Mariko 7
Na rĩrĩ, Afarisai na aandĩki-marũa amwe arĩa mooimĩte Yahrushalayim makĩũngana mamũthiũrũrũkĩirie.
Na makĩona arutwo amwe ake makĩrĩa irio na moko marĩ na thahu, ũguo nĩ kuuga, matethambĩte moko
(Nĩ gũkorũo Afarisai na Ayahudi othe matirĩaga irio matethambĩte moko nginya o kĩgokora, tondũ manyitagĩrĩra kĩrĩra kĩa athuri a mahinda ma tene,
na rĩrĩa moima thoko, matirĩaga irio matambĩte gwĩthamba. Na nĩ kũrĩ irĩra ingĩ nyingĩ manyitagĩrĩra, ta gũthambia ikombe, njagi, na indo cia gĩcango.)
Kwoguo Afarisai acio na aandĩki-marũa makĩmũũria atĩrĩ: “Nĩ kĩ gĩtũmaga arutwo aku mage kũrũmĩrĩra kĩrĩra kĩa athuri a mahinda ma tene, no marĩaga irio ciao na moko marĩ na thahu?”
Nake akĩmera ũũ: “Hinga ici, Isaiya nĩ aarathire wega igũrũ rĩanyu, o ta ũrĩa kwandĩkĩtwo atĩrĩ, ‘Andũ aya maheaga gĩtĩo na mĩromo yao no ngoro ciao irĩ kũraya na niĩ.
Ũthathaiya ũrĩa maheaga nĩ wa tũhũ, nĩ gũkorũo marutanaga maathani ma andũ marĩ ta morutani.’
Mũtiganaga na Maathani ma Yahweh, mũkanyitĩrĩra kĩrĩra kĩa andũ.”
Ningĩ akĩmera ũũ: “Inyuĩ mũregaga na wara gwathĩkĩra Maathani ma Yahweh nĩguo mũtũũrie kĩrĩra kĩanyu
Kwa ngerekano-rĩ, Musa ooigire ũũ, ‘Tĩaga thoguo na nyũkwa,’ na ‘Ũrĩa ũkaaruma ithe kana nyina no mũhaka oragwo.’
No inyuĩ muugaga atĩrĩ, ‘Mũndũ angĩĩra ithe kana nyina ũũ: “Kĩrĩa gĩothe ingĩgũteithia nakĩo nĩ korubani (ũguo nĩ kuuga, kĩheo kĩamũrĩirũo Yahweh),”’
mũticokaga kũreka ekĩre ithe kana nyina ũndũ o na ũmwe.
Na njĩra ĩyo mũkagithia kiugo kĩa Yahweh kĩene nĩ ũndũ wa kĩrĩra kĩanyu kĩrĩa mũtiganagĩra. Na nĩ mwĩkaga maũndũ mangĩ maingĩ ta macio.”
Nĩ ũndũ ũcio agĩĩta kĩrĩndĩ o rĩngĩ, agĩkĩĩra atĩrĩ: “Thikĩrĩriai, inyuĩ inyuothe, na mũtaũkĩrũo nĩ ũrĩa ngũmwĩra
Gũtirĩ kĩndũ kiumaga na nja gĩgatonya thĩinĩ wa mũndũ kĩngĩmũthahia, no maũndũ marĩa moimaga thĩinĩ wa mũndũ nĩmo mamũthahagia.”
Ũrĩa wĩna matũ ma kũigua nĩ akĩigue.
Na rĩrĩa aatonyire nyũmba kĩrĩndĩ gĩtarĩ ho, arutwo ake makĩambĩrĩria kũmũũria ũhoro wĩgiĩ ngerekano ĩyo
Nĩ ũndũ ũcio akĩmoria atĩrĩ: “Kaĩ o na inyuĩ mwagĩte ũtaũku o ta andũ acio? Kaĩ mũtoĩ atĩ gũtirĩ kĩndũ kiumaga na nja gĩkaingĩra thĩinĩ wa mũndũ kĩngĩmũthahia,
nĩ gũkorũo gĩtingĩraga ngoro-inĩ yake no kĩingĩraga nda, gĩgacoka gĩkoima nja ya mwĩrĩ?”
