Mariko 12
Agĩcoka akĩambĩrĩria kwaria nao na ngerekano akĩmera atĩrĩ: “Mũndũ ũmwe nĩ aahandire mĩthabibũ mũgũnda-inĩ, akĩũirigĩra na akĩenja irima rĩa kĩhihĩro kĩa ndibei na agĩaka nyũmba ndaya na igũrũ; agĩcoka akĩũkomborithia arĩmi, na agĩthiĩ bũrũri wa kũraya
Na rĩrĩa hĩndĩ ya magetha yakinyire-rĩ, agĩtũma ngombo kũrĩ arĩmi acio ĩkagĩĩre maciaro mamwe ma mũgũnda ũcio wa mĩthabibũ kuuma kũrĩ o
No makĩmĩnyita, makĩmĩhũũra, na makĩmĩingata moko matheri
O rĩngĩ agĩtũma ngombo ĩngĩ kũrĩ arĩmi acio, nao makĩmĩhũũra mũtwe na makĩmĩagĩra gĩtĩo
Ningĩ agĩtũma ngombo ĩngĩ, nao makĩmĩũraga, na agĩtũma ingĩ nyingĩ, makĩhũũra imwe na makĩũraga iria ingĩ
Aarĩ na ũmwe aatigĩtie, mũrũwe ũrĩa eendete mũno. Akĩmũtũma arĩ wa mũico, akiuga atĩrĩ, ‘Nĩ mekũhe mũrũ wakwa gĩtĩo.’
No arĩmi acio makĩĩrana atĩrĩ, ‘Ũyũ nĩwe mũgai. Nĩ tũmũũragei, narĩo igai rĩake rĩgũtuĩka ritũ.’
Kwoguo makĩmũnyita, makĩmũũraga, na makĩmũikia nja ya mũgũnda ũcio wa mĩthabibũ
Mwene mũgũnda ũcio wa mĩthabibũ ageeka atĩa hihi? Agoka orage arĩmi acio, acoke akomborithie arĩmi angĩ mũgũnda ũcio wa mĩthabibũ
Kaĩ mũtarĩ mwathoma rĩandĩko rĩrĩ: ‘Ihiga rĩrĩa aaki maaregire, nĩrĩo rĩtuĩkĩte ihiga rĩrĩa inene rĩa kona.
Ũndũ ũcio uumĩte kũrĩ Yahweh, na nĩ wa magegania maitho-inĩ maitũ’?”
Nao nĩ meendaga kũmũnyita tondũ nĩ maamenyire atĩ aaheanaga ngerekano ĩyo nĩ ũndũ wao. No tondũ nĩ meetigagĩra kĩrĩndĩ, magĩtigana nake magĩthiĩ.
Magĩcoka magĩtũma Afarisai amwe na arũmĩrĩri amwe a kĩama kĩa Herode nĩguo mamũtege na mĩario yake.
Rĩrĩa maakinyire makĩmwĩra: “Mũrutani, nĩ tũĩ atĩ waragia ma na ndũcaragia ũrĩa ũngĩtĩkĩrĩka nĩ mũndũ o na ũrĩkũ, tondũ ndũroraga ũrĩa andũ matariĩ na nja, no ũrutanaga njĩra ya Yahweh kũringana na ũrĩa ma ĩtariĩ. Hihi nĩ kwagĩrĩire kũrĩha Kaisari igooti kana gũtiagĩrĩire?
Hihi nĩ twagĩrĩirũo kũrĩha kana tũtiagĩrĩirũo?” Rĩrĩa oonire ũhinga wao akĩmera atĩrĩ: “Nĩ kĩ kĩratũma mũngerie? Ta ndeherai dinari ndĩmĩone.”
Makĩmũrehera dinari ĩmwe, nake akĩmoria atĩrĩ: “Mbica ĩno na maandĩko maya nĩ cia ũ?” Makĩmũcokeria: “Nĩ cia Kaisari.”
Nake Yahshua akĩmera: “Rĩhai Kaisari indo cia Kaisari, no indo cia Yahweh mũrĩhe Yahweh.” Nao makĩgegio mũno nĩwe.
Na rĩrĩ, Asadukai, arĩa moigaga atĩ andũ matikaariũkio, magĩthiĩ kũrĩ we makĩmũũria atĩrĩ:
“Mũrutani, Musa aatwandĩkĩire atĩ mũrũ wa nyina na mũndũ angĩkua, na atige mũtumia no akorũo ndararĩ na mwana, mũrũ wa nyina na mũndũ ũcio agĩrĩire kũhikia mũtumia ũcio nĩguo aciarĩre mũrũ wa nyina ciana.
Kwarĩ na ariũ mũgwanja a nyina ũmwe. Wa mbere akĩhikania, no agĩkua atagĩte ciana.
Nake wa kerĩ akĩhikia mũtumia ũcio no agĩkua atagĩte ciana, na noguo gwathiire harĩ wa gatatũ
Na othe mũgwanja magĩkua matagĩte ciana. Mũthia-inĩ, mũtumia ũcio o nake agĩkua.
Hĩndĩ ĩrĩa andũ makaariũkio-rĩ, agatuĩka mũtumia wa ũ? Nĩ gũkorũo nĩ aatuĩkĩte mũtumia wao othe mũgwanja.”
