Johana 3
Nĩ kwarĩ mũndũ warĩ Mũfarisai wetagwo Nikodemo, na aarĩ mũtongoria wa Ayahudi
Mũndũ ũcio agĩthiĩ kũrĩ Yahshua ũtukũ akĩmwĩra atĩrĩ: “Rabii, nĩ tũĩ atĩ wee ũrĩ mũrutani uumĩte kũrĩ Yahweh, nĩ gũkorũo gũtirĩ mũndũ ũngĩringa ciama iria ũringaga Yahweh atarĩ hamwe nake.”
Nake Yahshua akĩmũcokeria akĩmwĩra: “Ngũkwĩra atĩrĩ o ma o ma, mũndũ angĩaga gũciarũo rĩngĩ, ndangĩona Ũthamaki wa Yahweh.”
Nikodemo akĩmũũria: “Mũndũ angĩciarũo atĩa arĩ mũkũrũ? No ahote kũingĩra nda ya nyina riita rĩa kerĩ nĩguo aciarũo rĩngĩ?”
Yahshua akĩmũcokeria: “Ngũkwĩra atĩrĩ o ma o ma, mũndũ angĩaga gũciarũo na maĩ na Roho, ndangĩingĩra Ũthamaki-inĩ wa Yahweh
Kĩrĩa gĩciarĩtwo kuumana na mwĩrĩ nĩ mwĩrĩ, na kĩrĩa gĩciarĩtwo kuumana na Roho nĩ Roho
Ndũkagege tondũ nĩ ndakwĩra atĩrĩ: No mũhaka ũciarũo rĩngĩ
Rũhuho rũhurutanaga na kũrĩa rũkwenda, na ũkaigua mũgambo waruo, no ndũmenyaga kũrĩa rũroima na kũrĩa rũrathiĩ. Ũguo no taguo gũtariĩ ũhoro-inĩ wa mũndũ wothe ũrĩa ũciarĩtwo kuumana na Roho.”
Nake Nikodemo akĩmũũria atĩrĩ: “Maũndũ macio mangĩhoteka atĩa?”
Yahshua akĩmũũria: “Wee ũrĩ mũrutani wa Isiraeli na ndũĩ maũndũ macio
Ngũkwĩra atĩrĩ o ma o ma, maũndũ marĩa tũĩ nĩmo twaragia, na marĩa tuonete tũkamarutĩra ũira, no inyuĩ mũtiamũkagĩra ũira ũrĩa tũrutaga
Angĩkorũo ndakwĩra maũndũ ma gũkũ thĩ na ndũretĩkia-rĩ, ũngĩgĩtĩkia atĩa ingĩkwĩra maũndũ ma igũrũ
Makĩria ma ũguo-rĩ, gũtirĩ mũndũ ũrĩ wambata igũrũ o tiga ũrĩa waikũrũkire kuuma igũrũ, na nĩwe Mũrũ wa mũndũ.
Na o ta ũrĩa Musa aacuuririe nyoka werũ-inĩ, noguo Mũrũ wa mũndũ agaacuurio,
nĩguo mũndũ ũrĩa wothe ũmwĩtĩkagia agĩe na muoyo wa tene na tene.
“Nĩ gũkorũo Yahweh nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũmwĩtĩkagia ndakananinwo no agĩe na muoyo wa tene na tene
Tondũ Yahweh ndaatũmire Mũrũ wake thĩinĩ wa thĩ nĩguo amĩtuĩre, no aamũtũmire nĩguo thĩ ĩhonokio kũgerera harĩ we
Mũndũ o wothe wonanagia wĩtĩkio harĩ we ti wa gũtuĩrũo. Mũndũ o wothe ũtonanagia wĩtĩkio nĩ arĩkĩtie gũtuĩrũo, nĩ gũkorũo ndonanagia wĩtĩkio thĩinĩ wa rĩĩtwa rĩa Mũrũ wa mũmwe wa Yahweh
Ũyũ nĩguo mũthingi wa ituĩro: ũtheri nĩ ũũkĩte thĩinĩ wa thĩ, no andũ nĩ mendete nduma handũ ha ũtheri, nĩ gũkorũo ciĩko ciao ciarĩ njũru
Tondũ mũndũ o wothe ũmenyerete gwĩkaga maũndũ moru nĩ athũire ũtheri na ndokaga ũtheri-inĩ, nĩguo ciĩko ciake itikaguũrio
No mũndũ o wothe wĩkaga maũndũ marĩa magĩrĩire nĩ okaga ũtheri-inĩ, nĩguo ciĩko ciake imenyeke atĩ ciĩkĩtwo kũringana na wendi wa Yahweh.”
