Johana 6
Thutha wa maũndũ macio Yahshua akĩringa Iria rĩa Galili, na norĩo rĩtagwo rĩa Tiberia
Na andũ aingĩ nĩ maathiaga mamuumĩte thutha, tondũ nĩ moonaga ciama iria aaringaga akĩhonia arũaru
Nĩ ũndũ ũcio Yahshua akĩambata kĩrĩma-inĩ agĩikara thĩ hau hamwe na arutwo ake
Hĩndĩ ĩyo Bathaka, o yo gĩathĩ kĩa Ayahudi, nĩ yakuhĩrĩirie
Rĩrĩa Yahshua aatiirire maitho akĩona andũ aingĩ magĩũka harĩ we, akĩũria Filipu: “Tũkũgũra mĩgate kũ nĩguo andũ aya marĩe?”
No ooririe ũguo amũgerie, nĩ gũkorũo nĩ aamenyaga ũrĩa eendaga gwĩka
Filipu akĩmũcokeria atĩrĩ: “Mĩgate ya dinari magana merĩ ndĩngĩmaigana o mũndũ na arĩ kenyũ kanini.”
Ũmwe wa arutwo ake wetagwo Andrea mũrũ wa nyina na Simoni Kepha, akĩmwĩra ũũ:
“Haha harĩ na kahĩĩ karĩ na mĩgate ĩtano ya cairi na tũthamaki twĩrĩ tũnini. No icio nĩ kĩ harĩ kĩrĩndĩ kĩnene ũũ?”
Nake Yahshua akiuga: “Ĩrai andũ maikare thĩ.” Na tondũ kũu kwarĩ na nyeki nyingĩ mũno, andũ magĩikara thĩ, na arũme maarĩ ta 5,000
Yahshua akĩoya mĩgate ĩyo, na thutha wa gũcokia ngatho akĩmĩgayania kũrĩ arĩa maaikarĩte thĩ; na noguo eekire na tũthamaki tũu, nao makĩrĩa makĩhũna
Na rĩrĩa maarĩire makĩigania, akĩĩra arutwo ake ũũ: “Cokanĩrĩriai cienyũ iria ciatigara, nĩguo hatikagĩe kĩndũ o na kĩmwe gĩkũũra.”
Nĩ ũndũ ũcio magĩcokanĩrĩria cienyũ iria ciatigirio nĩ arĩa maarĩte mĩgate ĩyo ĩtano ya cairi, ikĩiyũra ikabu 12.
Hĩndĩ ĩrĩa andũ acio moonire kĩama kĩrĩa aaringire, makĩambĩrĩria kuuga: “Hatarĩ nganja ũyũ nĩwe Mũnabii ũrĩa weranĩirũo atĩ nĩ agooka gũkũ thĩ.”
Nake Yahshua, rĩrĩa aamenyire atĩ meendaga gũka mamũnyite nĩguo mamũtue mũthamaki, akĩũra o rĩngĩ agĩthiĩ kĩrĩma-inĩ arĩ wiki.
Na gwakinya hwaĩ-inĩ, arutwo ake magĩikũrũka iria-inĩ,
makĩingĩra gatarũ, makĩringa iria marorete Kaperinaumu. Gũkinyĩria hĩndĩ ĩyo, nduma nĩ yaingĩrĩte na Yahshua ndookĩte kũrĩ-o
Ningĩ iria rĩkĩambĩrĩria kũgĩa na makũmbĩ, tondũ kwarĩ na rũhuho rũnene rwahurutanaga
O na kũrĩ ũguo, rĩrĩa maakoretwo mathiĩte mairo ta ithatũ kana inya, makĩona Yahshua agereire maĩ igũrũ o agĩkuhagĩrĩria gatarũ, nao magĩĩtigĩra
No we akĩmera: “Nĩ niĩ, mũtigetigĩre!”
Nao magĩgĩtĩkĩra aingĩre thĩinĩ wa gatarũ, na hĩndĩ o ĩyo gatarũ gagĩkinya thĩ nyũmũ kũrĩa maathiaga.
Mũthenya ũyũ ũngĩ kĩrĩndĩ kĩrĩa kĩarĩ mwena ũcio ũngĩ wa iria gĩkĩona atĩ hatiarĩ na gatarũ kangĩ tiga o kamwe kanini, na atĩ Yahshua ndaatonyete gatarũ-inĩ kau hamwe na arutwo ake, ĩndĩ arutwo maathiĩte marĩ oiki
No rĩrĩ, tũtarũ twa kuuma Tiberia tũgĩkinya hakuhĩ na harĩa maarĩĩrĩire mĩgate thutha wa Yahshua gũcokia ngatho
Kwoguo rĩrĩa moonire atĩ Yahshua na arutwo ake matiarĩ hau, makĩingĩra tũtarũ-inĩ tũu magĩthiĩ Kaperinaumu gũcaria Yahshua.
Rĩrĩa maamuonire mũrĩmo ũcio ũngĩ wa iria, makĩmũũria: “Rabii, ũkinyire gũkũ rĩ?”
