Kĩambĩrĩria 30

Rĩrĩa Rakeli oonire atĩ ndaraciarĩra Jakubu ciana-rĩ, akĩiguĩra mwarĩ wa nyina ũiru na akĩambĩrĩria kwĩra Jakubu atĩrĩ: “He ciana, kwaga ũguo nĩ ngũkua.”

Nake Jakubu agĩcinwo nĩ marakara nĩ ũndũ wa Rakeli na akĩmũũria ũũ: “Kaĩ njoete ithenya rĩa Yahweh, o we ũcio ũkũgirĩrĩirie kũgĩa ciana?”

Nĩ ũndũ ũcio Rakeli akĩmwĩra atĩrĩ: “Biliha ngombo yakwa ya mũirĩtu arĩ haha. Koma nake nĩguo anjiarĩre ciana nĩgetha kũgerera harĩ we, o na niĩ ngĩe na ciana.”

Kwoguo akĩmũnengera Biliha ndungata yake arĩ ta mũtumia wake, na Jakubu agĩkoma nake

Biliha akĩgĩa nda na thutha wa ihinda agĩciarĩra Jakubu kahĩĩ

Nake Rakeli akiuga atĩrĩ: “Yahweh nĩ atuĩkĩte mũtuanĩri ciira wakwa na ningĩ nĩ aiguĩte mũgambo wakwa, nginya akahe kahĩĩ.” Nĩkĩo aagetire Dani

Na Biliha, ndungata ya Rakeli akĩgĩa nda rĩngĩ na thutha wa ihinda agĩciarĩra Jakubu kahĩĩ ga kerĩ

Nake Rakeli akiuga ũũ: “Nĩ ngianĩte mũno na mwarĩ wa maitũ. No ningĩ nĩ niĩ hootanĩte!” Nĩ ũndũ ũcio agĩgeta Nafitali.

Rĩrĩa Leah oonire atĩ nĩ atigĩte kũgĩa ciana, akĩoya Zilipa ndungata yake na akĩmũneana kũrĩ Jakubu arĩ ta mũtumia wake

Na Zilipa ndungata ya Leah agĩciarĩra Jakubu kahĩĩ

Nake Leah akiuga atĩrĩ: “Kaĩ ndĩ gũkorũo nĩ ũndũ mwega-ĩ!” Nĩ ũndũ ũcio agĩgeta Gadi

Thutha ũcio Zilipa ndungata ya Leah agĩciarĩra Jakubu kahĩĩ ga kerĩ

Nake Lea akiuga atĩrĩ: “Kaĩ ndĩ mũkenu-ĩ! Nĩ gũkorũo hatarĩ nganja airĩtu nĩ mekuuga ndĩ mũkenu.” Nĩ ũndũ ũcio agĩgeta Asheri.

Na rĩrĩ, matukũ-inĩ ma kũgetha ngano Rubeni agĩthianga nĩ oonire mandarĩki mũgũnda-inĩ. Kwoguo agĩtwarĩra nyina Leah. Nake Rakeli akĩra Leah atĩrĩ: “Ndagũthaitha ũũhe mandarĩki mamwe ma mũrũguo.”

Nake Leah akĩmwĩra ũũ: “Kaĩ arĩ ũndũ mũnini ũguo wooire mũthuri wakwa? Rĩu ũrenda kuoya mandarĩki ma mũrũ wakwa o namo?” Rakeli akĩmwĩra atĩrĩ: “Nĩ wega. Nĩ egũkoma nawe ũtukũ wa ũmũthĩ nawe ũũhe mandarĩki ma mũrũguo.”

