Mariko 4
Agĩcoka akĩambĩrĩria kũrutana o rĩngĩ arĩ rũteere-inĩ rwa iria, na kĩrĩndĩ kĩnene mũno gĩkĩũngana hakuhĩ nake. Nĩ ũndũ ũcio akĩhaica gatarũ na agĩikara thĩinĩ wako haraihu hanini kuuma rũteere-inĩ rwa iria, no kĩrĩndĩ gĩothe kĩarĩ rũteere-inĩ rwa iria.
Akĩambĩrĩria kũmaruta maũndũ maingĩ na njĩra ya ngerekano, na rĩrĩa aamarutaga akĩmera ũũ:
“Thikĩrĩriai. Atĩrĩrĩ, mũhuri nĩ aathiire kũhura mbeũ
Na rĩrĩa aahuraga, mbeũ imwe ikĩgũa mũkĩra-inĩ wa njĩra, na nyoni igĩũka igĩcirĩa
Ingĩ ikĩgũa kũndũ kũrĩ mahiga, kũrĩa gũtaarĩ na tĩri mũingĩ, na ikĩmera narua tondũ tĩri ũcio ndwarĩ mũriku
No rĩrĩa riũa rĩaarire, ikĩhĩa na ikĩũma tondũ itiarĩ na mĩri
Mbeũ ingĩ ikĩgũa mĩigua-inĩ, nayo mĩigua ĩyo ĩkĩneneha ĩgĩcihatĩka, nacio ikĩaga maciaro
No ingĩ ikĩgũa tĩri-inĩ ũrĩa mwega, igĩkũra na ikĩingĩha, ikĩambĩrĩria kũgĩa maciaro, nacio ciaciaraga maita 30, 60, na maita 100 makĩria.”
Agĩcoka akĩongerera ũũ: “Ũrĩa ũrĩ matũ ma kũigua, nĩ aigue.”
Na rĩrĩa aarĩ wiki, arĩa maarĩ nake hamwe na arĩa Ikũmi na erĩ makĩambĩrĩria kũmũũria ũhoro wa ngerekano icio.
Akĩmera atĩrĩ: “Inyuĩ nĩ mũtaũkĩirũo nĩ hitho ĩrĩa nyamũre ĩgiĩ Ũthamaki wa Yahweh, no harĩ andũ arĩa marĩ nja maũndũ mothe maikaraga marĩ ngerekano,
nĩgetha atĩ o na marora matikone, na o na maigua matigataũkĩrũo; na matikanagarũrũke nĩguo moherũo.”
Ningĩ akĩmera ũũ: “Angĩkorũo mũtirataũkĩrũo nĩ ngerekano ĩno-rĩ, mũngĩtaũkĩrũo atĩa nĩ ngerekano iria ingĩ ciothe?
“Mũhuri ahuraga kiugo kĩa Yahweh
Na rĩrĩ, aya nĩo mbeũ iria ciarĩ mũkĩra-inĩ wa njĩra harĩa kiugo kĩhurĩtwo; rĩrĩa maigua kiugo, o rĩo Shaitani okaga akeheria kiugo kĩu kĩahurũo thĩinĩ wao
O ũndũ ũmwe na ũcio, aya nĩo mbeũ iria ciahurirũo kũndũ kũrĩ na mahiga; rĩrĩa maigua kiugo, magĩtĩkagĩra o rĩo makenete
O na kũrĩ ũguo, matikoragwo na mĩri thĩinĩ wao, no mathiaga na mbere kwa ihinda; na rĩrĩa thĩna woka kana manyarirũo nĩ ũndũ wa kiugo kĩu, o rĩmwe makahĩngĩka
Ningĩ nĩ kũrĩ ingĩ ciahurirũo mĩigua-inĩ. Icio nĩ andũ arĩa maiguĩte kiugo,
no mĩtangĩko ya mũtabarĩre ũyũ wa maũndũ na hinya wa maheeni wa ũtonga na merirĩria ma indo iria ingĩ ciothe ikaingĩra thĩinĩ wa ngoro ciao na ikahatĩka kiugo kĩu, nakĩo gĩkaga maciaro
Mũthia-inĩ, mbeũ iria ciahurirũo tĩri-inĩ ũrĩa mwega nĩ arĩa maiguaga kiugo kĩa Yahweh na magakĩamũkĩra, na magaciara maciaro—maita 30, 60, na maita 100 makĩria.”
