Johana 9

Na rĩrĩa aathiiaga na njĩra-rĩ, akĩona mũndũ waciarĩtwo arĩ mũtumumu.

Nao arutwo ake makĩmũũria atĩrĩ, “Rabii, nũ wehirie, nĩ mũndũ ũyũ kana nĩ aciari ake, nĩgetha aciarwo arĩ mũtumumu?”

Nake Yahshua akiuga atĩrĩ, “Ti mũndũ ũyũ kana aciari ake mehirie. No ũndũ ũyũ wekĩkire nĩgetha wĩra wa Yahweh wonanio mũtũũrĩre-inĩ wake.

Rĩrĩa rĩothe arĩ mũthenya-rĩ, no nginya tũrute wĩra wa ũrĩa wandũmire. Ũtukũ nĩ ũroka rĩrĩa gũtarĩ mũndũ ũngĩhota kũruta wĩra.

Rĩrĩa ndĩ gũkũ thĩ, nĩ niĩ ũtheri wa thĩ.”

Na aarĩkia kuuga ũguo, agĩtua mata thĩ, akĩringia ndoro na mata macio, na akĩmĩhaka mũndũ ũcio maitho.

Akĩmwĩra atĩrĩ, “Thiĩ ũgethambe Karia-inĩ ga Siloamu” (narĩo rĩĩtwa Siloamu nĩ kuuga Gũtũmwo.) Nĩ ũndũ ũcio mũndũ ũcio agĩthiĩ na agĩĩthamba, na agĩũka mũciĩ akĩonaga.

Nao andũ a itũũra rĩake na arĩa maamuonete mbere ĩyo akĩhooya ũteithio makĩũrania atĩrĩ, “Githĩ mũndũ ũyũ ti ũrĩa ũraikaraga thĩ ahooyage ũteithio?”

Andũ amwe makiuga atĩ aarĩ we. Nao arĩa angĩ makiuga atĩrĩ, “Aca, no kũhaana amũhaana.” Nowe agĩkĩrĩrĩria kuuga atĩrĩ, “Nĩ niĩ mũndũ ũcio.”

Nao makĩmũũria atĩrĩ, “Maitho maku makĩhingũkire atĩa?”

Nake akĩmacokeria atĩrĩ, “Mũndũ ũrĩa metaga Yahshua nĩwe ũringirie ndoro aahaka maitho, anjĩĩra thiĩ ngethambe Karia-inĩ ga Siloamu. Nĩ ũndũ ũcio ndathiĩ na ndethamba, na ndahota kuona.”

Nao makĩmũũria atĩrĩ, “Mũndũ ũcio arĩ ha?” Nake akĩmera atĩrĩ, “Niĩ ndiũĩ.”

Nao magĩtwara mũndũ ũcio warĩ mũtumumu kũrĩ Afarisai.

Na rĩrĩ, mũthenya ũcio Yahshua aaringirie ndoro na akĩhingũra maitho ma mũndũ ũcio warĩ wa Thabatũ.

Nĩ ũndũ ũcio Afarisai o nao makĩmũũria ũrĩa aahotete kuona. Nake mũndũ ũcio akĩmacokeria atĩrĩ, “Aahakire ndoro maitho, na niĩ ndethamba na rĩu nĩ ndĩrona.”

Nao Afarisai amwe makiuga atĩrĩ, “Mũndũ ũyũ ndoimĩte kũrĩ Yahweh, nĩgũkorwo ndamenyagĩrĩra Thabatũ.” No arĩa angĩ makĩũria atĩrĩ, “Mũndũ mwĩhia ahota atĩa kũringa ciama ta ici?” Nĩ ũndũ ũcio makĩamũkana.

Mũthia-inĩ Afarisai acio makĩhũgũkĩra mũndũ ũcio warĩ mũtumumu, makĩmũũria atĩrĩ, “Wee ũkuuga atĩa ha ũhoro wake? Nĩwe araahingũrire maitho.” Nake mũndũ ũcio agĩcokia atĩrĩ, “Nĩ mũnabii.”

O na kũrĩ ũguo Ayahudi matiigana gwĩtĩkia ũhoro wa mũndũ ũcio atĩ aarĩ mũtumumu na atĩ nĩ acokete kuona, nginya rĩrĩa maatũmanĩire aciari ake.

Makĩmooria atĩrĩ, “Ũyũ nĩ mwana wanyu? Ũyũ nĩwe mũroiga aaciarirwo arĩ mũtumumu? Rĩu ahotete atĩa kuona?”

