Luka 6
Na rĩrĩ, mũthenya ũmwe wa Thabatũ, aatuĩkanagĩria mĩgũnda-inĩ ya ngano, nao arutwo ake maathiaga magĩtuaga igira cia ngano, magĩcirigithaga na moko makĩrĩaga
Rĩrĩa Afarisai amwe moonire ũguo makĩmoria atĩrĩ: “Mũreka ũndũ ũtarĩ mwĩtĩkĩrie mũthenya wa Thabatũ nĩkĩ?”
No Yahshua akĩmacokeria atĩrĩ: “Kaĩ mũtarĩ mwathoma ũrĩa Daudi eekire rĩrĩa we na arũme arĩa maarĩ nake maarĩ ahũtu
Ũrĩa aaingĩrire nyũmba ya Yahweh, akĩamũkĩra mĩgate ya maruta na akĩrĩa, na akĩhe arũme acio maarĩ nake, ĩrĩa gũtarĩ mũndũ wĩtĩkĩrĩtio kũrĩa tiga athĩnjĩri-Yahweh oiki?”
Agĩcoka akĩmera ũũ: “Mũrũ wa mũndũ nĩ Mwathi wa Thabatũ o nayo.”
Na gũgĩkinya atĩrĩ, mũthenya ũngĩ wa Thabatũ, akĩingĩra thĩinĩ wa thunagogi na akĩambĩrĩria kũrutana. Na kwarĩ na mũndũ kũu warĩ muonju guoko kwa ũrĩo
Nao aandĩki-marũa na Afarisai nĩ maaroraga Yahshua mũno mone kana nĩ ekũhonania mũthenya wa Thabatũ, nĩguo mone ũndũ wa kũmũthitangĩra
O na kũrĩ ũguo, nĩ aamenyaga ũrĩa meeciragia, kwoguo akĩĩra mũndũ ũcio warĩ muonju guoko atĩrĩ: “Rũgama na ũũke haha gatagatĩ.” Nake agĩũkĩra na agĩthiĩ akĩrũgama ho
Yahshua agĩcoka akĩmoria atĩrĩ: “Ta njĩrai atĩrĩ, Nĩ ũndũ ũrĩkũ mwĩtĩkĩrĩku mũthenya wa Thabatũ, nĩ gwĩka wega-ĩ kana nĩ gwĩka ũũru, nĩ kũhonokia muoyo-ĩ kana nĩ kũũnina?”
Thutha wa kũmarora othe, akĩĩra mũndũ ũcio atĩrĩ: “Tambũrũkia guoko gwaku.” Agĩgũtambũrũkia, nakuo gũkĩhona
No makĩnyitwo nĩ marakara mahiũ mũno, na makĩambĩrĩria kwarĩrĩria ũrĩa mangĩka Yahshua.
Mũthenya ũmwe matukũ-inĩ macio, nĩ aathiire kĩrĩma-inĩ kũhoya, na akĩraara kuo ũtukũ mũgima akĩhoya Yahweh
Na rĩrĩa gwakĩire, agĩĩta arutwo ake na agĩthuura ikũmi na erĩ kuuma harĩ o, arĩa ningĩ eetire atũmwo:
nĩo Simoni, ũrĩa ningĩ eetire Kepha, Andrea mũrũ wa nyina, Jakubu, Johana, Filipu, Batholomayo,
Mathayo, Toma, Jakubu mũrũ wa Alufayo, Simoni ũrĩa wetagwo “ũrĩa ũrĩ kĩyo,”
Yahuda mũrũ wa Jakubu, na Yahuda Mũisikariota, ũrĩa wacokire gũtuĩka mũkunyanĩri.
Na agĩikũrũka arĩ hamwe nao akĩrũgama handũ haaraganu, na nĩ haarĩ na kĩrĩndĩ kĩnene kĩa arutwo ake, na kĩrĩndĩ kĩnene kĩa andũ kuuma Yahuda na Yahrushalayim guothe o hamwe na gĩcigo gĩa gĩcũa-inĩ gĩa Turo na Sidoni, arĩa mookĩte kũmũthikĩrĩria na kũhonio mĩrimũ
O na arĩa maathĩnagio nĩ maroho moru nĩ maahonirio
Na andũ othe thĩinĩ wa kĩrĩndĩ nĩ maacaragia ũrĩa mangĩmũhutia nĩ ũndũ hinya nĩ woimaga harĩ we na ũkamahonia othe.
