Maũndũ ma Matukũ wa Keerĩ 20
Thutha ũcio, Amoabi na Aamoni, o hamwe na Aamonimu amwe, magĩũka kũrũa na Jehoshafatu
Nĩ ũndũ ũcio, Jehoshafatu akĩĩrũo atĩrĩ: “Kĩrĩndĩ kĩnene nĩ gĩũkĩte gũgũũkĩrĩra kuuma gĩcigo-inĩ kĩa iria, kuuma Edomu, na kĩrĩ Hazazoni-tamaru, ũguo nĩ kuuga Eni-gedi.”
Nake Jehoshafatu aigua ũguo agĩĩtigĩra, na agĩtua itua rĩa gũcaria Yahweh. Nĩ ũndũ ũcio, akĩanĩrĩra atĩ andũ othe a Yahuda mehinge
Nao andũ a Yahuda magĩcokanĩrĩra hamwe nĩguo matuĩrie ũhoro harĩ Yahweh; mookire moimĩte matũũra-inĩ mothe ma Yahuda nĩguo mahoe ũhoro harĩ Yahweh.
Jehoshafatu agĩcoka akĩrũgama kĩũngano-inĩ kĩa Yahuda na Yahrushalayim thĩinĩ wa nyũmba ya Yahweh mbere ya nja ĩrĩa njerũ,
akiuga ũũ: “Atĩrĩrĩ wee Yahweh Kĩhoti wa maithe maitũ ma tene, na githĩ wee tiwe Kĩhoti kũu igũrũ; githĩ ndũkoragwo na wathani igũrũ rĩa mothamaki mothe ma ndũrĩrĩ? Hinya na ũhoti irĩ guoko-inĩ gwaku, na gũtirĩ mũndũ ũngĩhota gũgwĩtiiria.
Wee Kĩhoti witũ-rĩ, na githĩ ndwaingatire aikari a bũrũri ũyũ mehere mbere ya andũ aku Isiraeli na ũkĩũheana harĩ mbeũ ya mũrata waku Iburahimu ũtuĩke igai rĩa gũtũũra
Nao magĩikara kuo, na magĩgwakĩra handũ hamũre kuo nĩ ũndũ wa rĩĩtwa rĩaku, makiuga ũũ,
‘Thĩna ũngĩgaatũkora, ũkorũo ũrĩ wa rũhiũ rwa njora, ituĩro iritũ, mũrimũ mũũru, kana ng’aragu, reke tũkaarũgama mbere ya nyũmba ĩno na mbere yaku (nĩ gũkorũo rĩĩtwa rĩaku rĩrĩ thĩinĩ wa nyũmba ĩno) na tũgũkaĩre ũtũteithie tuume thĩna-inĩ ũrĩa tũrĩ naguo, nawe ũgaatũthikĩrĩria na ũtũhonokie.’
Na rĩu haha harĩ na andũ a Amoni, Moabi, na gĩcigo kĩrĩa kĩrĩ irĩma gĩa Seiru, arĩa ũteetĩkĩririe Isiraeli mamatharĩkĩre rĩrĩa mooimire bũrũri wa Misiri. Maarorire na kũngĩ makĩmeherera na matiamaniinire
Rĩu maratũrĩha na njĩra ya gũka gũtũingata kuuma bũrũri-inĩ waku ũrĩa watũheire ũtuĩke igai
Atĩrĩrĩ wee Kĩhoti witũ, na githĩ ndũkũmatuĩra? Nĩ gũkorũo ithuĩ tũtirĩ na hinya mbere ya kĩrĩndĩ gĩkĩ kĩnene kĩroka gũtũũkĩrĩra; na tũtiũĩ ũrĩa twagĩrĩirũo nĩ gwĩka, no maitho maitũ merekeire harĩ wee.”
Ihinda-inĩ rĩu, andũ othe a Yahuda maarũgamĩte mbere ya Yahweh, hamwe na atumia ao, na ciana ciao, nginya twana tũrĩa tũnini.
Thutha ũcio gatagatĩ-inĩ ga kĩũngano kĩu, roho wa Yahweh ũgĩũka igũrũ rĩa Jahazieli mũrũ wa Zakaria, mũrũ wa Benaia mũrũ wa Jeieli mũrũ wa Matania ũrĩa Mũlawii wa ariũ a Asafu
Akiuga atĩrĩ: “Thikĩrĩriai inyuĩ andũ othe a Yahuda na inyuĩ aikari a Yahrushalayim na Mũthamaki Jehoshafatu! Ũũ nĩguo Yahweh ekũmwĩra, ‘Mũtigetigĩre kana mũmake tondũ wa kĩrĩndĩ gĩkĩ kĩnene, nĩ gũkorũo mbaara ĩno ti yanyu no nĩ ya Kĩhoti
Rũciũ ikũrũkai mũkamatharĩkĩre. Magaakorũo makĩambata magereire gacĩra ga Zizu na mũkaamakora mũthia-inĩ wa mũkuru mbere ya werũ wa Jerueli
Mũtikabatara kũrũa mbaara ĩno. Rũgamai handũ hanyu, mũrũgame mwĩhandĩte, muone Yahweh akĩmũhonokia. Inyuĩ Yahuda na Yahrushalayim mũtigetigĩre kana mũmake. Rũciũ mũkoimagara mũmatharĩkĩre, na Yahweh nĩ agaakorũo hamwe na inyuĩ.’”
O rĩo Jehoshafatu akĩinamĩrĩra agĩturumithia ũthiũ thĩ, na andũ othe a Yahuda na aikari a Yahrushalayim makĩĩgũithia thĩ mbere ya Yahweh nĩguo mathathaiye Yahweh
Nao Alawii arĩa maarĩ njiarũa cia Akohathu na cia Akora makĩrũgama nĩguo magooce Yahweh Kĩhoti wa Isiraeli na mũgambo mũnene mũno.
