Johana 15

“Niĩ nĩ niĩ mũthabibũ ũrĩa wa ma nake Baba nĩwe mũrĩmĩri.

Rũhonge o ruothe rũrĩ thĩinĩ wakwa rũtaciaraga nĩ arũtemaga akarweheria. Naruo rũhonge o ruothe rũrĩa rũciaraga nĩ arũceehaga nĩguo rũciare maciaro maingĩ makĩria.

Inyuĩ o na rĩu mũrĩ amũre nĩ ũndũ wa ũhoro ũrĩa ndĩmũheete.

Ikaragai thĩinĩ wakwa na niĩ nĩ ndĩrĩikaraga thĩinĩ wanyu. Gũtirĩ rũhonge rũngĩciara maciaro rũrĩ rwiki; no nginya rũikare thĩinĩ wa mũthabibũ. O na inyuĩ mũtingĩciara maciaro mũtangĩikara thĩinĩ wakwa.

“Nĩ niĩ mũthabibũ, na inyuĩ mũrĩ honge. Mũndũ angĩikara thĩinĩ wakwa na niĩ njikare thĩinĩ wake, nĩ arĩciaraga maciaro maingĩ; tondũ mũtarĩ hamwe na niĩ mũtirĩ ũndũ mũngĩhota gwĩka

Mũndũ o wothe angĩaga gũikara thĩinĩ wakwa-rĩ, atariĩ o ta rũhonge rũrĩa rũteagwo rũkooma; honge icio nĩ kũnganio ciũnganagio, igaikio mwaki-inĩ ikahĩa.

Mũngĩikara thĩinĩ wakwa, nacio ciugo ciakwa ciikare thĩinĩ wanyu, hoyai o kĩrĩa gĩothe mũngĩenda, na nĩ mũkũheo kĩo.

Ũndũ ũrĩa ũngĩgoocithia Baba nĩ atĩ, mũciarage maciaro maingĩ nĩguo mwĩonanie mũrĩ arutwo akwa.

“O ta ũrĩa Baba anyendete, ũguo noguo na niĩ ndĩmwendete. Rĩu-rĩ, ikaragai o wendo-inĩ wakwa.

Mũngĩathĩkĩra Maathani makwa-rĩ, nĩ mũrĩikaraga wendo-inĩ wakwa o ta ũrĩa niĩ njathĩkĩire Maathani ma Baba na ngaikara wendo-inĩ wake

Ndamwĩra maũndũ macio nĩguo gĩkeno gĩakwa kĩgĩe thĩinĩ wanyu, nakĩo gĩkeno kĩanyu gĩkinyanĩre.

Rĩathani rĩakwa nĩ rĩrĩ: Endanagai inyuĩ ene, o ta ũrĩa niĩ ndĩmwendete.

Gũtirĩ mũndũ ũrĩ wendo mũnene kũrĩ ũyũ, atĩ mũndũ no arute muoyo wake nĩ ũndũ wa arata ake.

Inyuĩ mũrĩ arata akwa, mũngĩĩka ũrĩa ndĩmwathĩte.

Ndigũcoka kũmwĩta ndungata, tondũ ndungata ndĩmenyaga ũrĩa mũmĩathi areka; no inyuĩ ndĩmwĩtĩte arata nĩgũkorwo maũndũ marĩa mothe ndĩĩrutĩte kuuma kũrĩ Baba nĩ ndĩmũmenyithĩtie.

Ti inyuĩ mwathuurire, no nĩ niĩ ndamũthuurire, na ngĩmwamũra mũthiĩ mũgaciare maciaro, namo maciaro macio matũũre. Nake Baba nĩ akamũhe kĩrĩa gĩothe mũkahoya thĩinĩ wa rĩĩtwa rĩakwa.

Rĩrĩ nĩrĩo Rĩathani rĩakwa: Endanagai.

“Andũ a thĩ mangĩmũthũũra, menyai atĩ nĩ niĩ maambire gũthũũra.

Korwo mũrĩ a gũkũ thĩ, andũ a thĩ no mamwende ta mũrĩ ao. No rĩrĩ, inyuĩ mũtirĩ a gũkũ thĩ, no nĩ ndĩmũthuurĩte kuuma kũrĩ andũ a thĩ. Nĩkĩo andũ a thĩ mamũthũire.

Ririkanai ũhoro ũrĩa ndamwĩrire atĩrĩ, ‘Gũtirĩ ndungata nene gũkĩra mũmĩathi.’ Angĩkorwo niĩ nĩ manyariirire, o na inyuĩ nĩ makamũnyarira. Angĩkorwo nĩ mathĩkĩire ũrutani wakwa o na wanyu nĩ makawathĩkĩra.

Nao makaamwĩka ũguo nĩ ũndũ wa rĩĩtwa rĩakwa, nĩgũkorwo matiũĩ ũrĩa wandũmire.

“Korwo ndiokire ngĩmahe ũhoro, matingĩamenyire nĩ ehia. No rĩu matirĩ na kĩĩgwatio nĩ ũndũ wa mehia mao

Mũndũ ũrĩa ũũthũũrĩte, nĩ athũire Baba o nake

Korwo ndiĩkĩte gatagatĩ-inĩ kao maũndũ marĩa matarĩ mekwo nĩ mũndũ ũngĩ matingĩamenyire nĩ ehia. No rĩu nĩ monete ciama ici, no no maathũire na magathũũra Baba.

No nĩgetha kũhingio ũrĩa kwandĩkĩtwo Watho-inĩ wao atĩrĩ, ‘Nĩ mathũũrire hatarĩ gĩtũmi.’

“Hĩndĩ ĩrĩa Mũteithia agoka, ũrĩa ngaamũtũmĩra kuuma kũrĩ Baba, na nĩwe Roho wa ma ũrĩa uumaga kũrĩ Baba, we nĩ akaheana ũira wakwa.

Na o na inyuĩ no nginya mũkaaruta ũira, tondũ mũtũũrĩte na niĩ kuuma o kĩambĩrĩria.