Mariko 6
Agĩcoka akiuma kũu agĩthiĩ itũũra rĩa kwao, na arutwo ake makĩmũrũmĩrĩra
Rĩrĩa Thabatũ yakinyire, akĩambĩrĩria kũrutana thĩinĩ wa thunagogi, na andũ aingĩ arĩa maamũiguire makĩgega makĩũria: “Mũndũ ũyũ arutĩte kũ maũndũ maya? Na aaheirũo ũũgĩ ũyũ nĩkĩ, na ũhoti wa gwĩka mawĩko maya ma hinya na moko make
Githĩ ũyũ ti bundi ũrĩa wa mbaũ, mũrũ wa Mariamu, na mũrũ wa nyina na Jakubu, Jusufu, Yahuda, na Simoni? Nao aarĩ a nyina githĩ matirĩ o gũkũ hamwe na ithuĩ?” Kwoguo makĩambĩrĩria kũhĩngĩka nĩ ũndũ wake
No Yahshua akĩmera atĩrĩ: “Mũnabii ndaimagwo gĩtĩo tiga o itũũra-inĩ rĩa kwao na gatagatĩ-inĩ ka andũ a nyũmba yao na gwake mũciĩ.”
Nĩ ũndũ ũcio ndaahotire gwĩka mawĩko ma hinya kũu o tiga kũigĩrĩra andũ maigana ũna moko arĩa maarĩ arũaru na akĩmahonia
Na nĩ aagegire nĩ ũndũ wao kwaga wĩtĩkio. Na agĩthiũrũrũka kuuma gĩcagi kĩmwe nginya kĩrĩa kĩngĩ akĩrutanaga.
Hĩndĩ ĩyo agĩta arĩa Ikũmi na Erĩ, akĩambĩrĩria kũmatũma marĩ erĩ erĩ, na akĩmahe wathani igũrũ rĩa maroho moru
Ningĩ akĩmahe watho akĩmera matigakuue kĩndũ o na kĩ nĩ ũndũ wa rũgendo tiga o mũtirima—matigakuue mũgate, matigakuue mondo ya irio, matigakuue mbeca mĩcibi-inĩ yao—
no mekĩre iratũ na matikehumbe nguo igĩrĩ.
Ningĩ akĩmera atĩrĩ: “Rĩrĩa mwatonya mũciĩ mũna, ikaragai kuo o nginya rĩrĩa mũkooima kuo
Na kũrĩa andũ matarĩmwamũkagĩra kana kũmũthikĩrĩria, mũkiuma kũu ringithiai ndiira cianyu thĩ rũkũngũ rũitĩke, nĩguo ũndũ ũcio ũtuĩke ũira harĩ o.”
Nao magĩthiĩ na makĩhunjĩria andũ merire,
na makĩingata ndaimono nyingĩ na makĩhaka arĩa maarĩ arũaru maguta na makĩmahonia.
Na rĩrĩ, Mũthamaki Herode akĩigua maũndũ macio, nĩ gũkorũo rĩĩtwa rĩa Yahshua nĩ rĩamenyekete mũno, na andũ nĩ moigaga: “Johana Mũbatithania nĩ ariũkĩtio kuuma kũrĩ arĩa akuũ, na nĩkĩo arahota gwĩka mawĩko ma hinya.”
No andũ angĩ moigaga ũũ: “Nĩ Eliya.” Nao angĩ makoiga: “Nĩ mũnabii o ta ũmwe wa anabii arĩa a tene.”
No rĩrĩa Herode aaiguire ũguo, akiuga atĩrĩ: “Johana ũrĩa ndarengire mũtwe nĩ ariũkĩtio.”
Nĩ gũkorũo Herode we mwene nĩ aatũmanĩte Johana anyitwo na aikio njera nĩ ũndũ wa Herodia, mũka wa Filipu mũrũ wa ithe, tondũ Herode nĩ aamũhikĩtie.
Nĩ gũkorũo Johana nĩ eeraga Herode ũũ: “Ndwagĩrĩirũo kũhikia mũka wa mũrũ wa thoguo.”
