Joshua 18

Nakĩo kĩrĩndĩ gĩothe gĩa ciana cia Isiraeli gĩkĩgomana Shilo, na gĩkĩamba hema ya gũtũnganwo kũu, tondũ gũkinyĩria hĩndĩ ĩyo nĩ gĩatooretie bũrũri ũcio

Ĩndĩ no gwatigarĩte mĩhĩrĩga mũgwanja ya ciana cia Isiraeli ĩtaaheetwo igai rĩayo

Nĩ ũndũ ũcio Joshua akĩra ciana cia Isiraeli ũũ: “Nĩ nginya rĩ mũkũhũthĩrĩria gũthiĩ kwĩgwatĩra bũrũri ũrĩa Yahweh Kĩhoti wa maithe manyu ma tene amũheete

Thuurai arũme atatũ kuuma harĩ o mũhĩrĩga nĩguo ndĩmatũme; magĩrĩirũo gũthiũrũrũka kũu guothe gĩcigo-inĩ kĩu na macore mabu ya ũrĩa kĩngĩgayanio kũringana na igai rĩao. Thutha ũcio macoke kũrĩ niĩ

Magĩrĩirũo kũgayania gĩcigo kĩu icunjĩ mũgwanja gatagatĩ-inĩ kao. Yahuda egũthiĩ o na mbere gũikara gĩcigo-inĩ gĩake mwena wa mũhuro, nayo nyũmba ya Jusufu ĩthiĩ o na mbere gũikara gĩcigo-inĩ kĩayo mwena wa rũgongo

No inyuĩ-rĩ, mwagĩrĩirũo gũcora mabu ya gĩcigo kĩu mũkĩgayanĩtie icunjĩ mũgwanja, na mũndehere ũhoro ũcio haha, na niĩ nĩ ngũcuka mĩtĩ haha nĩ ũndũ wanyu mbere ya Yahweh Kĩhoti witũ

No Alawii matirĩ na igai gatagatĩ-inĩ kanyu, tondũ ũthĩnjĩri-Yahweh wa Yahweh nĩguo igai rĩao; nao Gadi, Rubeni, na nuthu ya mũhĩrĩga wa Manase nĩ marĩkĩtie kwĩgwatĩra igai rĩao mwena wa irathĩro wa Jorodani, igai rĩrĩa Musa ndungata ya Yahweh aamaheire.”

Arũme acio magĩkĩĩhaarĩria gũthiĩ, nake Joshua agĩatha andũ acio maathiaga gũcora mabu ya gĩcigo kĩu akĩmeera ũũ: “Thiĩi mũthiũrũrũke kũu guothe gĩcigo-inĩ kĩu na mũcore mabu yakĩo na mũcoke kũrĩ niĩ, na niĩ nĩ ngũcuka mĩtĩ nĩ ũndũ wanyu haha mbere ya Yahweh gũkũ Shilo.”

Arũme acio magĩgĩthiĩ na magĩthiũrũrũka kũu guothe gĩcigo-inĩ kĩu na magĩcora mabu yakĩo ibuku-inĩ kũringana na matũũra makĩgayanĩtie icunjĩ mũgwanja. Thutha ũcio magĩcoka kũrĩ Joshua kambĩ-inĩ kũu Shilo

Joshua agĩcuka mĩtĩ nĩ ũndũ wao kũu Shilo mbere ya Yahweh. Joshua arĩ kũu, akĩgayania gĩcigo kĩu kũrĩ ciana cia Isiraeli kũringana na icunjĩ ciao.