Ningĩ akĩmera ũũ: “Kĩrĩa kiumaga thĩinĩ wa mũndũ nĩkĩo kĩmũthahagia
Tondũ thĩinĩ wa ngoro cia andũ nĩkuo kuumaga methugunda moru: ngomanio itagĩrĩire, ũici, ũũragani,
ciĩko cia ũtharia, ũkoroku, ciĩko cia waganu, maheeni, mĩtugo ya rũtũrĩko, riitho rĩrĩ na ũiru, irumi, mwĩtĩo, na ũrimũ
Maũndũ macio mothe moru moimaga na thĩinĩ na nĩmo mathahagia mũndũ.”
Oima kũu, agĩthiĩ gĩcigo-inĩ gĩa Turo na Sidoni. Akĩingĩra nyũmba na ndeendaga mũndũ o na ũmwe amenye atĩ nĩ akinya, no nĩ aamenyekire
O hĩndĩ ĩyo mũndũ-wa-nja warĩ na kairĩtu kaarĩ na roho mũũru akĩigua ũhoro wake na agĩthiĩ harĩ we akĩĩgũithia thĩ magũrũ-inĩ make.
Mũndũ-wa-nja ũcio aarĩ Mũngiriki, kuuma Foenicia bũrũri-inĩ wa Siria; na agĩikara akĩmũthaithaga arute kairĩtu kau ndaimono
No Yahshua akĩmwĩra atĩrĩ: “Reke ciana ciambe ihũne, nĩ gũkorũo ti wega kuoya mũgate wa ciana ũikĩrie ngui.”
No rĩrĩ, mũndũ-wa-nja ũcio akĩmũcokeria akĩmwĩra atĩrĩ: “Nĩ ma, mwathi wakwa, no o na ngui nĩ irĩaga rũitĩki rwa ciana rũrĩa rũgũaga rungu rwa metha.”
Nake Yahshua akĩmwĩra ũũ: “Nĩ ũndũ wa ũguo woiga-rĩ, thiĩ; ndaimono ĩyo nĩ yoima thĩinĩ wa kairĩtu gaku.”
Nĩ ũndũ ũcio akĩinũka mũciĩ agĩkora kaana kau gakomete ũrĩrĩ-inĩ, na ndaimono ĩyo nĩ yoimĩte.
Rĩrĩa Yahshua aahũndũkire kuuma gĩcigo gĩa Turo, akĩgerera Sidoni agĩthiĩ Iria-inĩ rĩa Galili, agereire gĩcigo kĩa Dekapoli
Arĩ kũu andũ makĩmũrehera mũndũ ũtaaiguaga na ũtaahotaga kwaria wega, na makĩmũthaitha amũigĩrĩre moko
Nake akĩmweheria kĩrĩndĩ-inĩ akĩmũtwara handũ hatarĩ andũ. Agĩcoka agĩikia ciara ciake matũ-inĩ ma mũndũ ũcio, na thutha wa gũtua mata, akĩmũhutia rũrĩmĩ.
Agĩcoka akĩrora igũrũ, akĩhũmũka na hinya na akĩmwĩra atĩrĩ: “Efatha,” ũguo nĩ kuuga, “Hingũka.”
Namo matũ make makĩhingũka na thĩna wake wa kwaria ũgĩthira, akĩambĩrĩria kwaria wega
Yahshua agĩcoka akĩmakaania matikere mũndũ o na ũrĩkũ, no o ũrĩa aathiaga na mbere kũmakaania noguo maamemerekagia ũhoro ũcio makĩria.
Nao andũ makĩgega mũno, makiuga ũũ: “Ciĩko ciake ciothe nĩ cia magegania. Aratũma nginya andũ arĩa mataiguaga maigue na arĩa mataragia marie.”