Maũndũ ma Matukũ wa Keerĩ 33

Manase aarĩ na mĩaka 12 rĩrĩa aatuĩkire mũthamaki, na agĩathana mĩaka 55 thĩinĩ wa Yahrushalayim.

Nake agĩka maũndũ moru maitho-inĩ ma Yahweh, akĩrũmĩrĩra mĩtugo ĩrĩ magigi ya ndũrĩrĩ iria Yahweh aaingatĩte ciehere mbere ya andũ a Isiraeli

Nĩ aakire rĩngĩ kũndũ gũtũũgĩru kũrĩa ithe Hezekia aamomorete, agĩakĩra ihoti cia Baali igongona na agĩthondeka mĩtĩ ya kũhoywo, o na akĩinamĩrĩra mbũtũ yothe ya igũrũ na akĩmĩtungatĩra

Ningĩ agĩaka igongona thĩinĩ wa nyũmba ya Yahweh, ĩrĩa Yahweh ooigĩte ũũ ũhoro-inĩ wayo: “Thĩinĩ wa Yahrushalayim nĩkuo rĩĩtwa rĩakwa rĩgũtũũra tene na tene.”

Ningĩ agĩakĩra mbũtũ yothe ya igũrũ igongona thĩinĩ wa nja igĩrĩ cia nyũmba ya Yahweh

Na akĩhĩtũkĩria ariũ ake mwene mwaki-inĩ Mũkuru-inĩ wa Mũrũ wa Hinomu; agĩka maũndũ ma ũgo, akĩhũthĩra ũragũri, agĩka maũndũ ma ũrogi, na akĩamũra andũ arĩa maragia na maroho na arĩa marathaga mohoro. Agĩka maũndũ moru maitho-inĩ ma Yahweh na gĩkĩro kĩnene nĩguo amũrakarie.

Aaigire mũhianano wa gwacũhio ũrĩa aathondekire nyũmba-inĩ ya Kĩhoti ũrĩa wa ma ĩrĩa Kĩhoti eerĩte Daudi na akera mũrũ wake Suleimani atĩrĩ: “Thĩinĩ wa nyũmba ĩno na thĩinĩ wa Yahrushalayim, o ĩyo thuurĩte kuuma harĩ mĩhĩrĩga yothe ya Isiraeli, nĩ ngaaiga rĩĩtwa rĩakwa rĩtũũre kuo

Na gũtirĩ hĩndĩ ĩngĩ ngeeheria makinya ma Isiraeli kuuma bũrũri-inĩ ũrĩa ndagaĩire maithe mao ma tene, angĩkorũo nĩ marĩrũmagĩrĩra biũ maũndũ mothe marĩa ndĩmathĩte, marũmĩrĩre Watho wothe, mawatho na matuĩro ma ciira marĩa maaheanirũo kũgerera harĩ Musa.”

Manase aathiire na mbere kũhĩtithia andũ a Yahuda na aikari a Yahrushalayim, agĩtũma meke maũndũ moru mũno gũkĩra ndũrĩrĩ iria Yahweh aaniinĩte nĩguo ciehere mbere ya ciana cia Isiraeli.

Nake Yahweh agĩthiĩ na mbere kwarĩria Manase na andũ ake, no o matiathikĩrĩirie

Nĩ ũndũ ũcio Yahweh akĩmarehera anene a mbũtũ ya mũthamaki wa Ashuri, nao makĩnyita Manase na ihocio na makĩmuoha na bĩngũ igĩrĩ cia gĩcango makĩmũtwara Babuloni

Hĩndĩ ĩyo aarĩ na mĩtangĩko, nĩ aathaithire Yahweh Kĩhoti wake amũiguĩre tha na agĩthiĩ na mbere kwĩnyihia na njĩra nene mbere ya Kĩhoti wa maithe make ma tene

Agĩthiĩ na mbere kũmũhoya, nake akĩhutio ngoro nĩ ithaithana rĩake na akĩigua ihoya rĩake rĩa kwenda gwĩtĩkĩrĩka, na akĩmũcokia ũthamaki-inĩ wake kũu Yahrushalayim. Manase agĩkĩmenya atĩ Yahweh nĩwe Kĩhoti ũrĩa wa ma.

