Maũndũ ma Matukũ wa Keerĩ 31

Rĩrĩa maarĩkirie maũndũ macio mothe, andũ a Isiraeli othe arĩa maarĩ kuo magĩthiĩ matũũra-inĩ ma Yahuda, na makĩhehenja itugĩ cia kũhoywo, magĩtemenga mĩtĩ ya kũhoywo, na makĩmomora kũndũ kũrĩa gũtũũgĩru na igongona iria ciarĩ kũndũ guothe thĩinĩ wa Yahuda na Benjamini, o hamwe na Efiraimu na Manase, nginya magĩciananga biũ, thutha ũcio andũ a Isiraeli othe magĩcoka matũũra-inĩ mao, o mũndũ igai-inĩ rĩake.

Nake Hezekia akĩamũra athĩnjĩri-Yahweh ikundi-inĩ ciao na Alawii ikundi-inĩ ciao, o ũmwe wa athĩnjĩri-Yahweh na Alawii nĩ ũndũ wa ũtungata wao, nĩ ũndũ wa magongona ma njino na magongona ma ũiguano, nĩguo matungatage magĩcokagia ngatho na kũgooca marĩ ihingo-inĩ cia nja cia Yahweh

Indo imwe cia mũthamaki ikĩneanwo nĩ ũndũ wa magongona ma njino, o hamwe na magongona ma rũcinĩ na ma hwaĩ-inĩ, o na magongona ma njino ma Thabatũ, tũrũgamo twa mweri, na ciathĩ, kũringana na ũrĩa kwandĩkĩtwo thĩinĩ wa Watho wa Yahweh.

Makĩria ma ũguo, agĩatha andũ arĩa maaikaraga Yahrushalayim maheage athĩnjĩri-Yahweh na Alawii gĩcunjĩ kĩrĩa maagĩrĩire kũheo, nĩgetha mahotage kũrũmĩrĩra biũ watho wa Yahweh

Rĩrĩa watho ũcio waheanirũo, o hĩndĩ ĩyo andũ a Isiraeli makĩruta mũigana mũnene wa maciaro ma mbere ma ngano, ndibei ya mũhihano, maguta, na ũũkĩ, o na maciaro mothe ma mũgũnda; maarehire mũigana mũnene wa gĩcunjĩ gĩa ikũmi kĩa indo ciothe

Na ciana cia Isiraeli na Yahuda arĩa maaikaraga matũũra-inĩ ma Yahuda o nao makĩrehe gĩcunjĩ gĩa ikũmi kĩa ng’ombe na ng’ondu na gĩcunjĩ gĩa ikũmi kĩa indo nyamũre iria ciaamũrĩirũo Yahweh Kĩhoti wao. Magĩcirehe na magĩciiga irĩ hĩba nyingĩ

Mweri-inĩ wa gatatũ makĩambĩrĩria kũiga mĩhothi yao ĩrĩ hĩba; na mweri-inĩ wa mũgwanja makĩrĩkia

Rĩrĩa Hezekia na anene mookire na makĩona hĩba icio, makĩgooca Yahweh na makĩrathima andũ ake Isiraeli.

Hezekia akĩũria athĩnjĩri-Yahweh na Alawii ũhoro wa hĩba icio,

nake Azaria mũnene wa athĩnjĩri-Yahweh wa nyũmba ya Zadoku akĩmwĩra atĩrĩ: “Kuuma rĩrĩa maambĩrĩirie kũrehe mĩhothi thĩinĩ wa nyũmba ya Yahweh, andũ makoretwo makĩrĩa makahũna na kũrĩ o na indo nyingĩ itigarĩte, tondũ Yahweh nĩ arathimĩte andũ ake, na indo ici nyingĩ igatigara.”

Nake Hezekia akĩmeera mahaarĩrie rumu cia kũiga indo nyũmba-inĩ ya Yahweh, nao magĩcihaarĩria

Magĩthiĩ na mbere kũrehe mĩhothi marĩ na wĩhokeku, icunjĩ cia ikũmi, na indo nyamũre; Konania ũrĩa warĩ Mũlawii agĩtuwo mũrũgamĩrĩri wa indo icio ciothe, na mũrũ wa ithe Shimei aarĩ wa kerĩ

Jehieli, Azazia, Nahathu, Asaheli, Jerimothu, Jozabadu, Elieli, Isimakia, Mahathu, na Benaia maarĩ anene a gũteithĩrĩria Konania na mũrũ wa ithe Shimei, kũringana na watho wa Mũthamaki Hezekia, nake Azaria aarĩ mũrũgamĩrĩri wa nyũmba ya Kĩhoti ũrĩa wa ma

Na Kore mũrũ wa Imuna, Mũlawii ũrĩa warĩ mũrangĩri wa kĩhingo mwena wa irathĩro, nĩwe warũgamagĩrĩra magongona ma kwĩyendera ma Kĩhoti ũrĩa wa ma, na akĩgaĩra andũ mĩhothi ĩrĩa yarutĩirũo Yahweh o hamwe na indo iria nyamũre mũno

Na rungu rwa ũtongoria wake kwarĩ Edeni, Miniamini, Jeshua, Shemaia, Amaria, na Shekania, matũũra-inĩ ma athĩnjĩri-Yahweh, wĩra-inĩ ũrĩa meehokeirũo, nĩguo magaĩre ariũ a ithe wao marĩ na ũigananĩru ikundi-inĩ ciao, ũrĩa mũnene na ũrĩa mũnini o ũndũ ũmwe

Ũndũ ũcio warĩ hamwe na kũgaĩra arũme a kuuma mĩaka ĩtatũ gũthiĩ na igũrũ arĩa maandĩkithĩtio kũringana na ndĩra ciao, arĩa mookaga o mũthenya gũtungata nyũmba-inĩ ya Yahweh na kũhingia mawĩra ma ikundi ciao.

Athĩnjĩri-Yahweh maandĩkithĩtio na ndĩra ciao kũringana na nyũmba cia maithe mao, o ta ũrĩa kwarĩ harĩ Alawii arĩa maarĩ na mĩaka

Arĩa maandĩkithĩtio na ndĩra nĩ hamwe na ciana ciao ciothe, atumia ao, ariũ ao, na aarĩ ao, kĩũngano kĩao gĩothe—nĩ gũkorũo nĩ maaikarire meyamũrĩte nĩ ũndũ wa ũndũ ũrĩa mwamũre tondũ wa wĩra ũrĩa meehokeirũo—

o hamwe na njiarũa cia Haruni, athĩnjĩri-Yahweh arĩa maaikaraga mĩgũnda-inĩ ya kũrĩithio ĩrĩa yarigicĩirie matũũra mao. Thĩinĩ wa matũũra mothe, andũ nĩ maathuurĩtwo makagwetwo na rĩĩtwa nĩguo maheage arũme othe gatagatĩ-inĩ ka athĩnjĩri-Yahweh rwĩga rwao, o na mũndũ wothe watarĩtwo harĩ ndĩra cia Alawii.

Hezekia eekire ũguo kũndũ guothe thĩinĩ wa Yahuda, na agĩthiĩ na mbere gwĩka maũndũ mega na marĩa magĩrĩire na ma kwĩhokeka mbere ya Yahweh Kĩhoti wake

Na wĩra o wothe ũrĩa aarutire wa gũcaria Kĩhoti wake, ũkorũo wakonainie na ũtungata wa nyũmba ya Kĩhoti ũrĩa wa ma kana na Watho na rĩathani, aaũrutire na ngoro yothe, na akĩgaacĩra.