Johana 5
Thutha ũcio, nĩ kwarĩ na gĩathĩ kĩa Ayahudi, na Yahshua akĩambata agĩthiĩ Yahrushalayim
Na rĩrĩ, kũu Yahrushalayim Kĩhingo-inĩ kĩa Ngʼondu, nĩ kwarĩ na karia geetagwo na Kĩhibirania Bethzatha, na kaarĩ na ithaku ithano
Thĩinĩ wacio nĩ kwarĩ na kĩrĩndĩ kĩnene kĩa andũ maakomete ho arũaru, atumumu, arĩa maathuaga, na angĩ maakuĩte ciĩga
Na mũraika nĩ atonyaga ho thĩiniĩ ithaa rĩngĩ akaunjuga maĩ, na mũndũ ũrĩa watoboka mbere thĩiniĩ wa karia kau thutha wa kunjugwo, nĩ ahonagio mũrimũ o wothe wake.
No hau nĩ haarĩ mũndũ ũmwe watũũrĩte arĩ mũrũaru mĩaka 38
Rĩrĩa Yahshua oonire mũndũ ũcio akomete hau na amenya atĩ aakoretwo arĩ mũrũaru kwa ihinda iraya, akĩmũũria atĩrĩ: “Nĩ ũkwenda kũhona?”
Mũndũ ũcio warĩ mũrũaru akĩmũcokeria: “Mũthuri ũyũ, ndirĩ na mũndũ wa kũndonyia karia-inĩ rĩrĩa maĩ maunjugwo, na rĩrĩa ndathiĩ gũtonya, mũndũ ũngĩ agatonya mbere yakwa.”
Yahshua akĩmwĩra: “Ũkĩra! Oya mũgeka waku na wĩtware.”
Na o rĩo mũndũ ũcio akĩhona, akĩoya mũgeka wake na akĩambĩrĩria gwĩtwara.
Nĩ ũndũ ũcio Ayahudi makĩambĩrĩria kwĩra mũndũ ũcio wahonetio atĩrĩ: “Nĩ mũthenya wa Thabatũ, na ndwagĩrĩirũo gũkuua mũgeka ũcio.”
No we akĩmacokeria: “Mũndũ ũrĩa wahonia nowe wanjĩĩra atĩrĩ, ‘Oya mũgeka waku na wĩtware.’”
Nao makĩmũũria: “Nĩ mũndũ ũrĩkũ ũcio wakwĩra, ‘Oya mũgeka na wĩtware’?”
No we ndaamenyaga nũ wamũhonetie, tondũ Yahshua nĩ eeherete agatonya kĩrĩndĩ-inĩ kĩrĩa kĩarĩ hau.
Thutha ũcio Yahshua akĩmũkora thĩinĩ wa hekarũ na akĩmwĩra ũũ: “Nĩ ũkuona rĩu ũrĩ mũhonu! Ndũkanehie rĩngĩ, nĩguo ndũgakorũo nĩ ũndũ mũũru makĩria.”
Mũndũ ũcio agĩthiĩ na akĩĩra Ayahudi atĩ nĩ Yahshua wamũhonetie
Nĩ ũndũ wa gĩtũmi kĩu, Ayahudi nĩ maanyariraga Yahshua, tondũ wa gwĩka maũndũ macio mũthenya wa Thabatũ
No we akĩmacokeria atĩrĩ: “Awa atũire arutaga wĩra o nginya rĩu, o na niĩ ndũire ndutaga wĩra.”
Kĩu nĩkĩo gĩatũmire Ayahudi mambĩrĩrie gũcaria makĩria ũrĩa mangĩmũũraga, tondũ to Thabatũ ooinaga, no ningĩ nĩ eetaga Yahweh Awa, akeiganania na Yahweh.
Nĩ ũndũ ũcio, akĩmacokeria akĩmera: “Ngũmwĩra atĩrĩ o ma o ma, Mũriũ ndangĩka ũndũ o na ũmwe eĩrĩte we mwene, no ekaga o ũrĩa tu onaga Ithe agĩka. Tondũ maũndũ marĩa Ithe ekaga, Mũriũ ekaga maũndũ macio o taguo
Nĩ gũkorũo Ithe nĩ endete Mũriũ na nĩ amuonagia maũndũ marĩa mothe we mwene ekaga, na nĩ ekũmuonia maũndũ manene gũkĩra macio, nĩguo inyuĩ mũgege
Nĩ gũkorũo o ta ũrĩa Ithe ariũkagia arĩa akuũ akamacokia muoyo, noguo Mũriũ o nake acokagia muoyo mũndũ o wothe ũrĩa enda gũcokia muoyo
Nĩ gũkorũo Ithe ndatuagĩra mũndũ o na ũmwe, no ũhoro wothe wa gũtuanĩra ehokeire Mũriũ,
nĩguo andũ othe maheage Mũriũ gĩtĩo o ta ũrĩa maheaga Ithe gĩtĩo. Mũndũ o wothe ũtaheete Mũriũ gĩtĩo ndaheete Ithe ũrĩa wamũtũmire gĩtĩo.
