Mariko 11
Na rĩrĩa maakuhĩrĩirie Yahrushalayim, Bethifage na Bethania Kĩrĩma-inĩ kĩa Mĩtamaiyũ, agĩtũma arutwo ake erĩ
akĩmera ũũ: “Thiĩi gĩcagi-inĩ kĩĩrĩa mũrona, na mwakinya nĩ mũkuona njaũ ya ndigiri yohetwo, ĩrĩa gũtarĩ mũndũ ũrĩ wamĩikarĩra. Mũmĩohore na mũndehere haha.
Na mũndũ o wothe angĩmũũria atĩrĩ, ‘Mũramĩohora nĩkĩ?’ Mũmwĩre, ‘Mwathi nĩ aramĩbatara na nĩ ekũmĩcokia o na ihenya.’”
Kwoguo magĩthiĩ na magĩkora njaũ ĩyo ya ndigiri yohetwo handũ mũrango-inĩ hakuhĩ na njĩra, na makĩmĩohora
No andũ amwe arĩa maarũngiĩ hau makĩmoria atĩrĩ: “Mũrohora njaũ ĩyo ya ndigiri nĩkĩ?”
Makĩmera o ũrĩa Yahshua ooigĩte, nao andũ acio makĩreka mathiĩ.
Magĩtwarĩra Yahshua njaũ ĩyo ya ndigiri na makĩmĩigĩrĩra nguo ciao cia igũrũ, nake akĩmĩikarĩra
Ningĩ andũ aingĩ makĩara nguo ciao cia igũrũ njĩra-inĩ, nao angĩ magĩtua mathĩgĩ mĩgũnda-inĩ
Na andũ arĩa maathiaga marĩ mbere yake na arĩa maarĩ thutha wake maanagĩrĩra makiugaga ũũ: “Hosanna! Kũrathimwo nĩ ũrĩa ũroka na rĩĩtwa rĩa Yahweh!
Kũrathimwo nĩ Ũthamaki ũrĩa ũroka wa ithe witũ Daudi! Twakũhoya ũmũhonokie ũrĩ kũu igũrũ mũno!”
Agĩtonya Yahrushalayim na agĩthiĩ hekarũ-inĩ, akĩrora maũndũ mothe, no tondũ mathaa nĩ maathiĩte mũno, agĩthiĩ Bethania marĩ hamwe na arĩa Ikũmi na Erĩ.
Mũthenya ũyũ ũngĩ rĩrĩa moimaga Bethania, akĩigua ahũtiĩ
Arĩ haraya akĩona mũkũyũ warĩ na mathangũ, na agĩthiĩ harĩ guo kũrora kana no one kĩndũ. No aakinya ho, gũtirĩ kĩndũ oonire tiga o mathangũ, tondũ gĩtiarĩ kĩmera kĩa ngũyũ
Nĩ ũndũ ũcio akĩwĩra atĩrĩ: “Mũndũ o na ũrĩkũ ndakanarĩe itunda kuuma harĩ wee rĩngĩ.” Nao arutwo ake nĩ maathikagĩrĩria.
Magĩkinya Yahrushalayim. Agĩtonya thĩinĩ wa hekarũ na akĩambĩrĩria kũrutũrũra andũ arĩa meendagia na makagũra indo thĩinĩ wa hekarũ, na akĩngʼaũrania metha cia arĩa maakũũranagia mbeca, na itĩ cia arĩa meendagia ndutura,
na ndeetĩkagĩria mũndũ o na ũrĩkũ ahĩtũkĩrie kĩndũ hekarũ-inĩ
Na aarutanaga akamera: “Githĩ ti kwandĩke ũũ: ‘Nyũmba yakwa ĩgeetagwo nyũmba ya mahoya harĩ ndũrĩrĩ ciothe’? No inyuĩ mũmĩtuĩte ngurunga ya atunyani.”
Nao anene a athĩnjĩri-Yahweh na aandĩki-marũa makĩigua ũhoro ũcio, na makĩambĩrĩria gũcaria ũrĩa mangĩmũũraga; nĩ gũkorũo nĩ maamwĩtigagĩra tondũ kĩrĩndĩ gĩothe nĩ kĩagegetio nĩ ũrutani wake.
Rĩrĩa gwakuhĩrĩirie gũtuka, makiuma kũu itũũra-inĩ
No rũcinĩ tene rĩrĩa maahĩtũkaga, makĩona mũtĩ ũrĩa wa mũkũyũ ũũmĩte nginya o mĩri-inĩ yaguo
Kepha akĩririkana ũrĩa gwekĩkĩte na akĩmwĩra atĩrĩ: “Rabii, ta rora! mũkũyũ ũrĩa ũrarumire nĩ ũũmĩte.”
Nake Yahshua akĩmacokeria akĩmera atĩrĩ: “Gĩai na wĩtĩkio harĩ Yahweh
Ngũmwĩra atĩrĩ na ma, mũndũ wothe angĩkera kĩrĩma gĩkĩ, ‘Uma haha ũthiĩ ũgũe iria-inĩ,’ na age nganja ngoro-inĩ yake, na etĩkie atĩ ũrĩa oiga nĩ ũgwĩkĩka, ũndũ ũcio nĩ ũgeekĩka
Na nĩkĩo ngũmwĩra atĩrĩ, maũndũ marĩa mothe mũhoyaga na mũgetia, gĩagai na wĩtĩkio atĩ nĩ mũmamũkĩrĩte, na nĩ mũrĩheagwo.
Na rĩrĩa mũkũrũgama nĩguo mũhoe, ohagĩrai andũ arĩa angĩ maũndũ marĩa mothe mamwĩhĩirie, nĩgetha o nake Ithe wanyu wa igũrũ amuohagĩre mehia manyu.”
No mũngĩaga kũrekanĩra, o nake Ithe wanyu ũrĩa ũrĩ igũrũ ndarĩmũrekagĩra mahĩtia manyu o na inyuĩ
Magĩcoka magĩthiĩ Yahrushalayim o rĩngĩ. Na rĩrĩa aathiangaga kũu thĩinĩ wa hekarũ, anene a athĩnjĩri-Yahweh na aandĩki-marũa o hamwe na athuri magĩthiĩ harĩ we
na makĩmũũria atĩrĩ: “Wĩkaga maũndũ maya na wathani ũrĩkũ? Kana nũ ũkũheete wathani ũyũ wa gwĩka maũndũ maya?”
Yahshua akĩmera ũũ: “Nĩ ngũmũũria kĩũria kĩmwe. Njokeriai, na niĩ nĩ ngũmwĩra njĩkaga maũndũ maya na wathani ũrĩkũ
Ũbatithio wa Johana woimĩte igũrũ kana woimĩte kũrĩ andũ? Njokeriai.”
Nĩ ũndũ ũcio makĩambĩrĩria kwĩrana atĩrĩ: “Tũngiuga, ‘Woimĩte igũrũ,’ egũtũũria, ‘Mwakĩagire kũmwĩtĩkia nĩkĩ?’
Kana tuuge, ‘Woimĩte kũrĩ andũ’?” Magĩĩtigĩra kuuga ũguo tondũ kĩrĩndĩ gĩetĩkĩtie atĩ kũna Johana aarĩ mũnabii
Nĩ ũndũ ũcio magĩcokeria Yahshua atĩrĩ: “Tũtiũĩ.” Yahshua akĩmera: “O na niĩ ndikũmwĩra njĩkaga maũndũ maya na wathani ũrĩkũ.”