Johana 19

Hĩndĩ ĩyo Pilato akĩoya Yahshua, akĩmũhũũrithia iboko

Nacio thigari igĩtuma thũmbĩ ya mĩigua, ikĩmwĩkĩra mũtwe, na ikĩmũhumba kanjũ ya rangi wa ndathi,

igathiiaga harĩ we o ihinda kwa ihinda, ikamũnyũrũragia ikiugaga atĩrĩ, “Geithĩka, mũthamaki wa Ayahudi!” Nacio ikamũgũthaga ũthiũ na hĩ.

O rĩngĩ Pilato akiuma nja, akĩĩra Ayahudi atĩrĩ, “Ta onei ngũmũruta nja ndĩmũrehe kũrĩ inyuĩ, nĩguo mũmenye atĩ niĩ ndionete ũndũ o na ũrĩkũ angĩthitangĩrwo.”

Rĩrĩa Yahshua oimire nja ekĩrĩte thũmbĩ ĩyo ya mĩigua na ehumbĩte kanjũ ĩyo ya rangi wa ndathi-rĩ, Pilato akĩmera atĩrĩ, “Mũndũ nĩ ũyũ!”

Rĩrĩa athĩnjĩri-Yahweh arĩa anene o na atongoria a Ayahudi maamuonire, makĩanĩrĩra makiuga atĩrĩ, “Mũcuurie mũtĩ-igũrũ! Mũcuurie mũtĩ-igũrũ!” No Pilato akĩmacokeria atĩrĩ, “Muoei mũmũcuurie mũtĩ igũrũ arĩ inyuĩ. Ha ũhoro wakwa, ndirona ũndũ o na ũrĩkũ angĩthitangĩrwo.”

Nao Ayahudi makiuga magwatĩirie atĩrĩ, “Ithuĩ nĩ tũrĩ Watho; na kũringana na Watho ũcio no nginya akue, tondũ nĩ etuĩte Mũrũ wa Kĩhoti.”

Rĩrĩa Pilato aiguire ũguo, agĩĩtigĩra mũno makĩria,

agĩcoka thĩinĩ wa nyũmba ĩyo ya ũthamaki. Ningĩ akĩũria Yahshua atĩrĩ, “Wee-rĩ, uumĩte kũ?” Nowe Yahshua ndaigana kũmũcokeria.

Pilato akĩmũũria atĩrĩ, “Kaĩ ũkũrega kũnjarĩria? Kaĩ ũtoĩ ndĩ na ũhoti wa gũkuohorithia, kana wa gũgũcuurithia mũtĩ igũrũ?”

Nake Yahshua akĩmũcokeria atĩrĩ, “Wee ndũngĩrĩ na ũhoti igũrũ rĩakwa korwo ndũheetwo guo kuuma igũrũ. Nĩ ũndũ ũcio ũrĩa ũũneanire kũrĩ wee nĩwe ũrĩ na mehia marĩa manene.”

Kuuma hĩndĩ ĩyo, Pilato akĩgeria kuohora Yahshua, no Ayahudi magĩthiĩ na mbere kwanĩrĩra atĩrĩ, “Ũngĩrekereria mũndũ ũyũ, wee ndũrĩ mũrata wa Kaisari. Mũndũ o wothe wĩtuaga mũthamaki nĩ amenete Kaisari.”

Rĩrĩa Pilato aiguire ũguo-rĩ, akiumia Yahshua nja, na agĩikarĩra gĩtĩ kĩa mũtuanĩri cira handũ hoĩkaine ta Gabatha (ũguo nĩ ta kuuga “Harĩa-haare-Mahiga”)

Kwarĩ mũthenya wa Ihaarĩria rĩa Kiumia gĩa Gĩathĩ kĩa Bathaka; na kwarĩ ta thaa thita. Nake Pilato akĩĩra Ayahudi atĩrĩ, “Ũyũ mũthamaki wanyu.”

