Mariko 13

Na rĩrĩa ooimaga thĩinĩ wa hekarũ, mũrutwo ũmwe wake akĩmwĩra atĩrĩ: “Mũrutani, ta rora ũrĩa mahiga maya na mĩako ĩno irĩ thaka!”

No rĩrĩ, Yahshua akĩmwĩra: “Nĩ ũrona mĩako ĩno mĩnene ũũ? Gũtirĩ ihiga haha rĩgaatigwo rĩikarĩire rĩrĩa rĩngĩ rĩtamomoretwo.”

Na rĩrĩa aaikarĩte thĩ Kĩrĩma-inĩ kĩa Mĩtamaiyũ handũ hekarũ yoonekaga, Kepha, Jakubu, Johana, na Andrea makĩmũũria ũũ hatarĩ andũ angĩ:

“Ta twĩre atĩrĩ, maũndũ macio mageekĩka rĩ, na nĩ kĩ gĩgakorũo kĩrĩ kĩmenyithia kĩa rĩrĩa maũndũ macio mothe magakinya mũthia?”

Nĩ ũndũ ũcio Yahshua akĩmera atĩrĩ: “Mwĩmenyererei mũtikanahĩtithio nĩ mũndũ o na ũrĩkũ.

Andũ aingĩ nĩ magoka na rĩĩtwa rĩakwa, makiugaga, ‘Nĩ niĩ we,’ na nĩ makaahĩtithia andũ aingĩ

Ningĩ, rĩrĩa mũkaigua ũhoro wa mbaara na mbugĩrĩrio ciĩgiĩ mbaara, mũtikanetigĩre; no mũhaka maũndũ macio mekĩke, no mũico ndũgaakorũo ũkinyĩte.

“Nĩ gũkorũo rũrĩrĩ nĩ rũgokĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ; nĩ gũkagĩa na ithingithia kũndũ na kũndũ; ningĩ nĩ gũkagĩa ngʼaragu. Maũndũ macio nĩ kĩambĩrĩria kĩa ruo ta rwa mũtumia arĩ hakuhĩ kũgĩa mwana.

“No inyuĩ-rĩ, mwĩhũgagei. Andũ nĩ makaamũtwara magooti-inĩ, na mamũhũũrĩre thunagogi-inĩ na mũrũgamio mbere ya mangavana na athamaki nĩ ũndũ wakwa, nĩguo mũtuĩke aira kũrĩ o

Ningĩ, ũhoro ũrĩa mwega no mũhaka ũkaamba kũhunjio kũrĩ ndũrĩrĩ ciothe

Na rĩrĩa magaakorũo makĩmũneana, mũtikanambĩrĩrie gũtangĩka igũrũ rĩa ũrĩa mũkuuga; ĩndĩ ũndũ ũrĩa wothe mũkaaheo hĩndĩ ĩyo, mũkaawaria, tondũ ti inyuĩ mũgaakorũo mũkĩaria no nĩ roho mwamũre

Makĩria ma ũguo, mũndũ nĩ akooragithia mũrũ wa nyina, na ithe wa mwana oragithie mwana wake, na ciana ciũkĩrĩre aciari a cio na cimoragithie

Na nĩ mũgathũũrũo nĩ andũ othe nĩ ũndũ wa rĩĩtwa rĩakwa. No ũrĩa ũgaakirĩrĩria o nginya mũico nĩwe ũkaahonokio.

“O na kũrĩ ũguo, rĩrĩa mũkona kĩndũ kĩrĩa kĩrĩ thahu kĩrehaga mwanangĩko, kĩrĩa kĩarĩtio ũhoro wakĩo nĩ Danieli, kĩrũgamĩte harĩa gĩtagĩrĩirũo (ũrĩa ũrathoma nĩ ahũthĩre ũtaũku), hĩndĩ ĩyo arĩa magaakorũo Yahuda nĩ mambĩrĩrie kũũrĩra irĩma-inĩ

Mũndũ ũrĩa ũgaakorũo nyũmba igũrũ ndakanaikũrũke o na ndakanatonye kuoya indo iria irĩ thĩinĩ wa nyũmba yake;

na mũndũ ũrĩa ũgaakorũo mũgũnda ndakanacoke kũrĩ indo iria irĩ thutha kuoya nguo yake ya igũrũ

