Johana 8
No rĩrĩ, Yahshua agĩthiĩ Kĩrĩma-inĩ kĩa Mĩtamaiyũ
Na rũcinĩ tene akĩroka o rĩngĩ kũu nja cia hekarũ, kũrĩa andũ othe maamũrigiicĩirie. Nake agĩikara thĩ kũmaruta
Aandĩki-marũa hamwe na Afarisai makĩrehe mũndu-wa-nja wanyitĩtwo agĩtharia. Makĩmũrũgamia hau mbere ya gĩkundi,
na makĩĩra Yahshua atĩrĩ, “Rabbi, mũndu-wa-nja ũyũ aanyiitwo agĩtharia
Thĩinĩ wa watho-rĩ, Musa aatwathire tũhũũrage andũ-a-nja ta aya na mahiga nyuguto. Rĩu we ũkuuga atĩa?”
Maahũthagĩra kĩũria gĩkĩ kĩrĩ ta mũtego, nĩgetha magĩe na ũndũ wa kũmũthitangĩra.
Na rĩrĩa maathiire na mbere kũmũũria ũhoro ũcio, akĩinamũka, akĩmera atĩrĩ, “Angĩkorwo harĩ na ũmwe wanyu ũtarĩ ehia-rĩ, nĩ atuĩke wa mbere kũmũikĩria ihiga.”
Agĩcoka akĩinamĩrĩra rĩngĩ, akĩandĩka thĩ na kĩara.
Rĩrĩa maiguire ũguo, makĩambĩrĩria kwehera hau ũmwe kwa ũmwe, maambĩrĩirie na arĩa akũrũ, nginya hagĩtigara o Yahshua na mũndu-wa-nja ũcio arũngiĩ o hau
Yahshua akĩinamũka, akĩmũũria atĩrĩ, “Mũndũ-wa-nja ũyũ, agũthitangi marĩ ha? Hatirĩ o na ũmwe wao wagũtuĩra?”
Nake akĩmũcokeria atĩrĩ, “Mũthuri ũyũ, gũtirĩ o na ũmwe.” Nake Yahshua akiuga atĩrĩ, “O na niĩ ndigũgũtuĩra. Thiĩ, na ndũkanacoke kwĩhia.”
Rĩrĩa Yahshua aarĩirie andũ rĩngĩ, akiuga atĩrĩ, “Niĩ nĩ niĩ ũtheri wa thĩ. Ũrĩa wothe ũnũmagĩrĩra ndarĩ hĩndĩ arĩthiiaga na nduma, no arĩgĩaga na ũtheri wa muoyo.”
Nao Afarisai makĩmũkararia, makĩmwĩra atĩrĩ, “We ũraheana ũira waku wee mwene; ũira waku ti wa ma.”
Nake Yahshua agĩcokia atĩrĩ, “O na ingĩruta ũira wakwa niĩ mwene-rĩ, ũira wakwa nĩ wa ma, nĩgũkorwo nĩ njũĩ kũrĩa ndoimire o na kũrĩa ndĩrathiĩ. No inyuĩ mũtiũĩ kũrĩa nyumĩte kana kũrĩa ndĩrathiĩ
Inyuĩ mũtuanagĩra cira na ũmũndũ; niĩ ndirĩ mũndũ nduagĩra cira
No o na ingĩtuanĩra cira-rĩ, itua rĩakwa nĩ rĩagĩrĩire, nĩgũkorwo ndituanagĩra ndĩ nyiki. No niĩ ndĩ na Baba, ũrĩa wandũmire
Thĩinĩ wa Watho wanyu nĩ kwandĩkĩtwo atĩ ũira wa andũ erĩ nĩ wa ma
Niĩ ndĩraruta ũira wakwa mwene; nake mũira wakwa ũcio ũngĩ nĩ Baba ũrĩa wandũmire.”
Ningĩ makĩmũũria atĩrĩ, “Thoguo arĩ kũ?” Nake Yahshua akĩmacokeria atĩrĩ, “Inyuĩ mũtinjũĩ, o na Baba mũtimũũĩ. Korwo nĩ mũnjũĩ, o na Baba nĩ mũngĩmũũĩ.”
Nake aaragia ciugo icio akĩrutana hekarũ-inĩ hakuhĩ na harĩa mũhothi warutagĩrwo. No gũtirĩ mũndũ wamũnyitire nĩ tondũ ihinda rĩake rĩtiarĩ ikinyu.
O rĩngĩ Yahshua akĩmera atĩrĩ, “Nĩ ngwĩthiĩra, na inyuĩ nĩ mũkanjaria no mũgakua mũrĩ o mehia-inĩ manyu. Kũrĩa ngũthiĩ inyuĩ mũtingĩhota gũka.”
