Mathayo 24

Rĩrĩa Yahshua oimaga hekarũ-inĩ, arutwo ake magĩthiĩ kũrĩ we kũmuonia mĩako ya hekarũ.

Nake akĩmera atĩrĩ: “Nĩ mũrona indo ici ciothe? Ngũmwĩra atĩrĩ na ma, gũtirĩ ihiga haha rĩgaatigwo rĩikarĩire rĩrĩa rĩngĩ, rĩtamomoretwo.”

Na rĩrĩa aaikarĩte thĩ Kĩrĩma-inĩ kĩa Mĩtamaiyũ, arutwo ake magĩũka kũrĩ we hatarĩ andũ angĩ, makĩmũũria atĩrĩ: “Ta twĩre atĩrĩ, maũndũ macio mageekĩka rĩ, na nĩ kĩ gĩgaakorũo kĩrĩ kĩmenyithia kĩa rĩrĩa ũgoka na kĩa ithirĩro rĩa mũtabarĩre wa maũndũ?”

Yahshua akĩmacokeria ũũ: “Mwĩmenyererei mũtikanahĩtithio nĩ mũndũ o na ũrĩkũ,

tondũ andũ aingĩ nĩ magoka na rĩĩtwa rĩakwa, makiugaga atĩrĩ, ‘Niĩ nĩ niĩ Messiya,’ na nĩ makahĩtithia andũ aingĩ

Nĩ mũkaigua ũhoro wa mbaara na mĩhuhu ĩgiĩ mbaara. Mũtikanetigĩre, tondũ no mũhaka maũndũ macio mekĩke, no mũico ndũgaakorũo ũkinyĩte.

“Nĩ gũkorũo rũrĩrĩ nĩ rũgokĩrĩra rũrĩrĩ rũrĩa rũngĩ na ũthamaki ũkĩrĩre ũthamaki ũrĩa ũngĩ, na nĩ gũkagĩa ngʼaragu na ithingithia kũndũ na kũndũ

Maũndũ macio mothe nĩ kĩambĩrĩria kĩa ruo ta rwa mũtumia arĩ hakuhĩ kũgĩa mwana.

“Ningĩ andũ nĩ makamũneana mũnyarirũo na mamũũrage, na nĩ mũgathũũrũo nĩ ndũrĩrĩ ciothe nĩ ũndũ wa rĩĩtwa rĩakwa

Na andũ aingĩ nĩ makahĩngĩka na nĩ magakunyananĩra na mathũũrane mũndũ na ũrĩa ũngĩ

Nĩ gũgoka anabii aingĩ a maheeni na mahĩtithie andũ aingĩ;

na tondũ wa uuni-watho kũingĩha-rĩ, wendo wa andũ aingĩ nĩ ũkanyiha

No ũrĩa ũgakirĩrĩria o nginya mũico nĩwe ũkahonokio

Naguo ũhoro ũyũ mwega wa Ũthamaki nĩ ũkahunjio thĩ yothe ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgakinya.

“Nĩ ũndũ ũcio, rĩrĩa mũkona kĩndũ kĩrĩa kĩrĩ thahu kĩrehaga mwanangĩko, kĩrĩa mũnabii Danieli arĩtie ũhoro wakĩo, kĩrũgamĩte harĩa hamũre (ũrĩa ũrathoma nĩ ataũkĩrwo),

hĩndĩ ĩyo arĩa magakorũo Yahuda nĩ mambĩrĩrie kũũrĩra irĩma-inĩ

Mũndũ ũrĩa ũgakorũo nyũmba igũrũ ndakanaikũrũke kuoya indo iria irĩ thĩinĩ wa nyũmba yake,

na mũndũ ũrĩa ũgakorũo mũgũnda ndakanacoke kuoya nguo yake ya igũrũ

Kaĩ andũ-a-nja arĩa magakorũo marĩ na nda na arĩa magakorũo makĩongithia ciana matukũ macio nĩ magakorũo na haaro-ĩ

Hoyagai atĩ hĩndĩ yanyu ya kũũra ndĩkanakinye hĩndĩ ya heho kana mũthenya wa Thabatũ;

tondũ nĩ gũkagĩa na thĩna mũnene ũtarĩ woneka kuuma kĩambĩrĩria gĩa thĩ nginyagia rĩu, na ndũkoneka rĩngĩ

Ma nĩ atĩ, matukũ macio matangĩnyihio, gũtirĩ mũndũ ũngĩkahonoka; no nĩ ũndũ wa arĩa athuure matukũ macio nĩ makanyihio.

“Na rĩrĩ, mũndũ o na ũrĩkũ angĩkamwĩra atĩrĩ, ‘Messiya arĩ haha,’ kana, ‘Arĩ haarĩa!’ mũtikanetĩkie

Nĩ gũkorũo nĩ gũgoka Messiya a maheeni na anabii a maheeni na maringe ciama nene na meke maũndũ ma magegania nĩguo mahĩtithie nginya arĩa athuure kũngĩhoteka

Ririkanai atĩ nĩ ndamũmenyithia o mbere

Nĩ ũndũ ũcio-rĩ, andũ mangĩkamwĩra atĩrĩ, ‘Arĩ werũ-inĩ,’ mũtikanathiĩ; kana mamwĩre, ‘Arĩ rumu cia thĩinĩ,’ mũtikanetĩkie

Tondũ o ta ũrĩa rũheni ruumaga mwena wa irathĩro na rũkoneka nginya mwena wa ithũĩro, noguo gũũka kwa Mũrũ wa mũndũ gũkahaana

Harĩa kĩimba gĩkoragwo, hau nĩho nderi ikagomana.