Nake Yahshua akĩmera atĩrĩ: “Na githĩ tikĩo mũhĩtĩtie, tondũ mũtiũĩ Maandĩko o na kana hinya wa Yahweh?
Nĩ gũkorũo rĩrĩa andũ makaariũkio kuuma kũrĩ akuũ, matikahikanagia kana kũhika, no magaakorũo matariĩ ta araika arĩa marĩ igũrũ.
No ha ũhoro wa kũriũkio kwa arĩa akuũ-rĩ, kaĩ mũtathomete thĩinĩ wa ibuku rĩa Musa ũhoro-inĩ wĩgiĩ kĩhinga kĩrĩa kĩa mĩigua, atĩ Yahweh aamwĩrire ũũ: ‘Niĩ nĩ niĩ Kĩhoti wa Iburahimu, na Kĩhoti wa Isaaka, na Kĩhoti wa Jakubu’?
We ti Kĩhoti wa arĩa makuĩte, no nĩ wa arĩa marĩ muoyo. Nĩ mũhĩtĩtie mũno.”
Na mwandĩki-marũa ũmwe wokĩte akaigua magĩkararania nake, amenya atĩ nĩ amacokeria na njĩra njega, akĩũria Yahshua atĩrĩ: “Rĩathani rĩrĩa rĩa mbere harĩ marĩa mangĩ mothe nĩ rĩrĩkũ?”
Yahshua agĩcokia ũũ: “Rĩa mbere nĩ rĩrĩ, ‘Thikĩrĩria wee Isiraeli, Yahweh Kĩhoti witũ nowe wiki Yahweh,
na no mũhaka wende Yahweh Kĩhoti waku na ngoro yaku yothe na muoyo waku wothe na meciria maku mothe na hinya waku wothe.’
Rĩa kerĩ nĩ rĩrĩ, ‘No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.’
Mwandĩki-marũa ũcio akĩmwĩra atĩrĩ: “Mũrutani, nĩ waria ma, 'Yahweh nĩ Ũmwe, na gũtirĩ ũngĩ tiga we’;
na mũndũ kũmwenda na ngoro yake yothe, na meciria make mothe, na hinya wake wothe, na mũndũ kwenda ũrĩa mariganĩtie nake o ta ũrĩa eyendete nĩ kwa bata makĩria gũkĩra magongona mothe ma njino na maruta.”
Nĩ ũndũ ũcio, rĩrĩa Yahshua oonire atĩ mũndũ ũcio nĩ acokia na ũũgĩ, akĩmwĩra: “Ndũrĩ haraya na Ũthamaki wa Yahweh.” Na gũtirĩ mũndũ warĩ na ũmĩrĩru wa kũmũũria ciũria rĩngĩ.
O na kũrĩ ũguo, rĩrĩa Yahshua aarutanaga thĩinĩ wa hekarũ, akiuga atĩrĩ: “Nĩ kĩ gĩtũmaga aandĩki-marũa moige atĩ Messiya nĩ mũrũ wa Daudi?
Daudi we mwene atongoretio nĩ Roho Mwamũre ooigire atĩrĩ, ‘Yahweh nĩ erire Mwathi wakwa ũũ: “Ikara thĩ guoko-inĩ gwakwa kwa ũrĩo nginya rĩrĩa ngaiga thũ ciaku rungu rwa makinya maku.”’
Daudi we mwene amwĩtĩte Mwathi, kwoguo-rĩ, kũngĩgĩtuĩka atĩa atĩ nĩ mũrũwe?”
Nake agĩthiĩ na mbere kũrutana akĩmera ũũ: “Mwĩmenyagĩrĩrei aandĩki-marũa arĩa mendete gũthiĩ mehumbĩte kanjũ na mendete kũgeithio nĩ andũ thoko-inĩ
na gũikarĩra itĩ cia mbere thunagogi-inĩ na gũikara handũ harĩa hatĩĩku makĩria maruga-inĩ ma hwaĩ-inĩ.
Manyamaragia mĩciĩ ya atumia a ndigwa, na makahoya mahoya maraihu nĩguo meyonanie. Acio nĩ magatuĩrũo ituĩro inene makĩria.”
Agĩcoka agĩikara thĩ handũ oonaga mathandũkũ ma mĩhothi na akĩambĩrĩria kwĩrorera ũrĩa kĩrĩndĩ gĩaikagia mbeca thĩinĩ wa mathandũkũ macio ma mĩhothi, na andũ aingĩ arĩa maarĩ atongu maikagia thendi nyingĩ
Na rĩrĩ, mũtumia ũmwe wa ndigwa warĩ mũthĩni agĩũka na agĩikia tũthendi twĩrĩ twa thogora mũnini mũno
Nĩ ũndũ ũcio agĩĩta arutwo ake akĩmera ũũ: “Ngũmwĩra atĩrĩ na ma, mũtumia ũyũ mũthĩni wa ndigwa aikia nyingĩ gũkĩra arĩa othe megũikagia mbeca thĩinĩ wa mathandũkũ ma mĩhothi
Tondũ othe maikia kuumana na matigari ma kĩrĩa marĩ nakĩo, no mũtumia ũyũ, o na arĩ mũthĩni, aikia kĩrĩa gĩothe oima nakĩo, kĩrĩa gĩothe oima nakĩo ũtũũro-inĩ.”