Maũndũ ma Matukũ wa Mbere 22

Daudi agĩcoka akiuga ũũ: “Ĩno nĩ nyũmba ya Yahweh Kĩhoti ũrĩa wa ma, na gĩkĩ nĩ kĩgongona gĩa kũrutagĩra magongona ma njino kĩa andũ a Isiraeli.”

Daudi agĩcoka agĩathana akiuga atĩ andũ a kũngĩ arĩa maarĩ bũrũri-inĩ wa Isiraeli macokanĩrĩrio, na akĩmatua andũ a gwacũhia mahiga nĩguo marutage wĩra wa gwacũhia na gũconga mahiga ma gwaka nyũmba ya Kĩhoti ũrĩa wa ma

Ningĩ Daudi akĩhaarĩria kĩgera kĩingĩ mũno gĩa gũthondeka mĩcumarĩ ya mĩrango ya ihingo na indo cia kũnyitithania, na gĩcango kĩingĩ mũno gĩtangĩthimĩka,

o hamwe na mbaũ cia mũtarakwa itangĩtarĩka, nĩ gũkorũo Asidoni na Aturo nĩ maareheire Daudi mbaũ nyingĩ mũno cia mũtarakwa

Na Daudi akiuga atĩrĩ: “Mũrũ wakwa Suleimani nĩ mũnini na ndarĩ na ũmenyeru, na nyũmba ĩrĩa ĩgwakĩrũo Yahweh ĩgũkorũo na riri mũnene mũno, ũũ atĩ ngumo yayo na ũthaka wayo ikaamenyeka mabũrũri-inĩ mothe. Nĩ ũndũ ũcio nĩ ngũhaarĩria maũndũ megiĩ mwako nĩ ũndũ wake.” Kwoguo Daudi akĩhaarĩria indo nyingĩ mũno cia mwako atanakua.

Makĩria ma ũguo, agĩta mũrũwe Suleimani na akĩmwĩra aake nyũmba ya Yahweh Kĩhoti wa Isiraeli

Daudi akĩĩra mũrũwe Suleimani atĩrĩ: “Niĩ-rĩ, ngoro yakwa nĩ yerirĩirie gwaka nyũmba nĩ ũndũ wa rĩĩtwa rĩa Yahweh Kĩhoti wakwa

Ĩndĩ kiugo kĩa Yahweh gĩkĩnginyĩra, akĩnjĩra atĩrĩ, ‘Nĩ ũitĩte thakame nyingĩ mũno, na nĩ ũrũĩte mbaara nyingĩ mũno. Ndũgwaka nyũmba nĩ ũndũ wa rĩĩtwa rĩakwa, nĩ gũkorũo nĩ ũitĩte thakame nyingĩ mũno thĩinĩ wa thĩ mbere yakwa

Atĩrĩrĩ, nĩ ũkaagĩa mwana wa kahĩĩ na agaakorũo arĩ mũndũ wa thayũ, na nĩ ngaamũhe ũhurũko kuuma harĩ thũ ciake ciothe iria igaakorũo imũthiũrũrũkĩirie, nĩ gũkorũo ageetwo Suleimani na nĩ ngaahe Isiraeli thayũ na ũhooreru matukũ-inĩ make

Ũcio nĩwe ũgaaka nyũmba nĩ ũndũ wa rĩĩtwa rĩakwa. Agaatuĩka mũrũ wakwa na niĩ nduĩke ithe. Na nĩ ngaahanda gĩtĩ kĩa ũnene kĩa ũthamaki wake kĩrũme tene na tene thĩinĩ wa Isiraeli.’

“Rĩu mũrũ wakwa-rĩ, Yahweh arokorũo hamwe nawe, na ũrogaacĩra na wake nyũmba ya Yahweh Kĩhoti waku, o ta ũrĩa arĩtie ũhoro ũkwĩgiĩ

Yahweh arokũhe ũũgĩ na ũtaũku hĩndĩ ĩrĩa agaakũhe wathani igũrũ rĩa Isiraeli, nĩgetha ũrũmagie watho wa Yahweh Kĩhoti waku

Na nĩ ũkaagaacĩra angĩkorũo nĩ ũrĩrũmagia na kinyi mawatho na matuĩro marĩa Yahweh aathire Musa ahe Isiraeli. Gĩa na ũmĩrĩru na ũgĩe na hinya. Ndũgetigĩre kana ũmake

Nĩ ndĩtungumanĩtie mũno nĩ ũndũ wa nyũmba ya Yahweh, ngahaarĩria taranda 100,000 cia thahabu na taranda 1,000,000 cia betha o hamwe na gĩcango na kĩgera kĩingĩ mũno ũndũ itangĩthimĩka, na nĩ haarĩirie mbaũ na mahiga, ĩndĩ nĩ ũkuongerera ingĩ harĩ icio

Ũrĩ na andũ aingĩ mũno a wĩra—andũ a gwacũhia mahiga, mabundi a mahiga, mabundi a mbaũ, na andũ arĩa marĩ na ũũgĩ wa mĩthemba yothe wa kũruta wĩra

Thahabu, betha, gĩcango, na kĩgera itingĩthimĩka. Arahũka wambĩrĩrie wĩra ũcio, na Yahweh arokorũo hamwe nawe.”

Daudi agĩcoka agĩatha anene othe a Isiraeli mateithie mũrũwe Suleimani akĩmeera ũũ:

“Na githĩ Yahweh Kĩhoti wanyu ndarĩ hamwe na inyuĩ, ningĩ githĩ ndamũheete ũhurũko mĩena yothe? Nĩ gũkorũo nĩ aaneanire aikari a bũrũri moko-inĩ makwa, na bũrũri ũyũ nĩ ũtooretio mbere ya Yahweh na mbere ya andũ ake

Rĩu tuai itua na ngoro yanyu yothe na muoyo wanyu wothe rĩa gũcaria Yahweh Kĩhoti wanyu, na mwambĩrĩrie gwaka handũ harĩa hamũre ha Yahweh Kĩhoti ũrĩa wa ma, nĩgetha ithandũkũ rĩa kĩrĩkanĩro kĩa Yahweh rĩrehwo o hamwe na indo iria nyamũre cia Kĩhoti ũrĩa wa ma nyũmba-inĩ ĩrĩa yakĩtwo nĩ ũndũ wa rĩĩtwa rĩa Yahweh.”