Mathayo 17
Thutha wa mĩthenya ĩtandatũ, Yahshua nĩ athiire na Kepha, na Jakubu, na mũrũ wa nyina Johana, akĩmatwara kĩrĩma-inĩ kĩraya handũ hataarĩ na andũ.
Arĩ hau mbere yao akĩgarũrũka ũrĩa aahaanaga. Ũthiũ wake ũkĩara ta riũa, na nguo ciake ikĩerũha cua, ta ũtheri.
O hĩndĩ ĩyo hau mbere yao makiumĩrĩrwo nĩ Musa na Eliya makĩaranĩria na Yahshua.
Nake Kepha akĩĩra Yahshua atĩrĩ, “Mwathi, nĩ wega tũikare gũkũ; ũngĩenda-rĩ, no njake ithũnũ ithatũ, kĩmwe gĩaku, na kĩmwe kĩa Musa, na kĩrĩa kĩngĩ kĩa Eliya.”
O akĩaragia-rĩ, itu ikengu rĩgĩũka rĩkĩmahumbĩra, na mũgambo ũkiuma itu-inĩ rĩu ũkiuga atĩrĩ, “Ũyũ nĩwe Mũrũ wakwa ũrĩa nyendete; na nĩ ngenagio mũno nĩwe. Mũiguagei!”
Rĩrĩa arutwo maiguire ũguo-rĩ, makĩinamĩrĩra, magĩturumithia mothiũ mao thĩ mamakĩte mũno.
No Yahshua agĩũka, akĩmahutia na akĩmera atĩrĩ, “Arahũkai, tigai gwĩtigĩra.”
Na rĩrĩa maatiirire maitho-rĩ, mationire mũndũ ũngĩ tiga o Yahshua wiki.
Rĩrĩa maikũrũkaga kuuma kĩrĩma-inĩ, Yahshua akĩmaatha akĩmera atĩrĩ, “Mũtikae kwĩra mũndũ o na ũrĩkũ ũrĩa muona, nginya rĩrĩa Mũrũ wa Mũndũ akaariũkio oime kũrĩ arĩa akuũ.”
Nao arutwo makĩmũũria atĩrĩ, “Nĩkĩ gĩtũmaga aandĩki-marũa moige atĩ Eliya no nginya aambe oke?”
Nake Yahshua akĩmacokeria atĩrĩ, “Ti-itherũ, Eliya no nginya aambe oke, ahaarĩrie maũndũ mothe.
No ngũmwĩra atĩrĩ, Eliya nĩ arĩkĩtie gũũka, no andũ makĩaga kũmũmenya, no nĩ mamwĩkire ũrĩa wothe meendaga kũmwĩka. O ũguo noguo nake Mũrũ wa Mũndũ akaanyarirwo nĩo.”
Hĩndĩ ĩyo arutwo makĩmenya atĩ aamaheaga ũhoro wa Johana Mũbatithania.
Rĩrĩa maakinyire harĩa kĩrĩndĩ kĩarĩ, mũndũ ũmwe agĩthiĩ harĩ Yahshua, akĩmũturĩria ndu,
akĩmwĩra atĩrĩ, “Mwathi iguĩra mũrũ wakwa tha, arĩ na mũrimũ wa kĩbaba na nĩ ũmũthĩnagia mũno. Kaingĩ nĩ agũaga mwaki-inĩ kana akagũa maĩ-inĩ.
Nĩ ndĩramũreheire arutwo aku, no matinahota kũmũhonia.”
Nake Yahshua akĩmũcokeria atĩrĩ, “Rũciaro rũrũ rũtetĩkĩtie na rũremi, nĩ nginya rĩ ngũikara na inyuĩ? Ngũmũkirĩrĩria nginya rĩ? Ndeherai kamwana kau.”
Yahshua agĩkũũma ndaimono ĩyo, nayo ĩkiuma kamwana kau, na gakĩhonio o hĩndĩ ĩyo.
Nao arutwo magĩthiĩ kũrĩ Yahshua keheri-inĩ, makĩmũũria atĩrĩ, “Tũremirwo nĩ kũingata ndaimono ĩyo nĩkĩ?”
Nake akĩmacokeria atĩrĩ, “Nĩ tondũ wĩtĩkio wanyu nĩ mũnini. Ngũmwĩra atĩrĩ na ma, mũngĩkorwo na wĩtĩkio mũnini ta mbeũ ya karatarĩ, no mũhote kwĩra kĩrĩma gĩkĩ atĩrĩ, ‘Ehera haha, ũthiĩ harĩa’ na gĩthiĩ. Gũtirĩ ũndũ ũkamũrema.”
(No ndaimono mũthemba ũcio ndĩngĩingatĩka na kĩndũ kĩngĩ, tiga mahoya na kwĩnyerekia.)”
Hĩndĩ ĩrĩa macokanĩrĩire kũu Galili, akĩmera atĩrĩ, “Mũrũ wa Mũndũ nĩ egũkunyanĩrwo aneanwo moko-inĩ ma andũ.
Nĩ makamũũraga, na mũthenya wa ĩtatũ nĩ akariũkio.” Nao arutwo makĩiyũrwo nĩ kĩeha.
Na rĩrĩ, Yahshua na arutwo ake maarĩkia gũkinya Kaperinaumu, arĩa metagia andũ daraki igĩrĩ cia igooti rĩa hekarũ magĩthiĩ kũrĩ Kepha, makĩmũũria atĩrĩ, “Kaĩ mũrutani wanyu atarutaga igooti rĩa hekarũ?”
Nake akĩmacokeria atĩrĩ, “Ĩĩ, nĩ arutaga.” Rĩrĩa Kepha aatonyire nyũmba, Yahshua akĩmũhĩta kwaria akĩmũũria atĩrĩ, “Ũgwĩciria atĩa, wee Simoni? Athamaki a thĩ-rĩ, metagia igooti kuuma kũrĩ a? Metagia ariũ ao, kana metagia andũ arĩa angĩ?”
Nake Kepha akĩmũcokeria atĩrĩ, “Nĩ kuuma kũrĩ andũ arĩa angĩ.” Nake Yahshua akĩmũcokeria atĩrĩ, “Nĩ ũndũ ũcio ariũ ao matirĩhaga.
No nĩguo tũtikamarakarie-rĩ, thiĩ iria-inĩ ũikie ndwano kuo, na thamaki ĩrĩa ũkũnyita mbere, ũmĩtumũre kanua kayo, na nĩ ũkuona mbeca, daraki inya; cioe ũthiĩ ũrĩhe igooti rĩakwa na rĩaku.”