Maũndũ ma Matukũ wa Keerĩ 32
Thutha wa maũndũ macio, na thutha wa ciĩko icio cia wĩhokeku, Mũthamaki Senakeribu wa Ashuri agĩũka na agĩtharĩkĩra Yahuda. Akĩrigicĩria matũũra marĩa maarĩ na ũgitĩri, arĩ na muoroto wa gũtonya kuo nĩguo amatahe.
Rĩrĩa Hezekia oonire atĩ Senakeribu nĩ ookĩte na aarĩ na muoroto wa kũrũa na Yahrushalayim,
akĩaranĩria na anene ake o hamwe na njamba ciake cia ita, na thutha ũcio agĩtua itua rĩa kũhingĩrĩria maĩ ma matherũkĩro marĩa maarĩ nja ya itũũra rĩu, nao makĩmũnyita mbaru
Andũ aingĩ makĩũngana hamwe, na makĩhingĩrĩria matherũkĩro mothe na karũũĩ karĩa gaathereraga kagereire bũrũri-inĩ ũcio, makiuga atĩrĩ: “Nĩ kĩĩ kĩngĩgĩtũma Mũthamaki wa Ashuri oke akore maĩ maingĩ?”
Makĩria ma ũguo, akĩĩhotora gwaka rĩngĩ rũthingo ruothe rũrĩa rwagwĩte na agĩaka nyũmba ndaya na igũrũ rũthingo-inĩ rũu, na agĩthondeka rũthingo rũngĩ nja. Ningĩ nĩ aathondekire Karĩma ka Itũũra rĩa Daudi na agĩthondeka mũigana mũnene wa matharaita na ngo
Agĩcoka akĩamũra anene a mbũtũ igũrũ rĩa andũ na akĩmacokanĩrĩria kĩhaaro-inĩ kĩa mũingĩ kĩrĩa kĩarĩ kĩhingo-inĩ gĩa itũũra na akĩmomĩrĩria ngoro, akĩmeera atĩrĩ:
“Gĩai na ũmĩrĩru na mũgĩe na hinya. Mũtigetigĩre kana mũmake nĩ ũndũ wa mũthamaki wa Ashuri na kĩrĩndĩ gĩothe kĩrĩa kĩrĩ hamwe nake, nĩ gũkorũo arĩa marĩ hamwe na ithuĩ nĩ aingĩ gũkĩra arĩa marĩ hamwe nake
We arĩ na guoko kwa mwĩrĩ wa nyama, no ithuĩ tũrĩ na Yahweh Kĩhoti witũ nĩguo atũteithie na atũrũĩre mbaara citũ.” Nao andũ magĩĩkĩrũo hinya nĩ ciugo icio cia Mũthamaki Hezekia wa Yahuda.
Thutha ũcio, rĩrĩa Mũthamaki Senakeribu wa Ashuri aarĩ Lakishi arĩ na ũhoti wake wothe wa ũthamaki, agĩtũma ndungata ciake Yahrushalayim, kũrĩ Mũthamaki Hezekia wa Yahuda na kũrĩ andũ othe a Yahudia thĩinĩ wa Yahrushalayim, akiuga atĩrĩ:
“Ũũ nĩguo Mũthamaki Senakeribu wa Ashuri ekuuga, ‘Nĩ kĩĩ kĩu mwĩhokete mũgathiĩ na mbere gũikara Yahrushalayim o na ĩrigicĩirio
Na githĩ Hezekia ti kũmũhĩtithia aramũhĩtithia na akamũneana nĩguo mũkue nĩ ũndũ wa ng’aragu na nyota, akamwĩra ũũ: “Yahweh Kĩhoti witũ nĩ egũtũhonokia kuuma guoko-inĩ kwa mũthamaki wa Ashuri”
Githĩ Hezekia ũyũ towe weeheririe kũndũ gũtũũgĩru gwa kĩhoti wanyu na igongona ciake agĩcoka akĩĩra andũ a Yahuda na Yahrushalayim atĩrĩ: “Mwagĩrĩirũo kũinamĩrĩra mbere ya kĩgongona kĩmwe, na igũrũ rĩakĩo nĩho mwagĩrĩirũo kũrutĩra ndogo ya magongona manyu”
Kaĩ mũtoĩ ũrĩa niĩ na maithe maitũ ma tene twekire ikundi ciothe cia andũ a mabũrũri? Hihi ihoti cia ndũrĩrĩ iria ciaikaraga mabũrũri-inĩ macio nĩ ciahotire kũhonokia mabũrũri ma cio kuuma guoko-inĩ gwakwa
Nĩ hoti ĩrĩkũ harĩ ihoti ciothe cia ndũrĩrĩ iria maithe maitũ ma tene maanangire yahotire kũhonokia andũ ayo kuuma guoko-inĩ gwakwa, atĩ nĩguo Kĩhoti wanyu ahote kũmũhonokia kuuma guoko-inĩ gwakwa
Mũtikareke Hezekia amũheenie kana amũhĩtithie ũguo! Mũtikamwĩtĩkie, tondũ gũtirĩ hoti ya rũrĩrĩ o ruothe kana ũthamaki o wothe yahotire kũhonokia andũ ayo kuuma guoko-inĩ gwakwa na kuuma guoko-inĩ kwa maithe maitũ ma tene. Kĩhoti wanyu angĩkĩhota atĩa kũmũhonokia kuuma guoko-inĩ gwakwa?’”