Yahshua akĩmera: “Ngũmwĩra atĩrĩ o ma o ma, mũtiranjaria tondũ wa ciama iria mũronire, ĩndĩ nĩ ũndũ nĩ mũraarĩire mĩgate mũrahũna
Mũtikarutagĩre wĩra irio iria ithũkaga, ĩndĩ rutagĩrai wĩra irio iria itũũraga nĩ ũndũ wa muoyo wa tene na tene, iria Mũrũ wa mũndũ ekũmũhe; nĩ gũkorũo Awa, Yahweh we mwene, nĩ amwĩkĩrĩte mũhũũri wa kuonania nĩ amwĩtĩkĩrĩte.”
Nĩ ũndũ ũcio makĩmũũria: “Twagĩrĩirũo gwĩka atĩa nĩguo tũrute mawĩra ma Yahweh?”
Yahshua akĩmacokeria atĩrĩ: “Ũyũ nĩguo wĩra wa Yahweh, atĩ muonanie wĩtĩkio harĩ ũrĩa aatũmire.”
Nao makĩmũũria ũũ: “Nĩ kĩama kĩrĩkũ ũkũringa tuone nĩguo tũgwĩtĩkie? Nĩ ũndũ ũrĩkũ ũgwĩka
Maithe maitũ ma tene maarĩire maana werũ-inĩ, o ta ũrĩa kwandĩkĩtwo atĩrĩ: ‘Nĩ aamaheire mũgate kuuma igũrũ marĩe.’”
Yahshua agĩcoka akĩmera ũũ: “Ngũmwĩra atĩrĩ na ma, Musa ndaamũheire mũgate kuuma igũrũ, ĩndĩ Awa amũheete mũgate ũrĩa wa ma kuuma igũrũ
Tondũ mũgate wa Yahweh nĩ mũndũ ũrĩa ũikũrũkĩte kuuma igũrũ kũhe kĩrĩndĩ gĩa gũkũ thĩ muoyo.”
Nao makĩmwĩra: “Rabbi, tũheage mũgate ũcio hingo ciothe.”
Yahshua akĩmera: “Nĩ niĩ mũgate wa muoyo. Mũndũ o wothe ũũkaga kũrĩ niĩ ndarĩ hĩndĩ akaahũta, nake ũrĩa wothe wonanagia wĩtĩkio harĩ niĩ ndarĩ hĩndĩ akaanyota
No o ta ũrĩa ndamwĩra, o na nĩ mũnyonete ĩndĩ mũtirĩ mũretĩkia
Arĩa othe heagwo nĩ Awa nĩ marĩũkaga kũrĩ niĩ, na ndirĩ hĩndĩ ngaaingata ũrĩa ũrĩũkaga kũrĩ niĩ;
tondũ ndiumĩte igũrũ ngoka gwĩka wendi wakwa niĩ mwene, ĩndĩ nĩ gwĩka wendi wa ũrĩa wandũmire
Ũyũ nĩguo wendi wa ũrĩa wandũmire, atĩ hatikagĩe mũndũ o na ũmwe ũkũũra harĩ arĩa othe aheete, no atĩ ngaamariũkia mũthenya wa mũthia
Nĩ gũkorũo ũyũ nĩguo wendi wa Awa, atĩ mũndũ o wothe ũkũũranaga Mũriũ na akonania wĩtĩkio harĩ we agĩe na muoyo wa tene na tene, na nĩ ngaamũriũkia mũthenya wa mũthia.”
Nao Ayahudi makĩambĩrĩria kũngʼungʼua nĩ ũndũ wake tondũ nĩ ooigĩte: “Nĩ niĩ mũgate ũrĩa waikũrũkire kuuma igũrũ.”
Na makĩambĩrĩria kuuga ũũ: “Githĩ ũyũ ti Yahshua mũrũ wa Jusufu, na ithe na nyina githĩ tũtimoĩ? Rĩu aroiga atĩa atĩ, ‘Niĩ ndaikũrũkire kuuma igũrũ’?”
Nake Yahshua akĩmacokeria akĩmera: “Tigai kũngʼungʼua gatagatĩ-inĩ kanyu
Gũtirĩ mũndũ ũngĩũka kũrĩ niĩ atagucĩrĩirio nĩ Awa ũrĩa wandũmire na nĩ ngaamũriũkia mũthenya wa mũthia
Nĩ kwandĩke ũũ maandĩko-inĩ ma Anabii: ‘Andũ othe nĩ makaarutwo nĩ Yahweh.’
Ti atĩ nĩ kũrĩ mũndũ wonete Awa, tiga o ũrĩa uumĩte kũrĩ Yahweh; ũcio nĩ onete Awa
Ngũmwĩra atĩrĩ o ma o ma, mũndũ o wothe wĩtĩkagia, arĩ na muoyo wa tene na tene.