Magĩũkĩra tene rũcinĩ rũrĩa rwarũmĩrĩire na magĩthiĩ werũ-inĩ wa Tekoa. Na rĩrĩa maathiaga, Jehoshafatu akĩrũgama na akĩmeera atĩrĩ: “Thikĩrĩriai, inyuĩ andũ a Yahuda na aikari a Yahrushalayim! Gĩai na wĩtĩkio harĩ Yahweh Kĩhoti wanyu nĩguo mũhote kũrũgama mwĩhandĩte. Gĩai na wĩtĩkio harĩ anabii ake, na nĩ mũgũtooria.”
Thutha wa kwaranĩria na andũ, agĩthuura andũ a kũinĩra Yahweh na kũmũgooca mehumbĩte nguo nyamũre makiumagara marĩ mbere ya arũme arĩa maarĩ na indo cia mbaara, makiugaga ũũ: “Cokeriai Yahweh ngatho, tondũ ũtugi wake ũtũũraga tene na tene.”
Rĩrĩa maambĩrĩirie kũina makĩgoocaga makenete, Yahweh akĩbanga tharĩkĩro ĩterĩgĩrĩirũo kwerekera andũ a Amoni, Moabi, na gĩcigo kĩrĩa kĩrĩ irĩma gĩa Seiru arĩa maatharĩkagĩra Yahuda, nao makĩũragana o ene
Na Aamoni na Amoabi makĩgarũrũkĩra aikari a gĩcigo kĩrĩa kĩrĩ irĩma gĩa Seiru nĩguo mamanange na mamaniine; na rĩrĩa maaniinire aikari a Seiru, magĩteithĩrĩria kũniinana o ene.
Rĩrĩa andũ a Yahuda maakinyire nyũmba-inĩ ĩrĩa ndaya na igũrũ ya mũrangĩri ya werũ-inĩ na makĩrora kĩrĩndĩ kĩu, makĩona ciimba ciao igũĩte thĩ; gũtirĩ mũndũ wahonokete
Nĩ ũndũ ũcio, Jehoshafatu na andũ ake magĩthiĩ gũtaha indo kuuma kũrĩ o, na magĩkora atĩ maarĩ na indo nyingĩ, nguo, na indo cia kwĩrirĩrio, iria maamarutire nginya makĩremwo nĩ gũkuua ingĩ. Maahũthĩrire thikũ ithatũ gũkuua indo icio cia gũtahwo, nĩ gũkorũo ciarĩ nyingĩ
Mũthenya wa kana makĩgomana Mũkuru-inĩ wa Beraka, tondũ hau nĩho maagooceire Yahweh. Nĩkĩo meetire handũ hau Mũkuru wa Beraka—nginya ũmũthĩ ũyũ.
Thutha ũcio andũ othe a Yahuda na Yahrushalayim matongoretio nĩ Jehoshafatu magĩcoka Yahrushalayim makenete, nĩ gũkorũo Yahweh nĩ aatũmĩte makene nĩ ũndũ wa gũtooria thũ ciao
Magĩkĩingĩra Yahrushalayim marĩ na inanda cia ndigi, inanda cia mũgeeto, na tũrumbeta na magĩthiĩ nyũmba-inĩ ya Yahweh
Na mothamaki mothe ma mabũrũri makĩnyitwo nĩ guoya nĩ ũndũ wa Yahweh rĩrĩa maaiguire atĩ nĩ aahũũrĩte thũ cia Isiraeli
Nĩ ũndũ ũcio ũthamaki wa Jehoshafatu ũgĩikara na thayũ, na Kĩhoti wake agĩthiĩ na mbere kũmũhe ũhurũko mĩena yothe.
Na Jehoshafatu agĩthiĩ na mbere gwathana Yahuda. Aarĩ na mĩaka 35 rĩrĩa aatuĩkire mũthamaki, na agĩathana mĩaka 25 thĩinĩ wa Yahrushalayim. Nyina eetagwo Azuba mwarĩ wa Shilihi
Agĩthiĩ na mbere kũrũmĩrĩra njĩra ya ithe Asa. Ndaatiganire nayo, na eekire maũndũ marĩa magĩrĩire maitho-inĩ ma Yahweh
No rĩrĩ, kũndũ kũrĩa gũtũũgĩru gũtieheririo, na andũ matiahaarĩirie ngoro ciao nĩ ũndũ wa Kĩhoti wa maithe mao ma tene.
Ha ũhoro wa maũndũ macio mangĩ megiĩ Jehoshafatu, kuuma kĩambĩrĩria nginya mũthia, nĩ maandĩke hamwe na ciugo cia Yahu mũrũ wa Hanani, iria ciaandĩkirũo thĩinĩ wa Ibuku rĩa Athamaki a Isiraeli
Thutha ũcio Mũthamaki Jehoshafatu wa Yahuda nĩ aagĩire na ngwatanĩro na Mũthamaki Ahazia wa Isiraeli, ũrĩa wekaga maũndũ ma waganu
Agĩkĩnyitanĩra nake harĩ gũthondeka meri cia gũthiĩ Tarishishi, na magĩthondekera meri icio Ezioni-geberi
No rĩrĩ, Eliezeri mũrũ wa Dodavahu kuuma Maresha akĩrathĩra Jehoshafatu ũrathi wa kũmũũkĩrĩra, akiuga ũũ: “Tondũ nĩ ũgĩĩte ngwatanĩro na Ahazia, Yahweh nĩ ekwananga mawĩra maku.” Nĩ ũndũ ũcio, meri icio igĩthũkanga, na itiahotire gũthiĩ Tarishishi.