Maũndũ ma Matukũ wa Keerĩ 19

Thutha ũcio Mũthamaki Jehoshafatu wa Yahuda agĩcoka na thayũ nyũmba-inĩ yake mwene kũu Yahrushalayim

Na rĩrĩ, Yahu mũrũ wa Hanani ũrĩa muoni cioneki agĩthiĩ kũmũtũnga na akĩĩra Mũthamaki Jehoshafatu atĩrĩ: “Hihi andũ arĩa aganu nĩo wagĩrĩirũo gũteithia, na hihi andũ arĩa mathũire Yahweh nĩo wagĩrĩirũo kwenda? Nĩ ũndũ wa ũguo, marakara ma Yahweh marĩ igũrũ rĩaku

O na kũrĩ ũguo, nĩ kũrĩ maũndũ mega monekete thĩinĩ waku, tondũ nĩ weeheririe mĩtĩ ya kũhoywo kuuma bũrũri-inĩ na nĩ ũhaarĩirie ngoro yaku gũcaria Kĩhoti ũrĩa wa ma.”

Jehoshafatu agĩthiĩ na mbere gũikara Yahrushalayim, na akiumagara o rĩngĩ agĩthiĩ kũrĩ andũ kuuma Biri-shiba nginya gĩcigo kĩrĩa kĩrĩ irĩma kĩa Efiraimu, nĩguo amacokie kũrĩ Yahweh Kĩhoti wa maithe mao ma tene

Ningĩ nĩ aamũrire atuanĩri ciira kũndũ guothe thĩinĩ wa bũrũri matũũra-inĩ mothe marĩa maarĩ na ũgitĩri ma Yahuda, itũũra o itũũra

Na akĩĩra atuanĩri ciira acio atĩrĩ: “Roragai wega maũndũ marĩa mũreka, nĩ gũkorũo mũtiratua ciira nĩ ũndũ wa mũndũ no nĩ tondũ wa Yahweh, na nĩ arĩkoragwo hamwe na inyuĩ rĩrĩa mũratuanĩra ciira

Rĩu-rĩ, mwĩtigagĩrei Yahweh. Mwĩmenyagĩrĩrei maũndũ-inĩ marĩa mũreka, tondũ harĩ Yahweh Kĩhoti witũ hatirĩ wagi wa kĩhooto, hatirĩ mũthutũkanio, hatirĩ kuoya mahaki.”

Ningĩ thĩinĩ wa Yahrushalayim Jehoshafatu nĩ aamũrire Alawii amwe na athĩnjĩri-Yahweh na atongoria amwe a nyũmba cia maithe ma andũ a Isiraeli nĩguo matungatage marĩ atuanĩri ciira nĩ ũndũ wa Yahweh na matuithanagie maciira ma aikari a Yahrushalayim

Na akĩmaatha akĩmeera atĩrĩ: “Ũũ nĩguo mwagĩrĩirũo gwĩka nĩ ũndũ wa gwĩtigĩra Yahweh, mũrĩ na wĩhokeku na mwĩke na ngoro nginyanĩru:

Rĩrĩa rĩothe ariũ a ithe wanyu arĩa maikaraga matũũra-inĩ mao mamũrehera ciira wĩgiĩ ũiti wa thakame kana kĩũria kĩgiĩ watho, rĩathani, mawatho, kana matuĩro, mwagĩrĩirũo kũmahe mũkaana nĩguo matigakorũo na mahĩtia mbere ya Yahweh; kwaga ũguo marakara make megũkorũo igũrũ rĩanyu na igũrũ rĩa ariũ a ithe wanyu. Ũguo nĩguo mwagĩrĩirũo gwĩka nĩguo mũtigakorũo na mahĩtia

Na rĩrĩ, Amaria mũnene wa athĩnjĩri-Yahweh nĩwe ũyũ, arĩkoragwo igũrũ rĩanyu maũndũ-inĩ mothe megiĩ Yahweh. Zebadia mũrũ wa Ishumaeli nĩwe mũtongoria wa nyũmba ya Yahuda maũndũ-inĩ mothe megiĩ mũthamaki. Nao Alawii marĩtungataga marĩ ateithĩrĩria anyu. Gĩai na hinya na mũrute wĩra, na Yahweh arokorũo hamwe na arĩa mekaga wega.”