia nĩ ĩgaacoka kwao bũrũri-inĩ wa Misiri

Nao Akalidei nĩ magaacoka na marũe na itũũra rĩrĩ na marĩĩgwatĩre na marĩcine na mwaki.”

Ũũ nĩguo Yahweh ekuuga: “Mũtikeheenie muuge atĩrĩ, ‘Hatarĩ nganja Akalidei nĩ makehera matige gũtũũkĩrĩra,’ nĩ gũkorũo matikehera

O na mũngĩhũũra mbũtũ yothe ya Akalidei acio mararũa na inyuĩ gũtigare o andũ ao arĩa matihangĩtio, o na hĩndĩ ĩyo no marahũke kuuma hema-inĩ ciao na macine itũũra rĩrĩ na mwaki.”’”

Rĩrĩa mbũtũ ya Akalidei yeeherire ĩgĩtiga gũũkĩrĩra Yahrushalayim nĩ ũndũ wa mbũtũ ya Firauni,

Jeremiya akiuma Yahrushalayim agĩthiĩ bũrũri wa Benjamini nĩguo akaamũkĩre igai rĩake kũu gatagatĩ-inĩ ka andũ ao

No rĩrĩa aakinyire Kĩhingo-inĩ kĩa Benjamini, mũnene wa arangĩri ũrĩa wetagwo Iriya mũrũ wa Shelemia mũrũ wa Hanania, akĩnyita Jeremiya ũcio mũnabii akĩmwĩra atĩrĩ: “Wee nĩ gũthiĩ ũrathiĩ kwĩneana kũrĩ Akalidei!”

Nake Jeremiya akĩmwĩra atĩrĩ: “Aca ũguo tiguo kũrĩ! Niĩ ndirathiĩ kwĩneana kũrĩ Akalidei.” No ndaamũthikĩrĩirie. Nĩ ũndũ ũcio Iriya akĩnyita Jeremiya na akĩmũtwara kũrĩ anene

Nao anene acio makĩrakara mũno nĩ ũndũ wa Jeremiya, makĩmũhũũra na makĩmuoha nyũmba-inĩ ya Jehonathani ũrĩa mwandĩki, ĩrĩa yatuĩtwo njera

Jeremiya agĩikio njera, rumu-inĩ iria ciarĩ kũu rungu, na agĩikara kũu thikũ nyingĩ.

Nake Mũthamaki Zedekia akĩmũtũmanĩra, na mũthamaki akĩmũhoya ũhoro na hitho nyũmba-inĩ yake. Akĩmũũria atĩrĩ, “Hihi nĩ harĩ kiugo o gĩothe kiumĩte kũrĩ Yahweh?” Jeremiya akĩmwĩra, “Nĩ harĩ!” Agĩcoka akĩmwĩra, “Nĩ ũkaaneanwo guoko-inĩ kwa mũthamaki wa Babuloni!”

Ningĩ Jeremiya akĩĩra Mũthamaki Zedekia atĩrĩ: “Nĩ atĩa njĩkĩte ngakwĩhĩria o na ngehĩria ndungata ciaku na andũ aya, ũgatũma mũnjikie njera

Marĩ ha anabii anyu arĩa maamũrathĩire ũhoro makĩmwĩra, ‘Mũthamaki wa Babuloni ndakamũũkĩrĩra kana okĩrĩre bũrũri ũyũ’

Rĩu ta thikĩrĩria, wee mũthamaki mwathi wakwa. Ndakũhoya ũigue ihoya rĩakwa rĩa kwenda gwĩtĩkĩrĩka. Ndũkanjokie nyũmba-inĩ ya Jehonathani ũrĩa mwandĩki, nĩgetha ndigakuĩre kuo.”

Nĩ ũndũ ũcio Mũthamaki Zedekia agĩathana atĩ Jeremiya ahingĩrũo kũu Nja ya Arangĩri, na aaheagwo mũgate o mũthenya ũrutĩtwo barabara-inĩ ya arugi mĩgate nginya rĩrĩa mĩgate yothe ĩrĩa yarĩ itũũra-inĩ yathirire. Na Jeremiya agĩikara kũu Nja ya Arangĩri.