Joshua 6
Na rĩrĩ, itũũra rĩa Jeriko rĩarĩ ihinge biũ nĩ tondũ wa ciana cia Isiraeli; gũtirĩ mũndũ o na ũmwe woimaga kuo na gũtirĩ mũndũ o na ũmwe watonyaga kuo.
Nake Yahweh akĩra Joshua atĩrĩ: “Rĩu nĩ neanĩte Jeriko moko-inĩ maku o hamwe na mũthamaki wakuo na njamba ciakuo cia ita irĩ hinya
Inyuothe arũme a mbaara mwagĩrĩirũo gũthiũrũrũka itũũra rĩu, mũkarĩthiũrũrũka riita rĩmwe o mũthenya. Mwagĩrĩirũo gwĩka ũguo thikũ ithathatũ
Ĩra athĩnjĩri-Yahweh mũgwanja mathiĩ makuuĩte coro mũgwanja cia hĩa cia ndũrũme marĩ mbere ya Ithandũkũ. No mũthenya wa mũgwanja, mwagĩrĩirũo gũthiũrũrũka itũũra rĩu maita mũgwanja nao athĩnjĩri-Yahweh mahuuhe coro icio
Na rĩrĩa coro icio cia hĩa cia ndũrũme ikaahuuhwo—rĩrĩa mũkaaigua mũgambo wa coro icio—andũ othe magĩrĩirũo kuugĩrĩria mbugĩrĩrio nene ya mbaara. Naruo rũthingo rwa itũũra rĩu nĩ rũkaamomoka rũgwe thĩ, nao andũ magĩrĩirũo kwambata, o mũndũ athiĩ na mbere aingĩrĩte kuo.”
Nĩ ũndũ ũcio Joshua mũrũ wa Nuni agĩta athĩnjĩri-Yahweh magĩcokanĩrĩra hamwe, akĩmeera atĩrĩ: “Oyai ithandũkũ rĩa kĩrĩkanĩro, na athĩnjĩri-Yahweh mũgwanja magĩrĩirũo gũthiĩ makuuĩte coro mũgwanja cia hĩa cia ndũrũme marĩ mbere ya Ithandũkũ rĩa Yahweh.”
Agĩcoka akĩra andũ acio ũũ: “Thiĩi mũthiũrũrũke itũũra rĩu, na thigari nĩcio ciagĩrĩirũo gũthiĩ irĩ mbere ya Ithandũkũ rĩa Yahweh irĩ na indo cia mbaara.”
Na o ta ũrĩa Joshua eerire andũ acio, athĩnjĩri-Yahweh mũgwanja arĩa maakuuĩte coro mũgwanja cia hĩa cia ndũrũme marĩ mbere ya Yahweh magĩtongoria na makĩhuuha coro, narĩo ithandũkũ rĩa kĩrĩkanĩro kĩa Yahweh rĩgĩthiĩ rĩmarũmĩrĩire
Nacio thigari irĩ na indo cia mbaara igĩthiĩ itongoretie athĩnjĩri-Yahweh acio maahuuhaga coro, nacio mbũtũ iria ciathiaga igitĩire mwena wa thutha ikĩrũmĩrĩra Ithandũkũ rĩu coro ikĩhuuhagwo itegũtigithĩrio.
Na rĩrĩ, Joshua nĩ aathĩte andũ acio akameera ũũ: “Mũtikoigĩrĩrie o na kana mũtũme mĩgambo yanyu ĩiguo. Mũtikareke kiugo o na kĩmwe kiume tũnua-inĩ twanyu o nginya mũthenya ũrĩa ngaamwĩra ũũ, ‘Ugĩrĩriai!’ Hĩndĩ ĩyo nĩrĩo mũkoigĩrĩria.”
Agĩtũma Ithandũkũ rĩa Yahweh rĩthiũrũrũke itũũra rĩu, rĩgĩthiũrũrũka riita rĩmwe, thutha ũcio magĩcoka kambĩ-inĩ na makĩraara kuo.
Rũcinĩ rũrũ rũngĩ Joshua agĩũkĩra tene, na athĩnjĩri-Yahweh makĩoya Ithandũkũ rĩa Yahweh,
nao athĩnjĩri-Yahweh mũgwanja magĩthiĩ makuuĩte coro mũgwanja cia hĩa cia ndũrũme marĩ mbere ya Ithandũkũ rĩa Yahweh, makĩhuuhaga coro icio mategũtigithĩria. Nacio thigari irĩ na indo cia mbaara igĩthiĩ irĩ mbere yao na thigari iria ciathiaga igitĩire mwena wa thutha igĩthiĩ irũmĩrĩire Ithandũkũ rĩa Yahweh coro ikĩhuuhagwo itegũtigithĩrio
Magĩthiũrũrũka itũũra rĩu mũthenya wa kerĩ riita rĩmwe, na thutha ũcio magĩcoka kambĩ-inĩ. Meekire ũguo thikũ ithathatũ.
