Mariko 9
Agĩcoka akĩmera ũũ: “Ngũmwĩra atĩrĩ o ma, nĩ harĩ amwe marũgamĩte haha matagacama gĩkuũ o rĩ nginya mambe mone Ũthamaki wa Yahweh ũũkĩte ũrĩ na hinya.”
Thikũ ithathatũ thutha ũcio, Yahshua akĩoya Kepha na Jakubu na Johana akĩmambatia kĩrĩma-inĩ kĩnene mũno marĩ oiki. Na arĩ mbere yao akĩgarũrũka ũrĩa aatariĩ;
nguo ciake cia igũrũ ikĩambĩrĩria kũhenia mũno, ikĩerũha gũkĩra ũrĩa mũthambia wa nguo o na ũrĩkũ thĩinĩ wa thĩ angĩtũma cierũhe
Ningĩ makiumĩrĩrũo nĩ Eliya na Musa, na maaranagĩria na Yahshua
Kepha akĩĩra Yahshua atĩrĩ: “Rabii, nĩ wega gũkorũo tũrĩ haha. Nĩ ũndũ ũcio reke twambe hema ithatũ, ĩmwe yaku, ĩmwe ya Musa, na ĩmwe ya Eliya.”
Kepha ndaamenyaga ũrĩa egwĩka, nĩ gũkorũo nĩ maaiguire guoya mũno
Hagĩcoka hakĩgĩa na itu, rĩkĩmahumbĩra, na mũgambo ũkiuma thĩinĩ wa itu rĩu ũkiuga: “Ũyũ nĩ Mũrũ wakwa, ũrĩa nyendete. Mũthikagĩrĩriei.”
Hĩndĩ o ĩyo makĩrora mĩena yothe, no gũtirĩ mũndũ ũngĩ moonire tiga Yahshua.
Rĩrĩa maaikũrũkaga kuuma kĩrĩma-inĩ, akĩmahe mũkaana mũrũmu atĩ matikere mũndũ o na ũmwe maũndũ macio moonire o nginya rĩrĩa Mũrũ wa mũndũ akaariũkio kuuma kũrĩ arĩa akuũ.
Nao makĩiga ciugo icio ngoro-inĩ, no magĩteereta gatagatĩ-inĩ kao ũrĩa kũriũkio kũu kuuma kũrĩ arĩa akuũ kuugĩte.
Na makĩambĩrĩria kũmũũria atĩrĩ: “Nĩ kĩ gĩtũmaga aandĩki-marũa moige atĩ no mũhaka Eliya ambe oke?”
Nake akĩmera atĩrĩ: “Eliya no mũhaka ambe oke na acokie maũndũ mothe; no nĩ kĩ gĩtũmĩte kwandĩkwo ũhoro wĩgiĩ Mũrũ wa mũndũ atĩ no mũhaka acemanie na mĩnyamaro mĩingĩ na anyararũo
No ngũmwĩra atĩrĩ, Eliya nĩ arĩkĩtie gũka, na makĩmwĩka ũrĩa wothe meendire kũmwĩka, o ta ũrĩa kwandĩkĩtwo ũhoro ũmwĩgiĩ.”
Na rĩrĩa maakinyire harĩ arutwo acio angĩ, makĩona kĩrĩndĩ kĩnene kĩmarigicĩirie, na nĩ haarĩ na aandĩki-marũa maakararanagia nao
No rĩrĩa andũ acio othe maamuonire, makĩgega na makĩhanyũka harĩ we nĩguo mamũgeithie
Nake akĩmoria atĩrĩ: “Nĩ kĩ mũrakararanĩria nao?”
Mũndũ ũmwe thĩinĩ wa kĩrĩndĩ kĩu akĩmũcokeria: “Mũrutani, ngũrehete mũrũ wakwa kũrĩ wee tondũ akoragwo na roho mũũru ũtũmaga akorũo arĩ bubu
Rĩrĩa rĩothe wamũnyita, ũmũtungumanagia thĩ, akaruta mũhũyũ na kanua, akahagarania magego na agathirũo nĩ hinya. Njũririe arutwo aku maũingate, no matinahota.”