No-o makĩanĩrĩra, makiuga atĩrĩ, “Mweherie! Mweherie! Mũcuurie mũtĩ-igũrũ!” Nake Pilato akĩmooria atĩrĩ, “Njuurie Mũthamaki wanyu?” Nao athĩnjĩri-Yahweh arĩa anene magĩcokia atĩrĩ, “Ithuĩ tũtirĩ mũthamaki ũngĩ tiga Kaisari.”

Mũthia-inĩ Pilato akĩmũneana kũrĩ o nĩguo agacuurio mũtĩ-igũrũ. Nacio thigari ikĩnyita Yahshua.

Na ekuuĩire mũtĩ wake wa gũcuurĩrio agĩthiĩ nginya harĩa heetagwo Gologotha (rĩgĩtaũrwo nĩ kuuga “ha ihĩndĩ rĩa mũtwe”).

Hau nĩho Maamũcuuririe, na hamwe nake magĩcuuria andũ angĩ erĩ, ũmwe mwena ũmwe na ũcio ũngĩ mwena ũcio ũngĩ; nake Yahshua arĩ gatagatĩ.

Nake Pilato akĩandĩkithia kĩbaũ na gĩkĩhũũrĩrwo mũtĩ-inĩ. Nakĩo kĩandĩkĩtwo atĩrĩ, YAHSHUA WA NAZARETHI, MŨTHAMAKI WA AYAHUDI.

Nao Ayahudi aingĩ magĩthoma maandĩko macio, nĩgũkorwo handũ harĩa Yahshua aacuurĩirio haarĩ hakuhĩ na itũũra rĩu inene, nakĩo kĩbaũ kĩu kĩandĩkĩtwo na Kĩhibirania, na Kĩlatini, na Kĩyunani.

Nao athĩnjĩri-Yahweh arĩa anene a Ayahudi makĩĩra Pilato atĩrĩ, “Tiga kwandĩka ‘Mũthamaki wa Ayahudi’, no andĩka atĩ mũndũ ũyũ nĩ kuuga oigire atĩ nĩwe mũthamaki wa Ayahudi.”

Nake Pilato akĩmacokeria atĩrĩ, “Ũguo ndandĩka nĩ ndandĩka!”

Rĩrĩa thigari ciarĩkirie gũcuuria Yahshua, ikĩoya nguo ciake, igĩcigayania maita mana, o mũndũ yake, no kanjũ yatigarire. Nguo ĩyo ndĩarĩ na rũtumo, yatumĩtwo kuuma igũrũ nginya thĩ ĩrĩ o tama ũmwe.

Nacio ikĩĩrana atĩrĩ, “Nĩ tũtigei kũmĩtarũra; rekei tũmĩcuukĩre mĩtĩ nĩguo tũmenye ũrĩa ũgũthiĩ nayo.” Gwekĩkire ũguo nĩguo Maandĩko mahinge marĩa moigĩte atĩrĩ, “Maagayanire nguo ciakwa, na magĩcuukĩra kanjũ yakwa mĩtĩ.” Ũguo nĩguo thigari ciekire.

Hakuhĩ na mũtĩ wa Yahshua nĩho nyina aarũgamĩte, na mwarĩ wa nyina na nyina, na Mariamu mũtumia wa Kiliopa, na Mariamu Mũmagidali.

Rĩrĩa Yahshua onire nyina na mũrutwo ũrĩa endete marũngiĩ hakuhĩ nake, akĩĩra nyina atĩrĩ, “Mũtumia ũyũ, ũcio mũrũguo,”

agĩcoka akĩĩra mũrutwo ũcio atĩrĩ, “Ũcio maitũguo.” Kuuma hĩndĩ ĩyo mũrutwo ũcio akĩoya nyina wa Yahshua, agĩthiĩ gũtũũra mũciĩ kwa mũrutwo ũcio.

