Luka 20
Mũthenya ũmwe rĩrĩa aarutanaga na akahunjia ũhoro ũrĩa mwega thĩinĩ wa hekarũ, anene a athĩnjĩri-Yahweh na aandĩki-marũa hamwe na athuri magĩthiĩ kũrĩ we
makĩmũũria: “Ta twĩre atĩrĩ, wĩkaga maũndũ maya na wathani ũrĩkũ? Kana nũ ũkũheete wathani ũyũ?”
Nake akĩmacokeria atĩrĩ: “O na niĩ nĩ ngũmũũria kĩũria, na inyuĩ mũnjokerie:
Ũbatithio wa Johana woimĩte igũrũ kana woimĩte kũrĩ andũ?”
Nao makĩĩrana atĩrĩ: “Tũngiuga, ‘Woimĩte igũrũ,’ egũtũũria, ‘Mwakĩagire kũmwĩtĩkia nĩkĩ?’
No tũngiuga, ‘Woimĩte kũrĩ andũ,’ andũ othe nĩ megũtũhũũra na mahiga, nĩ gũkorũo metĩkĩtie atĩ Johana aarĩ mũnabii.”
Nĩ ũndũ ũcio makĩmũcokeria atĩ matiũĩ kũrĩa aarutĩte
Yahshua akĩmera: “O na niĩ ndikũmwĩra njĩkaga maũndũ maya na wathani ũrĩkũ.”
Agĩcoka akĩambĩrĩria kũhe andũ ngerekano ĩno: “Mũndũ ũmwe nĩ aahandire mĩthabibũ mũgũnda-inĩ, akĩũkomborithia arĩmi, na agĩthiĩ bũrũri wa kũraya gũikara kuo ihinda iraya
Na rĩrĩa hĩndĩ ya magetha yakinyire-rĩ, agĩtũma ngombo kũrĩ arĩmi acio nĩguo mamĩnengere maciaro mamwe ma mũgũnda ũcio wa mĩthabibũ. No rĩrĩ, arĩmi acio makĩmĩhũũra na makĩmĩingata moko matheri
No o rĩngĩ agĩtũma ngombo ĩngĩ. Ĩyo o nayo makĩmĩhũũra na makĩmĩconorithia na makĩmĩingata moko matheri
O rĩngĩ agĩtũma ya gatatũ; o nayo ĩyo makĩmĩtihangia na makĩmĩingata
Mwene mũgũnda ũcio akiuga, ‘Ngwĩka atĩa rĩu? Ngũtũma mũrũ wakwa ũrĩa nyendete. No kũhoteke nĩ mekũmũhe gĩtĩo.’
Rĩrĩa arĩmi acio maamuonire, makĩĩrana atĩrĩ, ‘Ũyũ nĩwe mũgai. Nĩ tũmũũragei nĩguo igai rĩtuĩke ritũ.’
Kwoguo makĩmũrutũrũra nja ya mũgũnda ũcio wa mĩthabibũ na makĩmũũraga. Hakĩrĩ ũguo-rĩ, mwene mũgũnda ũcio wa mĩthabibũ ageeka arĩmi acio atĩa
Agoka orage arĩmi acio, acoke akomborithie arĩmi angĩ mũgũnda ũcio wa mĩthabibũ.”
No we akĩmarora akiuga: “Kaĩ rĩandĩko rĩrĩ rĩkĩendaga kuuga atĩa: ‘Ihiga rĩrĩa aaki maaregire, nĩrĩo rĩtuĩkĩte ihiga rĩrĩa inene rĩa kona’
Mũndũ o wothe ũrĩa ũkaagũĩra ihiga rĩu nĩ akaahehenjwo. Nake ũrĩa wothe ũkaagũĩrũo nĩrĩo, nĩ rĩkaamũmemenda amumuthũke.”
Nĩ ũndũ ũcio, aandĩki-marũa na anene a athĩnjĩri-Yahweh magĩcaria ũrĩa mangĩmũnyita o hĩndĩ ĩyo tondũ nĩ maamenyire atĩ aaheanire ngerekano ĩyo nĩ ũndũ wao, ĩndĩ nĩ meetigagĩra andũ
Na thutha wa kũmũbaara mũno, magĩtũma andũ arĩa o maarĩhĩte na hitho magetue athingu nĩguo mamũtege na mĩario yake, nĩgetha mamũneane kũrĩ thirikari na kũrĩ wathani wa ngavana
Nao makĩmwĩra atĩrĩ: “Mwathi, nĩ tũĩ atĩ waragia ma na ũkarutana ũrĩa kũrĩ, ndũrĩ mũthutũkanio, ĩndĩ ũrutanaga njĩra ya Kĩhoti kũringana na ũrĩa ma ĩtariĩ:
Hihi nĩ twagĩrĩire kũrĩha Kaisari magooti kana tũtiagĩrĩire?”