Nake akĩmera atĩrĩ: “Inyuĩ rũciaro rũrũ rũtarĩ wĩtĩkio, ngũtũũra hamwe na inyuĩ nginya rĩ? Ngũmũkirĩrĩria nginya rĩ? Mũrehei haha harĩ niĩ.”
Nĩ ũndũ ũcio magĩtwara kamwana kau harĩ we, no rĩrĩa roho ũcio woonire Yahshua, o rĩmwe ũgĩtugutania mwana ũcio. Thutha wa kũgũa thĩ, akĩambĩrĩria kwĩgaragaria akĩrutaga mũhũyũ na kanua
Yahshua agĩcoka akĩũria ithe wa mwana ũcio atĩrĩ: “Ũndũ ũyũ ũkoretwo ũgĩkĩka harĩ we kuuma rĩ?” Nake akĩmũcokeria: “Kuuma arĩ o mwana,
na kaingĩ nĩ ũmũikagia mwaki-inĩ na maĩ-inĩ nĩguo ũmũnine. No angĩkorũo no ũhote gwĩka ũndũ, tũiguĩre tha ũtũteithie.”
Yahshua akĩmwĩra ũũ: “Nĩ kĩ gĩatũma ũnjĩre, ‘Angĩkorũo no ũhote’? Maũndũ mothe nĩ mahotekaga harĩ mũndũ ũrĩ na wĩtĩkio.”
O hĩndĩ ĩyo ithe wa mwana ũcio akĩanĩrĩra akiuga: “Ndĩ na wĩtĩkio! Ndeithia harĩa ndĩrabatara wĩtĩkio!”
Rĩrĩa Yahshua oonire kĩrĩndĩ gĩtengʼerete harĩ o, agĩkũũma roho ũcio mũũru, akiuga ũũ: “Wee roho ũyũ ũtũmaga mũndũ akorũo arĩ bubu na mũndũ age kũigua, ndakwĩra uume na ndũkanaingĩre thĩinĩ wake rĩngĩ!”
Thutha wa gũtũma mwana ũcio akae na kũmũtugutania mũno, ũkiuma thĩinĩ wake na akĩhaana ta akuĩte, nginya andũ aingĩ makĩambĩrĩria kuuga: “Nĩ akua!”
No Yahshua akĩmũnyita guoko na akĩmũũkĩria, nake akĩrũgama
Na rĩrĩ, thutha wa kũingĩra nyũmba, arutwo ake makĩmũũria ũũ hatarĩ andũ angĩ: “Tũremirũo nĩ kũingata roho ũcio nĩkĩ?”
Akĩmacokeria atĩrĩ: “Mũthemba ũcio no uumire na njĩra ya mahoya na kwĩnyerekia tu.”
Makiuma kũu makĩgerera Galili, no ndeendaga mũndũ o na ũrĩkũ amenye ũhoro ũcio
Nĩ gũkorũo nĩ aarutaga arutwo ake akĩmeraga ũũ: “Mũrũ wa mũndũ nĩ egũkunyanĩrũo aneanwo moko-inĩ ma andũ, na nĩ mekũmũũraga, o na kũrĩ ũguo, nĩ akaariũka thutha wa thikũ ithatũ.”
No rĩrĩ, matiataũkagĩrũo nĩ ciugo icio ciake, na nĩ meetigagĩra kũmũũria ũndũ.
Na magĩkinya Kaperinaumu. Na arĩ nyũmba thĩinĩ akĩmoria atĩrĩ: “Nĩ ũndũ ũrĩkũ mũgũkararanagĩria njĩra-inĩ?”