Na rĩrĩa Jakubu oimagĩra werũ-inĩ hwaĩ-inĩ, Leah agĩthiĩ kũmũtũnga na akĩmwĩra atĩrĩ: “Nĩ niĩ ũgũkoma na niĩ, tondũ nĩ neanĩte mandarĩki ma mũrũ wakwa marĩ marĩhi nĩ ũndũ waku.” Kwoguo agĩkoma nake ũtukũ ũcio

Nake Yahweh akĩigua na agĩcokia ihoya rĩa Leah, na akĩgĩa nda na thutha wa ihinda agĩciarĩra Jakubu kahĩĩ ga gatano

Nake Leah akiuga atĩrĩ: “Yahweh nĩ aheete mũcara wakwa tondũ nĩ ndaneanire ndungata yakwa kũrĩ mũthuri wakwa.” Nĩ ũndũ ũcio agĩgeta Isakaru

Na Leah akĩgĩa nda rĩngĩ na thutha wa ihinda agĩciarĩra Jakubu kahĩĩ ga gatandatũ

Leah agĩcoka akiuga atĩrĩ: “Yahweh nĩ andanahĩire, ĩni, andanahĩire wega biũ. Rĩu mũthuri wakwa nĩ ekũngirĩrĩria, nĩ gũkorũo nĩ ndĩmũciarĩire tũhĩĩ tũtandatũ.” Nĩ ũndũ ũcio agĩgeta Zebuluni

Thutha ũcio agĩciara kairĩtu na agĩgeta Daina.

Yahweh agĩkĩririkana Rakeli, Yahweh akĩigua na agĩcokia ihoya rĩake, akĩmũhotithia kũgĩa nda

Akĩgĩa nda na agĩciara kahĩĩ. Agĩcoka akiuga atĩrĩ: “Yahweh nĩ anjehereirie kĩnyũrũri!”

Nĩ ũndũ ũcio agĩgeta Jusufu na akiuga ũũ: “Yahweh nĩ anyongereire kahĩĩ kangĩ.”

Thutha wa Rakeli gũciara Jusufu, o hĩndĩ ĩyo Jakubu akĩra Labani ũũ: “Njĩtĩkĩria thiĩ nĩgetha nyinũke gwitũ bũrũri-inĩ witũ

Nengera atumia akwa o hamwe na ciana ciakwa, arĩa ngũtungatĩire nĩ ũndũ wao, nĩgetha thiĩ tondũ wee nĩ ũĩ wega ũrĩa ngũtungatĩire.”

Nake Labani akĩmwĩra atĩrĩ: “Angĩkorũo nĩ njĩtĩkĩrĩkĩte maitho-inĩ maku,—nĩ menyete kũgerera imenyithia cia ũragũri atĩ Yahweh nĩ arandathima nĩ tondũ waku.”

Agĩcoka akiuga atĩrĩ: “Njĩĩra mũcara ũrĩa ũkwenda, na nĩ ngũkũnengera.”

Nake Jakubu akĩmwĩra ũũ: “Wee nĩ ũĩ ũrĩa ngũtungatĩire na ũrĩa rũũru rwaku rũkoretwo rũgĩtherema ndĩ naruo;

warĩ na rũũru rũnini itanoka, no rĩu rũũru rwaku nĩ rũingĩhĩte na rũgaciarana, na Yahweh nĩ akũrathimĩte kuuma rĩrĩa ndokire. Kwoguo-rĩ, niĩ nĩ rĩ ngeekĩra nyũmba yakwa ũndũ?”

Nake Labani akĩmũũria atĩrĩ: “Ũkwenda ngũhe kĩ?” Jakubu akiuga atĩrĩ: “Gũtirĩ kĩndũ ũũkũhe! Angĩkorũo nĩ ũkũnjĩkĩra ũndũ ũyũ ũmwe, nĩ ngũthiĩ na mbere kũrĩithia rũũru rwaku o na kũrũgitĩra

Njĩtĩkĩria thiĩ rũũru-inĩ rwaku ruothe ũmũthĩ. Nawe wamũre ng’ondu ĩrĩa yothe ĩrĩ na marooro na ĩrĩ na marangi maingĩ na ng’ondu yothe ĩrĩ na rangi mũirĩrĩru wa gĩĩtĩri gatagatĩ-inĩ ga tũtũrũme, o hamwe na ĩrĩa yothe ĩrĩ na marangi maingĩ na marooro gatagatĩ-inĩ ka mĩgoma. Kuuma rĩu, icio irĩtuĩkaga mũcara wakwa