Ngũmwĩra atĩrĩ o ma o ma, mũndũ o wothe ũiguaga ciugo ciakwa na agetĩkia Ũrĩa wandũmire arĩ na muoyo wa tene na tene, na ndagaatuĩrũo no nĩ oimĩte gĩkuũ-inĩ agatonya muoyo-inĩ.
“Ngũmwĩra atĩrĩ o ma o ma, ihinda nĩ rĩroka, na rĩu nĩ ikinyu, rĩrĩa arĩa makuĩte makaaigua mũgambo wa Mũrũ wa Yahweh, na arĩa mekũũthikĩrĩria nĩ magaatũũra muoyo
Nĩ gũkorũo o ta ũrĩa Ithe arĩ na muoyo thĩinĩ wake, nĩ ahotithĩtie Mũriũ o nake gũkorũo na muoyo thĩinĩ wake
Na nĩ amũheete wathani wa gũtuanĩra, tondũ we nĩwe Mũrũ wa mũndũ
Mũtikagegio nĩ ũhoro ũcio, nĩ gũkorũo ihinda nĩ rĩroka, rĩrĩa arĩa othe marĩ thĩinĩ wa mbĩrĩra makaaigua mũgambo wake
na moime kuo, arĩa meekaga maũndũ mega moimĩre iriũkĩro rĩa muoyo, nao arĩa meekaga maũndũ moru moimĩre iriũkĩro rĩa gũtuĩrũo.
Ndingĩka ũndũ o na ũmwe ndĩĩrĩte niĩ mwene. Nduaga cira kũringana na ũrĩa ndaigua, na ituĩro rĩakwa nĩ rĩa ũthingu tondũ ndiĩkaga wendi wakwa, no njĩkaga wendi wa ũrĩa wandũmire.
“Korũo nĩ niĩ nyiki ndutaga ũira igũrũ rĩakwa mwene, ũira wakwa ndũngĩkorũo ũrĩ wa ma
Nĩ harĩ ũngĩ ũrutaga ũira igũrũ rĩakwa, na nĩ njũĩ atĩ ũira ũrĩa arutaga igũrũ rĩakwa nĩ wa ma
Inyuĩ nĩ mũtũmĩte andũ kũrĩ Johana, na akaruta ũira igũrũ rĩgiĩ ũhoro ũrĩa wa ma
O na kũrĩ ũguo-rĩ, ndiĩtĩkagĩra ũira wa kuuma kũrĩ mũndũ, no ndĩroiga maũndũ macio nĩgetha inyuĩ mũhonokio
Mũndũ ũcio aarĩ tawa ũrakana na ũkaruta ũtheri, na kwa ihinda inyinyi nĩ mweriragĩria gũkenera mũno ũtheri wake
No ũira wakwa nĩ mũnene gũkĩra wa Johana, nĩ gũkorũo mawĩra marĩa Awa aaheire ndute, o maya ndĩraruta, nĩ marutaga ũira atĩ ndũmĩtwo nĩ Awa.
Na Awa ũcio wandũmire nĩ arutĩte ũira igũrũ rĩakwa. Inyuĩ gũtirĩ hĩndĩ mũrĩ mwaigua mũgambo wake kana mũkona ũrĩa atariĩ,
na kiugo gĩake gĩtiikaraga thĩinĩ wanyu, tondũ mũtiĩtĩkagia ũrĩa watũmirũo nĩwe.
“Inyuĩ mũthuthuragia Maandĩko tondũ mwĩciragia nĩ mũkoona muoyo wa tene na tene nĩ ũndũ wamo; na macio nĩmo marutaga ũira igũrũ rĩakwa
Ĩndĩ mũtiendaga gũka kũrĩ niĩ nĩguo mũgĩe na muoyo
Niĩ ndiĩtĩkagĩra rũgooco kuuma kũrĩ andũ,
no nĩ njũĩ wega atĩ mũtirĩ na wendo kwerekera Yahweh thĩinĩ wanyu
Njũkĩte na rĩĩtwa rĩa Awa, no mũtinjĩtĩkagĩra. No mũndũ ũngĩ angĩũka na rĩĩtwa rĩake mwene, ũcio no mũmwĩtĩkĩre
Mũngĩgĩtĩkia atĩa na mwĩtĩkagĩra kũgoocana inyuĩ ene, na mũticaragia rũgooco rũrĩa ruumaga kũrĩ Yahweh ũrĩa ũmwe?
Mũtigecirie atĩ nĩ ngũmũthitanga kũrĩ Awa; nĩ harĩ ũrĩa ũmũthitangaga, nĩwe Musa, ũrĩa inyuĩ mũkoragwo mũigĩte mwĩhoko wanyu harĩ we
Korũo nĩ mwĩtĩkĩtie Musa, o na niĩ mwanjĩtĩkia, nĩ gũkorũo nĩ aandĩkire ũhoro wakwa
No angĩkorũo mũtiĩtĩkĩtie ũhoro ũrĩa aandĩkire-rĩ, mũngĩgĩtĩkia atĩa ũrĩa njugaga?”