Mathayo 19

Na rĩrĩ, Yahshua aarĩkia kũmera maũndũ macio-rĩ, akiuma Galili, agĩthiĩ rũgongo rwa Yahuda mũrĩmo ũrĩa ũngĩ wa Rũũĩ rwa Jorodani.

Nao andũ aingĩ makĩmũrũmĩrĩra, nake akĩmahoneria kuo.

Na Afarisai amwe magĩthiĩ kũrĩ we nĩguo mamũgerie. Makĩmũũria atĩrĩ, “Watho nĩ wĩtĩkĩrĩtie mũndũ atigane na mũtumia wake nĩ ũndũ wa gĩtũmi o na kĩrĩkũ?”

Nake akĩmacokeria atĩrĩ, “Kaĩ mũtathomete, atĩ o kĩambĩrĩria Mũũmbi ‘ombire mũndũ-mũrũme na mũndũ-wa-nja’,

na akiuga atĩrĩ, ‘Nĩ ũndũ wa gĩtũmi kĩu mũndũ mũrũme nĩ agatigana na ithe na nyina, na anyitane na mũtumia wake, nao erĩ matuĩke mwĩrĩ ũmwe’?

Na nĩ ũndũ ũcio, acio ti andũ erĩ rĩngĩ, no nĩ mũndũ ũmwe. Nĩ ũndũ ũcio, arĩa Yahweh anyitithanĩtie, mũndũ ndakanamatigithanie.”

Nao makĩmũũria atĩrĩ, “Nĩ kĩ gĩatũmire Musa aathane atĩ mũndũ no ahe mũtumia wake marũa ma gũtigana nake, amũte?”

Nake Yahshua akĩmacokeria atĩrĩ, “Musa aamwĩtĩkĩririe mũtiganage na atumia anyu tondũ wa ũmũ wa ngoro cianyu. No gũtiarĩ ũguo kuuma kĩambĩrĩria.

Ngũmwĩra atĩrĩ, mũndũ o wothe angĩtigana na mũtumia wake, tiga amũteire nĩ ũndũ wa ũtharia, nake ahikie mũtumia ũngĩ-rĩ, mũndũ ũcio nĩ atharĩtie.”

Nao arutwo makĩmwĩra atĩrĩ, “Angĩkorwo ũguo nĩguo kũrĩ gatagatĩ ka mũthuri na mũtumia-rĩ, nĩ kaba kwaga kũhikania.”

Nake Yahshua akĩmacokeria atĩrĩ, “Ti mũndũ o wothe ũngĩhota gwĩtĩkĩra ũhoro ũyũ, tiga no arĩa mahetwo ũhoti ũcio.

Nĩgũkorwo andũ amwe maaciarirwo mahaana ta marĩ ahakũre; angĩ maahakũrirwo nĩ andũ; na angĩ makarega kũhikania nĩ ũndũ wa ũthamaki wa igũrũ. Mũndũ ũrĩa ũngĩhota gwĩtĩkĩra ũndũ ũyũ, nĩ awĩtĩkĩre.”

Hĩndĩ ĩyo Yahshua akĩreherwo twana nĩguo atũigĩrĩre moko na atũhoere. No arutwo magĩkũũma arĩa maatũrehete.

Nowe Yahshua akiuga atĩrĩ, “Rekei twana tũũke kũrĩ niĩ, tigai gũtũgiria, nĩgũkorwo ũthamaki wa Igũrũ nĩ wa arĩa mahaana ta tuo.”

Aarĩkia gũtũigĩrĩra moko, akiuma kũu.

Na rĩrĩ, mũndũ ũmwe nĩ okire kũrĩ Yahshua, akĩmũũria atĩrĩ, “Mũrutani mwega, nĩ ũndũ ũrĩkũ mwega ingĩĩka nĩgetha ngĩe na muoyo wa tene na tene?”

Nake Yahshua akĩmũcokeria atĩrĩ, “Ũkũnjũũria ũhoro wa ũndũ ũrĩa mwega nĩkĩ? Kũrĩ o Ũmwe mwega – Yahweh. Ũngĩenda gũtonya muoyo-inĩ-rĩ, athĩkagĩra Maathani.”

Mũndũ ũcio akĩmũũria atĩrĩ, “Nĩ Maathani marĩkũ?” Yahshua akĩmũcokeria atĩrĩ, “ ‘Ndũkanoragane, na ndũkanatharanie, na ndũkanaiye, na ndũkanaigĩrĩre mũndũ ũrĩa ũngĩ kĩgenyo,

na tĩa thoguo na nyũkwa,’ o na ‘endaga mũndũ ũrĩa ũngĩ o ta ũrĩa wĩyendete wee mwene.’ ”

Mwanake ũcio akiuga atĩrĩ, “Maũndũ macio mothe ndũire ndĩmarũmĩtie, nĩ kĩ kĩngĩ ndigairie?”

Nake Yahshua akĩmũcokeria atĩrĩ, “Ũngĩenda kwagĩrĩra kũna, thiĩ wendie indo ciaku ũhe athĩni mbeca icio, na nĩ ũkagĩa na mũthithũ igũrũ. Ũcoke ũũke ũnũmĩrĩre.”

Rĩrĩa mwanake ũcio aiguire ũguo-rĩ, agĩthiĩ arĩ na kĩeha, tondũ aarĩ na ũtonga mũingĩ.

Nake Yahshua akĩĩra arutwo ake atĩrĩ, “Ngũmwĩra atĩrĩ na ma, nĩ ũndũ ũrĩ hinya gĩtonga gũtonya ũthamaki-inĩ wa igũrũ.

O rĩngĩ ngũmwĩra atĩrĩ, nĩ ũhũthũ ngamĩra ĩhungurĩre irima rĩa cindano, gũkĩra gĩtonga gũtonya ũthamaki-inĩ wa Yahweh.”

Rĩrĩa arutwo maiguire ũguo-rĩ, makĩmaka mũno, makĩũrania atĩrĩ, “Rĩu-rĩ, nũ ũngĩkĩhonoka?”

Nake Yahshua akĩmarora akĩmera atĩrĩ, “Ũndũ ũcio ndũngĩhoteka nĩ andũ, no maũndũ mothe nĩ mahotekaga nĩ Yahweh.”

Kepha akĩmũcokeria atĩrĩ, “Ithuĩ nĩ tũtigĩte maũndũ mothe, tũgakũrũmĩrĩra! Ithuĩ-rĩ, nĩ kĩ tũkaheo?”

Nake Yahshua akĩmera atĩrĩ, “Ngũmwĩra atĩrĩ na ma, hĩndĩ ĩrĩa Mũrũ wa Mũndũ agaikarĩra gĩtĩ gĩake kĩa ũnene kĩrĩ riri, thĩinĩ wa thĩ njerũ, inyuĩ arĩa mũnũmagĩrĩra nĩ inyuĩ mũgaikarĩra itĩ ikũmi na igĩrĩ cia ũnene, na nĩ mũgatuĩra mĩhĩrĩga ĩrĩa ikũmi na ĩĩrĩ ya Isiraeli cira.

Na ũrĩa wothe ũtigĩte nyũmba, kana ariũ a nyina, kana aarĩ a nyina, kana ithe, kana nyina, kana ciana, kana mĩgũnda nĩ ũndũ wakwa nĩ akamũkĩra maita igana ma iria atigĩte, na agae muoyo wa tene na tene.

No rĩrĩ, andũ aingĩ arĩa marĩ mbere nĩo makarigia thutha, na aingĩ arĩa marĩ thutha nĩo magatongoria.