Mũthenya wa mũgwanja magĩũkĩra rũcinĩ tene, o hĩndĩ gwathererũka, na magĩthiũrũrũka itũũra rĩu o ta ũrĩa meekaga, makĩrĩthiũrũrũka maita mũgwanja. No mũthenya ũcio tu maathiũrũrũkire itũũra rĩu maita mũgwanja
Na riita rĩa mũgwanja, athĩnjĩri-Yahweh makĩhuuha coro, nake Joshua akĩra andũ acio ũũ: “Ugĩrĩriai, nĩ gũkorũo Yahweh nĩ aneanĩte itũũra rĩrĩ kũrĩ inyuĩ
Itũũra rĩrĩ o hamwe na kĩrĩa gĩothe kĩrĩ kuo ciagĩrĩire kwanangwo; ciothe nĩ cia Yahweh. Rahabu ũrĩa mũmaraya nowe tu wagĩrĩire kũrekwo atũũre muoyo, we o hamwe na arĩa othe marĩ nake nyũmba thĩinĩ, tondũ nĩ aahithire atũmwo arĩa twatũmĩte
No mũtigakuhĩrĩrie indo iria ituĩrĩirũo kwanangwo, nĩgetha mũtikerirĩrie kĩndũ gĩtuĩrĩirũo kwanangwo mũkĩoe, mũtũme kambĩ ya Isiraeli ĩtuĩke kĩndũ gĩtuĩrĩirũo kwanangwo na njĩra ya kũmĩrehera mwanangĩko
No betha yothe o hamwe na thahabu na indo cia gĩcango na cia kĩgera nĩ indo nyamũrĩre Yahweh. Ciagĩrĩire gũtwarũo kĩgĩna-inĩ kĩa Yahweh.”
Nao andũ acio makiugĩrĩria rĩrĩa coro ciahuuhirũo. Rĩrĩa andũ acio maaiguire mũgambo wa coro na makiugĩrĩria mbugĩrĩrio nene ya mbaara, o rĩo rũthingo rũu rũkĩmomoka rũkĩgwa thĩ. Thutha ũcio andũ makĩambata makĩingĩra itũũra-inĩ rĩu, o mũndũ agĩthiĩ na mbere aingĩrĩte kuo, na makĩrĩtunyana
Makĩananga kĩrĩa gĩothe kĩarĩ itũũra-inĩ rĩu na rũhiũ rwa njora, mũndũrũme na mũndũ-wa-nja, mũndũ ũrĩa mwĩthĩ na ũrĩa mũkũrũ, ndegwa, ng’ondu, na ndigiri.
Nake Joshua akĩarĩria arũme arĩa erĩ maathiganĩte bũrũri ũcio akĩmeera atĩrĩ: “Thiĩi mũingĩre nyũmba ya mũtumia ũrĩa mũmaraya, mũrute mũtumia ũcio o hamwe na andũ ake othe, o ta ũrĩa mwehĩtire harĩ we.”
Nĩ ũndũ ũcio, anake acio athigani magĩthiĩ makĩingĩra na makĩruta Rahabu nja, o hamwe na ithe, nyina, ariũ a nyina, na andũ ake othe; makĩruta nyũmba yake yothe, na makĩmatwara o wega handũ nja ya kambĩ ya Isiraeli.
Magĩcoka magĩcina itũũra rĩu na mwaki o hamwe na kĩrĩa gĩothe kĩarĩ kuo. No betha, thahabu, na indo cia gĩcango na cia kĩgera, magĩcineana kĩgĩna-inĩ kĩa nyũmba ya Yahweh
Rahabu ũrĩa warĩ mũmaraya na andũ a nyũmba ya ithe na andũ ake othe no o tu Joshua ataaniinire; na atũire thĩinĩ wa Isiraeli nginya ũmũthĩ, tondũ nĩ aahithire atũmwo arĩa Joshua aatũmĩte magathigane Jeriko.
Na ihinda-inĩ o rĩu Joshua akĩanĩrĩra mwĩhĩtwa ũyũ akiuga: “Kũnyitwo nĩ kĩrumi mbere ya Yahweh nĩ mũndũ ũrĩa ũkaageria gwaka itũũra rĩrĩ rĩa Jeriko rĩngĩ. Nĩ akoorũo nĩ irigithathi rĩake angĩgaaka mũthingi warĩo, na orũo nĩ kĩhinga nda gĩake nĩ ũndũ wa gwaka mĩrango yarĩo.”
Na Yahweh agĩkorũo arĩ hamwe na Joshua, na akĩgĩa igweta thĩinĩ wa thĩ yothe.