Kaĩ andũ-a-nja arĩa magaakorũo marĩ na ihu na arĩa magaakorũo makĩongithia ciana matukũ macio nĩ magaakorũo na haaro-ĩ

Hoyagai atĩ maũndũ macio matikanakinye hĩndĩ ya heho;

tondũ matukũ macio magaakorũo marĩ matukũ ma thĩna ũtarĩ woneka kuuma kĩambĩrĩria kĩa ũũmbi ũrĩa Yahweh oombire nginyagia hĩndĩ ĩyo, na ndũkoneka rĩngĩ.

Ma nĩ atĩ, tiga Yahweh akaanyihia matukũ macio, gũtirĩ mũndũ ũngĩkahonoka. No nĩ ũndũ wa arĩa athuurĩte, nĩ akaanyihia matukũ macio.

“Ningĩ-rĩ, mũndũ o na ũrĩkũ angĩkamwĩra atĩrĩ, ‘Messiya arĩ haha,’ kana ‘Arĩ haarĩa,’ mũtikanetĩkie

Nĩ gũkorũo nĩ gũgoka Messiya a maheeni na anabii a maheeni na maringe ciama na meke maũndũ ma magegania nĩguo mahĩtithie nginya arĩa athuure kũngĩhoteka

Nĩ ũndũ ũcio, inyuĩ mwĩhũgagei. Nĩ ndamwĩra maũndũ mothe o mbere.

“No matukũ-inĩ macio, thutha wa thĩna ũcio, riũa nĩ rĩkagĩa nduma, naguo mweri ndũkaruta ũtheri waguo,

nacio njata nĩ ikagũa kuuma igũrũ, namo mahinya ma igũrũ nĩ magathingithio

Na hĩndĩ ĩyo andũ nĩ makona Mũrũ wa mũndũ agĩũka arĩ thĩinĩ wa matu arĩ na hinya mũnene na riri

Na nĩ agatũma araika macokanĩrĩrie andũ ake arĩa athuure kuuma harĩ huho iria inya, kuuma ituri cia thĩ nginya ituri cia igũrũ.

“Na rĩrĩ, mwĩrutei na ngerekano ĩno ya mũkũyũ: Rĩrĩa tũhonge twaguo tuororoa na twagĩa mathangũ, nĩ mũmenyaga atĩ hĩndĩ ya ũrugarĩ nĩ ĩkuhĩrĩirie

O ũndũ ũmwe na ũcio, rĩrĩa mũkona maũndũ macio magĩkĩka, menyai atĩ arĩ hakuhĩ mĩrango-inĩ.

Ngũmwĩra atĩrĩ na ma, rũciaro rũrũ rũtirĩ hĩndĩ rũgaathira nginya maũndũ macio mothe mekĩke.

Igũrũ na thĩ nĩ igaathira, no ciugo ciakwa gũtirĩ hĩndĩ igaathira.

“Ũhoro wĩgiĩ mũthenya ũcio kana thaa, gũtirĩ mũndũ ũĩ, o na araika arĩa marĩ igũrũ kana Mũriũ, no Ithe witũ ũĩ.

Ikaragai mwĩhũgĩte na mwĩiguĩte, tondũ mũtiũĩ ihinda rĩrĩa rĩtuĩtwo nĩ rĩrĩkũ.

Nĩ ta mũndũ wathiire rũgendo kũndũ kũraya agĩtiga nyũmba yake na akĩhe ngombo ciake wathani, o ngombo wĩra-inĩ wayo, na agĩatha mũikaria wa mũrango aikarage eiguĩte

Nĩ ũndũ ũcio, ikaragai mwĩiguĩte, tondũ mũtiũĩ rĩrĩa mwene nyũmba arĩcoka, kana nĩ hwaĩ-inĩ kana nĩ ũtukũ gatagatĩ kana kũrĩ hakuhĩ gũkĩa kana rũcinĩ tene,

nĩguo rĩrĩa agoka mũterĩgĩrĩire, ndakanakore mũrĩ toro

No ũrĩa ndamwĩra, ndera andũ othe: Ikaragai mwĩiguĩte.”