Johana 17

Yahshua aarĩkia kuuga maũndũ macio, agĩtiira maitho akĩrora na igũrũ, akĩhoya, akiuga atĩrĩ: “Baba hĩndĩ nĩ nginyu. Goocithia Mũrũguo, nĩguo nake Mũrũguo akũgoocithie.

Nĩgũkorwo nĩ ũmũheete ũhoti wa gwatha andũ othe, nĩguo arĩa othe ũmũheete amahe muoyo wa tene na tene.

Na rĩu ũyũ nĩguo muoyo wa tene na tene: Atĩ makũmenye, o Wee tu El ũrĩa wa ma, na mamenye Yahshua Messiya, ũrĩa ũtũmĩte.

Nĩ ngũgoocithĩtie gũkũ thĩ na ũndũ wa kũrĩkia wĩra ũrĩa waheire ndute.

Na rĩu Baba, ngoocithia ndĩ mbere yaku na riri ũrĩa ndaarĩ naguo hamwe nawe o mbere thĩ ĩtanagĩa.

“Nĩ nguũrĩirie andũ arĩa waheire gũkũ thĩ rĩĩtwa rĩaku. Acio maarĩ aku; nawe ũkĩĩhe o, nao nĩ mathĩkĩire kiugo gĩaku

Na rĩu nĩ mamenyete atĩ indo iria ciothe ũheete ciumĩte kũrĩ wee.

Nĩgũkorwo nĩ ndamaheire ciugo iria waheire, nao magĩciĩtĩkĩra. Nĩ mamenyire hatarĩ nganja atĩ ndoimire kũrĩ wee, na magĩĩtĩkia atĩ wee nĩwe wandũmire

Acio nĩo ndĩrahoera. Ndirahoera andũ a gũkũ thĩ, no ndĩrahoera arĩa ũũheete, nĩgũkorwo nĩ aku.

Kĩrĩa gĩothe ndĩ nakĩo nĩ gĩaku, na kĩrĩa gĩothe ũrĩ nakĩo nĩ gĩakwa. Naguo ũgooci nĩ ũkĩte kũrĩ niĩ nĩ ũndũ wao.

Ndigũikara gũkũ thĩ rĩngĩ, no-o marĩ o gũkũ thĩ, na niĩ ndĩroka kũrĩ wee. Baba Mwamũre, magitĩre na ũhoti wa rĩĩtwa rĩaku, rĩĩtwa rĩrĩa waheire, nĩgetha matuĩke ũmwe o ta ũrĩa ithuĩ tũrĩ ũmwe.

Rĩrĩa ndĩrarĩ nao, nĩ ndĩramagitagĩra na ngamamenyerera na rĩĩtwa rĩu waheire. Gũtirĩ o na ũmwe ũũrĩte o tiga ũrĩa wathĩrĩirwo kwanangwo nĩguo Maandĩko mahingio.

“Rĩu ndĩroka kũrĩ wee, no maũndũ maya ndĩroiga ndĩ o gũkũ thĩ, nĩguo maiyũrwo nĩ gĩkeno gĩakwa kĩrĩ gĩkinyanĩru kũna thĩinĩ wao.

Nĩ ndĩmaheete kiugo gĩaku, nao andũ a gũkũ thĩ makamathũũra, nĩgũkorwo o ti a gũkũ thĩ rĩngĩ, o ta ũrĩa niĩ itarĩ wa gũkũ thĩ.

Ihoya rĩakwa ti ũmarute gũkũ thĩ, no nĩ atĩ ũmagitagĩre kuuma kũrĩ ũrĩa mũũru

O ti a gũkũ thĩ, o ta ũrĩa o na niĩ itarĩ wakuo.

Maamũre, ũmatherie na ũhoro ũrĩa wa ma; ũhoro waku nĩguo ũhoro wa ma.

O ta ũrĩa wandũmire gũkũ thĩ, na niĩ noguo ndamatũma kũrĩ andũ a gũkũ thĩ.

Ngwĩyamũrĩire nĩ ũndũ wao, nĩguo o nao maamũrwo kũna nĩ ũhoro ũrĩa wa ma.

“Ningĩ to aya oiki ndĩrahoera. Ndĩrahoera o na arĩa angĩ makaanjĩtĩkia nĩ ũndũ wa ndũmĩrĩri ya aya,

nĩguo othe matuĩke ũmwe, o ta ũrĩa we Baba ũrĩ thĩinĩ wakwa na niĩ ndĩ thĩinĩ waku. O nao marogĩa thĩinĩ witũ nĩgetha andũ a gũkũ thĩ metĩkie atĩ nĩwe ũndũmĩte.

Nĩ ndĩmaheete riri ũrĩa waheire, nĩguo matuĩke ũmwe o ta ũrĩa ithuĩ tũrĩ ũmwe,

niĩ ndĩ thĩinĩ wao, nawe ũrĩ thĩinĩ wakwa. Marotuĩka ũmwe kũna, nĩgetha andũ a gũkũ thĩ mamenye atĩ nĩwe wandũmire, na atĩ nĩ ũmendete o ta ũrĩa ũnyendete.

“Baba, ngwenda arĩa ũũheete makorwo na niĩ harĩa ndĩ na mone riri wakwa, riri ũrĩa ũũheete nĩ ũndũ nĩ wanyendete thĩ ĩtanombwo.

“Baba Mũthingu, o na gũtuĩka andũ a gũkũ thĩ matikũũĩ-rĩ, niĩ nĩ ngũũĩ, nao nĩ moĩ atĩ nĩwe ũndũmĩte.

Nĩ menyithanĩtie rĩĩtwa rĩaku kũrĩ o, na nĩ ngũkĩrĩrĩria kũrĩmenyithania, nĩgetha wendani ũrĩa ũnyendete naguo ũikarage thĩinĩ wao na nĩguo o na niĩ mwene ngoragwo thĩinĩ wao.”