Ningĩ akĩmera: “Tawa ndũkunĩkagĩrio na gĩkabu kana ũkaigwo rungu rwa ũrĩrĩ, kana tiguo? Githĩ ndũrehagwo nĩguo ũigĩrĩrũo mũtĩ-inĩ wa kũigĩrĩrũo matawa?
Tondũ gũtirĩ ũndũ o na ũmwe mũhithe ũtakaguũrio; gũtirĩ ũndũ mũhithe biũ ũtakanĩkwo ũtheri-inĩ
Ũrĩa ũrĩ matũ ma kũigua, nĩ aigue.”
Ningĩ akĩmera atĩrĩ: “Thikĩrĩriai na kinyi maũndũ marĩa mũraigua. Gĩthimi kĩrĩa mũthimagĩra andũ nakĩo, nokĩo mũgaathimĩrũo nakĩo, o na nĩ mũkoongererũo
Nĩ gũkorũo mũndũ o wothe ũrĩ na kĩndũ nĩ akoongererũo, no ũrĩa ũtarĩ kĩndũ, o na kĩrĩa arĩ nakĩo nĩ agaatunywo.”
Kwoguo agĩthiĩ na mbere kuuga: “Ũthamaki wa Yahweh ũtariĩ o ta rĩrĩa mũndũ ahuraga mbeũ mũgũnda
Akomaga ũtukũ na agokĩra mũthenya, nacio mbeũ icio ikamera na ikaraiha—no ndoĩ ũrĩa ikũraga
Tĩri guo mwene ũtũmaga igĩe na maciaro itĩna gwa itĩna, ciambaga ikaruta nguha, igacoka ikaruta igira, na marigĩrĩrio-inĩ igira icio ikagĩa na maciaro
Na rĩrĩa maciaro macio makũra, akamagetha na rũhiũ rwa kũgetha tondũ hĩndĩ ya magetha nĩ nginyu.”
Agĩcoka agĩthiĩ na mbere kuuga: “Tũngĩringithania Ũthamaki wa Yahweh na kĩ, kana tũngĩũtaarĩria na ngerekano ĩrĩkũ
Ũtariĩ ta mbegũ ya karatarĩ, ĩrĩa hĩndĩ ĩrĩa yahandagwo mũgũnda nĩyo yarĩ nini biũ gũkĩra mbegũ iria ingĩ ciothe thĩinĩ wa thĩ
No rĩrĩa yahandwo, ĩmeraga na ĩkaneneha gũkĩra mĩmera ĩrĩa ĩngĩ yothe ya mũgũnda na ĩkaruta honge nene, ũũ atĩ nyoni cia rĩera-inĩ ikona handũ ha gũikara kĩĩruru-inĩ kĩayo.”
Aaragia nao ũhoro wa kiugo kĩa Yahweh na ngerekano nyingĩ cia mũthemba ũcio kũringana na ũrĩa mangĩahotire gũthikĩrĩria
Gũtirĩ hĩndĩ aaragia nao hatarĩ ngerekano, no nĩ aataaragĩria arutwo ake maũndũ mothe hatarĩ andũ angĩ.
Na rĩrĩa gwakinyire hwaĩ-inĩ mũthenya ũcio, akĩmera ũũ: “Nĩ tũringei mũrĩmo ũrĩa ũngĩ wa iria.”
Thutha wao kwĩra kĩrĩndĩ gĩthiĩ, magĩthiĩ nake gatarũ-inĩ, o ũguo aatariĩ, na haarĩ na tũtarũ tũngĩ twatwaranire hamwe nake
Na gũkĩgĩa kĩhuhũkanio kĩnene, namo makũmbĩ maahũũraga gatarũ magatonya thĩinĩ, nginya gatarũ kau kaarĩ hakuhĩ kũiyũrũo nĩ maĩ
No Yahshua aarĩ mwena wa thutha akomeire muto. Nĩ ũndũ ũcio makĩmũũkĩria makĩmũũria: “Mũrutani, kaĩ ũtaramaka na tũrĩ hakuhĩ gũthira?”
Nake agĩũkĩra agĩkũũma rũhuho rũu na akĩĩra iria: “Horera na ũkire!” Naruo rũhuho rũgĩtiga kũhurutana na gũkĩhorera biũ
Agĩcoka akĩmoria ũũ: “Nĩ kĩ kĩratũma mwĩtigĩre ũguo? O na rĩu mũtirĩ mũragĩa na wĩtĩkio o na mũnini?”
No makĩiyũrũo nĩ guoya mũnene, na makĩũrania atĩrĩ: “Ũyũ kũna nũ? Nginya rũhuho na iria nĩ iramwathĩkĩra.”