Mathayo 21

Na rĩrĩa maakuhĩrĩirie Yahrushalayim, maakinya itũũra rĩa Bethibage kũu Kĩrĩma-inĩ kĩa Mĩtamaiyũ-rĩ, Yahshua agĩtũma arutwo ake erĩ,

akĩmera atĩrĩ, “Thiĩi itũũra rĩrĩa rĩrĩ mbere yanyu, na mwaingĩra o ũguo nĩ mũgũkora ndigiri yohetwo, ĩrĩ na njaũ yayo. Ciohorei mũndehere.

Na mũndũ o na ũrĩkũ angĩmũũria ũndũ-rĩ, mwĩrei atĩ Mwathi nĩ abatarĩtio nĩcio, na nĩ egũcicokia o narua.”

Ũndũ ũyũ wekĩkire nĩgetha ũrathi ũrĩa waarĩtio na kanua ka mũnabii ũhinge, rĩrĩa oigire atĩrĩ:

“Ĩrai Mwarĩ wa Zayuni atĩrĩ, ‘Mũthamaki waku nĩ aroka kũrĩwe, nĩ mũhoreri na akuuĩtwo nĩ ndigiri, o njaũ ya ndigiri.’ ”

Nao arutwo magĩthiĩ magĩĩka o ũrĩa Yahshua aamerĩte.

Makĩrehe ndigiri na njaũ yayo, na makĩara nguo ciao igũrũ rĩayo, nake Yahshua agĩkuuo nĩyo.

Na andũ gĩkundi kĩnene mũno makĩara nguo ciao njĩra-inĩ, nao arĩa angĩ magĩtua mathĩgĩ ma mĩtĩ makĩmaara njĩra-inĩ.

Nacio ikundi cia andũ arĩa maamũtongoretie na arĩa maamũrũmĩrĩire maanagĩrĩra makoiga atĩrĩ, “Hosana, Mũrũ wa Daudi!” “Kũrathimwo-rĩ, nĩ mũndũ ũrĩa ũgũũka na rĩĩtwa rĩa Yahweh!” “Hosana igũrũ, o igũrũ mũno!”

Rĩrĩa Yahshua aatonyire Yahrushalayim, andũ a itũũra rĩu inene rĩothe makĩambũrũrũka, makĩũrania atĩrĩ, “Ũyũ nake nũũ?”

Nakĩo kĩrĩndĩ kĩu gĩgĩcokia atĩrĩ, “Ũyũ nĩwe Yahshua ũrĩa mũnabii wa kuuma Nazarethi itũũra rĩa Galili.”

Nake Yahshua agĩtonya kũu hekarũ-inĩ akĩrutũrũra andũ othe arĩa magũraga na mendagia indo kuo, akĩngʼaũrania metha cia arĩa makũũranagia mbeca, na akĩngʼaũrania itĩ cia arĩa mendagia ndutura.

Akĩmera atĩrĩ, “Nĩ kwandĩkĩtwo atĩrĩ, ‘Nyũmba yakwa ĩgetagwo nyũmba ya kũhoyagĩrwo,’ no inyuĩ mũmĩtuĩte ‘ngurunga ya atunyani.’ ”

Nao atumumu na cionje magĩthiĩ kũrĩ we kũu hekarũ-inĩ, nake akĩmahonia.

No rĩrĩa athĩnjĩri-Yahweh arĩa anene na aandĩki-marũa monire maũndũ ma magegania marĩa ekaga, na maigua ũrĩa ciana cianagĩrĩra kũu hekarũ-inĩ ikiugaga atĩrĩ, “Hosana Mũrũ wa Daudi,” makĩrakara.

Makĩmũũria atĩrĩ, “Nĩ ũraigua ũrĩa ciana ici iroiga?” Nake Yahshua akĩmacokeria atĩrĩ, “Ĩĩ, nĩ ndĩraigua. Kaĩ inyuĩ mũtathomete ciugo iria ciugĩte atĩrĩ, “ ‘Kuuma tũnua-inĩ twa twana na twa ngenge nĩ ũtũmĩte hoime ũgooci’?”

Agĩcoka akĩmatiga, akiuma itũũra rĩu inene, agĩthiĩ Bethania, akĩraara kuo.

