Johana 14
“Mũtigatangĩke ngoro, mwĩhokei Yahweh; o na niĩ mũnjĩhoke.
Thĩinĩ wa nyũmba ya Baba kũrĩ na ciikaro nyingĩ; gũtangĩrĩ ũguo ingĩrĩ kũmwĩra. Nĩ ngũthiĩ kuo kũmũthondekera handũ.
Na ndathiĩ na ndamũthondekera handũ-rĩ, nĩ ngacoka ndĩmũgĩĩre nĩgetha o na inyuĩ mũkoragwo harĩa ndĩ
Njĩra ya kũrĩa ndĩrathiĩ inyuĩ nĩ mũmĩũĩ.”
Nake Toma akĩmwĩra atĩrĩ, “Rabbi, ithuĩ tũtiũĩ kũrĩa ũgũthiĩ, nĩ ũndũ ũcio-rĩ, njĩra tũngĩkĩmĩmenya atĩa?”
Nake Yahshua akĩmũcokeria atĩrĩ, “Niĩ nĩ niĩ njĩra, na nĩ niĩ ũhoro ũrĩa wa ma, na nĩ niĩ muoyo. Gũtirĩ mũndũ ũkinyaga kũrĩ Baba atagereire harĩ niĩ.
Korwo nĩ mũũmenyete kũna, no mũmenye Baba o nake. Kuuma rĩu, nĩ mũmũĩ na nĩ mũmuonete!”
Filipu akĩmwĩra atĩrĩ, “Rabbi, tuonie Baba na ithuĩ nĩ tũkũiganĩra.”
Nake Yahshua akĩmũcokeria atĩrĩ, “Filipu, ndũrĩ wamenya o na thutha wa gũkorwo na inyuĩ ihinda iraihu ũguo? Mũndũ ũrĩa wothe ũnyonete nĩ onete Baba. Ũngĩkiuga atĩa atĩ, ‘Tuonie Baba’
Kaĩ ũtetĩkĩtie atĩ niĩ ndĩ thĩinĩ wa Baba, na atĩ Baba arĩ thĩinĩ wakwa? Ciugo iria ndĩmwĩraga ti ciakwa niĩ mwene; no Baba ũrĩa ũtũũraga thĩinĩ wakwa, nĩwe ũraruta wĩra wake.
Njĩtĩkiai rĩrĩa nguuga atĩ ndĩ thĩinĩ wa Baba, nake Baba arĩ thĩinĩ wakwa; kana mũgĩĩtĩkie nĩ ũndũ wa ũira wa ciama iria ningaga.
Ngũmwĩra atĩrĩ na ma, mũndũ ũrĩa wothe ũnjĩtĩkĩtie, nĩ arĩĩkaga maũndũ marĩa njĩkaga. Na nĩ ageeka o na maũndũ manene kũrĩ macio, tondũ ndĩrathiĩ kũrĩ Baba.
Na ũrĩa wothe mũkahoya, nĩ ngawĩka thĩinĩ wa rĩĩtwa rĩakwa, nĩgetha Mũriũ arehere Ithe riri
Mwahoya ũndũ o wothe thĩinĩ wa rĩĩtwa rĩakwa, nĩ ndĩrĩwĩkaga.
“Angĩkorwo nĩ mũnyendete, nĩ mũrĩathĩkagĩra Maathani makwa.
Na niĩ nĩ ngahoya Baba, nake nĩ akamũhe Mũteithia ũngĩ aikarage na inyuĩ nginya tene,
nake nĩwe Roho ũrĩa wa ma. Nao andũ a gũkũ thĩ matingĩmwĩtĩkĩra tondũ matimuonaga na matimũũĩ. No inyuĩ nĩ mũmũĩ nĩgũkorwo atũũranagia na inyuĩ, na aikaraga thĩinĩ wanyu.
Ndikũmũtiga ta ciana cia ngoriai, nĩ ngũũka kũrĩ inyuĩ.
Thutha wa ihinda inyinyi, thĩ ndĩgũcoka kũnyona, no inyuĩ nĩ mũrĩnyonaga. Tondũ nĩ ndũũraga muoyo, o na inyuĩ nĩ mũgũtũũra muoyo.
Mũthenya ũcio nĩ mũkamenya atĩ niĩ ndĩ thĩinĩ wa Baba, na inyuĩ mũrĩ thĩinĩ wakwa, na niĩ ndĩ thĩinĩ wanyu.
Ũrĩa wothe ũiguaga Maathani makwa na akamaathĩkĩra, ũcio nĩwe ũnyendete. Nake ũcio ũnyendete nĩ arĩendagwo nĩ Baba, o na niĩ nĩ ndĩmwendaga na ndĩonithanagie kũrĩ we.”
Nake Yahuda (no ti Isikariota) akiuga atĩrĩ, “No rĩrĩ Rabbi, nĩ kĩ gĩgũtũma wĩonithanie kũrĩ ithuĩ na ti kũrĩ andũ a gũkũ thĩ?”
Nake Yahshua agĩcokia atĩrĩ, “Mũndũ o wothe ũnyendete nĩ arĩathĩkagĩra ũrutani wakwa. Baba nake nĩ arĩmwendaga, na nĩ tũrĩũkaga kũrĩ we tũtũũranagie nake.
Ũrĩa ũtanyendete ndathĩkagĩra ũrutani wakwa. Ciugo icio mũiguaga ti ciakwa niĩ mwene; nĩ cia Baba ũrĩa wandũmire.
“Maũndũ maya mothe ndamwarĩria tũrĩ o na inyuĩ.
No rĩrĩ, we Mũteithia, na nĩwe Roho Mwamũre, ũrĩa Baba agaatũma thĩinĩ wa rĩĩtwa rĩakwa, nĩ akamũruta maũndũ mothe na amũririkanie ũrĩa wothe ndĩmwĩrĩte.
Thayũ nĩguo ngũmũtigĩra; thayũ wakwa nĩguo ndaamũhe. Ndikũmũhe thayũ ta ũrĩa ũheanagwo nĩ andũ a gũkũ thĩ. Mũtigatangĩke ngoro kana mwĩtigĩre.
“Inyuĩ nĩ mwaiguire ngiuga atĩrĩ, ‘Nĩ ngũthiĩ na nĩ ngacoka njũke kũrĩ inyuĩ rĩngĩ.’ Angĩkorwo nĩ mũnyendete-rĩ, no mũkene tondũ ndĩrathiĩ kũrĩ Baba, nĩgũkorwo Baba nĩ mũnene kũrĩ niĩ.
Ndamwĩra maũndũ macio o rĩu matanekĩka nĩgetha rĩrĩa magekĩka mũgeetĩkia.
Ndikũmwarĩria ũhoro ũyũ ihinda iraya, nĩgũkorwo mũnene wa gũkũ thĩ nĩ aroka. We ndarĩ na hinya wa kũnjatha,
no andũ a gũkũ thĩ no nginya mamenye atĩ nĩ nyendete Baba, na atĩ njĩkaga o ũrĩa Baba anjathĩte. “Ũkai rĩu; nĩ tũthiĩi.