Thutha ũcio, Yahshua na arutwo ake magĩthiĩ Yahuda mĩgũnda-inĩ, na agĩikara nao kũu kwa ihinda, na nĩ aabatithanagia
No Johana o nake nĩ aabatithanagia thĩinĩ wa Ainoni hakuhĩ na Salimu, tondũ kũu nĩ kwarĩ na maĩ maingĩ, na andũ maaikaraga o magĩũkaga na makabatithio;
nĩ gũkorũo hĩndĩ ĩyo Johana ndaaikĩtio njera.
Na rĩrĩ, arutwo a Johana makĩgĩa ngarari na Mũyahudi ũmwe igũrũ rĩgiĩ gwĩtheria
Thutha ũcio magĩthiĩ kũrĩ Johana makĩmwĩra: “Rabii, mũndũ ũrĩa mwarĩ nake mũrĩmo wa Jorodani, ũrĩa wee warutire ũira igũrũ rĩake, nĩ arabatithania, na andũ othe marathiĩ kũrĩ we.”
Nake Johana akĩmacokeria akĩmera: “Mũndũ ndangĩgĩa na kĩndũ o na kĩmwe tiga aheirũo kuuma igũrũ
Inyuĩ ene mũrĩ aira a ũrĩa ndoigire atĩ, ‘Niĩ ti niĩ Messiya, ĩndĩ nĩ gũtũmwo ndũmĩtwo njũke mbere yake.’
Mũndũ o wothe ũrĩ na mũhiki nĩwe mũhikania. No rĩrĩa mũrata wa mũhikania arũgama hakuhĩ nake na aigua akĩaria, nĩ akenaga mũno nĩ kũigua mũgambo wa mũhikania. Nĩ ũndũ ũcio, gĩkeno gĩakwa nĩ gĩkinyanĩru
Ũcio no mũhaka athiĩ na mbere kuongerereka, ĩndĩ niĩ no mũhaka thiĩ na mbere kũnyiha.”
Ũrĩa uumĩte igũrũ akoragwo arĩ igũrũ rĩa arĩa angĩ othe. Ũrĩa uumĩte thĩ oimĩte thĩinĩ wa thĩ na aragia maũndũ ma thĩ. Ũrĩa uumĩte igũrũ akoragwo arĩ igũrũ rĩa arĩa angĩ othe
Arutaga ũira igũrũ rĩa maũndũ marĩa onete na akaigua, no gũtirĩ mũndũ wĩtĩkagĩra ũira wake
Mũndũ o wothe wĩtĩkĩrĩte ũira wake nĩ ahũũrĩte mũhũũri atĩ Yahweh nĩ wa ma
Nĩ gũkorũo ũrĩa ũtũmĩtwo nĩ Yahweh aragia ciugo cia Yahweh, tondũ We aheanaga Roho ategũthima
Ithe nĩ endete Mũriũ na nĩ aheanĩte indo ciothe guoko-inĩ gwake.
Ũrĩa wonanagia wĩtĩkio harĩ Mũriũ arĩ na muoyo wa tene na tene; ũrĩa ũtaathĩkagĩra Mũriũ ndakona muoyo, ĩndĩ marakara ma Yahweh megũtũũra igũrũ rĩake.