Johana 16
“Ndamwĩra maũndũ macio mothe nĩgetha mũtikanae kũigua ũũru.
Nĩ makamũingata thunagogi-inĩ; na ũhoro wa ma nĩ atĩ, kũrĩ hĩndĩ ĩgũũka rĩrĩa mũndũ o wothe ũkaamũũraga ageciragia atĩ nĩ Yahweh aratungatĩra
Mageekaga maũndũ macio nĩ ũndũ matimenyete Baba o na kana makaamenya.
Ndamwĩra maũndũ macio nĩgetha hĩndĩ ĩyo yakinya mũkaaririkana atĩ nĩ ndamwĩrĩte. Ndiamwĩrire maũndũ macio kĩambĩrĩria-inĩ tondũ ndaarĩ hamwe na inyuĩ.
“Rĩu nĩ ngũthiĩ kũrĩ ũrĩa wandũmire. No gũtirĩ o na ũmwe wanyu ũranjũũria atĩrĩ, ‘Ũrathiĩ kũ?’
Mwaiyũrwo nĩ kĩeha nĩ tondũ nĩ ndamwĩra maũndũ macio.
No ngũmwĩra atĩrĩ na ma, nĩ kwagĩrĩire niĩ thiĩ nĩ ũndũ wanyu. Tondũ ndaaga gũthiĩ, Mũteithia ndagoka kũrĩ inyuĩ. No ndaathiĩ, nĩ ngamũtũma oke kũrĩ inyuĩ.
Nake oka, nĩ akaiguithia andũ a gũkũ thĩ ũrĩa mahĩtĩtie ũhoro-inĩ wa mehia, na ũhoro-inĩ wa ũthingu, o na ũhoro-inĩ wa cira:
Nĩ mahĩtĩtie ũhoro-inĩ wa mehia, nĩgũkorwo andũ matinjĩtĩkĩtie;
nĩ mahĩtĩtie ũhoro-inĩ wa ũthingu, nĩgũkorwo ndĩrathiĩ kũrĩ Baba kũrĩa mũtangĩcoka kũnyona;
na nĩ mahĩtĩtie ũhoro-inĩ wa cira tondũ mũnene wa gũkũ thĩ nĩ arĩkĩtie gũtuĩrwo cira.
“Ndĩ na maũndũ mangĩ maingĩ ma kũmwĩra, makĩria ya marĩa mũngĩhota kũũmĩrĩria rĩu.
No rĩrĩ, Roho ũcio Wa Ma oka, nĩ akamũtongoria ũhoro-inĩ ũrĩa wa ma wothe. Ndakaaragia ũhoro wake mwene; akaaragia ũhoro wa maũndũ marĩa aiguĩte, ningĩ nĩ akamwĩra ũhoro wa maũndũ marĩa magoka thutha.
Nĩ akangoocithia nĩgũkorwo nĩ akamũmenyithia ũhoro wakwa ũrĩa arutĩte kuuma kũrĩ niĩ
Maũndũ mothe ma Baba nĩ makwa. Nĩkĩo ndamwĩra atĩ Roho nĩ akamũmenyithia ũhoro wakwa ũrĩa arutĩte kuuma kũrĩ niĩ, mũũmenye.
“Thutha wa kahinda kanini mũtikũnyona rĩngĩ na ningĩ thutha wa kahinda kanini nĩ mũkũnyona.”
Amwe a arutwo ake makĩũrania atĩrĩ, “Arenda kuuga atĩa rĩrĩa aroiga atĩ, ‘Thutha wa kahinda kanini mũtikũnyona rĩngĩ na ningĩ atĩ thutha wa kahinda kanini nĩ mũkũnyona’, ningĩ atĩ ‘Tondũ ndĩrathiĩ kũrĩ Baba?’ ”
Magĩthiĩ na mbere kũũrania atĩrĩ, “Arenda kuuga atĩa rĩrĩa aroiga atĩ, ‘Kahinda kanini’? Ithuĩ tũtiramenya ũrĩa aroiga.”
