Joshua 5

Na rĩrĩa athamaki othe a Aamori arĩa maaikaraga mwena wa ithũĩro wa Jorodani na athamaki othe a Akanaani arĩa maaikaraga hakuhĩ na iria maaiguire atĩ Yahweh nĩ aahũithĩtie maĩ ma Jorodani mbere ya ciana cia Isiraeli o nginya rĩrĩa ciarĩkirie kũringa, magĩkua ngoro, na makĩaga ũmĩrĩru nĩ ũndũ wa ciana cia Isiraeli.

Hĩndĩ ĩyo Yahweh akĩra Joshua ũũ: “Thondeka tũhiũ twa ihiga rĩũmũ ũruithie arũme a Isiraeli rĩngĩ, riita rĩa kerĩ.”

Nĩ ũndũ ũcio Joshua agĩthondeka tũhiũ twa ihiga rĩũmũ na akĩruithia ariũ a Isiraeli kĩrĩma-inĩ kĩrĩa gĩetagwo Kĩrĩma gĩa Ikonde

Ũyũ nĩguo ũndũ ũrĩa watũmire Joshua amaruithie: Arũme othe gatagatĩ-inĩ ka andũ arĩa mooimire Misiri, arũme othe a mbaara, nĩ maakuĩrĩire werũ-inĩ marĩ rũgendo-inĩ thutha wao kuuma Misiri

Andũ othe arĩa mooimire Misiri maarĩ aruu, no arĩa othe maaciarĩirũo werũ-inĩ marĩ rũgendo-inĩ thutha wao kuuma Misiri matiarĩ aruu

Ciana cia Isiraeli ciorũrire werũ-inĩ mĩaka 40 o nginya rũrĩrĩ rũu ruothe rũgĩkua, na nĩo arũme a mbaara arĩa mooimĩte Misiri arĩa mataathĩkĩire mũgambo wa Yahweh. Yahweh akĩĩhĩta harĩ o atĩ ndarĩ hĩndĩ akaareka mone bũrũri ũrĩa Yahweh eehĩtĩte harĩ maithe mao ma tene atĩ nĩ agaatũhe, bũrũri ũiyũire iria na ũũkĩ

Kwoguo akĩoya ariũ ao ithenya rĩao. Acio nĩo Joshua aaruithirie; matiarĩ aruu tondũ hĩndĩ ĩrĩa maarĩ rũgendo-inĩ matiamaruithirie.

Rĩrĩa maarĩkirie kũruithia rũrĩrĩ ruothe, magĩikara kambĩ-inĩ o kũu maarĩ nginya rĩrĩa maahonire.

Yahweh agĩcoka akĩra Joshua ũũ: “Ũmũthĩ nĩ ndakwehereria kĩnyũrũri kĩa Misiri.” Nĩ ũndũ ũcio kũndũ kũu gũgĩtwo Giligali nginyagia ũmũthĩ.

Andũ a Isiraeli magĩgĩthiĩ na mbere gũikara kambĩ-inĩ kũu Giligali, na magĩkũngũĩra Bathaka hwaĩ-inĩ wa mũthenya wa 14 wa mweri ũcio, werũ-inĩ mwaraganu wa Jeriko

Na makĩambĩrĩria kũrĩa maciaro ma bũrũri ũcio mũthenya ũrĩa warũmĩrĩire thutha wa Bathaka, mĩgate ĩtarĩ mĩkĩre ndawa ya kũimbia na ngano hĩhie, mũthenya o ro ũcio

Na mũthenya ũrĩa warũmĩrĩire rĩrĩa maarĩire maciaro ma bũrũri ũcio, maana magĩtiga gũkorũo kuo rĩngĩ; Ciana cia Isiraeli itiacokire kũgĩa na maana rĩngĩ, ĩndĩ ikĩambĩrĩria kũrĩa maciaro ma bũrũri wa Kanaani mwaka ũcio.

Na rĩrĩ, Joshua arĩ hakuhĩ na Jeriko, agĩtiira maitho akĩona mũndũ warũgamĩte mbere yake acomorete rũhiũ rwa njora akarũnyita na guoko. Joshua agĩthiĩ harĩ we akĩmũũria: “Ũrĩ mwena witũ kana ũrĩ mwena wa thũ citũ?”

Nake akĩmũcokeria ũũ: “Aca, niĩ njũkĩte ndĩ mũnene wa mbũtũ ya Yahweh.” Joshua aigua ũguo akĩĩgũithia agĩturumithia ũthiũ wake thĩ na akĩmũũria: “Nĩ ũndũ ũrĩkũ mwathi wakwa arenda kũmenyithia ndungata yake?”

Mũnene ũcio wa mbũtũ ya Yahweh akĩra Joshua ũũ: “Ruta iratũ, tondũ handũ haha ũrũgamĩte nĩ hamũre.” O hĩndĩ ĩyo Joshua agĩka guo.