Kwoguo Herodia aatũire amũigĩire muku na eendaga kũmũũraga no akaremwo
Nĩ gũkorũo Herode nĩ eetigagĩra Johana, tondũ nĩ aamenyaga atĩ nĩ mũndũ mũthingu na Mwamũre, na kwoguo nĩ aamũgitagĩra. Thutha wa kũmũthikĩrĩria nĩ aarigagwo ũrĩa ekũmwĩka, ĩndĩ no aathiaga na mbere kũmũthikĩrĩria akenete.
No mũthenya ũmwe mweke nĩ weyumĩririe, rĩrĩa Herode aahaarĩirie iruga rĩa hwaĩ-inĩ mũthenya wake wa gũciarũo nĩ ũndũ wa anene ake na atongoria a mbũtũ na andũ arĩa maarĩ igweta mũno a Galili
Nake mwarĩ wa Herodia akĩingĩra na agĩthũngũtha agĩkenia Herode na arĩa maarĩanagĩra nake. Mũthamaki akĩĩra mũirĩtu ũcio ũũ: “Njĩtia kĩrĩa gĩothe ũkwenda, na nĩ ngũkũhe.”
Akĩmwĩrĩra na mwĩhĩtwa atĩrĩ: “Kĩrĩa gĩothe ũkũũhoya, nĩ ngũkũhe, o na angĩkorũo nĩ nuthu ya ũthamaki wakwa.”
Kwoguo agĩthiĩ kũrĩ nyina akĩmũũria atĩrĩ: “Hoe kĩ?” Nake akĩmwĩra: “Mũtwe wa Johana Mũbatithania.”
O hĩndĩ ĩyo agĩthiĩ na ihenya kũrĩ mũthamaki akĩmwĩra atĩrĩ: “Ngwenda ũũhe o rĩu mũtwe wa Johana Mũbatithania ũigĩrĩirũo thani-inĩ.”
O na gũtuĩka ũndũ ũcio nĩ waiguithirie mũthamaki kĩeha kĩnene, ndeendaga kwaga kũhingia ihoya rĩa mũirĩtu ũcio, nĩ ũndũ wa mĩĩhĩtwa yake na nĩ ũndũ wa ageni ake
Nĩ ũndũ ũcio mũthamaki agĩtũma mũrangĩri ũmwe o hĩndĩ ĩyo na akĩmwatha arehe mũtwe wa Johana. Nake agĩthiĩ kũu njera na akĩmũrenga mũtwe
na akĩrehe mũtwe wake ũigĩrĩirũo thani-inĩ. Akĩnengera mũirĩtu ũcio, nake mũirĩtu ũcio akĩũtwarĩra nyina.
Rĩrĩa arutwo ake maaiguire ũhoro ũcio, magĩthiĩ makĩoya mwĩrĩ wake na makĩũkomia mbĩrĩra-inĩ.
Atũmwo makĩũngana harĩ Yahshua na makĩmwĩra maũndũ marĩa mothe meekĩte na makarutana
Nake akĩmera atĩrĩ: “Ũkai tũthiĩ tũrĩ ithuiki handũ hatarĩ andũ angĩ mũkahurũke hanini.” Tondũ kwarĩ na andũ aingĩ mookaga magĩthiaga, nginya o makaga ihinda rĩa kũhurũka o na rĩa kũrĩa irio
Nĩ ũndũ ũcio makĩingĩra thĩinĩ wa gatarũ nĩguo mathiĩ handũ hatarĩ andũ nĩgetha makorũo marĩ oiki
No rĩrĩa andũ maamonire magĩthiĩ, na aingĩ makĩmenya, magĩtengʼera na magũrũ moimĩte matũũra-inĩ mothe, na magĩkinya mbere yao
Na rĩrĩa oimire gatarũ-inĩ, akĩona kĩrĩndĩ kĩnene, akĩringwo nĩ tha tondũ maatariĩ ta ngʼondu itarĩ na mũrĩithi. Akĩambĩrĩria kũmaruta maũndũ maingĩ.
