Mariko 5
Magĩcoka makĩringa mũrĩmo ũcio ũngĩ wa iria gĩcigo-inĩ kĩa Agerasi
Na rĩrĩa Yahshua oimire gatarũ-inĩ, o rĩo mũndũ warĩ na roho mũũru agĩũka kũrĩ we oimĩte mbĩrĩra-inĩ.
Mũndũ ũcio aaikaraga kũu mbĩrĩra-inĩ, na nginyagia hĩndĩ ĩyo, gũtirĩ mũndũ o na ũmwe wahotete kũmuoha biũ, nginya na mũnyororo
Nĩ oohagwo kaingĩ na bĩngũ na mĩnyororo, ĩndĩ agatua bĩngũ icio na agatuuanga mĩnyororo ĩyo; na gũtirĩ mũndũ warĩ na hinya wa kũmũtooria
Na rĩrĩ, aatũũraga akayaga kũu mbĩrĩra-inĩ na irĩma-inĩ ũtukũ na mũthenya agĩĩtihangagia na mahiga
No rĩrĩa oonire Yahshua arĩ haraya, agĩtengʼera na akĩmũinamĩrĩra
Agĩcoka akĩanĩrĩra na mũgambo mũnene akiuga: “Tũrorania kĩ nawe, Yahshua, Mũrũ wa Yahweh? Ndakwĩhĩtithia mbere ya Yahweh ndũkae kũũnyarira.”
Nĩ gũkorũo Yahshua aawĩraga ũũ: “Uma thĩinĩ wa mũndũ ũyũ, wee roho ũyũ mũũru.”
No akĩũria mũndũ ũcio ũũ: “Wĩtagwo atĩa?” Nake akĩmũcokeria: “Njĩtagwo Mbũtũ, tondũ tũrĩ aingĩ.”
Na agĩthaitha Yahshua mũno ndakaingate maroho macio kuuma bũrũri-inĩ ũcio.
Na rĩrĩ, nĩ kwarĩ na rũũru rũnene rwa ngũrũe rwarĩaga kũu kĩrĩma-inĩ
Nĩ ũndũ ũcio maroho macio makĩmũthaitha makĩmwĩra ũũ: “Twĩtĩkĩrie tũthiĩ tũingĩre thĩinĩ wa ngũrũe iria.”
Nake akĩmetĩkĩria. Namo maroho macio moru magĩkiuma na magĩthiĩ makĩingĩra thĩinĩ wa ngũrũe icio, naruo rũũru rũu rũgĩtengʼera kĩharũrũka-inĩ rũkĩgũa thĩinĩ wa iria, ngũrũe ta 2,000, igĩkuĩra iria-inĩ
No arĩithi a cio makĩũra na magĩthiĩ makĩheana ũhoro ũcio itũũra-inĩ na mĩgũnda-inĩ, nao andũ magĩũka kuona ũrĩa gwekĩkĩte
Nĩ ũndũ ũcio magĩkinya harĩ Yahshua, na makĩona mũndũ ũcio warĩ na ndaimono, o we ũcio warĩ na mbũtũ ĩyo, aikarĩte thĩ ehumbĩte nguo na arĩ mũhonu meciria, na magĩĩtigĩra mũno
Ningĩ arĩa meeyoneire maũndũ macio makĩmaganĩra ũrĩa gwekĩkĩte harĩ mũndũ ũcio warĩ na ndaimono na harĩ ngũrũe
Nĩ ũndũ ũcio makĩambĩrĩria gũthaitha Yahshua oime kũu gĩcigo-inĩ kĩao.
Na rĩrĩa aaingĩraga thĩinĩ wa gatarũ, mũndũ ũcio warĩ na ndaimono akĩmũthaitha mathiĩ nake
No rĩrĩ, Yahshua ndamwĩtĩkĩririe no aamwĩrire ũũ: “Inũka kũrĩ andũ anyu, na ũmere maũndũ mothe marĩa Yahweh agwĩkĩire na tha iria akuonetie.”
Mũndũ ũcio agĩthiĩ na akĩambĩrĩria kũmenyithania ũhoro kũu Dekapoli wĩgiĩ maũndũ mothe marĩa Yahshua aamwĩkĩire, na andũ othe makĩgega.
Thutha wa Yahshua gũcoka na gatarũ mũrĩmo ũcio ũngĩ wa iria, kĩrĩndĩ kĩnene gĩkĩũngana harĩ we, na aarĩ rũteere-inĩ rwa iria.
Mũrũgamĩrĩri ũmwe wa thunagogi wetagwo Jairo agĩũka, na thutha wa kuona Yahshua, akĩĩgũithia thĩ magũrũ-inĩ make
Na akĩmũthaitha maita maingĩ, akĩmwĩra: “Kairĩtu gakwa nĩ karũaru mũno. Ndagũthaitha, ũka ũgakaigĩrĩre moko nĩguo kahone gatũũre muoyo.”