Naguo ũthingu wakwa nĩguo ũkanjarĩrĩria mũthenya ũrĩa wee ũgooka kuona mũcara wakwa; ĩrĩa yothe ĩtagaakorũo na marooro na ĩtarĩ na marangi maingĩ gatagatĩ-inĩ ka mĩgoma na ĩtarĩ na rangi mũirĩrĩru wa gĩĩtĩri gatagatĩ-inĩ ga tũtũrũme ĩgaakorũo ĩrĩ ya kũiya ingĩgaakorũo nayo.”

Nĩ ũndũ ũcio Labani akiuga atĩrĩ: “Ũcio nĩ ũndũ mwega! Reke gũtuĩke o ũguo woiga.”

Mũthenya o ro ũcio, akĩamũra thenge iria ciarĩ na mĩcoora na marangi maingĩ na mĩgoma yothe ĩrĩa yarĩ na marooro na marangi maingĩ, ĩrĩa yothe yarĩ na handũ harĩ na rangi mwerũ na ĩrĩa yothe yarĩ na rangi mũirĩrĩru wa gĩĩtĩri gatagatĩ-inĩ ga tũtũrũme, na agĩcineana kũrĩ ariũ ake macirĩithagie

Thutha ũcio agĩikara kũndũ kũraihu, ũraihu wa rũgendo rwa mĩthenya ĩtatũ gatagatĩ-inĩ gake na Jakubu, nake Jakubu aarĩithagia ndũũru cia Labani iria ciatigirũo.

Nake Jakubu akĩoya thanju aakoretwo o hĩndĩ atua cia mũtĩ wa mũribina, wa mũrothi, na wa mũraraciĩ, agĩciũnũra ũndũ ciatigirũo na tũmarooro twa rangi mwerũ na njĩra ya gũtũma werũ wa thĩinĩ wa thanju icio woneke

Agĩcoka akĩiga thanju icio oonũrĩte mbere ya rũũru rũu, mĩharatĩ-inĩ ya maĩ, harĩa ndũũru ciokaga kũnyuĩra maĩ, nĩgetha ikagĩa ũrugarĩ irĩ hau mbere ya thanju icio rĩrĩa cioka kũnyua maĩ.

Nĩ ũndũ ũcio ndũũru cianyitagwo nĩ ũrugarĩ irĩ hau mbere ya thanju icio, na ndũũru icio igaciara tũũri tũrĩ na mĩcoora, marooro, na marangi maingĩ

Nake Jakubu akamũra tũtũrũme na akabanga ndũũru icio ũndũ ikũrora iria irĩ na mĩcoora na iria ciothe cia rangi mũirĩrĩru wa gĩĩtĩri gatagatĩ-inĩ ka ndũũru cia Labani. Agacoka akamũra ndũũru ciake na akaga gũcitukania na ndũũru cia Labani

Na hĩndĩ ĩrĩa yothe nyamũ iria ciarĩ na hinya ciagĩaga na ũrugarĩ, Jakubu aaigaga thanju icio mĩharatĩ-inĩ ĩyo mbere ya maitho ma ndũũru icio, nĩgetha inyitwo nĩ ũrugarĩ irĩ hau harĩ thanju icio

No rĩrĩa haarĩ na nyamũ iria itaarĩ na hinya, ndaigaga thanju icio hau. Kwoguo iria itaarĩ na hinya hingo ciothe ciatuĩkaga cia Labani, no iria ciarĩ na hinya ciatuĩkaga cia Jakubu.

Na mũndũ ũcio akĩgaacĩra mũno, akĩgĩa ndũũru nyingĩ biũ na ndungata cia arũme na cia atumia o hamwe na ngamĩra na ndigiri.