“Nĩ niĩ mũgate wa muoyo
Maithe manyu ma tene maarĩire maana werũ-inĩ ĩndĩ nĩ maakuire
Ũyũ nĩguo mũgate ũrĩa ũikũrũkĩte kuuma igũrũ nĩguo mũndũ o wothe aũrĩa ndagakue
Nĩ niĩ mũgate ũrĩa ũrĩ muoyo waikũrũkire kuuma igũrũ. Mũndũ o wothe angĩrĩa mũgate ũyũ egũtũũra tene na tene; na ũrĩa kũrĩ nĩ atĩ, mũgate ũrĩa ngũheana nĩ mwĩrĩ wakwa nĩ ũndũ wa muoyo wa kĩrĩndĩ gĩa gũkũ thĩ.”
Nao Ayahudi makĩambĩrĩria gũkararania o ene makiugaga: “Mũndũ ũyũ angĩtũhe atĩa mwĩrĩ wake tũrĩe?”
Nĩ ũndũ ũcio Yahshua akĩmera: “Ngũmwĩra atĩrĩ o ma o ma, mũngĩaga kũrĩa mwĩrĩ wa Mũrũ wa mũndũ na kũnyua thakame yake, mũtingĩgĩa na muoyo thĩinĩ wanyu
Mũndũ o wothe ũrĩaga mwĩrĩ wakwa na akanyua thakame yakwa, arĩ na muoyo wa tene na tene, na nĩ ngaamũriũkia mũthenya wa mũthia;
nĩ gũkorũo mwĩrĩ wakwa nĩ irio kũna na thakame yakwa nĩ kĩndũ gĩa kũnyua kũna
Mũndũ o wothe ũrĩaga mwĩrĩ wakwa na akanyua thakame yakwa atũũraga thĩiniĩ wakwa, na niĩ ngatũũra thĩiniĩ wake
O ta ũrĩa Awa ũrĩa ũtũũraga muoyo aandũmire na ndũũraga nĩ ũndũ wa Awa, noguo mũndũ o wothe ũrĩaga mwĩrĩ wakwa agaatũũra nĩ ũndũ wakwa
Ũyũ nĩguo mũgate ũrĩa waikũrũkire kuuma igũrũ. Ti ta hĩndĩ ĩrĩa maithe manyu ma tene maarĩire na no maakuire. Mũndũ o wothe ũrĩaga mũgate ũyũ egũtũũra tene na tene.”
Ooigire maũndũ macio hĩndĩ ĩrĩa aarutanaga thĩinĩ wa thunagogi ĩmwe kũu Kaperinaumu.
Rĩrĩa arutwo ake aingĩ maaiguire maũndũ macio, makiuga: “Ũhoro ũcio nĩ wa kũmakania; nũ ũngĩũthikĩrĩria?”
No rĩrĩa Yahshua aamenyire atĩ arutwo ake nĩ maangʼungʼuaga nĩ ũndũ wa ũhoro ũcio-rĩ, akĩmoria: “Kaĩ ũhoro ũcio ũramũhĩnga
Ĩ mũngĩkĩona Mũrũ wa mũndũ akĩambata athiĩte kũrĩa aatũũraga tene
Roho nĩguo wĩkĩranaga muoyo; mwĩrĩ ndũrĩ kĩene o na hanini. Maũndũ macio ndamwĩra-rĩ, nĩ Roho na nĩ muoyo
No nĩ harĩ na amwe anyu matetĩkagia.” Nĩ gũkorũo Yahshua nĩ aamenyaga kuuma o kĩambĩrĩria arĩa mateetĩkagia na mũndũ ũrĩa ũngĩkamũkunyanĩra
Agĩthiĩ na mbere kuuga: “Nĩkĩo ndamwĩra atĩ gũtirĩ mũndũ o na ũmwe ũngĩũka kũrĩ niĩ, tiga etĩkĩririo nĩ Awa.”
Nĩ ũndũ ũcio arutwo ake aingĩ magĩcokerera maũndũ marĩa maatigĩte na matiatwaranire nake rĩngĩ
Kwoguo Yahshua akĩũria arĩa Ikũmi na Erĩ atĩrĩ: “Hihi o na inyuĩ nĩ mũkwenda gũthiĩ?”
Simoni Kepha akĩmũcokeria ũũ: “Rabbi, tũgũgĩthiĩ kũrĩ ũ? Wee ũrĩ na ciugo cia muoyo wa tene na tene
Nĩ twĩtĩkĩtie na tũkamenya atĩ wee nĩwe Ũrĩa Mwamũre wa Yahweh.”
Yahshua akĩmacokeria atĩrĩ: “Githĩ ti niĩ ndamũthuurire inyuĩ ikũmi na erĩ? No ũmwe wanyu nĩ wa ũrĩa mũũru.”
Ũrĩa kũrĩ nĩ atĩ, aaragia ũhoro wa Yahuda mũrũ wa Simoni Mũisikariota, nĩ gũkorũo nĩ aacokire akĩmũkunyanĩra, o na gũtuĩka aarĩ ũmwe wa arĩa Ikũmi na Erĩ.