Na rũcinĩ tene, arĩ njĩra agĩcoka kũu itũũra inene, akĩigua arĩ mũhũtu.

Nake akĩona mũkũyũ mũkĩra wa njĩra, agĩthiĩ harĩ guo, no ndaigana kuona kĩndũ thĩinĩ waguo tiga o mathangũ. Nake akĩwĩra atĩrĩ, “Ũroaga gũgaaciara maciaro rĩngĩ!” O hĩndĩ ĩyo mũtĩ ũcio ũkĩhoha.

Rĩrĩa arutwo ake monire ũguo makĩgega, makĩũrania atĩrĩ, “Kaĩ mũkũyũ ũyũ wahoha narua atĩa?”

Nake Yahshua akĩmacokeria atĩrĩ, “Ngũmwĩra atĩrĩ na ma, mũngĩkorwo na wĩtĩkio na mũtigathanganie-rĩ, to ũguo mũkũyũ ũyũ wĩkĩtwo mũngĩhota gwĩka, no rĩrĩ, o na no mũhote kwĩra kĩrĩma gĩkĩ atĩrĩ, ‘Ũrokũũrũka ũikio iria-inĩ,’ na gwĩkĩke ũguo.

Maũndũ mothe marĩa mũrĩhoyaga mwĩtĩkĩtie nĩ mũkaheo.”

Na rĩrĩa Yahshua aatonyire hekarũ-inĩ-rĩ, athĩnjĩri-Yahweh arĩa anene na athuri a andũ makĩmũkora akĩrutana, makĩmũũria atĩrĩ, “Ũreka maũndũ maya na ũhoti ũrĩkũ? Na nũ ũkũhete ũhoti ũcio?”

Nake Yahshua akĩmacokeria atĩrĩ, “O na niĩ nĩ ngũmũũria kĩũria. Mwanjokeria-rĩ, nĩ ngũmwĩra njĩkaga maũndũ maya na ũhoti ũrĩkũ.

Ũbatithio wa Johana-rĩ, woimĩte kũ? Woimĩte igũrũ-ĩ, kana woimĩte kũrĩ andũ?” Makĩaranĩria o ene ũhoro ũcio, makĩĩrana atĩrĩ, “Tũngiuga atĩ, ‘Woimĩte igũrũ’, egũtũũria atĩrĩ, ‘Mwakĩregire kũmwĩtĩkia nĩkĩ?’

No tũngiuga atĩ, ‘Woimĩte kũrĩ andũ’, nĩ tũgwĩtigĩra andũ, nĩgũkorwo othe nĩ metĩkĩtie atĩ Johana aarĩ mũnabii.”

Nĩ ũndũ ũcio magĩcokeria Yahshua atĩrĩ, “Ithuĩ tũtiũĩ.” Nake Yahshua akĩmera atĩrĩ, “O na niĩ ndikũmwĩra njĩkaga maũndũ maya na ũhoti ũrĩkũ.

“Na rĩrĩ, mũgwĩciria atĩa? Nĩ kwarĩ na mũndũ warĩ na ariũ erĩ. Agĩthiĩ harĩ ũrĩa wa mbere, akĩmwĩra atĩrĩ, ‘Mũriũ, thiĩ ũkarute wĩra ũmũthĩ mũgũnda-inĩ wa mĩthabibũ.’

“Nake agĩcokia, akiuga, ‘Ndigũthiĩ,’ no thutha akĩĩricũkwo, agĩthiĩ.

“Ningĩ mũthuri ũcio agĩthiĩ kũrĩ mũriũ ũcio ũngĩ akĩmwĩra o ũguo. Nake agĩcokia akiuga, ‘Ĩĩ baba, nĩ ngũthiĩ,’ no ndathiire. 31“Acio erĩ-rĩ, nũ wekire ũrĩa ithe endaga?” Magĩcokia atĩrĩ, “Nĩ ũrĩa wa mbere.” Nake Yahshua akĩmera atĩrĩ, “Ngũmwĩra atĩrĩ na ma, etia mbeca cia igooti na maraya nĩ maratonya ũthamaki-inĩ wa Yahweh mbere yanyu.