Agĩcoka akĩrora arutwo ake na akĩambĩrĩria kuuga atĩrĩ: “Kũrathimwo-rĩ, nĩ inyuĩ athĩni nĩ gũkorũo Ũthamaki wa Yahweh nĩ wanyu.
“Kũrathimwo-rĩ, nĩ inyuĩ mũhũtaga ũmũthĩ, nĩ gũkorũo nĩ mũkaahũnio. “Kũrathimwo-rĩ, nĩ inyuĩ mũrĩraga ũmũthĩ, nĩ gũkorũo nĩ mũgaatheka.
“Kũrathimwo-rĩ, nĩ inyuĩ rĩrĩa rĩothe andũ maamũthũũra, na rĩrĩa meyamũrania na inyuĩ na maamũnyũrũria na maamũthũkĩria rĩĩtwa nĩ ũndũ wa Mũrũ wa mũndũ
Mũthenya ũcio kenai mũno na mũcanjamũke, nĩ gũkorũo kĩheo kĩanyu nĩ kĩnene kũrĩa igũrũ, tondũ maũndũ macio nomo maithe mao ma tene meekaga anabii.
“No inyuĩ itonga kaĩ mũrĩ na haaro-ĩ, nĩ gũkorũo nĩ mũrĩkĩtie kwamũkĩra igai rĩanyu rĩothe.
“Inyuĩ mũhũnĩte ũmũthĩ kaĩ mũrĩ na haaro-ĩ, nĩ gũkorũo nĩ mũkaahũta. “Inyuĩ mũratheka ũmũthĩ kaĩ mũrĩ na haaro-ĩ, nĩ gũkorũo nĩ mũgaacakaya na mũrĩre.
“Kaĩ mũrĩ na haaro-ĩ, rĩrĩa andũ othe mekũmũgaathĩrĩria, nĩ gũkorũo no taguo maithe mao ma tene meekaga anabii a maheeni.
“No ngũmwĩra atĩrĩ inyuĩ mũrathikĩrĩria: Endagai thũ cianyu, na arĩa mamũthũire mũmekage maũndũ mega,
mũrathimage arĩa mamũrumaga, na mũhoyagĩre arĩa mamwĩkaga maũndũ moru
Mũndũ ũrĩa ũrakũgũtha ikai rĩmwe mũnengere rĩu rĩngĩ o na rĩo, nake ũrĩa ũragũtunya nguo ya igũrũ, ndũkamũgirie ya thĩinĩ o nayo
Heaga ũrĩa wothe ũrakũhoya, na ũrĩa ũroya indo ciaku, ndũkamwĩre agũcokerie.
“Ningĩ, o ta ũrĩa mũngĩenda andũ arĩa angĩ mamwĩkage, mekagei o taguo.
“Mũngĩenda o arĩa mamwendete-rĩ, mũngĩgunĩka atĩa? Nĩ gũkorũo o na ehia nĩ mendete arĩa mamendete
Na mũngĩka wega o arĩa mamwĩkaga wega-rĩ, mũngĩgunĩka atĩa? O na ehia nĩ mekaga o taguo
Ningĩ mũngĩkombagĩra o arĩa mũratanya mamũrĩhe-rĩ, mũngĩgunĩka atĩa?
No inyuĩ endagai thũ cianyu na mwĩkage wega na mũkombanagĩre mũtegũtanya kũrĩhwo; nakĩo kĩheo kĩanyu nĩ kĩrĩkoragwo kĩrĩ kĩnene, na nĩ mũgaatuĩka ariũ a Ũrĩa ũrĩ Igũrũ Mũno, nĩ gũkorũo we nĩ atugaga andũ arĩa matarĩ ngatho na arĩa oru
Thiĩi na mbere kũiguanĩra tha, o ta ũrĩa Ithe wanyu aiguanagĩra tha.
