Jeremiya 43

Hĩndĩ ĩrĩa Jeremiya aarĩkirie kwĩra andũ othe ciugo icio ciothe cioimĩte kũrĩ Yahweh Kĩhoti wao, kiugo o gĩothe kĩrĩa Yahweh Kĩhoti wao aamũtũmĩte ameere,

Azaria mũrũ wa Hoshaia, Johanani mũrũ wa Karea, o hamwe na andũ othe arĩa maarĩ na mwĩĩkĩrĩro makĩĩra Jeremiya atĩrĩ: “Ũndũ ũcio ũroiga nĩ wa maheeni! Yahweh Kĩhoti witũ ndagũtũmĩte ũtwĩre ũũ, ‘Mũtikae gũthiĩ Misiri gũtũũra kuo.’

No Baruku mũrũ wa Neria nĩwe ũragũcogera ũtũneane kũrĩ Akalidei, nĩguo tũũragwo nĩo kana matũtware ithamĩrio Babuloni.”

Nĩ ũndũ ũcio Johanani mũrũ wa Karea na anene othe a mbũtũ o hamwe na andũ othe makĩrega gwathĩkĩra mũgambo wa Yahweh wa gũikara bũrũri-inĩ wa Yahuda

Handũ ha ũguo, Johanani mũrũ wa Karea na anene othe a mbũtũ makĩoya andũ arĩa maatigarĩte a Yahuda, o acio maacokete nĩguo maikare bũrũri-inĩ wa Yahuda kuuma mabũrũri-inĩ mothe kũrĩa maahurunjĩtwo

Makĩoya arũme, atumia, ciana, aarĩ a mũthamaki, na mũndũ o wothe ũrĩa Nebuzaradani mũnene wa arangĩri aatigĩire Gedalia mũrũ wa Ahikamu mũrũ wa Shafani, o hamwe na Jeremiya ũcio mũnabii na Baruku mũrũ wa Neria

Na magĩthiĩ bũrũri-inĩ wa Misiri, tondũ matiathĩkĩire mũgambo wa Yahweh, magĩthiĩ o nginya Tahapanihesi.

Nakĩo kiugo kĩa Yahweh gĩgĩkinyĩra Jeremiya kũu Tahapanihesi akĩrũo atĩrĩ:

“Oya mahiga manene guoko-inĩ gwaku, na ũmahithe na rĩũmba hau harĩtwo maturubarĩ itonyero-inĩ rĩa nyũmba ya Firauni kũu Tahapanihesi arũme Ayahudi makwĩroreire

Ũcoke ũmeere atĩrĩ, ‘Ũũ nĩguo Yahweh mũnene wa ita, o we Kĩhoti wa Isiraeli ekuuga: “Nĩ ngũtũmanĩra Nebukadineza mũthamaki wa Babuloni, o ũcio ndungata yakwa, na nĩ ngaaiga gĩtĩ gĩake kĩa ũnene igũrũ rĩa mahiga macio ndahitha, nake nĩ agaatambũrũkia hema yake ya ũthamaki igũrũ rĩamo

Na nĩ agooka na ahũũre bũrũri wa Misiri. Mũndũ o wothe wathĩrĩirũo mũrimũ wa kũrehe gĩkuũ, oragwo nĩ mũrimũ wa kũrehe gĩkuũ, na mũndũ o wothe wathĩrĩirũo gũtahwo, atahwo, na mũndũ o wothe wathĩrĩirũo rũhiũ rwa njora, oragwo na rũhiũ rwa njora

Na nĩ ngaacina nyũmba cia ihoti cia Misiri na mwaki, na nĩ agaacicina na atahe ihoti icio. Akeehumba bũrũri wa Misiri o ta ũrĩa mũrĩithi ehumbaga nguo yake, na akooima kuo arĩ na thayũ

Na nĩ akoinanga itugĩ cia Bethi-shemeshi ituĩke tũcunjĩ bũrũri-inĩ wa Misiri, na acine nyũmba cia ihoti cia Misiri na mwaki.”’”