Nao aciari ake magĩcokia atĩrĩ, “Ithuĩ tũũĩ nĩ mwana witũ na tũũĩ aaciarirwo arĩ mũtumumu

No ũrĩa ahotete kuona, kana ũrĩa ũmũhingũrire maitho make, ithuĩ tũtiũĩ. Mũũriei nĩ mũgima, nĩ ekwĩyarĩrĩria.”

Aciari ake moigire ũguo nĩ ũndũ wa gwĩtigĩra Ayahudi, nĩgũkorwo Ayahudi nĩ marĩkĩtie gũtua atĩ mũndũ o wothe ũngiuga atĩ Yahshua nĩwe Messiya nĩ egũikio nja ya thunagogi.

Nĩkĩo aciari ake moigire atĩrĩ, “Nĩ mũgima; mũũriei.”

Magĩĩta mũndũ ũcio warĩ mũtumumu hĩndĩ ya kerĩ. Makĩmwĩra atĩrĩ, “Goocithia Kĩhoti. Nĩ tũũĩ mũndũ ũyũ nĩ mwĩhia.”

Nake agĩcokia atĩrĩ, “Niĩ ndiũĩ kana nĩ mwĩhia kana ti mwĩhia. No njũĩ ũndũ ũyũ ũmwe; ndĩrarĩ mũtumumu na rĩu nĩ ndĩrona!”

Ningĩ makĩmũũria atĩrĩ, “Agwĩkire atĩa? Akũhingũrire maitho atĩa?”

Nake akĩmacokeria atĩrĩ, “Nĩ ndamwĩra ũhoro o rĩu na inyuĩ mũtinathikĩrĩria. Mũrenda kũigua rĩngĩ nĩkĩ? O na inyuĩ nĩ mũkwenda gũtuĩka arutwo ake?”

Nao makĩmũruma, makĩmwĩra atĩrĩ, “Wee ũrĩ mũrutwo wa mũndũ ũyũ! Ithuĩ tũrĩ arutwo a Musa!

Ithuĩ nĩ tũũĩ atĩ Kĩhoti nĩ arĩirie Musa, no ha ũhoro wa mũndũ ũyũ-rĩ, tũtiũĩ o na kũrĩa oimĩte.”

Nake mũndũ ũcio akĩmacokeria atĩrĩ, “Kaĩ ũcio nĩ ũrirũ-ĩ! Inyuĩ mũtiũĩ kũrĩa oimĩte, na nĩwe ũũhingũrire maitho!

Nĩ tũũĩ atĩ Yahweh ndathikagĩrĩria andũ ehia. Athikagĩrĩria mũndũ ũrĩa ũmũthathayagia na ũrĩa wĩkaga wendi wake.

Gũtirĩ mũndũ ũrĩ waigua ũhoro wa mũndũ ũhingũrĩtwo maitho aciarĩtwo arĩ mũtumumu.

Korwo mũndũ ũyũ ndoimĩte kũrĩ Yahweh ndarĩ ũndũ angĩhota gwĩka.”

Igũrũ rĩa ũhoro ũcio magĩcokia atĩrĩ, “Wee waciarirwo ũrĩ na mehia. Ũngĩkĩgeria atĩa gũtũruta!” Nao makĩmũikania na kũu nja.

Yahshua nĩ aiguire atĩ nĩ maikĩtie mũndũ ũcio nja, na rĩrĩa aamuonire akĩmũũria atĩrĩ, “Wee nĩ wĩtĩkĩtie Mũrũ wa Mũndũ?”

Nake mũndũ ũcio akĩmũũria atĩrĩ, “Mũthuri ũyũ, ũcio nĩwe ũ? Njĩĩra, nĩgetha ndĩmwĩtĩkie.”

Nake Yahshua akiuga atĩrĩ, “Rĩu nĩ ũmuonete; nĩwe ũyũ ũra aria nawe.”

Nake mũndũ ũcio akiuga atĩrĩ, “Rabbi, nĩ ndetĩkia,” na akĩmũthathaiya.

Ningĩ Yahshua akiuga atĩrĩ, “Njũkĩte gũkũ thĩ nĩ ũndũ wa gũtuanĩra cira, nĩgetha arĩa atumumu mahote kuona, nao arĩa monaga matuĩke atumumu.”

Afarisai amwe arĩa maarĩ nake makĩigua akiuga ũguo, nao makĩmũũria atĩrĩ, “Atĩ atĩa? O na ithuĩ tũrĩ atumumu?”

Nake Yahshua akĩmacokeria atĩrĩ, “Mũngĩrĩ atumumu-rĩ, mũtingĩrĩ na mehia; no rĩu tondũ muugaga atĩ nĩ muonaga-rĩ, mũgũikara o na wĩhia wanyu.”