“Makĩria ma ũguo, tigai gũtuagĩra andũ arĩa angĩ, na gũtirĩ hĩndĩ mũgaatuĩrũo, na mũtige kũrutaga arĩa angĩ mahĩtia na gũtirĩ hĩndĩ mũkaarutwo mahĩtia. Thiĩi na mbere kuohanagĩra na nĩ mũrĩohagĩrũo.
Mwĩmenyagĩriei kũheanaga, na andũ nĩ marĩmũheaga. Marĩmũitagĩrĩra mĩhuko-inĩ yanyu gĩthimi kĩega, gĩkindĩrĩtwo, gĩkainainio, na gĩkaiyũrĩrĩrio. Nĩ gũkorũo gĩthimi kĩrĩa mũthimagĩra andũ nakĩo, nokĩo o nao marĩmũthimagĩra nakĩo.”
Ningĩ agĩcoka akĩmahe ngerekano akĩmera ũũ: “Mũtumumu ndangĩtongoria mũtumumu ũrĩa ũngĩ, githĩ tiguo? Erĩ no kũgũa mangĩgũa irima-inĩ, kana tiguo
Mũrutwo ndakĩraga mũrutani wake, no mũndũ wothe ũrutĩtwo na njĩra nginyanĩru atuĩkaga o ta mũrutani wake
Kwoguo-rĩ, nĩ kĩ gĩgũtũma ũrore kahuti karĩa karĩ riitho rĩa mũrũ wa Ithe wanyu no ndũrarora rũbaũ rũrĩa rũrĩ riitho rĩaku
Ũngĩhota atĩa kwĩra mũrũ wa Ithe wanyu, ‘Mũrũ wa Ithe witũ, reke ngũrute kahuti kau karĩ riitho rĩaku,’ no wee mwene ndũrona rũbaũ rũrĩa rũrĩ riitho rĩaku? Hinga ĩno! Amba ũrute rũbaũ rũu rũrĩ riitho rĩaku mwene, na hĩndĩ ĩyo nĩ ũkũhota kuona wega ũrĩa ũkũruta kahuti kau karĩ riitho rĩa mũrũ wa Ithe wanyu.
“Nĩ ũndũ gũtirĩ mũtĩ mwega ũciaraga maciaro moru, na gũtirĩ mũtĩ mũũru ũciaraga maciaro mega.
Tondũ o mũtĩ ũmenyekaga na maciaro maguo. Kwa mũhaano-rĩ, andũ matigethaga ngũyũ kuuma mĩigua-inĩ, o na kana makagetha thabibũ kuuma kĩhinga-inĩ kĩa mĩigua
Mũndũ mwega arutaga maũndũ mega kuuma mũthithũ-inĩ mwega wa ngoro yake, no mũndũ mũũru arutaga maũndũ moru kuuma mũthithũ-inĩ wake mũũru; tondũ kanua karagia kĩrĩa kĩiyũire ngoro-inĩ ya mũndũ.
“Nĩ ũndũ ũcio-rĩ, mũnjĩtaga ‘Mwathi! Mwathi!’ nĩkĩ na mũtiĩkaga maũndũ marĩa ndĩmwĩraga?
Nĩ ngũmwĩra ũrĩa mũndũ o wothe ũũkaga kũrĩ niĩ akaigua ciugo ciakwa na agaciathĩkĩra atariĩ:
Atariĩ ta mũndũ waakaga nyũmba, akĩenja thĩ akĩrikia na agĩaka mũthingi igũrũ rĩa rwaro rwa ihiga. Nĩ ũndũ ũcio, rĩrĩa mũiyũro wokire, rũũĩ rũkĩhũũra nyũmba ĩyo no rũtingĩahotire kũmĩenyenyia, tondũ nĩ yaakĩtwo wega.
No mũndũ o wothe ũiguaga na ndeke ũndũ, atariĩ ta mũndũ waakire nyũmba igũrũ rĩa tĩri, ĩtarĩ na mũthingi. Rũũĩ rũkĩhũũra nyũmba ĩyo, na o hĩndĩ ĩyo ĩkĩmomoka, nayo nyũmba ĩyo ĩgĩthũkanga biũ.”