Nake Yahshua akĩona atĩ nĩ mendaga kũmũũria ũhoro ũcio, nĩ ũndũ ũcio akĩmera atĩrĩ, “Nĩ kũũrania mũrorania ũrĩa ngwendaga kuuga rĩrĩa njugire atĩ ‘Thutha wa kahinda kanini mũtikũnyona rĩngĩ, na ningĩ thutha wa kahinda kanini nĩ mũkũnyona’?
Ngũmwĩra atĩrĩ na ma, mũkaarĩra na mũcakae rĩrĩa andũ a thĩ marakena. Inyuĩ mũkanyitwo nĩ kĩeha, no kĩeha kĩanyu nĩ gĩkagarũrũka gĩtuĩke gĩkeno.
Mũndũ-wa-nja agĩciara nĩ akoragwo na ruo tondũ hĩndĩ yake nĩ nginyu; no aarĩkia gũciara kaana, akariganĩrwo nĩ ruo nĩ ũndũ wa gũkena nĩgũkorwo kaana nĩ gaaciarwo gũkũ thĩ.
O na inyuĩ noguo: Rĩu nĩ ihinda rĩanyu rĩa kĩeha, no nĩ ngamuona rĩngĩ na ngoro cianyu ikene, na gũtirĩ mũndũ o na ũmwe ũkaamũtunya gĩkeno kĩu.
Mũthenya ũcio wakinya mũtigacoka kũnjũũria ũndũ o na ũrĩkũ. Ngũmwĩra atĩrĩ na ma, Baba nĩ akamũhe kĩrĩa gĩothe mũkaahoya thĩinĩ wa rĩĩtwa rĩakwa.
Nginyagia rĩu mũtirĩ mwahoya ũndũ thĩinĩ wa rĩĩtwa rĩakwa. Hoyai na nĩ mũkũheo, nĩguo gĩkeno kĩanyu gĩkinyanĩre.
“O na gũtuĩka ngoretwo ngĩaria na ngerekano-rĩ, hĩndĩ nĩ ĩroka rĩrĩa itagacoka kũmwarĩria na njĩra ĩyo, no ngaamwĩraga ũhoro wa Baba itekũhithĩrĩra.
Mũthenya ũcio nĩ mũkahoyaga thĩinĩ wa rĩĩtwa rĩakwa. Ndiroiga atĩ nĩ ngahoyaga Baba ithenya rĩanyu.
No rĩrĩ, Baba we mwene nĩ amwendete, nĩgũkorwo inyuĩ nĩ mũnyendete, na nĩ mwĩtĩkĩtie atĩ ndoimire kũrĩ Yahweh.
Niĩ ndoimire kũrĩ Baba, ngĩũka gũkũ thĩ; na rĩu nĩ nguuma gũkũ thĩ, njoke kũrĩ Baba.”
Hĩndĩ ĩyo arutwo a Yahshua makiuga atĩrĩ, “Rĩu nĩ ũratũhe ũhoro wega, ũtekwaria na ngerekano.
Rĩu nĩ twamenya atĩ wee nĩ ũĩ maũndũ mothe, na atĩ o na ndũbataire mũndũ o na ũrĩkũ akũũrie ciũria. Ũhoro ũcio nĩ watũma twĩtĩkie atĩ woimĩte kũrĩ Yahweh.”
Nake Yahshua akĩmacokeria atĩrĩ, “Rĩu nĩ mwetĩkia!
No hĩndĩ nĩ ĩroka, na nĩ nginyu, rĩrĩa mũkahurunjũka, o mũndũ athiĩ gwake mũciĩ. Mũkaandiga ndĩ nyiki, no ndirĩ nyiki, nĩgũkorwo Baba arĩ hamwe na niĩ.
“Ndamwĩra maũndũ macio nĩgetha mũgĩe na thayũ thĩinĩ wakwa. Gũkũ thĩ nĩ mũrĩonaga thĩna. No ũmĩrĩriai! Niĩ nĩ ndooretie thĩ.”