Na mũtĩ ũgĩkĩgwĩra mũhĩrĩga wa Benjamini kũringana na mbarĩ ciao, nakĩo gĩcigo kĩrĩa kĩamagwĩrĩire kĩarĩ gatagatĩ ka andũ a Yahuda na andũ a Jusufu

Mwena wa rũgongo, mũhaka wao waambĩrĩirie Jorodani, mũhaka ũcio ũgacoka ũkambata o nginya kĩharũrũka-inĩ kĩa Jeriko mwena wa rũgongo na ũkambata kĩrĩma werekeire ithũĩro, na wathiĩte nginya werũ-inĩ wa Bethi-aveni

Mũhaka ũcio ũgacoka ũkoima kũu ũgathiĩ Luzu, kĩharũrũka-inĩ kĩa Luzu kĩa mwena wa mũhuro, na nokuo Betheli; mũhaka ũcio waikũrũkĩte nginya Atarothu-adari kĩrĩma-inĩ kĩrĩa kĩrĩ mũhuro wa Bethi-horoni ya Kĩanda

Na mũhaka ũcio ũgĩĩkĩrũo mwena wa ithũĩro na ũgĩthiĩ ũrigicũkĩte werekeire mwena wa mũhuro kuuma kĩrĩma-inĩ kĩrĩa kĩng’etheire Bethi-horoni mwena wa mũhuro; wathirĩire Kiriathu-baali, na nokuo Kiriathu-jearimu, itũũra rĩa Yahuda. Ũcio nĩ mwena wa ithũĩro.

Mwena wa mũhuro woimĩte mũthia-inĩ wa Kiriathu-jearimu, mũhaka ũcio ũgathiĩ werekeire ithũĩro; wathiĩte o nginya itherũkĩro-inĩ rĩa maĩ ma Nefitoa

Mũhaka ũcio waikũrũkĩte o nginya mũthia-inĩ wa kĩrĩma kĩrĩa kĩng’etheire Mũkuru wa Mũrũ wa Hinomu, kĩrĩa kĩrĩ Mũkuru-inĩ wa Refaimu mwena wa rũgongo, na ũgaikũrũka Mũkuru-inĩ wa Hinomu, kĩharũrũka-inĩ kĩa Mũjebusi mwena wa mũhuro, na gũikũrũka nginya Eni-rogeli

Na ũgĩĩkĩrũo werekeire rũgongo ũthiĩte nginya Eni-shemeshi na ũgacoka ũkoima hau ũgathiĩ Gelilothu, ĩrĩa ĩng’etheire mwambato wa Adumimu, na ũgaikũrũka nginya ihiga-inĩ rĩa Bohani mũrũ wa Rubeni

Na wathiĩte na mbere o nginya kĩharũrũka-inĩ kĩa mwena wa rũgongo kũng’ethera Araba na ũgaikũrũka o nginya Araba

Mũhaka ũcio wathiĩte na mbere nginya kĩharũrũka-inĩ kĩa Bethi-hogila kĩa mwena wa rũgongo, na mũhaka ũcio wathirĩire rũteere-inĩ rwa mwena wa rũgongo rwa Iria rĩa Cumbĩ mũthia-inĩ wa Jorodani wa mwena wa mũhuro. Ũcio nĩguo warĩ mũhaka wa mwena wa mũhuro

Jorodani nĩyo yarĩ mũhaka wa gĩcigo kĩu mwena wa irathĩro. Rĩu nĩrĩo rĩarĩ igai rĩa njiarũa cia Benjamini kũringana na mbarĩ ciao, kũringana na mĩhaka ya igai rĩu mĩena yothe.

Matũũra ma mũhĩrĩga wa Benjamini kũringana na mbarĩ ciao maarĩ: Jeriko, Bethi-hogila, Emeki-keziza,

Bethi-araba, Zemaraimu, Betheli,

Avimu, Para, Ofara,

Kefari-amoni, Ofini, na Geba—matũũra 12 na icagi ciamo.

Gibeoni, Rama, Beerothu,

Mizipe, Kefira, Moza,

Rekemu, Iripeeli, Tarala,

Zela, Ha-elefu, Jebusi, na nokuo Jerusalemu, Gibea, na Kiriathu—matũũra 14 na icagi ciamo. Rĩu nĩrĩo rĩarĩ igai rĩa njiarũa cia Benjamini kũringana na mbarĩ ciao.