Ũhoro ũcio ũgĩtũma Ayahudi morie atĩrĩ, “Kaĩ ekwĩyũraga? Hihi nĩkĩo aroiga atĩ, ‘Kũrĩa ngũthiĩ mũtingĩhota gũka’?”
Nowe akĩmera atĩrĩ, “Inyuĩ mũrĩ a gũkũ thĩ, niĩ nyumĩte Igũrũ
Inyuĩ mũrĩ a thĩ-ĩno; no niĩ ndirĩ wa thĩ-ĩno. Ndamwĩrire atĩ mũgakua mũrĩ o mehia-inĩ manyu; mũngĩrega gwĩtĩkia ũrĩa njugaga atĩ niĩ nĩ niĩ we, ti-itherũ mũgakua mũrĩ o mehia-inĩ manyu.”
Nao makĩmũũria atĩrĩ, “Wee nĩwe ũ.” Nake Yahshua akĩmera atĩrĩ, “Niĩ nĩ niĩ o ũrĩa ndũũrĩte ndĩmwĩraga kuuma o kĩambĩrĩria.
Ndĩ na maũndũ maingĩ ingiuga ma kũmũcirithia namo. No ũrĩa wandũmire nĩ wa ma, naguo ũrĩa njiguĩte kuuma kũrĩ we nĩguo njĩĩraga kĩrĩndĩ.”
Nao matiigana kũmenya atĩ aameraga ũhoro wa Ithe.
Nĩ ũndũ ũcio Yahshua akĩmera atĩrĩ, “Mwarĩkia kwambararia Mũrũ wa Mũndũ-rĩ, nĩguo mũkamenya ũrĩa njugaga atĩ niĩ nĩ niĩ we, na atĩ gũtirĩ ũndũ njĩkaga ndĩĩrĩte, no njaragia o ũrĩa Baba andutĩte.
Nake ũrĩa wandũmire arĩ hamwe na niĩ; ndandigĩte ndĩ nyiki, nĩgũkorwo hĩndĩ ciothe njĩkaga maũndũ o marĩa mamũkenagia.”
O akĩaragia-rĩ, andũ aingĩ makĩmwĩtĩkia.
Nake Yahshua akĩĩra Ayahudi arĩa maamwĩtĩkĩtie atĩrĩ, “Mũngĩrũmia ũrutani wakwa-rĩ, mũrĩ arutwo akwa kũna.
Nĩ mũkaamenya ũhoro wa ma, naguo ũhoro ũcio wa ma nĩ ũkaamũkũũra ũkombo-inĩ.”
Nao makĩmũcokeria makĩmwĩra atĩrĩ, “Ithuĩ tũrĩ a rũciaro rwa Iburahĩmu, na tũtirĩ twatuĩka ngombo cia mũndũ o na ũ. Ũngĩkiuga atĩa atĩ nĩ tũgakũũrwo?”
Nake Yahshua akĩmacokeria atĩrĩ, “Ngũmwĩra atĩrĩ o ma, mũndũ o wothe wĩhagia nĩ ngombo ya mehia.
No rĩrĩ, ngombo ti ya gũtũũra mũciĩ nginya tene no mũriũ wa mwene mũciĩ nĩ wa gũtũũra mũciĩ nginya tene.
Nĩ ũndũ ũcio Mũrũ wa Yahweh angĩkamũkũũra-rĩ, nĩ mũgakũũrwo kũna.
Nĩ njũĩ mũrĩ a rũciaro rwa Iburahĩmu, no nĩ mwĩharĩirie kũnjũraga, tondũ ũhoro wakwa ndũrĩ na ũikaro thĩinĩ wanyu.
Niĩ ndĩramwĩra maũndũ marĩa nyonete harĩ Baba, na inyuĩ mwĩkaga maũndũ marĩa mũiguĩte kuuma kũrĩ ithe wanyu.”
Nao makĩmũcokeria atĩrĩ, “Iburahĩmu nĩwe ithe witũ.” Nake Yahshua akĩmera atĩrĩ, “Mũngĩrĩ ciana cia Iburahĩmu-rĩ, nĩ mũngĩĩkaga maũndũ marĩa Iburahĩmu eekaga.
Ũrĩa kũrĩ nĩ atĩ, inyuĩ nĩ mũtuĩte itua rĩa kũnjũraga, o niĩ mũndũ ũrĩa ũmũheete ũhoro ũrĩa wa ma, o ũrĩa ndaiguire kuuma kũrĩ Yahweh. Ũguo tiguo Iburahĩmu eekaga.
