Mathayo 18
Ihinda o rĩu arutwo magĩũka kũrĩ Yahshua, makĩmũũria atĩrĩ, “Nũ mũnene gũkĩra arĩa angĩ ũthamaki-inĩ wa igũrũ?”
Nake agĩĩta kaana, agĩkarũgamia gatagatĩ kao.
Agĩcoka akiuga atĩrĩ, “Ngũmwĩra atĩrĩ na ma, tiga mũgarũrũkire mũtuĩke o ta twana, mũtigatonya ũthamaki wa igũrũ.
Nĩ ũndũ ũcio, ũrĩa wothe wĩnyihagia ta kaana gaka nĩwe mũnene gũkĩra arĩa angĩ ũthamaki-inĩ wa igũrũ.
“Nake ũrĩa wothe wamũkagĩra kaana ta gaka thĩinĩ wa rĩĩtwa rĩakwa, nĩ niĩ aamũkagĩra.
No ũrĩa wothe ũngĩhĩtithia kamwe ga twana tũtũ tũnjĩtĩkĩtie keehie, nĩ kaba mũndũ ũcio aharũkio ihiga rĩa gĩthĩi ngingo aikio iria-inĩ kũrĩa kũriku.
“Kaĩ gũkũ thĩ kũrĩ na haaro-ĩ, nĩ ũndũ wa maũndũ marĩa matũmaga andũ mehie! Maũndũ ta macio no nginya moke, no mũndũ ũrĩa ũtũmaga moke kaĩ arĩ na haaro-ĩ!
Guoko gwaku kana kũgũrũ gwaku kũngĩtũma wĩhie-rĩ, gũtinie ũgũte. Nĩ kaba ũtonye muoyo-inĩ wĩ gĩthua kana wĩ kĩonje, gũkĩra ũkorwo na moko merĩ kana magũrũ merĩ na ũikio mwaki-inĩ wa tene na tene.
Narĩo riitho rĩaku rĩngĩtũma wĩhie-rĩ, rĩkũũre, ũrĩte. Nĩ kaba ũtonye muoyo-inĩ na riitho rĩmwe, gũkĩra ũkorwo na maitho merĩ na ũikio mwaki-inĩ wa kwa Jehanamu.
“Menyererai mũtikae kũnyarara o na kamwe ga twana tũtũ tũnini. Nĩgũkorwo ngũmwĩra atĩrĩ, araika a tuo nĩ monaga ũthiũ wa Baba ũrĩa ũrĩ igũrũ, hĩndĩ ciothe.”
(Nĩgũkorwo Mũrũ wa Mũndũ ookire kũhonokia kĩrĩa kĩorĩte.)
“Rĩu-rĩ, mũgwĩciria atĩa? Mũndũ angĩkorwo arĩ na ngʼondu igana rĩmwe, na ĩmwe yacio yũre-rĩ, githĩ ndangĩtiga icio mĩrongo kenda na kenda kũu irĩma-inĩ, athiĩ agacarie ĩyo yũrĩte?
Na angĩmĩona-rĩ, ngũmwĩra atĩrĩ na ma, akenagĩra ngʼondu ĩyo ĩmwe ĩrorĩte kũrĩ ũrĩa akenagĩra icio mĩrongo kenda na kenda itarorĩte.
Ũguo noguo Ithe wanyu ũrĩa ũrĩ Igũrũ atangĩenda o na kamwe ga twana tũtũ tũnini kore.
“Mũrũ kana mwarĩ wa thoguo angĩkũhĩtĩria-rĩ, thiĩ ũmuonie ihĩtia rĩake mũrĩ o inyuĩ erĩ. Angĩgũthikĩrĩria-rĩ, nĩ mwacokanwo nake.
No angĩrega gũgũthikĩrĩria, oya mũndũ ũngĩ ũmwe kana erĩ mũthiĩ nao, nĩguo ũndũ o wothe ũrũgamagĩrĩrwo nĩ ũira wa andũ erĩ kana atatũ.
Angĩrega kũmathikĩrĩria-rĩ, ĩra ũngano ũndũ ũcio; na angĩkĩrega gũthikĩrĩria o na ũngano-rĩ, mũtue o ta mũndũ ũtetĩkĩtie kana ta mwĩtia wa mbeca cia igooti.