Thutha ũcio, Yahshua amenya atĩ maũndũ mothe nĩ mathira, na nĩguo Maandĩko mahinge, akiuga atĩrĩ, “Nĩ nyotiĩ.”

Hau nĩ haarĩ na cuba yarĩ na thiki, nĩ ũndũ ũcio thigari igĩtobokia thibũnji ho, igĩcoka igĩthecerera thibũnji ĩyo rũthanju-inĩ rwa mũthobi, ikĩmĩtwarĩrĩria kanua-inĩ ka Yahshua.

Hĩndĩ ĩrĩa Yahshua aamĩkundire, akiuga atĩrĩ, “Ũhoro nĩ wathira.” Na oiga ũguo, akĩinamia mũtwe, agĩtuĩkana.

Na rĩrĩ, kwarĩ mũthenya wa Ihaarĩria wa Ayahudi, nĩguo marokere Thabatũ ya mwanya. Na tondũ Ayahudi matiendaga mĩĩrĩ ĩyo ĩtigwo mĩtĩ-inĩ hĩndĩ ya Thabatũ, makĩũria Pilato aathane atĩ andũ acio maacuurĩtio moinwo magũrũ, na mĩĩrĩ yao ĩcuurũrio

Nĩ ũndũ ũcio thigari igĩthiĩ ikiuna magũrũ ma mũndũ wa mbere ũrĩa macuuranĩirio na Yahshua na igĩcoka ikiuna ma ũcio ũngĩ.

No rĩrĩa maakinyire harĩ Yahshua na makĩona atĩ nĩ arĩkĩtie gũkua, makĩaga kuuna magũrũ make.

Handũ ha ũguo-rĩ, mũthigari ũmwe agĩtheca Yahshua mbaru na itimũ, na o rĩmwe hakiura thakame na maĩ.

Nake mũndũ ũrĩa wonire maũndũ macio nĩ arutĩte ũira, naguo ũira wake nĩ wa ma. We nĩ oĩ atĩ aaragia ũhoro wa ma, na oimbũraga nĩgetha o na inyuĩ mwĩtĩkie.

Namo maũndũ macio meekĩkire nĩgetha Maandĩko mahinge marĩa moigĩte atĩrĩ, “Gũtirĩ ihĩndĩ o na rĩmwe rĩake rĩkoinwo.”

O na ningĩ no harĩ Maandĩko mangĩ moigĩte atĩrĩ, “Makeerorera mũndũ ũrĩa maathecire.”

Thutha ũcio, Jusufu wa Arimathea akĩhoya Pilato mwĩrĩ wa Yahshua. Na rĩrĩ, Jusufu aarĩ mũrutwo wa Yahshua, no amũrũmagĩrĩra na hitho tondũ wa gwĩtigĩra Ayahudi. Nake Pilato akĩmũhe rũtha, nake agĩthiĩ agĩkuua mwĩrĩ ũcio.

Maathiire na Nikodemo, ũrĩa wathiĩte kũrĩ Yahshua ũtukũ. Nikodemo agĩtwara mũtukanio wa manemane na thubiri ingĩkinya o ta ratiri mĩrongo mũgwanja na ithano.

Nao erĩ makĩoya mwĩrĩ wa Yahshua, makĩwoha na matama ma gatani hamwe na mĩtukanio ĩyo mĩnungi wega, kũringana na mĩtugo ya Ayahudi ya gũthikana.

Hau Yahshua aacuurĩirio nĩ haarĩ na mũgũnda, na thĩinĩ wa mũgũnda ũcio nĩ kwarĩ na mbĩrĩra njerũ, ĩrĩa ĩtakoretwo ĩigĩtwo mwĩrĩ wa mũndũ o na ũmwe.

Tondũ kwarĩ mũthenya wa Ihaarĩria wa Ayahudi nĩguo marokere Thabatũ, na ningĩ nĩ ũndũ mbĩrĩra ĩyo yarĩ o hakuhĩ-rĩ, makĩiga Yahshua ho.