Nĩ ũndũ ũcio Yahshua agĩthiĩ hamwe nake, na kĩrĩndĩ kĩnene gĩkĩmũrũmĩrĩra na gĩkahatĩkanĩra harĩ we.
Na rĩrĩ, nĩ haarĩ na mũndũ-wa-nja watũũraga oiraga thakame mĩaka 12.
Nĩ aanyamarĩkĩte mũno moko-inĩ ma ndagĩtarĩ aingĩ na agakorũo ahũthĩrĩte indo ciake ciothe no ndaateithĩkĩte, ĩndĩ no kwĩhĩrũo eehagĩrũo
Rĩrĩa aaiguire ũhoro wĩgiĩ Yahshua, agĩthiĩ thutha wake arĩ kĩrĩndĩ-inĩ na akĩhutia nguo yake ya igũrũ,
tondũ eĩraga na ngoro ũũ: “Ingĩhutia o nguo ciake cia igũrũ tu, nĩ ngũhona.”
Na o hĩndĩ ĩyo agĩtiga kuura, na akĩigua mwĩrĩ-inĩ wake ahona mũrimũ ũcio mũũru.
Na o hĩndĩ ĩyo Yahshua akĩigua harĩ hinya woima thĩinĩ wake, na akĩhũgũkĩra kĩrĩndĩ akĩũria: “Nũ wahutia nguo ciakwa cia igũrũ?”
No arutwo ake makĩmũũria atĩrĩ: “Ũrona kĩrĩndĩ gĩkĩhatĩkanĩra harĩ wee, na ũkoria, ‘Nũ wahutia?’”
O na kũrĩ ũguo, nĩ aaroraga mĩena yothe nĩguo one nũ wekĩte ũguo
Tondũ mũndũ-wa-nja ũcio nĩ aamenyaga ũrĩa gwathiĩte, agĩthiĩ amakĩte na akĩinainaga akĩĩgũithia mbere yake na akĩmwĩra ũhoro wothe
Nake akĩmwĩra atĩrĩ: “Mwarĩ ũyũ, wĩtĩkio waku nĩ watũma ũhone. Thiĩ na thayũ, na ndũkanathĩnio nĩ mũrimũ ũcio mũũru rĩngĩ.”
Na o hĩndĩ ĩyo aaragia, hagĩũka andũ moimĩte mũciĩ kwa mũrũgamĩrĩri ũcio wa thunagogi makĩmwĩra: “Kairĩtu gaku nĩ gakuire! Ũgũgĩthĩnia Mũrutani rĩngĩ nĩkĩ?”
No Yahshua akĩigua ũrĩa moigaga na akĩĩra mũrũgamĩrĩri ũcio wa thunagogi ũũ: “Ndũgetigĩre, no gĩa na wĩtĩkio.”
Na rĩrĩ, ndeetĩkĩririe mũndũ o na ũrĩkũ amũrũmĩrĩre tiga Kepha, Jakubu, na Johana mũrũ wa nyina na Jakubu.
Nĩ ũndũ ũcio magĩkinya nyũmba ya mũrũgamĩrĩri ũcio wa thunagogi, na agĩkora kũrĩ na gĩcanjama andũ magĩcakaya, makĩrĩraga manĩrĩire
Thutha wa kũingĩra, akĩmoria atĩrĩ: “Kĩrĩro gĩkĩ na gĩcanjama nĩ cia kĩ? Mwana ũcio ndakuĩte ĩndĩ nĩ gũkoma akomete.”
Maigua ũguo, makĩambĩrĩria kũmũthekerera na kĩnyũrũri. No thutha wa kũmera moime nja othe, akĩoya ithe wa mwana ũcio na nyina na acio maarĩ nake, magĩthiĩ harĩa mwana ũcio aarĩ
Agĩcoka akĩnyita mwana ũcio guoko, akĩmwĩra ũũ: “Talitha kum!” ciugo icio ciataũrũo ciugaga ũũ: “Kairĩtu, ndakwĩra atĩrĩ, ũkĩra!”
Na o rĩo kairĩtu kau gagĩũkĩra na gakĩambĩrĩria gwĩtwara. (Kaarĩ ka mĩaka 12.) Na o hĩndĩ ĩyo arĩa maarĩ ho magĩkena mũno
No we akĩmaatha rĩngĩ na rĩngĩ matikareke mũndũ o na ũrĩkũ amenye ũhoro ũcio, na akĩmera mahe kairĩtu kau kĩndũ gĩa kũrĩa.