Joshua 4

Na rĩrĩa rũrĩrĩ rũu ruothe rwarĩkirie kũringa Jorodani, Yahweh akĩra Joshua ũũ:

“Oya arũme 12 kuuma harĩ andũ, mũndũrũme ũmwe kuuma harĩ o mũhĩrĩga,

ũmaathe ũmeere ũũ: ‘Oyai mahiga 12 kuuma Jorodani gatagatĩ, harĩa athĩnjĩri-Yahweh marũgamĩte, na mũmakuue mũthiĩ namo mũmabange handũ harĩa mũkũraara.’”

Nĩ ũndũ ũcio Joshua agĩta arũme acio 12 aathuurĩte kuuma harĩ ciana cia Isiraeli, mũndũrũme ũmwe kuuma harĩ o mũhĩrĩga,

na Joshua akĩmeera ũũ: “Hĩtũkai mbere ya Ithandũkũ rĩa Yahweh Kĩhoti wanyu mũthiĩ gatagatĩ ka Jorodani, na o ũmwe wanyu oe ihiga arĩigĩrĩre kĩande-inĩ gĩake, kũringana na mũigana wa mĩhĩrĩga ya ciana cia Isiraeli,

nĩguo matuĩke kĩmenyithia gatagatĩ-inĩ kanyu. Ciana cianyu ingĩkamũũria atĩrĩ, ‘Mwaigire mahiga maya haha nĩkĩ?’

mwagĩrĩirũo gũgaciĩra ũũ: ‘Nĩ tondũ maĩ ma Jorodani nĩ maarũgamirio mbere ya ithandũkũ rĩa kĩrĩkanĩro kĩa Yahweh. Rĩrĩa rĩaringire Jorodani, maĩ ma Jorodani makĩrũgamio. Mahiga maya megũtũũra marĩ kĩririkania harĩ ciana cia Isiraeli.’”

Kwoguo andũ a Isiraeli magĩka o ta ũrĩa Joshua aathanire. Makĩoya mahiga 12 kuuma Jorodani gatagatĩ, o ta ũrĩa Yahweh eerĩte Joshua, kũringana na mũigana wa mĩhĩrĩga ya ciana cia Isiraeli. Makĩmatwara handũ harĩa o maarĩ maraare na makĩmabanga ho.

Ningĩ Joshua akĩbanga mahiga 12 Jorodani gatagatĩ handũ harĩa athĩnjĩri-Yahweh arĩa maakuuĩte ithandũkũ rĩa kĩrĩkanĩro maarũgamĩte, na mahiga macio marĩ o hau nginyagia ũmũthĩ.

Athĩnjĩri-Yahweh arĩa maakuuĩte Ithandũkũ maaikarire marũgamĩte Jorodani gatagatĩ nginya rĩrĩa maũndũ marĩa mothe Yahweh aathĩte Joshua ere andũ meke maarĩkire, kũringana na ũrĩa wothe Musa aathĩte Joshua. Ihinda-inĩ rĩu, andũ makĩringa mehĩkĩte

Na rĩrĩa andũ othe maarĩkirie kũringa, athĩnjĩri-Yahweh makĩringa na Ithandũkũ rĩa Yahweh andũ meroreire

Na Arubeni, Agadi, na nuthu ya mũhĩrĩga wa Manase maaringire mebangĩte marĩ mbũtũ ya mbaara mbere ya ciana cia Isiraeli icio ingĩ, o ta ũrĩa Musa aameerĩte

Thigari ta 40,000 ciĩhaarĩirie nĩ ũndũ wa mbaara ikĩringa irĩ mbere ya Yahweh igĩthiĩ werũ-inĩ mwaraganu wa Jeriko.

Mũthenya ũcio Yahweh agĩtũũgĩria Joshua maitho-inĩ ma andũ othe a Isiraeli, na makĩmũtĩa mũno matukũ mothe ma ũtũũro wake, o ta ũrĩa maatĩĩte Musa.

Yahweh agĩcoka akĩra Joshua ũũ:

“Atha athĩnjĩri-Yahweh arĩa makuuĩte ithandũkũ rĩa Ũira maambate moime Jorodani.”

Kwoguo Joshua agĩatha athĩnjĩri-Yahweh acio akĩmeera atĩrĩ: “Ambatai muume Jorodani.”

Rĩrĩa athĩnjĩri-Yahweh acio maakuuĩte ithandũkũ rĩa kĩrĩkanĩro kĩa Yahweh maambatire kuuma Jorodani gatagatĩ na magũrũ ma athĩnjĩri-Yahweh acio magĩkinyanga thĩ nyũmũ, maĩ ma Jorodani magĩcoka ũrĩa maatariĩ na makiunĩrĩra nginya ndeere-inĩ ciaruo o ta mbere.

Andũ acio maambatire kuuma Jorodani mũthenya wa ikũmi wa mweri wa mbere na makĩamba hema ciao Giligali mũhaka-inĩ wa Jeriko wa mwena wa irathĩro.

Namo mahiga 12 marĩa maarutĩte Jorodani, Joshua akĩmabanga Giligali

Agĩcoka akĩra ciana cia Isiraeli ũũ: “Ihinda rĩũkĩte ciana cianyu ingĩkoria maithe ma cio atĩrĩ, ‘Mahiga maya nĩ ma kĩ?’

mwagĩrĩirũo gũgataarĩria ciana cianyu mũciĩre ũũ: ‘Andũ a Isiraeli maaringire Jorodani magereire thĩ nyũmũ 23 rĩrĩa Yahweh Kĩhoti wanyu aahũithirie maĩ ma Jorodani mbere yao nginya makĩrĩkia kũringa, o ta ũrĩa Yahweh Kĩhoti wanyu eekire Iria Itune rĩrĩa aarĩhũithirie mbere itũ nginya tũkĩrĩkia kũringa

rĩrĩa Yahweh Kĩhoti wanyu aahũithirie maĩ ma Jorodani mbere yao nginya makĩrĩkia kũringa, o ta ũrĩa Yahweh Kĩhoti wanyu eekire Iria Itune rĩrĩa aarĩhũithirie mbere itũ nginya tũkĩrĩkia kũringa.

Eekire ũguo nĩguo ikundi ciothe cia andũ thĩinĩ wa thĩ imenye ũrĩa guoko kwa Yahweh kũrĩ hinya na nĩguo mwĩtigagĩre Yahweh Kĩhoti wanyu hingo ciothe.’”