Johana 11
Na rĩrĩ, kwarĩ na mũndũ wetagwo Lazaro, nake aarĩ mũrũaru. Aarĩ wa Bethania, itũũra rĩa Mariamu na mwarĩ wa nyina Maritha.
Mariamu ũyũ nowe waitĩrĩirie Yahshua maguta manungi wega na akĩmũgiria nyarĩrĩ na njuĩrĩ yake, na aarĩ mwarĩ wa nyina na Lazaro ũcio warĩ mũrũaru
Nĩ ũndũ ũcio aarĩ acio a nyina magĩtũmanĩra Yahshua akeerwo atĩrĩ, “Rabbi, ũrĩa wendete nĩ mũrũaru.”
Rĩrĩa Yahshua aiguire ũhoro ũcio, akiuga atĩrĩ, “Ndwari ĩno ndĩkũrĩĩkĩrĩra na gĩkuũ. Aca, nĩ ya kũgoocithia Yahweh, nĩgetha Mũrũ wa Yahweh agoocithio nĩyo.”
Yahshua nĩ endete Maritha na mwarĩ wa nyina, o na Lazaro.
No o na thutha wa kũigua atĩ Lazaro aarĩ mũrũaru-rĩ, aikarire kũu aarĩ mĩthenya ĩngĩ ĩĩrĩ.
Agĩcoka akĩĩra arutwo ake atĩrĩ, “Nĩ tũcokei Yahuda.”
Nao makĩmwĩra atĩrĩ, “No rĩrĩ Rabii, o rĩu ica ikuhĩ Ayahudi marageragia gũkũhũũra na mahiga nyuguto, na rĩu ũrenda gũcoka kuo?”
Nake Yahshua akĩmacokeria atĩrĩ, “Githĩ mũthenya ti wa mathaa ikũmi na merĩ? Mũndũ ũrĩa ũthiiaga mũthenya ndangĩhĩngwo, nĩgũkorwo onaga na ũtheri wa gũkũ thĩ
Ahĩngagwo rĩrĩa egũthiĩ ũtukũ, nĩ ũndũ ndarĩ na ũtheri.”
Aarĩkia kuuga ũguo, agĩcoka akĩmera atĩrĩ, “Mũrata witũ Lazaro nĩ akomete; no nĩ ngũthiĩ kũu ngamũũkĩrie.”
Arutwo ake makĩmũcokeria atĩrĩ, “Rabbi, akorwo nĩ gũkoma akomete-rĩ, nĩ ekũigua wega.”
Yahshua aaragia ũhoro wa gĩkuũ gĩake, no arutwo ake meciragia aaragia ũhoro wa toro wa ndũire.
Nĩ ũndũ ũcio akĩmera na njĩra ĩgũtaũka, atĩrĩ, “Lazaro nĩ mũkuũ,
no nĩ ũndũ wanyu nĩ ngenete nĩgũkorwo ndirarĩ kuo, nĩgetha mwĩtĩkie. No rĩrĩ, nĩ tũthiĩi kũrĩ we.”
Nake Toma (ũrĩa wetagwo Wa-mahatha) akĩĩra arutwo arĩa angĩ atĩrĩ, “Nĩ tũthiĩi o na ithuĩ, tũgakuanĩre nake.”
Yahshua aakinya-rĩ, agĩkora Lazaro nĩ aninĩte mĩthenya ĩna thĩinĩ wa mbĩrĩra
Na rĩrĩ, itũũra rĩa Bethania rĩtiakinyĩtie kilomita ithatũ kuuma Yahrushalayim,
nao Ayahudi aingĩ nĩ mokĩte kũu kwa Maritha na Mariamu kũmomĩrĩria nĩ ũndũ wa gũkuĩrwo nĩ mũrũ wa nyina wao.
Rĩrĩa Maritha aiguire atĩ Yahshua nĩ aroka, akiuma, agĩthiĩ kũmũtũnga, no Mariamu agĩikara kũu mũciĩ.
Maritha akĩĩra Yahshua atĩrĩ, “Rabbi ũngĩraarĩ gũkũ-rĩ, mũrũ wa maitũ ndangĩrakuire.