Nao matiamũcokeirie, tondũ nĩ maakararanĩtie marĩ njĩra-inĩ igũrũ rĩgiĩ nũ mũnene gũkĩra arĩa angĩ
Nĩ ũndũ ũcio agĩikara thĩ na agĩĩta acio Ikũmi na Erĩ na akĩmera ũũ: “Mũndũ o wothe angĩenda gũkorũo arĩ wa mbere, no mũhaka atuĩke wa mũico harĩ arĩa angĩ othe na atungatagĩre arĩa angĩ othe.”
Agĩcoka akĩoya kaana na agĩkarũgamia gatagatĩ-inĩ kao; agĩkoya na moko agĩkaigĩrĩra ciande-inĩ, akĩmera ũũ:
“Mũndũ o wothe wamũkagĩra kaana ta gaka nĩ ũndũ wa rĩĩtwa rĩakwa nĩ anyamũkagĩra o na niĩ; nake mũndũ o wothe ũnyamũkagĩra, to niĩ amũkagĩra ĩndĩ nĩ nginya Ũrĩa wandũmire.”
Johana akĩmwĩra atĩrĩ: “Mũrutani, nĩ harĩ mũndũ tuonire akĩruta andũ ndaimono na rĩĩtwa rĩaku, na twageria kũmũgiria nĩ gũkorũo ndegũtũrũmagĩrĩra.”
No Yahshua akiuga ũũ: “Mũtikagerie kũmũgiria, tondũ gũtirĩ mũndũ ũngĩka mawĩko ma hinya na rĩĩtwa rĩakwa ũngĩhiũha kuuga ũndũ mũũru igũrũ rĩakwa
Tondũ mũndũ o wothe ũtararegana na ithuĩ arĩ mwena witũ
Nake ũrĩa wothe ũkaamũhe gĩkombe kĩa maĩ ma kũnyua nĩ ũndũ mũrĩ a Messiya, ngũmwĩra atĩrĩ o ma, mũndũ ũcio ndarĩ hĩndĩ akorũo nĩ kĩheo gĩake
No ũrĩa wothe ũhĩngaga ũmwe wa aya matariĩ ta twana arĩa marĩ na wĩtĩkio, nĩ kaba ohererũo ihiga rĩa gĩthĩi ngingo na aikio iria thĩinĩ.
“Angĩkorũo guoko gwaku nĩ kũrakũhĩngithia, gũtinie ũgũte. Nĩ kaba ũgaatonya muoyo-inĩ ũrĩ kĩonje gũkĩra ũgaaikio Jehanamu ũrĩ na moko merĩ, thĩinĩ wa mwaki ũrĩa ũtangĩhoreka.
O kũu igunyũ ciao itakuaga na mwaki ũtahorekaga.
Na angĩkorũo kũgũrũ gwaku nĩ kũrakũhĩngithia, gũtinie ũgũte. Nĩ kaba ũgaatonya muoyo-inĩ ũgĩthuaga gũkĩra ũgaaikio Jehanamu ũrĩ na magũrũ merĩ
O kũu igunyũ ciao itakuaga na mwaki ũtahorekaga.
Na angĩkorũo riitho rĩaku nĩ rĩrakũhĩngithia, rĩkũũre ũrĩte. Nĩ kaba ũkaaingĩra thĩinĩ wa Ũthamaki wa Yahweh ũrĩ na riitho rĩmwe gũkĩra ũgaaikio Jehanamu ũrĩ na maitho merĩ,
kũrĩa igunyũ ciao itakuaga na mwaki ũtahoraga.
“Tondũ no mũhaka o mũndũ agekĩrwo mũcamo nĩ mwaki o ta ũrĩa irio igĩithagio cama nĩ cumbĩ
Cumbĩ nĩ mwega, no ũngĩaga mũcamo waguo-rĩ, mũngĩcokia mũcamo waguo na kĩ? Gĩai na cumbĩ thĩinĩ wanyu, na mũtũũrie thayũ gatagatĩ-inĩ kanyu.”