“Ngũmwĩra atĩrĩ na ma, ũndũ o wothe mũkoha gũkũ thĩ, o na igũrũ nĩ ũkohwo, na ũrĩa wothe mũkohora gũkũ thĩ, o na igũrũ nĩ ũkohorwo.
“O rĩngĩ ngũmwĩra atĩrĩ, andũ erĩ anyu mangĩiguanĩra gũkũ thĩ ũndũ o wothe ũrĩa marahoya, nĩ makahingĩrio nĩ Baba ũrĩa ũrĩ igũrũ.
Nĩgũkorwo harĩa andũ erĩ kana atatũ monganĩte thĩinĩ wa rĩĩtwa rĩakwa-rĩ, ngoragwo ndĩ ho gatagatĩ kao.”
Ningĩ Kepha agĩũka harĩ Yahshua, akĩmũũria atĩrĩ, “Mwathi, mũrũ kana mwarĩ wa baba angĩhĩtĩria maita maigana ngĩmũrekagĩra? Hihi nĩ maita mũgwanja?”
Yahshua akĩmũcokeria atĩrĩ, “Ngũkwĩra atĩrĩ, ti maita mũgwanja, no nĩ mĩrongo mũgwanja, maita mũgwanja.
“Nĩ ũndũ ũcio, ũthamaki wa igũrũ ũhaananĩtio na mũthamaki ũrĩa wendaga kuonio mathabu ma mbeca ciake nĩ ndungata ciake.
Aambĩrĩria kũrora mathabu-rĩ, mũndũ warĩ na thirĩ wake wa taranda ngiri ikũmi akĩrehwo kũrĩ we.
Na tondũ nĩ aremetwo nĩ kũrĩha-rĩ, mwathi wake agĩathana atĩ mũndũ ũcio, endio hamwe na mũka, na ciana ciake, na kĩrĩa gĩothe aarĩ nakĩo nĩguo thirĩ ũrĩhĩke.
“Ndungata ĩyo ĩkĩĩgũithia mbere yake, ĩkĩmũthaitha, ĩkĩmwĩra atĩrĩ, ‘Ngirĩrĩria, na nĩ ndĩkũrĩha thirĩ wothe.’
Nake mwathi ũcio wa ndungata ĩyo akĩmĩiguĩra tha, akĩmĩrekera thirĩ ũcio akĩreka ĩthiĩ.
“No ndungata ĩyo yoima nja, ĩgĩcemania na ndungata ĩngĩ yarutaga wĩra nayo yarĩ na thirĩ wayo wa dinari igana rĩmwe. Ĩkĩmĩnyita mũmero ĩmĩite, ĩkĩmĩĩra na hinya atĩrĩ, ‘Ndĩha thirĩ wakwa ũrĩa ũrĩ naguo!’
“Ndungata ĩyo ĩkĩĩgũithia thĩ, ĩkĩmĩthaitha, ĩkĩmĩĩra atĩrĩ, ‘Ngirĩrĩria, na nĩ ndĩĩkũrĩha.’
“Nowe akĩrega. Handũ ha ũguo, agĩthiĩ akĩmĩikithia njera nginya rĩrĩa ĩkaarĩha thirĩ ũcio
Rĩrĩa ndungata iria ingĩ cionire ũrĩa gwekĩka-rĩ, ikĩigua ũru mũno, igĩthiĩ ikĩĩra mwathi wacio ũrĩa wothe gwekĩkĩte.
“Nake mwathi wao agĩĩta ndungata ĩyo, akĩmĩĩra atĩrĩ, ‘Wee ndungata ĩno njaganu, ngũrekeire thirĩ waku wothe tondũ nĩ ũthaithire
Githĩ nawe ndũkwagĩrĩirwo ũiguĩre ndungata ĩrĩa ĩngĩ tha o ta ũrĩa niĩ ngũiguĩrĩire tha?’
Nĩ ũndũ wa kũrakara, mwathi wayo akĩmĩneana kũrĩ anene a njera nĩguo ĩkaherithio o nginya rĩrĩa ĩkaarĩha thirĩ wothe.
“Ũguo nĩguo Baba ũrĩa ũrĩ igũrũ ageka o ũmwe wanyu, mũngĩaga kũrekera mũrũ kana mwarĩ wa ithe wanyu na ma kuuma ngoro-inĩ cianyu.”