No rĩrĩ, nĩ njũĩ atĩ o na rĩu Yahweh nĩ egũkũhe o kĩrĩa gĩothe ũngĩhoya.”
Nake Yahshua akĩmwĩra atĩrĩ, “Mũrũ wa maitũguo nĩ ekũriũka.” Nake Maritha akĩmũcokeria atĩrĩ,
“Nĩ njũĩ nĩ akariũka hĩndĩ ya iriũkĩro mũthenya wa mũthia.”
Nake Yahshua akĩmwĩra atĩrĩ, “Niĩ nĩ niĩ kũriũka na nĩ niĩ muoyo. Nake ũrĩa wothe ũnjĩtĩkĩtie, o na aakua, nĩ agatũũra muoyo;
nake ũrĩa wothe ũtũũraga muoyo na nĩ anjĩtĩkĩtie, ndarĩ hĩndĩ agaakua. Wee nĩ wĩtĩkĩtie ũguo?”
Nake Maritha akĩmwĩra atĩrĩ, “Ĩĩ Mwathi, nĩ njĩtĩkĩtie atĩ wee nĩwe Messiya, Mũrũ wa Yahweh, ũrĩa wĩrĩtwo nĩ agoka gũkũ thĩ.”
Nake aarĩkia kuuga ũguo, agĩcoka agĩthiĩ agĩĩta mwarĩ wa nyina Mariamu keeheri-inĩ, akĩmwĩra atĩrĩ, “Mũrutani arĩ gũkũ na nĩ arakũũria.”
Rĩrĩa Mariamu aiguire ũguo, akĩrũgama na ihenya agĩthiĩ kũrĩ we
Na hĩndĩ ĩyo Yahshua ndaakoretwo atonyete itũũra, no aarĩ o harĩa Maritha aamũtũngĩte.
Rĩrĩa Ayahudi acio maarĩ na Mariamu kũu nyũmba makĩmũũmĩrĩria monire ũrĩa okĩra na ihenya oimĩte nja, makĩmũrũmĩrĩra, magĩĩciria atĩ aathiiaga mbĩrĩra-inĩ akarĩrĩre ho.
Hĩndĩ ĩrĩa Mariamu aakinyire harĩa Yahshua aarĩ na akĩmuona, akĩgũa thĩ magũrũ-inĩ make, akĩmwĩra atĩrĩ, “Rabbi, ũngĩraarĩ gũkũ, mũrũ wa maitũ ndangĩrakuire.”
Hĩndĩ ĩrĩa Yahshua aamuonire akĩrĩra, na Ayahudi arĩa mokĩte hamwe nake o nao makĩrĩra-rĩ, agĩcaya mũno roho-inĩ thĩinĩ na agĩtangĩka ngoro.
Akĩmooria atĩrĩ, “Mũmũigĩte ha?” Nao makĩmũcokeria atĩrĩ, “Rabbi, ũka wone.”
Yahshua akĩrĩra.
Nao Ayahudi makiuga atĩrĩ, “Onei ũrĩa aramwendete!”
No amwe ao makĩũrania atĩrĩ, “Mũndũ ũyũ ũrahingũrire mũtumumu maitho-rĩ, ndangĩrahotire kũgiria akue?”
Nake Yahshua, o rĩngĩ acaĩte mũno, agĩthiĩ mbĩrĩra-inĩ. Mbĩrĩra ĩyo yarĩ ngurunga na yahingĩtwo na ihiga.
Nake Yahshua akĩmera atĩrĩ, “Eheriai ihiga.” No Maritha, mwarĩ wa nyina na mũndũ ũcio wakuĩte, akĩmwĩra atĩrĩ, “Rabbi, rĩu nĩ mũnungu nĩ ũndũ nĩ aninĩte mĩthenya ĩna ho.”
Nake Yahshua akĩmwĩra atĩrĩ, “Githĩ ndikwĩrire atĩ wetĩkia nĩ ũkuona riri wa Yahweh?”
