Jeremiya 38

Na rĩrĩ, Shefatia mũrũ wa Matani, Gedalia mũrũ wa Pashuru, Jukali mũrũ wa Shelemia, na Pashuru mũrũ wa Malikiya nĩ maaiguire ciugo iria Jeremiya eeraga andũ othe akoiga:

“Ũũ nĩguo Yahweh oigĩte, ‘Mũndũ ũrĩa ũgũtigwo thĩinĩ wa itũũra rĩrĩ nĩ akooragwo na rũhiũ rwa njora, oragwo nĩ ng’aragu, o na mũrimũ mũũru. No mũndũ ũrĩa ũkwĩneana kũrĩ Akalidei nĩ agaathiĩ na mbere gũtũũra muoyo, na nĩ akeenyitĩra muoyo wake ta arĩ kũũtaha aũtahĩte na atũũre

Yahweh oigĩte atĩrĩ, ‘Hatarĩ nganja itũũra rĩrĩ nĩ rĩkaaneanwo kũrĩ mbũtũ ya mũthamaki wa Babuloni, nake nĩ akaarĩĩgwatĩra.’”

Nao anene makĩĩra mũthamaki atĩrĩ: “Reke mũndũ ũyũ oragwo, tondũ nĩ arekĩra guoya thigari iria itigarĩte itũũra-inĩ rĩrĩ, o hamwe na andũ arĩa angĩ othe, na njĩra ya kũmeera ciugo ta icio. Tondũ mũndũ ũyũ ndacaragia ũrĩa andũ aya mekũgĩa na thayũ, no amacaragĩria ũũru.”

Nake mũthamaki Zedekia akĩmeera ũũ: “, Ũcio arĩ moko-inĩ manyu, tondũ gũtirĩ ũndũ mũthamaki angĩka amũgirĩrĩrie.”

Kwoguo makĩoya Jeremiya makĩmũikia irima-inĩ rĩa Malikiya mũrũ wa mũthamaki, rĩrĩa rĩarĩ kũu Nja ya Arangĩri. Magĩikũrũkia Jeremiya na mĩkwa. Irima rĩu rĩtiarĩ na maĩ, no mũtondo, na Jeremiya akĩambĩrĩria kũrikĩra mũtondo-inĩ ũcio.

Nake Ebedi-meleku ũrĩa Mũethiopia, ũrĩa warĩ mũnene nyũmba-inĩ ya mũthamaki akĩigua atĩ nĩ maaikĩtie Jeremiya irima-inĩ. Hĩndĩ ĩyo mũthamaki aaikarĩte thĩ Kĩhingo-inĩ kĩa Benjamini,

kwoguo Ebedi-meleku akiuma nyũmba-inĩ ya mũthamaki na akĩaria na mũthamaki akĩmwĩra atĩrĩ:

“Atĩrĩrĩ wee mũthamaki mwathi wakwa, ũndũ ũrĩa andũ aya mekĩte mũnabii Jeremiya nĩ mũũru mũno! Mamũikĩtie irima-inĩ, na nĩ egũkuĩra kuo nĩ ng’aragu, tondũ gũtirĩ mũgate ũtigarĩte thĩinĩ wa itũũra.”

Nake mũthamaki agĩatha Ebedi-meleku ũcio Mũethiopia akĩmwĩra: “Oya andũ 30 kuuma gũkũ mũthiĩ mũrute Jeremiya ũcio mũnabii irima-inĩ atanakua.”

Nĩ ũndũ ũcio Ebedi-meleku akĩoya andũ acio na magĩthiĩ nyũmba-inĩ ya mũthamaki rungu rwa harĩa haaigagwo kĩgĩna, na makĩoya ndangari na nguo imwe ndarũkangu kuuma hau na magĩciharũrũkia na mĩkwa kũrĩ Jeremiya irima-inĩ

Ebedi-meleku ũcio Mũethiopia agĩcoka akĩĩra Jeremiya ũũ: “Ĩkĩra ndangari na nguo icio gatagatĩ ka njegeke ciaku na mĩkwa ĩyo.” Nake Jeremiya agĩka ũguo,

magĩkĩguucia Jeremiya na mĩkwa na makĩmũruta irima-inĩ. Na Jeremiya agĩthiĩ na mbere gũikara kũu Nja ya Arangĩri.

Mũthamaki Zedekia agĩtũmanĩra mũnabii Jeremiya athiĩ kũrĩ we itonyero-inĩ rĩa gatatũ, rĩrĩa rĩrĩ nyũmba-inĩ ya Yahweh, na mũthamaki akĩĩra Jeremiya ũũ: “Harĩ ũndũ ndĩrenda gũkũũria. Ndũkahithe ũndũ o na ũrĩkũ.”

