Mathayo 23

Ningĩ Yahshua akĩĩra ikundi cia andũ o hamwe na arutwo ake atĩrĩ:

“Arutani a Watho na Afarisai maikaragĩra gĩtĩ kĩa Musa

Nĩ ũndũ ũcio, mathĩkagĩrei na mwĩkage ũrĩa wothe marĩmwĩraga. No mũtigekage ũrĩa mekaga, nĩgũkorwo matiĩkaga ũrĩa mahunjagia.

Mohaga mĩrigo mĩritũ mũno makamĩigĩrĩra ciande cia andũ, no-o ene matiendaga o na kũmĩhutia na kaara.

“Ũrĩa wothe mekaga, mekaga nĩguo monwo nĩ andũ: Maaraaramagia tũthandũkũ tũrĩa meyohaga thiithi tũrĩ na maandĩko thĩinĩ, na makaraihia ciohe cia ndigi cia nguo ciao,

na nĩ mendete gũikara handũ ha gũtĩo maruga-inĩ, na gũikarĩra itĩ cia mbere thĩinĩ wa thunagogi;

na nĩ mendete kũgeithio ndũnyũ-inĩ, na gwĩtwo nĩ andũ ‘Rabii’.

“No inyuĩ mũtikanetwo ‘Rabii’, nĩgũkorwo Mũnene wanyu no ũmwe, na inyuothe mũrĩ a ithe ũmwe.

Na mũtikanete mũndũ o na ũrĩkũ gũkũ thĩ ‘baba’, nĩgũkorwo mũrĩ na Ithe o ũmwe, nake arĩ igũrũ.

O na mũtikanetwo ‘mũrutani’, nĩgũkorwo mũrĩ na ‘Mũrutani’ o ũmwe, nake nĩwe Messiya.

Ũrĩa mũnene thĩinĩ wanyu nĩ atuĩkage ndungata yanyu.

Nĩgũkorwo ũrĩa wothe wĩtũgagĩria nĩ akanyihio, na ũrĩa wothe wĩnyihagia nĩ agatũgĩrio.

“Kaĩ mũrĩ na haaro-ĩ, inyuĩ aandĩki-marũa na Afarisai, hinga ici! Mũhingagĩrĩria andũ gũtonya ũthamaki wa igũrũ, na inyuĩ-ene mũtitonyaga, o na mũtirekaga arĩa marenda gũtonya matonye.

(“Kaĩ mũrĩ na haaro-ĩ, inyuĩ aandĩki-marũa na Afarisai, hinga ici! Mũtonyagĩrĩra nyũmba cia atumia a ndigwa, mũkamatunya indo ciao, na mũkahoyaga mahoya maraihu ma kwĩonania. Nĩ ũndũ ũcio nĩ mũkaherithio makĩria ma andũ arĩa angĩ.)

“Kaĩ mũrĩ na haaro-ĩ, inyuĩ aandĩki-marũa na Afarisai hinga ici! Mũtuĩkanagia bũrũri na mũkaringa iria mũgĩcaria mũndũ ũmwe mũmũgarũre amũrũmĩrĩre, na amũrũmĩrĩra mũkamũtua mũrũ wa Jehanamu maita merĩ manyu.

“Kaĩ mũrĩ na haaro-ĩ, inyuĩ atongoria atumumu! Muugaga atĩrĩ, ‘Mũndũ o na ũrĩkũ angĩĩhĩta na hekarũ, ũcio ti ũndũ; no mũndũ angĩĩhĩta na thahabu ya hekarũ-rĩ, ũcio nĩ ekuohwo nĩ mwĩhĩtwa wake.’

Inyuĩ atumumu aya akĩĩgu! Nĩ kĩ kĩnene? Nĩ thahabu ĩyo, kana nĩ hekarũ ĩrĩa ĩtũmaga thahabu ĩtuĩke nyamũre?

Ningĩ muugaga atĩrĩ, ‘Mũndũ o na ũrĩkũ angĩĩhĩta na kĩgongona-rĩ, ũcio ti ũndũ; no mũndũ angĩĩhĩta na kĩheo kĩrĩa kĩrĩ kĩgongona-igũrũ, ũcio nĩ ekuohwo nĩ mwĩhĩtwa wake.’

Inyuĩ andũ aya atumumu! Nĩ kĩ kĩnene? Nĩ kĩheo kĩu, kana nĩ kĩgongona kĩrĩa gĩtũmaga kĩheo kĩu gĩtuĩke kĩamũre?

Nĩ ũndũ ũcio, ũrĩa wĩhĩtaga na kĩgongona, ehĩtaga nakĩo na akehĩta na kĩrĩa gĩothe kĩrĩ kĩgongona-igũrũ.

Nake ũrĩa wĩhĩtaga na hekarũ, ehĩtaga nayo na akehĩta na ũrĩa ũikaraga thĩinĩ wayo.