Nĩ ũndũ ũcio makĩeheria ihiga.Yahshua agĩcoka agĩtiira maitho, akiuga atĩrĩ, “Baba, nĩ ndagũcokeria ngatho nĩ ũndũ nĩ ũnjiguaga.
Nĩ njũĩ atĩ nĩ ũnjiguaga hĩndĩ ciothe, no ndoiga ũguo nĩ ũndũ wa andũ aya marũgamĩte haha, nĩguo metĩkie atĩ nĩwe wandũmire.”
Yahshua aarĩkia kuuga ũguo, akĩanĩrĩra na mũgambo mũnene, akiuga atĩrĩ, “Lazaro, uma!”
Nake mũndũ ũcio warĩ mũkuũ akiuma, ohetwo na ndaamĩ cia gatani moko na magũrũ, na akarigicĩrio tama ũthiũ. Yahshua akĩmera atĩrĩ, “Muohorei matama macio ma mbĩrĩra, mũreke athiĩ.”
Nĩ ũndũ ũcio Ayahudi aingĩ arĩa mokĩte gũceerera Mariamu, mona ũrĩa Yahshua eekire, makĩmwĩtĩkia
No amwe ao magĩthiĩ kũrĩ Afarisai, makĩmera ũrĩa Yahshua ekĩte.
Hĩndĩ ĩyo athĩnjĩri-Yahweh arĩa anene hamwe na Afarisai magĩĩta Kĩama. Makĩũrania atĩrĩ, “Nĩ kĩ tũreka? Onei ũrĩa mũndũ ũyũ araringa ciama nyingĩ.
Twareka athiĩ na mbere ũguo, andũ othe nĩ mekũmwĩtĩkia, nao Aroma moke meyoere hekarũ itũ, o na rũrĩrĩ rwitũ.”
Hĩndĩ ĩyo ũmwe wao wetagwo Kaiafa, ũrĩa warĩ mũthĩnjĩri-Yahweh mũnene mwaka ũcio, akiuga atĩrĩ, “Inyuĩ mũtirĩ ũndũ mũũĩ o na atĩa!
Inyuĩ mũtiũĩ atĩ nĩ kaba mũndũ ũmwe akue nĩ ũndũ wa kĩrĩndĩ, handũ ha rũrĩrĩ ruothe rũthire.”
Ũndũ ũcio ndaaririe etaarĩte we mwene, no aarathire ũguo arĩ ta mũthĩnjĩri-Yahweh mũnene wa mwaka ũcio, atĩ Yahshua nĩ agakuĩra rũrĩrĩ rwa Ayahudi,
na to rũrĩrĩ rũu rwiki, no o na ningĩ akue nĩ ũndũ wa ciana cia Yahweh iria ciahurunjũkĩte, nĩgetha acicokanĩrĩrie atũme ituĩke kĩndũ kĩmwe.
nĩ ũndũ ũcio kuuma mũthenya ũcio magĩciirĩra kũmũũraga.
Nĩ ũndũ ũcio Yahshua ndaacokire gũthiĩ akĩĩonithanagia kũrĩ Ayahudi. Handũ ha ũguo, akĩehera agĩthiĩ kũndũ kwarĩ hakuhĩ na werũ, gatũũra geetagwo Efiraimu, agĩikara kuo na arutwo ake.
Na rĩrĩa Bathaka ya Ayahudi yakuhĩrĩirie, andũ aingĩ makĩambata kuuma matũũra-inĩ, magĩthiĩ Yahrushalayim nĩ ũndũ wa igongona rĩa gwĩtheria Bathaka ĩtanakinya.
Andũ acio magĩikara magĩcaragia Yahshua, na rĩrĩa maarũngiĩ nja ya hekarũ, makĩũrania atĩrĩ, “Mũgwĩciiria atĩa? Kaĩ hihi ategũũka Gĩathĩ-inĩ?”
No athĩnjĩri-Yahweh arĩa anene na Afarisai nĩ marutĩte watho atĩ mũndũ o wothe ũngĩamenyire harĩa Yahshua aarĩ, amarehere ũhoro nĩgetha mamũnyite.