“Thutha wa thĩna wa matukũ macio, o rĩo riũa nĩ rĩkagĩa nduma, naguo mweri ndũkaruta ũtheri waguo, nacio njata nĩ ikagũa kuuma igũrũ, namo mahinya ma igũrũ nĩ magathingithio

Thutha ũcio kĩmenyithia kĩa Mũrũ wa mũndũ nĩ gĩkoneka igũrũ, nayo mĩhĩrĩga yothe ya thĩ nĩ ĩkehũũra gĩthũri ĩrĩ na kĩeha, na nĩ ĩkona Mũrũ wa mũndũ agĩũka arĩ thĩinĩ wa matu ma igũrũ arĩ na hinya na riri mũnene

Nake nĩ agatũma araika ake na mũgambo mũnene wa karumbeta, nao nĩ magacokanĩrĩria andũ ake arĩa athuure kuuma harĩ huho iria inya, kuuma gĩturi kĩmwe kĩa igũrũ nginya gĩturi kĩrĩa kĩngĩ.

“Na rĩrĩ, mwĩrutei na ngerekano ĩno ya mũkũyũ: Rĩrĩa tũhonge twaguo tuororoa na twagĩa mathangũ, nĩ mũmenyaga atĩ hĩndĩ ya ũrugarĩ nĩ ĩkuhĩrĩirie

O ũndũ ũmwe na ũcio, rĩrĩa mũkona maũndũ macio mothe, menyai atĩ arĩ hakuhĩ mũrango-inĩ

Ngũmwĩra atĩrĩ na ma, rũciaro rũrũ rũtirĩ hĩndĩ rũgathira nginya maũndũ macio mothe mekĩke

Igũrũ na thĩ nĩ igathira, no ciugo ciakwa gũtirĩ hĩndĩ igathira.

“Ũhoro wĩgiĩ mũthenya ũcio kana thaa, gũtirĩ mũndũ ũĩ, o na araika arĩa marĩ igũrũ kana Mũriũ, no Awa ũĩ

Nĩ gũkorũo o ta ũrĩa matukũ ma Nuhu maatariĩ, noguo gũkahaana hĩndĩ ya gũũka kwa Mũrũ wa mũndũ

Nĩ ũndũ o ta ũrĩa matukũ ma mbere ya Mũiyũro maatariĩ, andũ maarĩaga na makanyua, makahikania na makahika, nginya mũthenya ũrĩa Nuhu aingĩrire thabina,

na matiatindanĩire nginya rĩrĩa Mũiyũro wokire na ũkĩmanina othe, ũguo noguo gũũka kwa Mũrũ wa mũndũ gũkahaana

Arũme erĩ nĩ magakorũo mũgũnda; ũmwe wao oywo nake ũcio ũngĩ atigwo

Andũ-a-nja erĩ nĩ magakorũo magĩthĩa; ũmwe wao oywo nake ũcio ũngĩ atigwo

Nĩ ũndũ ũcio, ikaragai mwĩhũgĩte, tondũ mũtiũĩ ithaa rĩrĩa Mwathi wanyu agoka.

“No menyai ũndũ ũyũ: Korũo mwene nyũmba nĩ amenyete ituanĩra rĩrĩa mũici egũka, nĩ angĩaikarire eiguĩte na ndangĩetĩkĩririe nyũmba yake ĩbunjwo

Nĩ ũndũ ũcio o na inyuĩ ikaragai mwĩhaarĩirie, tondũ Mũrũ wa mũndũ agoka ithaa rĩrĩa mũtarecirĩria.

“Nũũ kũna ngombo ĩrĩa njĩhokeku na njũgĩ, ĩrĩa mwathi wayo amũrire igũrũ rĩa andũ a nyũmba yake, nĩguo ĩmaheage irio ihinda rĩrĩa rĩagĩrĩire

Kũrathimwo nĩ ngombo ĩyo mwathi wayo angĩgoka amĩkore ĩgĩka ũguo

Ngũmwĩra atĩrĩ o ma, nĩ akamĩamũra ĩrũgamĩrĩre indo ciake ciothe.

“No ngombo ĩyo njũru ĩngĩkeĩra na ngoro atĩrĩ, ‘Mwathi wakwa nĩ aracererũo,’

na yambĩrĩrie kũhũũra ngombo iria ingĩ ĩkĩrĩanagĩra na kũnyuanĩra na arĩĩu,

mwathi wa ngombo ĩyo agoka mũthenya ũrĩa ĩterĩgĩrĩire na ithaa rĩrĩa ĩtaramenya,

na nĩ akamĩherithia mũno na amĩtuĩre hamwe na hinga. Kũu nĩkuo kũrĩ kĩrĩro na kũhagarania magego.