Johana 10
“Ngũmwĩra atĩrĩ na ma, mũndũ ũrĩa ũtatonyaga gĩcegũ kĩa ngʼondu agereire kĩhingo-inĩ, no akahaicĩra handũ hangĩ-rĩ, ũcio nĩ mũici na nĩ mũtunyani.
Mũndũ ũrĩa ũtonyaga na kĩhingo nĩwe mũrĩithi wa ngʼondu ciake.
Mũrangĩri nĩ amũhingũragĩra kĩhingo, nacio ngʼondu nĩ ithikagĩrĩria mũgambo wake. Eetaga ngʼondu ciake na marĩĩtwa, na agaciumagaria.
Aarĩkia kuumia iria irĩ ciake ciothe-rĩ, acitongoragia, nacio ngʼondu ciake ikamũrũmĩrĩra, tondũ nĩ ciũĩ mũgambo wake.
No itirĩ hĩndĩ ingĩrũmĩrĩra mũgeni; ũrĩa kũrĩ nĩ atĩ nĩ ikũmũũrĩra, tondũ itiũĩ mũgambo wa mũgeni.”
Yahshua aahũthĩrire ngerekano ĩyo, no matiigana gũtaũkĩrwo nĩ ũrĩa aameraga.
Nĩ ũndũ ũcio Yahshua akiuga o rĩngĩ atĩrĩ, “Ngũmwĩra atĩrĩ na ma, Niĩ nĩ niĩ kĩhingo kĩa ngʼondu.
Arĩa othe mookire mbere yakwa maarĩ aici na atunyani, no ngʼondu itiigana kũmathikĩrĩria
Niĩ nĩ niĩ kĩhingo; ũrĩa wothe ũtonyagĩra harĩ niĩ nĩ akahonoka. Agaatonyaga na akoima, na onage gĩa kũrĩa.
Mũici okaga tu nĩgetha aiye, na orage, na anange; niĩ njũkĩte nĩguo magĩe na muoyo, na magĩe naguo kũna.
“Niĩ nĩ niĩ mũrĩithi ũrĩa mwega. Mũrĩithi ũrĩa mwega arutaga muoyo wake nĩ ũndũ wa ngʼondu.
Mũrĩithi wa mũcaara tiwe mũrĩithi ũrĩa mwene ngʼondu. Nĩ ũndũ ũcio rĩrĩa ona njũũi ĩgĩũka, atiganagĩria ngʼondu, akoora. Hĩndĩ ĩyo nayo njũũi ĩgatharĩkĩra rũũru, ĩkarũhurunja.
Mũndũ ũcio oraga tondũ we nĩ wa kwandĩkwo, na ndarũmbũyanagia na ũhoro wa ngʼondu.
“Niĩ nĩ niĩ mũrĩithi ũrĩa mwega; nĩ njũĩ ngʼondu ciakwa, nacio ngʼondu ciakwa nĩ cinjũĩ,
o ta ũrĩa Baba anjũĩ, na niĩ ngamenya Baba, na nĩ ndutĩte muoyo wakwa nĩ ũndũ wa ngʼondu.
Ndĩ na ngʼondu ingĩ iria itarĩ cia gĩcegũ gĩkĩ. No nginya o nacio ndĩcirehe. O nacio nĩ igathikĩrĩria mũgambo wakwa, na gũgaakorwo na rũũru rũmwe, na mũrĩithi ũmwe
Gĩtũmi kĩa Baba kũnyenda nĩ ũndũ nĩ ndutĩte muoyo wakwa nĩgetha njoke ndĩwoe rĩngĩ.
Gũtirĩ mũndũ ũngĩndunya guo, no niĩ ngũũruta na kwĩyendera. Ndĩ na ũhoti wa kũũruta, o na ũhoti wa kũwoya rĩngĩ. Watho ũyũ ndaamũkĩrire kuuma kũrĩ Baba.”
Maigua ciugo icio, Ayahudi makĩamũkana o rĩngĩ.
Aingĩ ao makiuga atĩrĩ, “Mũndũ ũyũ arĩ na ndaimono na akagũrũka. Mũkũmũthikĩrĩria nĩkĩ?”
No angĩ makiuga atĩrĩ, “Ĩno ti mĩario ya mũndũ ũrĩ na ndaimono. Ndaimono no ĩhingũre maitho ma mũtumumu?”