No akĩmenya wara wao na akĩmera:
“Ta nyoniai dinari. Mbica ĩno na maandĩko maya nĩ cia ũ?” Nao makĩmwĩra: “Nĩ cia Kaisari.”
Nake akĩmera: “Nĩ ũndũ ũcio-rĩ, rĩhai Kaisari indo cia Kaisari no indo cia Yahweh mũrĩhe Yahweh.”
Nĩ ũndũ ũcio makĩremwo nĩ kũmũtega mĩario-inĩ yake mbere ya andũ, no magĩkira ki nĩ ũndũ wa kũgegio nĩ macokio make.
No rĩrĩ, Asadukai amwe, arĩa moigaga atĩ andũ matikaariũkio, magĩthiĩ kũrĩ we makĩmũũria atĩrĩ:
“Mwathi, Musa aatwandĩkĩire atĩrĩ, ‘Mũrũ wa nyina na mũndũ angĩkua, atige mũtumia no akorũo ndararĩ na mwana, mũrũ wa nyina na mũndũ ũcio agĩrĩire kũhikia mũtumia ũcio nĩguo aciarĩre mũrũ wa nyina ciana.’
Rĩu-rĩ, kwarĩ na ariũ mũgwanja a nyina ũmwe. Wa mbere akĩhikania no agĩkua atagĩĩte mwana
O na wa kerĩ
akĩhikia mũtumia o ũcio, o na wa gatatũ. Na noguo gwathiire harĩ othe mũgwanja; magĩkua matagĩĩte ciana.
Mũthia-inĩ mũtumia ũcio o nake agĩkua
Nĩ ũndũ ũcio-rĩ, hĩndĩ ĩrĩa andũ makaariũkio-rĩ, agaatuĩka mũtumia wa ũ? Nĩ gũkorũo nĩ aatuĩkĩte mũka wao othe mũgwanja.”
Nake Yahshua akĩmera atĩrĩ: “Ciana cia mũtabarĩre ũyũ wa maũndũ nĩ ihikanagia na ikahika,
no andũ arĩa agĩrĩru gũgaatonya mũtabarĩre-inĩ ũcio na kũriũkio kuuma kũrĩ arĩa akuũ matikahikanagia kana makahika
O na gũtirĩ hĩndĩ magaakua rĩngĩ, tondũ magaakorũo matariĩ ta araika, na magaakorũo marĩ ciana cia Yahweh na njĩra ya gũkorũo marĩ ciana cia ũriũkio
No ha ũhoro wa kũriũkio kwa arĩa akuũ, o na Musa nĩ aaũmenyithanirie ũhoro-inĩ wĩgiĩ kĩhinga kĩrĩa kĩa mĩigua, rĩrĩa eetire Yahweh ‘Kĩhoti wa Iburahimu na Kĩhoti wa Isaaka na Kĩhoti wa Jakubu.’
We ti Kĩhoti wa arĩa makuĩte, no nĩ wa arĩa marĩ muoyo, nĩ gũkorũo harĩ we othe marĩ muoyo.”
Nao aandĩki-marũa amwe makĩmũcokeria makĩmwĩra: “Mwathi, nĩ woiga wega.”
Nĩ gũkorũo matiarĩ na ũmĩrĩru rĩngĩ wa kũmũũria kĩũria o na kĩmwe.
Nake akĩmoria atĩrĩ: “Nĩ kĩ gĩtũmaga andũ moige atĩ Messiya nĩ mũrũ wa Daudi?
Nĩ gũkorũo Daudi we mwene oigĩte ũũ thĩinĩ wa ibuku rĩa Thaburi, ‘Yahweh nĩ eerire Mwathi wakwa ũũ: “Ikara thĩ guoko-inĩ gwakwa kwa ũrĩo
nginya rĩrĩa ngaatũma thũ ciaku ituĩke gaturũa ka makinya maku.”’
Kwoguo-rĩ, Daudi amwĩtĩte Mwathi; akĩrĩ mũrũ wake atĩa?”
Na hĩndĩ ĩyo andũ othe maamũthikagĩrĩria, akĩĩra arutwo ake ũũ:
“Mwĩmenyagĩrĩrei aandĩki-marũa arĩa mendete gũthiĩ mehumbĩte kanjũ na mendete kũgeithio nĩ andũ thoko-inĩ na gũikarĩra itĩ cia mbere thunagogi-inĩ na gũikara handũ harĩa hatĩĩku makĩria maruga-inĩ ma hwaĩ-inĩ,
na nĩo manyamaragia mĩciĩ ya atumia a ndigwa, na makahoya mahoya maraihu nĩguo meyonanie. Acio nĩ magaatuĩrũo ituĩro inene makĩria.