Jeremiya akĩĩra Zedekia atĩrĩ: “Ingĩkwĩra, hatarĩ nganja nĩ ũkũnjũraga. Na ingĩgũtaara, ndũgũthikĩrĩria.”

Kwoguo Mũthamaki Zedekia akĩĩhĩta kũrĩ Jeremiya na hitho akĩmwĩra: “O ta ũrĩa Yahweh atũũraga muoyo, o ũcio ũtũheete muoyo ũyũ, ndigũkũũraga, na ndigũkũneana kũrĩ andũ aya maracaria ũrĩa megũkũruta muoyo.”

Nake Jeremiya akĩĩra Zedekia atĩrĩ: “Ũũ nĩguo Yahweh, Kĩhoti mũnene wa ita, o we Kĩhoti wa Isiraeli ekuuga, ‘Angĩkorũo nĩ ũkwĩneana kũrĩ anene a mũthamaki wa Babuloni, ndũkoorũo nĩ muoyo waku, na itũũra rĩrĩ rĩtigaacinwo na mwaki, na wee na andũ a nyũmba yaku nĩ mũkaahonoka

No waga kwĩneana kũrĩ anene a mũthamaki wa Babuloni, itũũra rĩrĩ nĩ rĩkaaneanwo kũrĩ Akalidei, na nĩ makaarĩcina na mwaki, na ndũgeethara kuuma guoko-inĩ kwao.’”

Nake Mũthamaki Zedekia akĩĩra Jeremiya atĩrĩ: “Nĩ ndĩretigĩra Ayahudi arĩa mathiĩte makeneana kũrĩ Akalidei, tondũ ingĩneanwo kũrĩ o, mahota kũnjĩka ũũru.”

No Jeremiya akiuga ũũ: “Ndũkaaneanwo kũrĩ o. Ndagũthaitha wathĩkĩre mũgambo wa Yahweh wĩgiĩ ũhoro ũrĩa ndĩrakũhe, na maũndũ maku nĩ megũthiĩ wega, na nĩ ũgũthiĩ na mbere gũtũũra muoyo

No warega kwĩneana, ũndũ ũyũ nĩguo Yahweh anguũrĩirie:

Atĩrĩ, andũ-a-nja othe arĩa matigarĩte nyũmba-inĩ ya mũthamaki wa Yahuda nĩ gũtwarũo maratwarũo kũrĩ anene a mũthamaki wa Babuloni, na maroiga atĩrĩ, ‘Andũ arĩa wehokete nĩ makũheenetie na magagũtooria. Nĩ matũmĩte kũgũrũ gwaku kũrikĩre mũtondo-inĩ. Rĩu nĩ mahũndũkĩte makora.’

Na maratwarĩra Akalidei atumia aku othe na ariũ aku, na ndũgeethara kuuma guoko-inĩ kwao, no nĩ ũkaanyitwo nĩ mũthamaki wa Babuloni, na itũũra rĩrĩ nĩ rĩgaacinwo na mwaki nĩ ũndũ waku.”

Zedekia agĩcoka akĩĩra Jeremiya ũũ: “Ndũkareke mũndũ o na ũrĩkũ amenye ũhoro wĩgiĩ maũndũ macio, nĩgetha ndũgakue

Na anene mangĩigua atĩ nĩ njarĩtie nawe na moke makwĩre atĩrĩ, ‘Twĩre maũndũ marĩa ũreerire mũthamaki. Ndũgatũhithe ũndũ o na ũrĩkũ, na tũtigũkũũraga. Mũthamaki arakwĩrire atĩa?’

Ũmeere atĩrĩ, ‘ndĩrahoyaga mũthamaki atĩ ndakanjokie nyũmba-inĩ ya Jehonathani ndigakuĩre kuo.’”

Thutha wa ihinda anene othe magĩthiĩ kũrĩ Jeremiya na makĩmũhoya ũhoro. Nake akĩmeera maũndũ mothe marĩa mũthamaki aamwathĩte oige. Na kwoguo matiamwĩrire ũndũ ũngĩ, tondũ gũtirĩ mũndũ waiguĩte ndeereti ĩyo

Jeremiya aaikarire kũu Nja ya Arangĩri nginya mũthenya ũrĩa Yahrushalayim yatahirũo; aarĩ o kũu rĩrĩa Yahrushalayim yatahirũo.