Na gwakinya hwaĩ-inĩ, arutwo ake magĩthiĩ harĩ we makĩmwĩra ũũ: “Kũndũ gũkũ nĩ werũ-inĩ na mathaa nĩ mathiĩte mũno
Ĩra andũ aya moimagare nĩguo mathiĩ mĩgũnda-inĩ na icagi-inĩ iria ithiũrũrũkĩirie makegũrĩre irio.”
Nake akĩmacokeria akĩmera atĩrĩ: “Inyuĩ mahei kĩndũ gĩa kũrĩa.” Maigua ũguo makĩmũũria ũũ: “Tũthiĩ tũgũre mĩgate ya dinari 200 tũhe andũ aya marĩe?”
Nake akĩmoria atĩrĩ: “Mũrĩ na mĩgate ĩigana? Thiĩi mũrore!” Nao marora makĩmwĩra: “Tũrĩ na mĩgate ĩtano na thamaki igĩrĩ.”
Nake akĩĩra andũ othe maikare thĩ nyeki-inĩ nduru marĩ ikundi
Nao magĩikara thĩ marĩ ikundi cia andũ 100 na cia andũ 50
Nake akĩoya mĩgate ĩyo ĩtano na thamaki icio igĩrĩ, akĩrora igũrũ akĩmĩrathima. Agĩcoka akĩenyũranga mĩgate ĩyo, akĩnengera arutwo matwarĩre andũ, na akĩgayania thamaki icio igĩrĩ nĩ ũndũ wa andũ acio othe
Nao othe makĩrĩa makĩhũna,
na makĩũngania cienyũ cia mĩgate ikĩiyũra ikabu 12, thamaki itatarĩtwo.
Arĩa maarĩire mĩgate ĩyo maarĩ arũme 5,000.
O rĩo akĩĩra arutwo ake maingĩre gatarũ maringage mwena ũcio ũngĩ wa iria kwerekera Bethisaida nake agĩtigwo akiugĩra kĩrĩndĩ ũhoro
No thutha wa kũmoigĩra ũhoro, agĩthiĩ kĩrĩma-inĩ kũhoya
Rĩrĩa gwatukire, gatarũ kau kaarĩ iria-inĩ gatagatĩ, no Yahshua aarĩ wiki thĩ nyũmũ.
Na rĩrĩa aamonire magĩgatwara na thĩna mũno tondũ rũhuho rwahurutanaga rwerekeire mwena ũrĩa mooimaga, hakuhĩ ituanĩra rĩa kana rĩa ũtukũ agĩthiĩ harĩ o agereire igũrũ rĩa iria; no endaga kũmahĩtũka
Na rĩrĩa maamuonire agereire igũrũ rĩa iria, magĩĩciria ũũ: “ũyũ nĩ roho!” Na magĩkaya
Nĩ gũkorũo othe nĩ maamuonire na magĩĩtigĩra. No o hĩndĩ ĩyo akĩmera: “Gĩai na ũmĩrĩru! Nĩ niĩ; mũtigetigĩre.”
Agĩcoka akĩingĩra gatarũ karĩa maarĩ, naruo rũhuho rũkĩhorera. Mona ũguo makĩgega mũno,
nĩ gũkorũo matiataũkĩirũo nĩ ũhoro wa mĩgate ĩrĩa aaheanĩte, ĩndĩ ngoro ciao ciathiire na mbere kwaga ũtaũku.
Rĩrĩa maaringire magĩkinya thĩ nyũmũ mũrĩmo ũcio ũngĩ, magĩkinya Genesareti na makĩoha gatarũ o hau hakuhĩ
No moima gatarũ-inĩ o ũguo, andũ makĩmenya nĩ we
Magĩtengʼera gĩcigo-inĩ kĩu gĩothe na makĩambĩrĩria kũmũrehera arĩa maarĩ arũaru mamakuuĩte na tũrĩrĩ o kũrĩa maigua arĩ
Na kũrĩa guothe aathiaga icagi-inĩ kana matũũra-inĩ kana mĩgũnda-inĩ, maaigaga andũ arĩa maarĩ arũaru thoko-inĩ, makamũthaitha etĩkĩre mahutie o gĩcũrĩ kĩa nguo yake ya igũrũ. Na arĩa othe maakĩhutirie makĩhonio.