Ningĩ gũkĩgĩa na Gĩathĩ kĩa Hanukah kũu Yahrushalayim. Kwarĩ kĩmera kĩa heho,
nake Yahshua aarĩ hekarũ-inĩ agĩceracera gĩthaku-inĩ gĩa Solomoni.
Nao Ayahudi makĩmũrigicĩria makĩmwĩra atĩrĩ, “Ũgũtũũra ũtũigĩte na nganja nginya rĩ? Angĩkorwo nĩwe Messiya-rĩ, twĩre ũtekũhitha.”
Nake Yahshua akĩmacokeria atĩrĩ, “Nĩ ndĩmwĩrĩte, no mũtiĩtĩkagia. Ciama iria ningaga na rĩĩtwa rĩa Baba nĩ cinjaragĩrĩria,
no inyuĩ mũtiĩtĩkagia tondũ mũtirĩ ngʼondu ciakwa.
Ngʼondu ciakwa nĩ ithikagĩrĩria mũgambo wakwa; nĩ ndĩciũĩ, nacio nĩ cinũmagĩrĩra.
Nĩ ndĩciheaga muoyo wa tene na tene, na gũtirĩ hĩndĩ ikoora; gũtirĩ mũndũ o na ũmwe ũngĩcigutha kuuma moko-inĩ makwa.
Baba ũrĩa waheire cio, nĩ mũnene kũrĩ othe; gũtirĩ mũndũ ũngĩcigutha kuuma moko-inĩ ma Baba.
Niĩ na Baba tũrĩ ũmwe.”
O rĩngĩ Ayahudi makĩoya mahiga nĩguo mamũhũũre namo nyuguto,
nake Yahshua akĩmera atĩrĩ, “Nĩ ndĩmuonetie ciama nyingĩ nene kuuma kũrĩ Baba. Nĩ kĩama kĩrĩkũ gĩacio mũrenda kũũhũrĩra na mahiga nyuguto?”
Nao Ayahudi makĩmũcokeria atĩrĩ, “Tũtirakũhũũra na mahiga nyuguto nĩ ũndũ wa o na kĩmwe gĩacio, no nĩ ũndũ wa kũruma Elohim, tondũ wĩtuĩte Kĩhoti na wee ũrĩ o mũndũ.”
Nake Yahshua akĩmacokeria atĩrĩ, “Githĩ gũtiandĩkĩtwo Watho-inĩ wanyu atĩrĩ, ‘Ndoigire inyuĩ mũrĩ Elohim’?
Angĩkorwo aametire ‘Elohim’, o acio kiugo kĩa Yahweh gĩokire kũrĩ o, (na Maandĩko Maamũre matingĩaga kũhingio)
ĩ mũndũ ũrĩa Baba aamũrire arĩ wake kũna na akĩmũtũma gũkũ thĩ, ũhoro wake nĩ atĩa? Mũragĩthitanga nĩkĩ atĩ nĩ ndaruma Yahweh tondũ nĩ ndoiga, ‘Ndĩ Mũrũ wa Yahweh’?
Ingĩaga gwĩka ũrĩa Baba ekaga mũtikanjĩtĩkie.
No o na ingĩĩka ũrĩa ekaga-rĩ, o na gũtuĩka mũtinjĩtĩkĩtie, ĩtĩkiai ciama icio, nĩguo mũmenye na mũtaũkĩrwo atĩ Baba arĩ thĩinĩ wakwa, na niĩ ndĩ thĩinĩ wa Baba.”
Na o rĩngĩ makĩgeria kũmũnyita, nowe akĩĩhonokia kuuma moko-inĩ mao.
Ningĩ Yahshua agĩcoka mũrĩmo ũũrĩa ũngĩ wa Jorodani, harĩa Johana aabatithanagĩria matukũ-inĩ ma mbere. Agiĩkara kũu,
nao andũ aingĩ magĩũka kũrĩ we. Nao makiuga atĩrĩ, “O na gũtuĩka Johana ndarĩ kĩama aaringire, ũhoro ũrĩa wothe Johana oigire ũkoniĩ mũndũ ũyũ warĩ wa ma.”
Na andũ aingĩ a kũu magĩĩtĩkia Yahshua.