Ndungata ciake nĩ ciaaririe maũndũ maingĩ o na makĩria ma gũũkĩrĩra Yahweh Kĩhoti ũrĩa wa ma na Hezekia ndungata yake
Ningĩ nĩ aandĩkire marũa ma kũruma Yahweh Kĩhoti wa Isiraeli na akĩaria maũndũ ma kũmũũkĩrĩra, akiuga ũũ: “O ta ihoti cia ndũrĩrĩ iria ciaikaraga mabũrũri-inĩ macio, o icio itaahotire kũhonokia andũ a cio kuuma guoko-inĩ gwakwa, no taguo Kĩhoti wa Hezekia atekũhota kũhonokia andũ ake kuuma guoko-inĩ gwakwa.”
Magĩgĩthiĩ na mbere kwanĩrĩra na mũgambo mũnene na rũthiomi rwa Ayahudi makĩarĩria andũ a Yahrushalayim arĩa maarĩ rũthingo igũrũ, nĩguo matũme metigĩre na mamake, nĩgetha matahe itũũra rĩu
Makĩaria maũndũ ma gũũkĩrĩra Kĩhoti wa Yahrushalayim o ta ũrĩa maaririe magĩũkĩrĩra ihoti cia ikundi cia andũ a thĩ, o icio wĩra wa moko ma andũ
No Mũthamaki Hezekia na mũnabii Isaia mũrũ wa Amozu magĩthiĩ na mbere kũhoya igũrũ rĩgiĩ ũndũ ũcio na gũkaĩra Ũrĩa ũrĩ igũrũ amateithie.
Nake Yahweh agĩtũma mũraika na akĩniina njamba ciothe cia ita iria irĩ hinya, mũtongoria o wothe, na mũnene o wothe kambĩ-inĩ ya mũthamaki wa Ashuri, na mũthamaki ũcio agĩcoka bũrũri wake aconokete. Thutha-inĩ akĩingĩra nyũmba-inĩ ya kĩhoti wake, na arĩ kũu ariũ ake amwe makĩmũũraga na rũhiũ rwa njora
Yahweh agĩkĩhonokia Hezekia na aikari a Yahrushalayim kuuma guoko-inĩ kwa Mũthamaki Senakeribu wa Ashuri na kuuma guoko-inĩ kwa andũ acio angĩ othe na akĩmahe ũhurũko mĩena yothe
Na andũ aingĩ makĩrehera Yahweh iheo kũu Yahrushalayim na makĩrehera Mũthamaki Hezekia wa Yahuda indo njega, nake akĩheo gĩtĩo kĩnene nĩ ndũrĩrĩ ciothe kuuma hĩndĩ ĩyo.
Matukũ-inĩ macio Hezekia nĩ aarũarire na aarĩ hakuhĩ gũkua, agĩkĩhoya Yahweh, nake akĩmũcokeria na akĩmũhe kĩmenyithia
No Hezekia ndoonanirie ngatho nĩ ũndũ wa maũndũ mega marĩa eekĩirũo, nĩ gũkorũo ngoro yake nĩ yakũririe mwĩtĩo, ũndũ ũcio ũgĩtũma marakara mamũũkĩrĩre na mokĩrĩre andũ a Yahuda na Yahrushalayim
No rĩrĩ, Hezekia nĩ eenyihirie, na ngoro yake ĩgĩtiga gũkorũo na mwĩtĩo, we hamwe na aikari a Yahrushalayim, na marakara ma Yahweh matiokire igũrũ rĩao matukũ-inĩ ma Hezekia.
Na Hezekia akĩgĩa na ũtonga mũnene o na riri; na agĩĩthondekera thitoo cia kũiga betha, thahabu, mahiga ma goro, maguta ma balisamu, ngo, na indo ciothe cia kwĩrirĩrio
Ningĩ agĩthondeka kũndũ gwa kũiga ngano na ndibei ya mũhihano na maguta, o hamwe na ciugũ cia mahiũ ma mĩthemba ĩtiganĩte na ciugũ cia ndũũru
Ningĩ akĩĩgĩra na matũũra, na mahiũ maingĩ, ndũũru cia ng’ondu na ng’ombe, nĩ gũkorũo Kĩhoti nĩ aamũheire indo nyingĩ mũno
Hezekia nĩwe wahingĩrĩirie kĩhumo kĩa mwena wa rũgongo kĩa maĩ ma Gihoni na akĩmerekeria maikũrũke mwena wa ithũĩro wa Itũũra rĩa Daudi, na Hezekia nĩ aagaacĩrire wĩra-inĩ o wothe ũrĩa aarutaga
No rĩrĩa aaria a anene a Babuloni maatũmirũo makamũũrie ũhoro wa kĩmenyithia kĩrĩa kĩoonekete bũrũri-inĩ ũcio, Kĩhoti ũrĩa wa ma nĩ aamwehereire nĩgetha amũgerie, nĩguo amenye maũndũ marĩa mothe maarĩ ngoro-inĩ yake.
Ha ũhoro wa maũndũ macio mangĩ megiĩ Hezekia na ciĩko ciake njega, nĩ maandĩke kĩoneki-inĩ kĩa mũnabii Isaia, mũrũ wa Amozu, thĩinĩ wa Ibuku rĩa Athamaki a Yahuda na a Isiraeli
Thutha ũcio Hezekia akĩhurũkio hamwe na maithe make ma tene, na makĩmũthika mwambato-inĩ wa gũthiĩ kũndũ gwa gũthikanwo kwa ariũ a Daudi; na andũ othe a Yahuda na aikari a Yahrushalayim makĩmũhe gĩtĩo hĩndĩ ĩrĩa aakuire. Na mũrũwe Manase agĩtuĩka mũthamaki ithenya rĩake.