Acio erĩ-rĩ, nũ wekire ũrĩa ithe endaga?” Magĩcokia atĩrĩ, “Nĩ ũrĩa wa mbere.” Nake Yahshua akĩmera atĩrĩ, “Ngũmwĩra atĩrĩ na ma, etia mbeca cia igooti na maraya nĩ maratonya ũthamaki-inĩ wa Yahweh mbere yanyu.

Nĩgũkorwo Johana ookire kũrĩ inyuĩ amwonie njĩra ya ũthingu, no mũtiamwĩtĩkirie, no etia mbeca cia igooti na maraya nĩ mamwĩtĩkirie. Na inyuĩ o na muona ũguo, mũtiigana kwĩrira mũmwĩtĩkie.

“Ta thikĩrĩriai ngerekano ĩngĩ: Mũndũ warĩ mwene mũgũnda nĩ ahandire mũgũnda ũcio wake mĩthabibũ. Agĩaka rũgiri rũgĩthiũrũrũkĩria mũgũnda ũcio, akĩenja kĩhihĩro gĩa thabibũ o kũu thĩinĩ, na agĩaka nyũmba ndaya na igũrũ ya arangĩri. Agĩcoka agĩkomborithia mũgũnda ũcio wa mĩthabibũ kũrĩ arĩmi na agĩthiĩ rũgendo.

Hĩndĩ ya kũgetha yakuhĩrĩria-rĩ, agĩtũma ndungata ciake kũrĩ akombori acio nĩguo ikanengerwo maciaro make.

“Akombori acio makĩnyita ndungata ciake; makĩhũra ĩmwe, na makĩũraga ĩrĩa ĩngĩ, na ya gatatũ makĩmĩhũra na mahiga nyuguto.

Agĩcoka akĩmatũmĩra ndungata ingĩ nyingĩ kũrĩ iria aatũmĩte mbere, nao akombori acio magĩciĩka o ro ũguo.

Mũthia-inĩ akĩmatũmĩra mũrũwe, akiuga atĩrĩ, ‘Nĩ magatĩa mũrũ wakwa.’

“No rĩrĩa akombori acio monire mũriũ, makĩĩrana atĩrĩ, ‘Ũyũ nĩwe ũkagaya mũgũnda ũyũ. Ũkai tũmũũrage, twĩyoere igai rĩake.’

Nĩ ũndũ ũcio makĩmũnyita, makĩmũikia nja ya mũgũnda ũcio wa mĩthabibũ, na makĩmũũraga.

“Nĩ ũndũ ũcio, rĩrĩa mwene mũgũnda ũcio wa mĩthabibũ agoka-rĩ, ageka akombori acio atĩa?”

Nao magĩcokia atĩrĩ, “Nĩ akanina andũ acio aganu, na acoke akomborithie andũ angĩ mũgũnda ũcio, arĩa marĩmũgayagĩra maciaro hĩndĩ ya magetha yakinya.”

Nake Yahshua akĩmoria atĩrĩ, “Kaĩ mũtathomete thĩinĩ wa Maandĩko atĩ: “ ‘Ihiga rĩrĩa aaki maregire nĩrĩo rĩtuĩkĩte ihiga inene rĩa koine; Yahweh nĩ we wĩkĩte ũndũ ũcio, na nĩ wa magegania tũkĩwona’?

“Nĩ ũndũ ũcio ngũmwĩra atĩrĩ, ũthamaki wa Yahweh nĩ ũkeherio kũrĩ inyuĩ, ũheo andũ angĩ arĩa magaciaraga maciaro maguo.

Mũndũ ũrĩa ũkagũĩra ihiga rĩrĩ nĩ agathuthĩka, no ũrĩa ũkagũĩrwo nĩrĩo nĩ rĩkamũthethera.”

Rĩrĩa athĩnjĩri-Yahweh arĩa anene na Afarisai maaiguire ngerekano icio cia Yahshua, makĩmenya atĩ aaragia ũhoro wao.

Magĩcaria ũrĩa mangĩmũnyita, no nĩ metigagĩra kĩrĩndĩ kĩu, tondũ andũ nĩ metĩkĩtie atĩ aarĩ mũnabii.