Inyuĩ mũreka maũndũ marĩa ithe wanyu ekaga.” Nao makĩmũkararia makĩmwĩra atĩrĩ, “Ithuĩ tũtirĩ ciana ciumanĩte na ũtharia. Ithuĩ tũrĩ na Baba ũmwe tu, na nĩwe Elohim.”
Yahshua akĩmera atĩrĩ, “Yahweh angĩrĩ Ithe wanyu-rĩ, no mũnyende, nĩgũkorwo ndoimire kũrĩ Yahweh, na rĩu ndĩ gũkũ. Ti niĩ mwene ndĩĩtũmĩte, no nĩwe wandũmire.
Mũraga gũtaũkĩrwo nĩ ũrĩa ndĩroiga nĩkĩ? Tondũ mũtirahota kũmenya ũhoro ũrĩa ndĩraria.
Inyuĩ mũrĩ ciana cia ithe wanyu, Mũcukani, na mwendaga kũhingia merirĩria ma ithe wanyu. We aarĩ mũũragani kuuma o kĩambĩrĩria. Ndathingataga ũhoro wa ma, nĩgũkorwo gũtirĩ ũhoro wa ma thĩinĩ wake. Rĩrĩa ekũheenania, aaragia rũthiomi rwake, tondũ we nĩ mũheenania, na nĩwe ithe wa maheeni.
No tondũ njaragia ũhoro wa ma-rĩ, mũtinjĩtĩkagia
Nĩ kũrĩ mũndũ ũmwe wanyu ũngĩonania atĩ ndĩ mwĩhia? Angĩkorwo ndĩraria ũhoro wa ma-rĩ, mũregaga kũnjĩtĩkia nĩkĩ
Ũrĩa ũrĩ wa Yahweh nĩ aiguaga ũrĩa Yahweh oigaga. Kĩrĩa kĩgiragia mũmũigue nĩ tondũ mũtirĩ a Yahweh.”
Nao Ayahudi makĩmũcokeria atĩrĩ, “Githĩ tũtirĩ na kĩhooto gĩa kuuga atĩ wee ũrĩ Mũsamaria na ũrĩ na ndaimono?”
Nake Yahshua akĩmera atĩrĩ, “Niĩ ndirĩ na ndaimono, no nĩ ndĩĩte Baba, no inyuĩ mũtindĩĩte.
Ndirecarĩria ũgooci wakwa niĩ mwene, no nĩ harĩ na ũmwe ũrĩa ũũcaragia, na nĩwe mũtuanĩri cira
Ngũmwĩra atĩrĩ na ma, mũndũ o wothe angĩrũmia kiugo gĩakwa, ndarĩ hĩndĩ akona gĩkuũ.”
Ayahudi maigua ũguo, makĩgũthũka makĩmwĩra atĩrĩ, “Rĩu nĩ twamenya atĩ ũrĩ na ndaimono. Iburahĩmu nĩ akuire o na anabii magĩkua, no wee ũroiga atĩ mũndũ o wothe angĩrũmia kiugo gĩaku, ndagacama gĩkuũ.
Wee ũkĩrĩ mũnene gũkĩra ithe witũ Iburahĩmu? We nĩ akuire o na anabii magĩkua. Kaĩ ũreciria we ũrĩ ũ?”
Nake Yahshua akĩmacokeria atĩrĩ, “Ingĩĩgooca-rĩ, kwĩgooca gwakwa nĩ gwa tũhũ. Baba, ũrĩa muugaga atĩ nĩwe Kĩhoti wanyu nĩwe ũngoocithagia.
O na gũtuĩka mũtimũũĩ, niĩ nĩ ndĩmũũĩ. Ingiuga atĩ ndimũũĩ, ingĩtuĩka wa maheeni ta inyuĩ, no nĩ ndĩmũũĩ na nĩ nũmĩtie kiugo gĩake.
Ithe wanyu Iburahĩmu nĩ akenaga atĩ nĩ akona mũthenya wakwa; na nĩ awonire na agĩcanjamũka.”
Nao Ayahudi makĩmwĩra atĩrĩ, “Wee o na ndũkinyĩtie mĩaka mĩrongo ĩtano, na ũkoiga atĩ nĩ wonete Iburahĩmu!”
Nake Yahshua akĩmacokeria atĩrĩ, “Ngũmwĩra atĩrĩ na ma, Iburahĩmu atanaciarwo, Niĩ ndũire!”
Maigua ũguo makĩoya mahiga mamũhũũre namo nyuguto, no Yahshua akĩĩhitha, akiuma kũu hekarũ-inĩ.