Mariko 3
Yahshua akĩingĩra thĩinĩ wa thunagogi o rĩngĩ, na kũu nĩ kwarĩ mũndũ warĩ muonju guoko.
Nao nĩ maamũroraga mũno mone kana nĩ ekũhonia mũndũ ũcio mũthenya wa Thabatũ, nĩguo mone ũndũ wa kũmũthitangĩra.
Akĩĩra mũndũ ũcio warĩ muonju guoko atĩrĩ: “Rũgama na ũũke haha gatagatĩ.”
Agĩcoka akĩmoria atĩrĩ: “Nĩ ũndũ ũrĩkũ mwĩtĩkĩrĩku mũthenya wa Thabatũ, nĩ gwĩka wega-ĩ kana nĩ gwĩka ũũru, nĩ kũhonokia muoyo-ĩ kana nĩ kũũraga?” No magĩkira.
Thutha wa kũmarora arakarĩte na aiguĩte ũũru mũno nĩ ũndũ wa ũrĩa moomĩtie ngoro, akĩĩra mũndũ ũcio ũũ: “Tambũrũkia guoko gwaku.” Nake agĩgũtambũrũkia, nakuo gũkĩhona.
Afarisai mona ũguo makiuma nja na o hĩndĩ ĩyo makĩambĩrĩria kũbanga njama ya kũmũũkĩrĩra marĩ na arũmĩrĩri a kĩama kĩa Herode, nĩguo mamũũrage.
No Yahshua agĩthiĩ iria-inĩ marĩ na arutwo ake, na kĩrĩndĩ kĩnene mũno kuuma Galili na kuuma Yahuda gĩkĩmũrũmĩrĩra.
O na kuuma Yahrushalayim, na Idumea, na mũrĩmo wa Jorodani, na kuuma Turo na Sidoni, kĩrĩndĩ kĩnene gĩgĩthiĩ kũrĩ we rĩrĩa kĩaiguire maũndũ maingĩ marĩa eekaga
Nake akĩĩra arutwo ake mamũhaarĩrĩrie gatarũ kanini nĩguo kĩrĩndĩ gĩtikae kũmũhatĩka
Tondũ nĩ aahonirie andũ aingĩ, arĩa othe maarĩ na mĩrimũ mĩũru nĩ maahatĩkanagĩra harĩ we nĩguo mamũhutie
Nginya maroho moru maamuonaga makamũinamĩrĩra makĩanagĩrĩra ũũ: “Wee nĩwe Mũrũ wa Yahweh.”
No nĩ aamaheaga mũkaana mũrũmu maita maingĩ matikamũmenyithanie kũrĩ andũ.
Agĩcoka akĩambata kĩrĩma-inĩ na agĩta arĩa eendaga, nao magĩthiĩ harĩ we.
Na agĩthondeka gĩkundi kĩa andũ 12 arĩa ningĩ eetire atũmwo, na nĩo maarĩ matwaranage nake na amatũmage makahunjie,
na magĩe na wathani wa kũingata ndaimono.
Nao arĩa maarĩ gĩkundi-inĩ kĩu aathondekire kĩa andũ 12 maarĩ Simoni, ũrĩa ningĩ aatuire Kepha,
Jakubu mũrũ wa Zebedi, na Johana mũrũ wa nyina na Jakubu (arĩa ningĩ aatuire Boanerigesi, ũguo nĩ kuuga “Ariũ a Marurumĩ”),
Andrea, Filipu, Batholomayo, Mathayo, Toma, Jakubu mũrũ wa Alufayo, Thadayo, Simoni ũrĩa Mũkananayo,
na Yahuda Mũisikariota ũrĩa wacokire kũmũkunyanĩra. Yahshua agĩcoka agĩthiĩ agĩtonya nyũmba,
na kĩrĩndĩ gĩkĩũngana o rĩngĩ nginya makĩaga mweke wa kũrĩa irio
No rĩrĩa andũ a nyũmba yao maiguire maũndũ macio, magĩthiĩ kũmũnyita, nĩ gũkorũo moigaga ũũ: “Nĩ agũrũkĩte.”
Ningĩ aandĩki-marũa arĩa mookire kuuma Yahrushalayim moigaga atĩrĩ: “Arĩ na Beelizebubu, na aingataga ndaimono na hinya wa mũnene wa ndaimono.”
Nĩ ũndũ ũcio, akĩmeta harĩ we na akĩmaarĩria na njĩra ya ngerekano, akĩmoria: “Shaitani angĩingata Shaitani atĩa
Ũthamaki ũngĩgayũkana, ndũngĩrũgama;
na nyũmba ĩngĩgayũkana, nyũmba ĩyo ndĩngĩrũgama
Ningĩ angĩkorũo Shaitani nĩ areyũkĩrĩra we mwene na nĩ agayũkanĩte-rĩ, ndangĩrũgama, no nĩ gũthira egũthira
Ũrĩa kũrĩ nĩ atĩ, gũtirĩ mũndũ ũingĩraga nyũmba ya mũndũ ũrĩ hinya na akahota kũiya indo ciake tiga ambire kũmuoha. Hĩndĩ ĩyo norĩo angĩhota gũtaha indo iria irĩ nyũmba yake
Ngũmwĩra atĩrĩ na ma, andũ nĩ makooherũo maũndũ mothe, gũtekũmakania nĩ mehia marĩkũ manehia na irumi iria manarumana
No mũndũ o wothe ũrumaga roho Mwamũre gũtirĩ hĩndĩ akoherũo ĩndĩ mehia make megũtũũra tene na tene.”
Aamerire ũguo tondũ moigaga atĩrĩ: “Arĩ na roho mũũru.”
Na rĩrĩ, nyina hamwe na ariũ a nyina magĩũka na makĩrũgama hau nja, magĩtũma mũndũ atonye akamwĩte
Na tondũ kĩrĩndĩ gĩaikarĩte thĩ kĩmũthiũrũrũkĩirie-rĩ, makĩmwĩra ũũ: “Atĩrĩrĩ, maitũguo na ariũ a maitũguo marĩ nja na nĩ maragwĩta.”
No akĩmoria atĩrĩ: “Maitũ na ariũ a maitũ nĩa?”
Agĩcoka akĩrora andũ arĩa maaikarĩte thĩ mamũthiũrũrũkĩirie akiuga ũũ: “Ta rora, aya nĩo maitũ na ariũ a maitũ
Mũndũ o wothe wĩkaga wendi wa Yahweh, ũcio nĩwe mũrũ wa maitũ na mwarĩ wa maitũ o na maitũ.”