Thutha wa ũguo, agĩaka rũthingo rwa na nja rwa Itũũra rĩa Daudi mwena wa ithũĩro wa Gihoni mũkuru-inĩ o nginya Kĩhingo-inĩ gĩa Thamaki, na akĩrũthiũrũrũkia nginya Ofeli, na akĩrũraihia na igũrũ mũno. Makĩria ma ũguo, akĩamũra anene a mbũtũ thĩinĩ wa matũũra mothe marĩa maarĩ na ũgitĩri thĩinĩ wa Yahuda

Agĩcoka akĩeheria ihoti ng’eni na mũhianano thĩinĩ wa nyũmba ya Yahweh na igongona ciothe iria aakĩte kĩrĩma-inĩ kĩa nyũmba ya Yahweh na thĩinĩ wa Yahrushalayim, na agĩathana iteo nja ya itũũra

Ningĩ nĩ aahaarĩirie kĩgongona kĩa Yahweh na akĩambĩrĩria kũruta magongona ma ũiguano na magongona ma gũcokia ngatho igũrũ rĩakĩo, na akĩĩra andũ a Yahuda matungatĩre Yahweh Kĩhoti wa Isiraeli

O na kũrĩ ũguo, andũ no maarutagĩra magongona kũndũ kũrĩa gũtũũgĩru, ĩndĩ maarutagĩra o Yahweh Kĩhoti wao.

Ha ũhoro wa maũndũ macio mangĩ megiĩ Manase, ihoya rĩake kũrĩ Kĩhoti wake, na ciugo cia oni cioneki arĩa maaririe nake rĩĩtwa-inĩ rĩa Yahweh Kĩhoti wa Isiraeli, nĩ maandĩke maũndũ-inĩ ma athamaki a Isiraeli

Ningĩ ihoya rĩake o na ũrĩa aacokeirio ithaithana rĩake, mehia make mothe na kwaga kwĩhokeka gwake, kũrĩa aakĩte kũndũ gũtũũgĩru na akahanda mĩtĩ ya kũhoywo na mĩhianano ya gwacũhio atanenyihia, maũndũ macio nĩ maandĩke ciugo-inĩ cia andũ arĩa maamuonagĩra cioneki

Thutha ũcio Manase akĩhurũkio hamwe na maithe make ma tene na makĩmũthika nyũmba-inĩ yake; na mũrũwe Amoni agĩtuĩka mũthamaki ithenya rĩake.

Amoni aarĩ na mĩaka 22 rĩrĩa aatuĩkire mũthamaki, na agĩathana mĩaka ĩĩrĩ thĩinĩ wa Yahrushalayim

Nake agĩthiĩ na mbere gwĩka maũndũ moru maitho-inĩ ma Yahweh, o ta ũrĩa ithe Manase eekĩte; na Amoni akĩruta magongona kũrĩ mĩhianano yothe ya gwacũhio ĩrĩa ithe Manase aathondekete, na agĩthiĩ na mbere kũmĩtungatĩra

Ĩndĩ ndeenyihirie mbere ya Yahweh ta ũrĩa ithe Manase eenyihirie; handũ ha ũguo, Amoni oongereire mahĩtia make na gĩkĩro kĩnene

Thutha-inĩ ndungata ciake ikĩbanga njama ya kũmũũkĩrĩra na ikĩmũũragĩra thĩinĩ wa nyũmba yake mwene

No andũ a bũrũri ũcio makĩũraga arĩa othe maabangĩte njama ya gũũkĩrĩra Mũthamaki Amoni, na magĩtua mũrũwe Josia mũthamaki ithenya rĩake.