Nake ũrĩa wĩhĩtaga na igũrũ, ehĩtaga na gĩtĩ kĩa ũnene kĩa Yahweh, na akehĩta na ũrĩa ũgĩikaragĩra.

“Kaĩ mũrĩ na haaro-ĩ, inyuĩ aandĩki-marũa na Afarisai, hinga ici! Mũrutaga gĩcunjĩ gĩa ikũmi kĩa nyeni; na nĩcio terere, na bitharĩ, na thuu. No nĩ mũtiganĩirie maũndũ marĩa ma bata makĩria marĩa makoniĩ Watho na nĩmo Matua ma Cira Marũngĩrĩru, na kũiguanĩra tha, na gwĩtĩkia. Maya-rĩ, nĩmo mwagĩrĩirwo nĩ gwĩka mũtegũtiganĩria macio mangĩ.

Inyuĩ atongoria aya atumumu! Inyuĩ mũcungaga rũmuru, no mũkameria ngamĩra.

“Kaĩ mũrĩ na haaro-ĩ, inyuĩ aandĩki-marũa na Afarisai, hinga ici! Mũthambagia gĩkombe na mbakũri mwena wa nja, no thĩinĩ-rĩ, kũiyũrĩte ũkoroku na kwenda kwĩhũnia.

Wee Mũfarisai ũyũ mũtumumu! Amba ũthambie gĩkombe na mbakũri mwena wa thĩinĩ, naguo mwena wa nja o naguo nĩ ũgũthera.

“Kaĩ mũrĩ na haaro-ĩ, inyuĩ aandĩki-marũa na Afarisai, hinga ici! Mũhaana mbĩrĩra hake mũnyũ mwerũ, iria cionekaga irĩ thaka mwena wa nja, no thĩinĩ ciyũrĩte mahĩndĩ ma andũ akuũ, na gĩko kĩa mĩthemba yothe.

No taguo andũ mamuonaga mũrĩ athingu mwena wa nja, no mwena wa thĩinĩ mũiyũirwo nĩ ũhinga na waganu.

“Kaĩ mũrĩ na haaro-ĩ, inyuĩ aandĩki-marũa na Afarisai, hinga ici! Mwakagĩra anabii mbĩrĩra na mũkagemia mbĩrĩra cia arĩa athingu.

Mũgacoka mũkoiga atĩrĩ, ‘Tũngĩarĩ muoyo hĩndĩ ya maithe maitũ-rĩ, tũtingĩagwatanĩire nao gũita thakame ya anabii.’

Nĩ ũndũ ũcio mũkaruta ũira wa atĩ inyuĩ mũrĩ njiaro cia arĩa mooragire anabii.

Nĩ ũndũ ũcio-rĩ, kĩiyũrĩrĩriei kĩgeri kĩa mehia ma maithe manyu ma tene.

“Inyuĩ nyoka ici! Inyuĩ ciana cia nduĩra! Mũgaagĩthema atĩa gũtuĩrwo cira wa gũikio Jehanamu?

Nĩ ũndũ ũcio-rĩ, ngũmũtũmĩra anabii, na andũ arĩa ogĩ, o na arutani. Amwe ao nĩ mũkamoraga na mũcuurie amwe ao mũtĩ-igũrũ, na arĩa angĩ mũmahũũre na iboko thĩinĩ wa thunagogi cianyu na mũmaingate kuuma itũũra rĩmwe nginya rĩrĩa rĩngĩ.

Na nĩ mũgagĩcokererwo nĩ thakame yothe ya andũ arĩa athingu, ĩrĩa ĩrĩkĩtie gũitwo gũkũ thĩ, kuuma thakame ya Habili ũrĩa warĩ mũthingu, nginya thakame ya Zakariya mũrũ wa Barakiya, ũrĩa muoragĩire gatagatĩ ka Handũ-harĩa-Hamũre na kĩgongona.

Ngũmwĩra atĩrĩ na ma, maũndũ maya mothe nĩ magakinyĩra rũciaro rũrũ.

“Wee Yahrushalayim, Yahrushalayim, wee ũragaga anabii, na ũkahũũra arĩa matũmĩtwo kũrĩ wee na mahiga nyuguto, nĩ maita maingĩ atĩa ndanenda gũcokanĩrĩria ciana ciaku hamwe, ta ũrĩa ngũkũ ĩcokanagĩrĩria tũcui twayo rungu rwa mathagu mayo, no ndũnjĩtĩkagĩria!

Rĩu takĩoneei! nyũmba yaku ĩtigĩtwo ĩkirĩte ihooru.

Ngũmwĩra atĩrĩ, kuuma rĩu mũtikanyona rĩngĩ nginya rĩrĩa mũkoiga atĩrĩ, ‘Kũrathimwo nĩ mũndũ ũrĩa ũgũũka na rĩĩtwa rĩa Yahweh.’ ”